Te papai mai nei te feia taio
Hiˈoraa i nia i teie nei ao E papai vea vau, mea au na to ˈu mau hoa rave ohipa e rave rahi i te taio i te tuhaa ra “Hiˈoraa i nia i teie nei ao” ia noaa mai te tahi mau manaˈo no ta ratou iho ohipa. Te faˈi nei au e ua tauturuhia to ˈu iho manaˈo e te tahi mau tumu parau. Te umere taa ê nei au i ta outou feia huri parau e ta outou feia faatitiaifaro i te papai. Mea varavara te faito maitatai mai teie i te pae o te reo i roto i te mau vea.
J. B., Tekolovakia
Tau matahiti aˈenei, i to ˈu haamataraa i te taio i te A ara mai na!, o te tuhaa ra “Hiˈoraa i nia i teie nei ao” ta ˈu e au ore roa ˈˈe. I teie nei, te manaˈo nei au e mea faahiahia roa te reira ei faaiteraa i te parau apî. Oia mau, e rave rahi mau tupuraa na te ao nei aita vau i ite i roto i te mau vea e haapararehia e te afata teata, ua faahitihia ïa i roto i te “Hiˈoraa i nia i teie nei ao.” A tamau noa i teie ohipa maitai!
I. K. M. C., Beresilia
Maˈi pee Te parau ra te mau tumu parau ra “Te mau maˈi pee—E ore anei i te hoê mahana?” (8 no Novema 1997) e: “O te mau maˈi haapê noâ te tumu rahi roa ˈˈe i te ao nei e pohe ai te taata, hau atu i te 50 mirioni taata tei pohe i te matahiti 1996 anaˈe.” Teie râ, te parau ra te hoê tabula a te Faanahonahoraa o te Ao nei no te Oraora-maitai-raa e hau atu i te 52 mirioni taata tei pohe i te matahiti 1996, hau atu i te 17 mirioni, o te mau maˈi haapê aore ra te mau manumanu aitaata te tumu.
B. B., Hau Amui no Marite
No roto mai ta matou mau parau i te vea Helemani ra “Nassauische Neue Presse.” Ua hape iho â ïa to teie vea faahitiraa i te numera a te Faanahonahoraa o te Ao nei no te Oraora-maitai-raa. No reira, te mauruuru nei matou no teie haamaramaramaraa.—Te feia nenei.
Ûû Mauruuru no te tumu parau ra “Te taaraa i te mǎtaˈu o te ûû.” (8 no Novema 1997) I roto i ta matou amuiraa, te vai ra te tahi mau taurearea te reira to ratou fifi, e ere i te mea ohie na ˈu ia amui atu i roto ia ratou. No reira, te oaoa nei au i te taioraa i te mau manaˈo ohie ia faaohipa ta outou e horoa maira no te tauturu ia matou ia amui atu e te mau ûû. Ua turai outou ia matou ia tauturu i teie huru taata e ua faaite mai outou nafea.
Y. N., Tapone
I roto i ta ˈu piha haapiiraa, te vai ra e piti ûû. Fatata roa eita roa ˈtu raua e pahono i roto i te piha haapiiraa, e mai ta ta outou tumu parau i faahiti, ia anihia raua ia taio ma te reo teitei, e ite-roa-hia ia ruru raua. Auaa ta outou tumu parau, e nehenehe ta ˈu e taa maitai aˈe i te mǎtaˈu te tia ia ratou ia faaruru no te paraparau i roto i te piha haapiiraa.
S. L., Helemani
Hoê ahuru ma ono matahiti to ˈu, e e ûû to ˈu. Te hinaaro nei au e haamauruuru ma to ˈu mafatu taatoa ia outou no te faaitoitoraa i noaa mai ia ˈu na roto i te taioraa i te tumu parau ra. I te tahi taime, e ite tatou i te hepohepo no te mea eita ta tatou e nehenehe e rave i te mau mea atoa ta tatou e hinaaro. No reira, mea faahiahia roa ia ite eaha to Iehova manaˈo ia tatou e nafea oia ia faaitoito mai ia tatou. Te hinaaro nei au ia taa te mau taata atoa e taio i te tumu parau ra i te mau tutavaraa e ravehia e te mau ûû.
S. D. A., Italia
Ua haafaura mai te tumu parau ra i te mau haamanaˈoraa mauiui mau. Ua faaite atoa mai râ te reira e ua aupuru maite e ua haamaitai mai Iehova ia ˈu i te roaraa o te mau matahiti. I to ˈu bapetizoraahia i te 11raa o to ˈu matahiti, to ˈu hinaaro rahi roa ˈˈe, te arueraa ïa ia Iehova ei taata orero. Ua manaˈo vau e e tiai roa vau i te ao apî a te Atua e roaa ˈi taua fa ra. I te roaraa râ o na matahiti e 37 i mairi, ua haamaitaihia vau i te vauvauraa i te mau oreroraa parau huiraatira e rave rahi e oia atoa i te mau oreroraa parau i roto i te mau tairururaa haaati e mataeinaa.
R. F. D., Beretane
No to ˈu riaria ia ûû vau, ua tapea noa vau ia ˈu iho i te horoa i to ˈu manaˈo i roto i te mau putuputuraa a te amuiraa. Te haapeapea atoa ra vau e ia ûû vau i roto i te ohipa pororaa i tera e tera fare, ia haere iho â râ vau na muri i te hoê taata ite i te paraparau. Ua tauturu mai teie tumu parau ia ˈu ia ite e te taa ra ia Iehova to ˈu mau fifi.
C. C. L., Beresilia