Te uiui nei te mau taurearea . . .

E nafea vau ia patoi to ˈu mau metua i to ˈu faaipoiporaa?

Te manaˈo ra o Lakesha e to ˈna hoa tamaroa e faaipoipo, aita râ to ˈna metua vahine e farii ra. “E naeahia to ˈu 19 matahiti i teie matahiti,” o ta Lakesha ïa e parau ra, “ua onoono noa râ to ˈu mama e ia tiai â mâua ia naeahia to ˈu e 21 matahiti.”

MAI te peu e te opua ra outou i te faaipoipo, e hinaaro iho â outou e ia oaoa to outou mau metua no outou. E nehenehe mau â outou e mauiui, ia ore anaˈe to outou mau metua e farii i te hoa ta outou i maiti i te faaipoipo. Eaha te tia ia outou ia rave? E tia anei ia outou ia ore e tâuˈa i to raua mau hinaaro, e ia tapea i ta outou opuaraa e faaipoipo?a

E hinaaro paha outou e na reira mai te peu e e taata paari outou e i mua i te ture, e nehenehe ta outou e faaipoipo ma te ore e ani i te parau faatia a te mau metua. Noa ˈtu râ, aita te Bibilia e faataa ra i te hoê faito matahiti e faaea ˈi tatou i te faahanahana e i te faatura i to tatou mau metua. (Maseli 1:8) E ia ore outou e tâuˈa i to raua mau manaˈo, e nehenehe outou e faaino e a muri noa ˈtu i to outou taairaa e o raua. Hau atu, peneiaˈe te vai ra te mau tumu papu e patoi ai to outou mau metua i to outou faaipoiporaa.

Mea apî roa, eaha ïa te faito matahiti?

Ei hiˈoraa, te parau ra anei to outou mau metua ia outou e mea apî roa outou no te faaipoipo? Parau mau, aita te Bibilia e faataa ra i te faito matahiti i titauhia no te faaipoipo. Tera râ, te faaitoito ra oia e hou te hoê taata e faaipoipo ai, e tia ia ˈna ia “mairi i te uaaraa o te apîraa”—oia te mau matahiti i muri iho oia e haamata ˈi i te riro ei taurearea, i reira e mea puai roa te mau hiaai i te pae taatiraa. (Korinetia 1, 7:36, MN) No te aha? No te mea te haamata noa ra teie feia apî i te faatupu i te feruriraa paari i te pae no te here, te hitahita ore, e te mau huru pae varua e titauhia no te ora i te oraraa faaipoipo.—A faaau e te Korinetia 1, 13:11; Galatia 5:22, 23.

I to Dale, 20 matahiti, opuaraa i te faaipoipo, ua peapea roa oia i te patoiraa a to ˈna mau metua. “Ua parau raua e mea apî roa vau e e ere au i te mea aravihi,” o ta ˈna ïa e parau ra. “Ua manaˈo vau e ua ineine mâua e e nehenehe mâua e haapii i muri aˈe mâua e faaipoipo ai, tera râ, ua hinaaro to ˈu mau metua e ite papu e aita vau i faaoti noa no te horuhoru o te aau. Ua ani mai raua e rave rahi mau uiraa. Ua ineine anei au i te rave i te mau faaotiraa i te mau mahana atoa, i te haapao i te moni, i te horoa i te mau mea e hinaarohia e te hoê utuafare i te pae materia, i te pae no te here, e i te pae varua? Ua ineine anei au i te riro ei metua? Ua haapii mau anei au e nafea ia aparau e te hoê hoa? Ua taa mau anei ia ˈu i te mau hinaaro o te hoê hoa faaipoipo? Ua manaˈo raua e e tia ia ˈu ia ite maitai aˈe ia ˈu iho ei taata paari hou vau e haamata ˈi i te haapao i te tahi atu taata paari.

“Noa ˈtu e aita mâua i hinaaro e tiai, ua faanuu atu mâua i to mâua faaipoiporaa ia nehenehe mâua e riro mai ei feia feruriraa paari. I to mâua faaipoiporaa i te pae hopea, ua haamata mâua i to mâua taairaa ma te hoê niu maitai aˈe e hau atu â no te horoa na te tahi e te tahi.”

Te tapitapiraa no nia i te mau taa-ê-raa i te pae faaroo

I to Terri faahinaaroraa i te hoê tane tei ore i tufa i te faaroo ta ˈna i maiti, ua haamatau omoe atura oia ia ˈna. I muri aˈe i to ˈna faaiteraa i ta raua opuaraa e faaipoipo, ua peapea roa o Terri i te iteraa e te patoi ra to ˈna metua vahine i te faaipoiporaa. “Aita vau e hinaaro ra ia manaˈo to ˈu metua vahine mai tera te huru i nia ia ˈu,” o ta Terri ïa i parau ma te autâ. “Te hinaaro nei au e ia vai noa to mâua taairaa metua vahine e tamahine.”

