Te papai mai nei te feia taio

Faahapehia Hoê ahuru ma pae matahiti to ˈu, e ua tahe to ˈu roimata i to ˈu taioraa i te tumu parau ra “Te uiui nei te mau taurearea . . . No te aha e na ˈu noa te hape?” (8 no Tiurai 1997) O vau te tamarii hopea o te utuafare e o te tamaˈihia i te mau taime atoa. Mauruuru no to outou papairaa i teie tumu parau.

N. H., Hau Amui no Marite

Peho no Rift Ua oaoa taa ê au i te taioraa e rave rahi taime, i te tumu parau ra “Te Peho rahi no Rift.” (8 no Tiurai 1997) E au mai te hoê tere. E rave na ta ˈu tane i te ohipa i Afirika, e ua nehenehe au e reva i te pae apatoa no Tanzania. Ua piri roa to ˈu mata i nia i te haamaramarama o to mâua pereoo Land Rover. E mea oraora roa te mau mea atoa i Afirika e ua rau te peni; ua mau roa te reira i roto i to ˈu feruriraa.

B. S., Kanada

Mau tamarii ruperupe maitai Te hinaaro nei au e haamauruuru ia outou no te mau tumu parau faahiahia roa ra “A tauturu i ta outou mau tamarii ia ruperupe maitai.” (8 no Atete 1997) E mau tumu parau faufaa roa teie e te faaitoito. E tamaroa ta ˈu e toru matahiti to ˈna, e ua tauturu mai teie tumu parau ia ˈu ia taa i to ˈna manaˈo e ia haamaitai i ta ˈu huru aˈo ia ˈna. Te haamauruuru hohonu nei au ia Iehova no teie mau tumu parau.

P. S., Italia

Ua putapû roa vau i te tumu parau ra “E paruparu roa te aau i te parau haamauiui.” I te roaraa o to ˈu oraraa taatoa, e mau manaˈo faahapa noa to ˈu ia ˈu iho. Ua oaoa vau i te iteraa e maoti i te haava ino roa i te feia atoa i faaruru i te mau mauiui rahi, te tutava nei outou ma te here i te tauturu ia ratou. Ia tamau o Iehova i te haamaitai ia outou e i te aratai i te papairaa o te mau tumu parau faufaa roa e te tamǎrû.

L. D., Kanada

Mea maitai e e na roto i te mau tumu parau, e ite vetahi ê i te tumu o te mauiui rahi i roto ia matou o ta matou e rave rahi i faaruru. Mauruuru no te hohoraraa mai i teie tumu parau.

L. B., Hau Amui no Marite

Te tauturu maira te mau tumu parau mai teie te huru, ia ˈu ia rave maitai aˈe i ta ˈu ohipa ei orometua haapii i roto i te hoê fare haapiiraa tamahou. Mauruuru roa no te haamaramarama-noa-raa mai ia matou e no te tautururaa mai ia maitai mai matou.

G. R., Mexiko

Ua horoa mai te mau tumu parau i te tahi tiaturiraa. No roto mai au i te hoê utuafare peapea e e pinepine, mea fifi no ˈu ia manaˈo e e tano ia ˈu ia tavini ia Iehova e ia haapao i ta ˈu tamahine iti. E tutava vau i te faaohipa i te mau manaˈo tauturu i roto i te tumu parau. Mauruuru no te haapaoraa mai.

A. A., Hau Amui no Marite

Taata tuatapapa faaroo no Rusia Mauruuru roa no te neneiraa i te tumu parau ra “Te mau Ite no Iehova i Rusia.” (8 no Atete 1997) Te faatura e te haapopou rahi nei au ia Sergei Ivanenko, no to ˈna itoito e no to ˈna hinaaro e nenei i te parau mau no nia i te mau Ite no Iehova.

S. M., Hau Amui no Marite

Feii O to te mau tumu parau ra “No te aha i rahi roa ˈi te feii? No te aha i iti roa ˈi te here?” (8 no Setepa 1997) te hoê o te mau api matamua maitai roa ˈˈe ta outou i nenei aˈenei. Ua tauturu mai te mau tumu parau ia ˈu ia maramarama ˈtu â e no te aha te taata e manaˈo ino ai i te feia ěê e te mau taata no te tahi atu mau hiroa tumu.

J. M., Hau Amui no Marite