Te papai mai nei te feia taio

Parau haamauiui Ua putapû roa vau i te mau tumu parau ra “Ia riro te parau haamauiui ei parau tamǎrû.” (8 no Atopa 1996) Ua faataa maitai te reira i to ˈu huru oraraa e ta ˈu tane. Ua farii ohie au i te mau pereota atoa. Mea here roa outou i te mau vahine, e te haapapu ra te reira ia ˈu e te faaohipahia ra teie faanahonahoraa e Iehova.

P. S., Helemani

Ua faaitoito te mau tumu parau ia ˈu ia tamau noa i te aro i to ˈu paruparu na roto i te haavîraa i to ˈu arero. I teie nei, ua ite au e eaha to ˈu huru i nia i ta ˈu tane, e tia ˈi. Ua taio vau i te mau tumu parau ma te roimata.

G. I., Auteteria

E faahiti noa mai na ta ˈu tane i te mau parau haavî e rave rahi matahiti te maoro. Ua nehenehe au e ape i te topa i roto i te hepohepo na roto i te faatupuraa i te mau hotu o te varua o te Atua, e na roto i te rohiraa i roto i te ohipa pororaa ma te taime taatoa. Ua faaite mai ta outou mau tumu parau e e ere o vau anaˈe—oia hoi te taa ra i te hoê taata te fifi.

M. N., Italia

Haruhia E mau auri au, e piti matahiti e toe ra e hope ai ta ˈu utua. E piti taime to ˈu taioraa i te tumu parau ra “Ua haruhia matou i roto i te hoê orureraa i te fare auri.” (8 no Novema 1996) I na taime e piti, ua tahe to ˈu roimata i te oaoa e ua horuhoru roa vau. E tiai noa vau ia haere anaˈe mai te mau Ite no Iehova i te fare auri. E mea mahanahana roa to ratou mau tere!

J. K., Hau Amui no Marite

Aratairaa Ua oaoa mau â vau i te tumu parau ra “Ia au i te Bibilia: Ta vai aratairaa ta outou e tiaturi?” (8 no Novema 1996) Ua tamahanahana e ua faaitoito roa mai ia ˈu. Mai e rave rahi atoa, ua inoino roa vau i mutaa iho i to te feia o ta ˈu i tiaturi atu no te aratai ia ˈu, haavareraa ia ˈu. Ua tahe to ˈu roimata no te faahohoˈaraa o te tamarii e tapea ra i te rima o to ˈna metua tane. E mea mahanahana roa ia ite e i roto i te Isaia 41:13, te parau ra o Iehova e na ˈna e ‘tapea i te rima’ o to ˈna mau taata.

M. S., Hau Amui no Marite

Reo aparaa rima Mauruuru roa no te tumu parau ra “Ia nehenehe au e paraparau e ta ˈu tamaiti, ua haapii au i te hoê reo apî.” (8 no Novema 1996) E metua vahine hoê au, e tamaiti tariˈa turi ta ˈu e e 24 matahiti to ˈna i teie nei. No reira, na roto i ta ˈu iho i ite, te taa ra ia ˈu e eaha ta Cindy Adams i faaruru, e te faatura rahi ra vau i te mea o ta ˈna i rave.

H. B., Helemani

Ua haapii au i te Bibilia e te hoê taurearea tamahine tariˈa turi. Ua haapii rahi mâua no nia ia mâua iho, noa ˈtu e aita mâua i ite maitai i te reo aparaa rima. Na roto i to ˈu taioraa i te faaotiraa a Cindy Adams e haapii i taua reo ra no ta ˈna tamaiti, ua faaitoitohia vau ia haamaitai i to ˈu aravihi i roto i teie reo haviti ia nehenehe au e tufa i te parau apî maitai o te Bibilia na te feia tariˈa turi i roto i to ˈu mataeinaa.

S. T., St Martin, Antilles Néerlandaises