Te papai mai nei te feia taio

Ekalesia Orthodoxe Na nia i to ˈu tiaraa Kerisetiano Orthodoxe, ua anaanatae au i te taio i ta outou tumu parau ra “Te Ekalesia Orthodoxe no Heleni—E faaroo amahamaha.” (8 no Tenuare 1996) Ia opua faahou anaˈe outou e faaino i te haapaoraa Orthodoxe, eiaha ia moehia ia faahiti atoa i ta ˈna mau ohipa maitatai i rave, mai to ˈna parururaa i te Kerisetianoraa i te tau o te hamani-ino-raa Mahometa e te faatereraa Rusia. Hau atu, e ere te faataa-ê-raa i te Ekalesia e te Hau no roto i te Bibilia. Ua faataa-ê-hia anei te faatereraa a te Arii ra o Davida aore ra ta Solomona i te Ekalesia?

M. F., Hau Amui no Marite

Ua tuatapapa matou i te fifi e farereihia ra e te Ekalesia Orthodoxe—e tumu parau teie i faahiti-rahi-hia na roto i te mau ravea haapurororaa i Heleni. Te tumu o te fifi, o te oreraa ïa te ekalesia i auraro i te faaueraa a Iesu ia faataa ê “i to teie nei ao” e ia tapea i te tiaraa amui ore i te pae politita. (Ioane 17:16)—Feia nenei.

Carnaval Mauruuru no te tumu parau ra “Ia au i te Bibilia: Te carnaval—Mea tano anei aore ra mea tano ore?” (8 no Tiunu 1996) Te faaea nei au i Beresilia, e e taime arearearaa rahi te carnaval i ǒ nei. Ua hinaaro noa na vau e haere atoa ˈtu i taua mau oroa ra. Ua ite au e e ere i te mea tano, aita râ vau i papu e no te aha râ. Ua faaite mai râ teie tumu parau ma te maramarama maitai e te ravehia nei te mau oroa inuraa i te carnaval, e te hiˈo nei te Atua i teie mau huru oroa ei “mau ohipa o te pouri.”—Roma 13:12.

F. M. M., Beresilia

Tau faafaaearaa Mauruuru roa no te mau tumu parau ra “Reva no te tau faafaaearaa?—Te mea e tia ia outou ia ite.” (8 no Tiunu 1996) Ua tano maitai to ˈna taeraa mai inaha, tau mahana noa i muri iho, ua rave matou i te hoê tere faafaaearaa. Ua tauturu rahi te mau manaˈo i horoahia ia matou. Mauruuru â.

L. J., Hau Amui no Marite

Fifi ia haapii Ua au roa vau i te tumu parau ra “Te uiui nei te mau taurearea . . . No te aha e mea fifi roa no ˈu ia haapii?” (8 no Tiunu 1996) Te fifihia nei au i te fare haapiiraa no vetahi o te mau tumu i faahitihia i roto i te tumu parau. E faaohipa vau i te mau manaˈo o ta outou e horoa ra. Mauruuru roa.

R. C., Hau Amui no Marite

Aita vau i anaanatae faahou i te haapii e aita atoa vau i tâuˈa i ta ˈu ohipa i te fare haapiiraa. Na roto i te faaohiparaa i te mau manaˈo e horoahia ra i roto i te tumu parau, te tiaturi nei au e haamaitai i ta ˈu mau peu i te pae no te haapiiraa.

M. E. O., Ouganda

Aita vau e fifi ra no te haapii, aita râ vau i au i te haapii. Mea fifi atoa na ˈu ia haamanaˈo i te mau ture numeraraa. Ua faataa râ teie tumu parau ia na nia iho noa e ia faahiti roa i te mau taˈo no te tauturu ia arai i te mau fifi o te tamau-aau-raa. I te haamataraa, ua manaˈo vau e mea maau roa ia taio haapuai, i to ˈu râ tamataraa, ua au roa vau!

N. I., Tapone

Taata ofati ture Mauruuru no te neneiraa i te aamu o Franck Mannino, “E taata ofati ture na vau.” (8 no Tiunu 1996) Ua haaputapû roa teie aamu ia ˈu e ua papu atoa ia ˈu i te puai e te here rahi o to tatou Poiete ra o Iehova. E 30 matahiti to ˈu tavini-noa-raa ia ˈna, e ua faaitoito teie aamu ia ˈu ia tutava puai i roto i te ohipa pororaa, a fanaˈo noa ˈi au i te tiamâraa ia poro.

E. B., Italia

Ua tauturu te tumu parau ia ˈu ia haafaufaa i te haamaitairaa taa ê e haere i te mau putuputuraa kerisetiano. No to ˈu iho huenane, ua taere-noa-hia vau i te mau putuputuraa. Mea iti roa te tiamâraa o Franck Mannino i roto i te fare auri, mea rahi râ te ohipa o ta ˈna i rave i roto i to ˈna oraraa.

D. W., Hau Amui no Marite

Ua putapû roa vau i te itoito ta Franck Mannino i faaite, noa ˈtu e ua tapeahia oia i te fare auri. Noa ˈtu e e haamataraa ino to to ˈna oraraa, ua riro oia i teie nei ei hiˈoraa maitai roa.

C. R., Hau Amui no Marite