Ia au i te Bibilia

Eaha te auraa taa ê o te matahiti 2000?

AITA roa ˈtu te rahiraa o te taata e horoa ra i te hoê auraa taa ê i te pae faaroo no nia i te huru o te matahiti 2000 i roto i te mau fenua no te pae Tooa o te râ ma e te tahi atoa mau fenua e rave rahi. Ei hiˈoraa, te vai ra ta te mau ati Iuda, ta te mau Mahometa e ta te feia faaroo Hindu iho kalena i te pae faaroo o te ore e tuea ra i ta to te pae Tooa o te râ. No te mau taio mahana i te pae faaroo e te pae tutuu, e pee to Taina i te hoê kalena avaˈe. No reira, tau miria te mau taata i teie mahana, peneiaˈe te rahiraa o te huiraatira o te ao nei, o te ore e horoa nei i te auraa taa ê no te matahiti 2000.a

Teie râ, i roto iho â râ i te mau fenua no te pae Tooa o te râ, te tiai nei te taata e rave rahi ma te hinaaro e ite, i te uputa e fatata mai nei o te mileniuma i mua nei mai tei tapaohia e te kalena a Grégoire. No vetahi, e ere noa te hinaaroraa e ite. Te hiˈo ra ratou i te matahiti 2000 ei faaôraa ˈtu i roto i te hoê tau apî, ei tipuuraa i roto i te aamu. E rave rahi mau taata te parau nei e e tiaturi ratou i te Bibilia, teie e taai nei i te tupuraa o te mau parau tohu i te matahiti 2000. Te tiai nei vetahi i te hoê faaiteraa rahi mau i te pae varua. Te mǎtaˈu nei te tahi atu â i te hoê ati rahi—te hopea o teie nei ao. Te horoa mai ra anei te Bibilia i te hoê noa ˈˈe niu no teie mau tiairaa?

O Iehova, te Taata haapao taime

Te faataahia ra te Atua o te Bibilia mai “To te mau mahana tahito ra.” (Daniela 7:9) E tiai oia i te taime ma te tia roa, mai tei ite-maite-hia ra i roto i te tereraa o te mau mea e rave rahi ta ˈna i poiete, mai te ohuraa o te mau palaneta e tae noa ˈtu i te hautiutiraa o te mau taoˈa rii nainai roa. E tabula ohipa iho â ta ˈna, o ta ˈna ïa e pee ra ma te tia roa. “Ua haapao [oia] i te tau i haapaohia i mutaa ihora, e te otia o to ratou ra parahiraa,” ta te Bibilia ïa e parau ra. (Ohipa 17:26) E Taata haapao taime au mau o Iehova.

No reira te Bibilia e haapao taa ê ai i te tuatapaparaa i te tau. E horoa mai oia i te hoê tuatapaparaa mutumutu ore o te faatia i te hoê numeraraa i te tau e tae roa ˈtu i te omuaraa o te aamu o te taata. E faaite mai te hoê numeraraa mai teie i te matahiti 4026 H.T.T. ei matahiti i reira to te Atua poieteraa ia Adamu. Fatata e 2 000 matahiti i muri aˈe, fanau maira Aberahama. E 2 000 matahiti faahou â i mairi e tae mai ai i te tau o te fanauraa o Iesu.

Ua haamau haere noa vetahi e haapii ra i te tuatapaparaa i te tau o te Bibilia, i te mau numeraraa o te faaite i te tahi mau taio mahana taa ê no a muri aˈe. Ei hiˈoraa, ma te faaohipa i te anotau mutumutu ore fatata e 2 000 matahiti i rotopu ia Adamu, ia Aberahama e ia Iesu, ei niu, ua tohu vetahi i te hoê tupuraa riaria mau no te hopea o te anotau e 2 000 matahiti mai te fanauraa mai o Iesu. Hoê noa hiˈoraa teie o te mau numeraraa i te tau i parau-noa-hia e mea niuhia i nia i te tuatapaparaa i te tau o te Bibilia.

Parau mau, te faahiti nei te Bibilia no nia i te tau i reira te Atua ra o Iehova e faaô mai ai i roto i te mau ohipa a te taata na roto i te faaoreraa i te ino e te faatupuraa i te hoê ao apî. Te faahiti nei te parau tohu a te Bibilia i “te tau o te hopea,” “te hopea o te faanahoraa o te mau mea,” “taua anotau hopea nei,” e “te mahana o Iehova.” (Daniela 8:17, MN; Mataio 24:3, MN; Timoteo 2, 3:1; Petero 2, 3:12, MN) Teie râ, aita roa ˈtu te “hopea” i tohuhia i roto i te Bibilia i taaihia i te matahiti 2000. Aita roa ˈtu hoê aˈe parau i roto i te mau Papai e horoa ra i te auraa taa ê no te hopea o te pitiraa o te mileniuma mai tei numerahia e te kalena a Grégoire.

