Te hamǎmǎraa vaha o te mau animala oviri

Ia hamǎmǎ anaˈe te hoê taata i to ˈna vaha i mua ia vetahi ê, e nehenehe ratou e manaˈo e aita o ˈna i ite i te peu—aore ra ua fiu roa o ˈna. Noa ˈtu râ te mau ture i te pae o te peu maitai, e fa faufaa mau â to te hamǎmǎraa i te vaha. Te hamǎmǎraa i te vaha, o te hutiraa ïa i te aho ma te opua-ore-hia. E hamǎmǎ na tatou i to tatou vaha i te po mai te peu e ua rohirohi tatou no te mau ohipa i ravehia i taua mahana ra, aore ra i te poipoi i muri aˈe i to tatou araraa mai. E faarahi te hamǎmǎ-roa-raa i te vaha i te mataˈi ora i roto ia tatou, e e tamǎrû hoi ia tatou no te tahi taime; e mea pinepine e tuhaa te reira no te faaaraara.

Ua ite anei râ outou e e hamǎmǎ atoa te mau animala i to ratou vaha, noa ˈtu e e ere noa no te hutihuti maitai aˈe i te mataˈi? E pinepine e mea faahiahia te tumu ratou e na reira ˈi. Ei hiˈoraa, e hamǎmǎ te mau urî taata i te tahi mau taime i to ratou vaha no te horoa i te hoê poroi. Ua riro te hamǎmǎ-rahi-raa i te vaha e te faaiteiteraa i te niho ma te taehae ei ravea no te faaite oioi i te hoê faaararaa i te tahi urî taata oni e aa mai aore ra i te hoê enemi. Teie hoi te poroi: ‘E mea riaria ia hohoni anaˈe au. A faaatea ˈtu!’

Ua ite-atoa-hia te mau mimi taehae i te mau vahi papu no Afirika i te faaetaeta-pinepine-raa e i te hamǎmǎraa i to ratou vaha na mua ˈˈe ratou e haere ai e auau. Mai no te taata atoa, ua riro te hamǎmǎraa te mau mimi i to ratou vaha ei mea maitai no te tereraa o to ratou tino—oia hoi te faaî-rahi-raa i to ratou mahaha i te mataˈi. E faarahi te reira i te mataˈi ora i roto i te toto. I muri iho, e pâmu oioi te mafatu i taua mataˈi ra i te tahi atu mau vaehaa o te tino, o te horoa ˈtu i te puai apî ia nehenehe ratou e auau ma te vitiviti roa i roto maa taime poto noa.

Inaha, ua ite-atoa-hia te iˈa i te hamǎmǎraa i to ˈna vaha! Te parau ra te hoê buka (Inside the Animal World) e i te tahi mau taime, e “hamǎmǎ [te iˈa] i to ˈna vaha na mua ˈˈe oia e aˈu oioi ai. . . . E hamǎmǎ atoa paha te hoê iˈa i to ˈna vaha ia huehue oia, aore ra ia ite oia i te tahi enemi, aore ra i te maa, i te mau taime atoa e titauhia ˈi te tahi ohipa oioi.”

Peneiaˈe, te hamǎmǎraa vaha faahiahia roa ˈˈe, o to te puaa pape ïa, aore ra Behemota. E nehenehe teie animala rahi e hamǎmǎ i to ˈna vaha rahi i te hoê faito maere 150 teteri! Na roto i te hamǎmǎraa i to ˈna vaha, e nehenehe te hoê puaa pape oni ruau e faaite i te tahi atu mau puaa pape atoa i roto i te pape e o vai te raatira. E riro atoa ei faaararaa haamǎtaˈu i te mau huru animala e opua noa ˈtu e haere na roto i ta ˈna anavai.

No reira, noa ˈtu e aita e faaauraa e te uuru rahi a te hoê liona, e fa faufaa râ ia hamǎmǎ i te vaha—no te varea taoto, aore ra no te haamǎtaˈu, aore ra no te haapuai noa. O te tahi noa ïa hiˈoraa teie o te aravihi maere e hamani i te mau mea o te Poiete o te ao o te animala!