Teie râ, o vai mau na te haafifi ra i taua taairaa ra? Ua faaite anei te metua vahine o Terri i te hoê huru ino aore ra tano ore? Aita, te turu noa ra oia i te aˈoraa a te Bibilia i te mau Kerisetiano ia faaipoipo “[“noa i roto,” MN] i te Fatu.” (Korinetia 1, 7:39) Inaha, te faaue ra te Bibilia e: “Eiaha outou ia amui-au-ore-hia i te feia faaroo ore ra.” (Korinetia 2, 6:14, 15) No te aha hoi?

No te mea e tuhaa faufaa roa te au-maite-raa i te pae faaroo, i roto i te hoê faaipoiporaa oaoa e te manuïa. Te parau ra te feia aravihi e pinepine te mau hepohepo e te mau faateimaharaa matauhia i rotopu i te feia faaipoipo e ere hoê â faaroo ta raua, i te aratai i te faataaraa. Te tahi atu râ tumu faufaa ˈtu â, oia hoi e nehenehe te hoê hoa e faahepohia ia ofati i ta ˈna mau tiaturiraa faaroo—aore ra ia faarue roa. Noa ˈtu e eita te hoê hoa faaipoipo faaroo ore e haafifi i ta outou haamoriraa, e tia noa ia outou ia ora ma te oto i te mea e eita ta outou e nehenehe e tufa e o ˈna i ta outou mau tiaturiraa hohonu roa ˈˈe. Tera anei te ravea e oaoa ˈi te faaipoiporaa?

E faaotiraa fifi râ ta Terri e rave. “Te here nei au i te Atua ra o Iehova,” o ta Terri ïa i parau, “aita râ vau e hinaaro ra ia erehia vau i to ˈu hoa.” Eita e noaa mai ia outou teie na mea e piti. Eita ta outou e nehenehe e ofati i te mau ture a te Atua e e fanaˈo noa ˈi i to ˈna farii maitai e ta ˈna haamaitairaa.

Peneiaˈe râ, te patoi nei to outou mau metua ia faaipoipo outou i te hoê hoa kerisetiano. E nehenehe anei e amui-au-ore-hia i te hoê taata faaroo? Oia, mai te peu e aita taua taata ra e tufa ra i ta outou mau tapao pae varua aore ra ta outou haamoriraa i te Atua anaˈe. Mai te peu e te reira iho â aore ra e ere i te “roo maitai” to taua taata ra, i mua i te mau taeae i roto i ta ˈna amuiraa, ua tano paha to outou mau metua i te tapitapi no to outou faaipoiporaa i taua taata ra.—Ohipa 16:2.

E te mau taa-ê-raa ïa i te pae nunaa aore ra o te hiroa tumu?

Ua patoi te mau metua o Lynn no te hoê tumu taa ê: Ua hinaaro oia e faaipoipo i te hoê taata no te hoê nunaa ê. Eaha ta te Bibilia e haapii maira no nia i teie tuhaa? Te faaite maira oia “e ore te Atua e haapao i te huru o te taata” e ‘na ˈna i hamani i te taata o te mau [“nunaa,” MN] atoa nei i te taata hoê ra.’ (Ohipa 10:34, 35; 17:26) No ǒ mai te mau taata i te hoê â tumu, e hoê â faufaa to ratou i mua i te aro o te Atua.

Noa ˈtu râ, te faaruru nei te mau hoa faaipoipo atoa i te ‘ati i te tino nei,’ e nehenehe ïa te mau hoa faaipoipo nunaa ê e faaruru i te tahi atu â mau fifi. (Korinetia 1, 7:28) No te aha? No te mea e rave rahi taata i roto i teie nei ao tei î i te feii, aita e farii ra i te manaˈo o te Atua no nia i te nunaa. Te maraa pinepine nei te mau faaipoiporaa nunaa ê i roto i te tahi mau fenua Tooa o te râ, area i te tahi mau vahi ra, te hiˈo-ino-rahi-hia nei te mau hoa faaipoipo anoi. Te mǎtaˈu nei paha to outou mau metua e aita outou i ineine maitai no te faaruru i taua mau huru faateimaharaa ra.

“Ua manaˈo to ˈu mau metua e mea fifi roa no mâua,” o ta Lynn ïa e faˈi ra. Ma te paari, ua faatura o Lynn i to raua mau manaˈo e aita ˈtura oia i ru i te faaipoipo. A hiˈopoa ˈi to ˈna mau metua i te feruriraa paari o Lynn, e i to raua matau-maitai-aˈe-raa i te tane o ta ˈna i here, ua haamata mǎrû noa ˈtura raua i te tiaturi ma te au maite e e nehenehe ta ˈna e faaruru i te mau faateimaharaa o teie faaipoiporaa. Te na ô ra o Lynn e: “I te taime raua i manaˈo ai e e nehenehe mau â mâua e oaoa, ua oaoa atoa ˈtura raua no mâua.”