“Afea teie mau mea e tupu ai?”

Ua faaite te mau aposetolo a Iesu i te anaanatae rahi no te tabula ohipa a te Atua i to ratou uiraa ia Iesu e: “A faaite mai na, afea teie mau mea e tupu ai, e eaha te tapao o to oe vairaa mai e te hopea o te faanahoraa o te mau mea?” (Mataio 24:3, MN) E rave rahi i teie mahana e faaite nei i te hoê â hinaaroraa ia ite no nia i te tau i mua nei. Mea tano mau ia anaanatae rahi i te mau parau tohu taa ê a te Bibilia e te taime e tupu ai. Teie râ, e haerea paari te fariiraa e te faaturaraa i to te Atua tiaraa no nia i teie tumu parau.

Na roto i te arai o ta ˈna Tamaiti, ua faaite mai Iehova i to ˈna manaˈo e ua horoa tahaa mai i te hoê pahonoraa i teie tumu parau. Maa taime rii na mua ˈˈe Iesu a maue ai i nia i te raˈi, ua ani faahou ta ˈna mau pǐpǐ ia ˈna no nia i te taime e tupu roa ˈi te mau parau tǎpǔ a te Atua. Ua pahono atu Iesu e: “Aore ïa i haapaohia e ia ite outou i te taime e te anotau, i vaiihohia e te Metua ia ˈna ihora.” (Ohipa 1:7) Na mua ˈtu â, ua faaite Iesu i ta ˈna mau pǐpǐ e: “Area te reira mahana e te reira hora, e ore roa te hoê e ite, e ore hoi te mau melahi o te raˈi; [“e ore atoa hoi te Tamaiti,” MN] maori râ o tau Metua anaˈe ra.”—Mataio 24:36.

Papu maitai, aita te “ite . . . i te taime e te anotau,” no nia iho â râ i te tupuraa o te mau parau tohu a te Bibilia, i tuuhia i raro aˈe i te faatereraa a te taata. Ua faaoti te Atua eiaha e faaite ia tatou i te parau mai teie. (Mataio 24:22-44) E nehenehe anei tatou e faahuru ê i te opuaraa a te Atua na roto i te tamataraa i te numera i “te reira mahana e te reira hora” ma to tatou iho manaˈo, e ma te patoi i to ˈna hinaaro? Papu maitai, eita roa ˈtu. (Numera 23:19; Roma 11:33, 34) Te parau nei te Bibilia e: “Tei faaauhia e Iehova ra, e tia ïa i te vai-maite-raa.” (Salamo 33:11) I te mea e oia te Atua Mana hope, e manuïa noa oia.—Isaia 55:8-11.

Noa ˈtu te mana o te Atua no te haapao i te “ite . . . i te taime e te anotau . . . ia ˈna ihora,” te hinaaro noa nei â te rahiraa e manaˈo atea. Ua faariro vetahi ia ratou iho ei peropheta no te pohe. No reira te aposetolo Paulo i aˈo taa ê ai i to Tesalonia no nia i te atâtaraa i te faarooraa i te feia e faataa atea i te mau taio mahana. Ua papai oia e: “Te hinaaro nei râ matou . . . ia ore to outou aau ia aueue vave, ia ore ia hitimaue, i te hoê varua ˈtu, e te parau, e te leta, mai te mea e no ǒ nei atu ia matou nei, e mai te mea hoi e ua fatata roa te mahana o [“Iehova,” MN] ra. Eiaha roa outou e vare i te taata atoa.”—Tesalonia 2, 2:1-3.

Te tiaturi papu nei te mau Ite no Iehova e e tupu iho â te mau opuaraa a te Atua no a muri aˈe, i te taime mau i faataahia e ana, i te mahana e te hora mau i haapaohia e ana. (Habakuka 2:3; Petero 2, 3:9, 10) E te tiaturi nei matou e eita e maoro roa e tupu teie mau ohipa. (Timoteo 2, 3:1-5) Teie râ, eita matou e faataa atea aore ra e paturu i te mau manaˈo niu ore e parare roa nei i teie mahana.b Papu maitai, aita roa ˈtu to te matahiti 2000, aore ra 2001, aore ra te tahi atu â matahiti haamataraa i haamauhia e te taata, e auraa e te tabula ohipa a Iehova.

[Nota i raro i te api]