Te ahuaraˈi e fatata maira

TE HAAVIIVIIRAA o te reva, o te hoê noa ïa fifi teie o te natura i faatupuhia e te taata. O te haamou-hua-raa i te ururaau, te haamouraa i te tahi mau huru animala, e te viiviiraa te anavai, te roto, e te tai te tahi atu. Ua hiˈopoa-maite-hia teie mau fifi taitahi, e ua horoahia te mau manaˈo no te faatitiaifaro i te reira. I te mea râ e mau fifi rarahi teie, e titauhia ïa te mau ravea rarahi. Te vai ra te manaˈo tu i parare no nia i te mau fifi e te mea te tia ia ravehia no te faaafaro i te reira. I tera e tera matahiti, e faaroohia te mau piiraa no te haaraa. I tera e tera matahiti, mea iti roa tei ravehia. Mea pinepine roa e autâ te feia haapao a te hau no nia i te mau fifi e te farii ra ratou e e tia ia ravehia te tahi mea, tera râ e na ô â ratou e, te mea mau “eiaha na tatou e rave, eiaha i teie nei â.”

I te matahiti 1970 i te Mahana tumu o te Fenua, ua hopoi te feia taahi no New York City i te hoê faaiteraa aano. Te faahohoˈa ra teie faaiteraa i te palaneta Fenua o te tuô ra e “A tauturu mai!!” Te vai ra anei te taata no te pahono i teie taparuraa? Te pahono maira te Parau a te Atua e: “Eiaha e tiaturi i te hui arii, e te taata atoa, aita hoi o ˈna e ora. Te reva nei hoi to ˈna varua, te hoˈi nei oia i to ˈna ra repo; mou roa ˈtura ta ˈna i opua i taua mahana ra.” (Salamo 146:3, 4) I muri iho te huti ra te taata papai salamo i te ara-maite-raa i nia i te Poiete, no te mea tei Ia ˈna anaˈe te mana, te paari, te hinaaro no te faatitiaifaro taatoa i te mau fifi rau e faaruruhia ra e huitaata. Te taio nei tatou e: “E ao to ˈna . . . tei to ˈna Atua, tei ia Iehova to ˈna tiaturiraa! O tei hamani i te mau raˈi e te fenua, te tai, e te mau mea atoa i roto ra.”—Salamo 146:5, 6.

Te fafau here a te Atua

E ô te fenua no ǒ mai i te Atua ra. Na ˈna i opua e i poiete i te reira, e te mau tereraa ohipa rau e te faahiahia a riro ai te ahuaraˈi o te fenua ei mea au. (Salamo 115:15, 16) Te na ô ra te Bibilia e: “Na [te Atua] i hamani i te fenua i to ˈna ra mana, e na ˈna i haamau i te ao atoa nei i to ˈna ra paari, e na ˈna i hohora i te mau raˈi i to ˈna ra ite. Ua parau anaˈe to ˈna reo, ua rahi te pape i nia i te raˈi; no ˈna i pee ai te ata mai te hopea mai o te fenua ra; e na ˈna i faatupu i te uira e te ûa, e ua hopoi mai oia i te mataˈi no roto i to ˈna pueraa.”—Ieremia 10:12, 13.

Ua faataa te aposetolo Paulo i te here o te Poiete no te huitaata nei i te feia no Lusetera i tahito ra. Ua parau oia e: “Aita râ [o te Atua] i ere i te faaite ia ˈna iho, oia i hamani maitai mai, e te horoaraa mai i te ûa no nia i te raˈi ra, e te anotau auhune, e te faaîraa mai i to tatou aau i te maa e te oaoa.”—Ohipa 14:17.

Aita i taaihia te palaneta a muri aˈe i te mau tutavaraa e te mau parau faaau a te taata. No nia i te ahuaraˈi, ua fafau tei Ia ˈna ra te mana no te faatere i te reira, i to ˈna nunaa i tahito ra e: “E horoa ˈtu vau i te ûa i te tau mau ra, e e maahia to te fenua, e e faahotu mai te mau raau o te fenua ra i te huero.” (Levitiko 26:4) Fatata te taata i te fanaˈo i teie huru tupuraa na te fenua nei. Eita roa ˈtu te feia auraro e mǎtaˈu faahou i te mau vero vavahi, te mau are miti teitei, te mau vai pue, te paˈurâ, aore ra te tahi noa ˈtu ati o te natura.

E riro te mau are, te mataˈi, e te huru o te reva ei mea au roa. E tauaparau â te taata no nia i te huru o te reva, eita râ ratou e rave i te hoê noa ˈˈe mea no nia i te reira. I te oraraa a muri aˈe o ta te Atua e faatupu, mea faahiahia roa ïa te oraraa e aita e faufaa ia rave i te hoê noa ˈˈe mea no te haamaitai i te huru o te reva.