I te tahi mau taime râ, e ere te nunaa te fifi, o te hiroa tumu râ. E tapitapi paha to outou mau metua e, i te pae hopea, e ite outou e mea fifi ia ora i pihai iho i te hoê taata e mea taa ê roa to ˈna huru oraraa, ta ˈna mau tiaturiraa, e ta ˈna maa, upaupa, e faaanaanataeraa e au, i ta outou. Noa ˈtu râ, na roto i te faaipoiporaa i te hoê taata nunaa ê aore ra e hiroa tumu ê to ˈna, e nehenehe te mau fifi rahi e tupu mai. Ua ineine anei outou i te faaruru i te reira?

E au ra e aita i tano te patoiraa a te hoê metua

E nafea râ mai te peu e te manaˈo ra outou e aita roa ˈtu i tano te patoiraa a to outou mau metua? Teie ta te hoê vahine apî, o Faith te iˈoa, e parau ra no nia i to ˈna metua vahine: “E rave rahi taime to Mama faataaraa. Te parau ra oia e eita roa ˈtu ta outou e nehenehe e ite mau i te taata o ta outou e faaipoipo hou a itehia ˈi e ua maoro roa. Te tiaturi roa ra oia e eita vau e oaoa i roto i te faaipoiporaa.” E pinepine, eita ta te mau metua, aita hoi to ratou iho faaipoiporaa i manuïa, e nehenehe e hiˈo i te faaipoiporaa o ta ratou tamarii ma te manaˈo aifaito. I roto i te tahi mau hiˈoraa, e mau tumu papu ore tei turai i te mau metua ia patoi i te faaipoiporaa o ta raua tamarii, mai te hinaaro e faatere noa i to ˈna oraraa.

Mai te peu e eita to outou mau metua e hinaaro e faaroo i te haamaramaramaraa, eaha ïa ta outou e nehenehe e rave? I rotopu i te mau Ite no Iehova, e nehenehe e ani i te mau matahiapo o te amuiraa ia tauturu mai no te faatitiaifaro i te mau fifi o te utuafare. Ma te pae tahi ore, e nehenehe ratou e tauturu i te mau melo o te utuafare ia tauaparau i nia i te mau fifi ma te mǎrû, te hau, e te maitai.—Iakobo 3:18.

A imi i te hau

Parau mau, e rave rahi atu â mau tumu o te nehenehe e turai i to outou metua ia patoi i to outou faaipoiporaa, mai te mau tapitapiraa i te pae moni aore ra te huru o te hoa e faaipoipohia. E i roto i te tau o te maˈi SIDA e te tahi atu mau maˈi purumu, ua tano to outou mau metua i te tapitapi no to outou oraora-maitai-raa mai te peu e ua taiata na te taata ta outou i momoˈa hou oia a riro mai ai ei Kerisetiano.b

A ora noa ˈi outou i ǒ to outou mau metua ra, ua titauhia outou ia farii i to raua mana i nia ia outou. (Kolosa 3:20) Teie râ, noa ˈtu e o outou anaˈe to outou faaearaa e e taata paari outou no te rave i ta outou iho mau faaotiraa, eiaha e haapae oioi i te mau tapitapiraa a to outou mau metua. A faaroo atu. (Maseli 23:22) A faito i te mau faahopearaa e tupu mai ia faaipoipo outou.—A faaau e te Luka 14:28.

I muri aˈe i te reira, e faaoti paha outou e te hinaaro noa ra outou e faaipoipo. Parau mau, na outou iho ïa e amo i te hopoia taatoa no teie huru faaotiraa. (Galatia 6:5) Mai te peu e ua rave outou i te mau tutavaraa atoa no te hiˈopoa i te manaˈo o to outou mau metua, e turaihia paha raua ia turu i ta outou faaotiraa, noa ˈtu e aita raua i hinaaro roa. Teie râ, mai te peu e e tamau raua i te patoi noa mai, a tutava e eiaha e inoino aore ra e riri. A haamanaˈo: Te here nei to outou mau metua ia outou, e te tapitapi nei no to outou oaoa a muri aˈe. A tutava noa i te faaea hau e o raua. Ia manuïa to outou faaipoiporaa, peneiaˈe e taui to raua huru.

I te tahi aˈe pae, mai te peu e e hiˈopoa mau outou i te mau parau atoa a to outou mau metua, e e hiˈopoa maitai ia outou iho e i te taata o ta outou e hinaaro rahi ra e faaipoipo, eiaha e maere ia huti mai outou i te faaotiraa e ua tano iho â paha to outou mau metua.

[Nota i raro i te api]

[Hohoˈa i te api 21]

E manaˈo paha to outou mau metua e mea apî roa outou no te faaipoipo