To roto to tatou hoa rahi roa ˈˈe i te ao varua

TE HOROA maira te Bibilia i te hoê faataaraa papu maitai no nia i te feia e ora ra i roto i te ao varua. O te Atua ra o Iehova tei teitei aˈe i nia i te raˈi. To muri iho o Iesu Mesia ia Iehova i te pae o te puai e te mana. Te ohipa nei te mau melahi haapao maitai a te Atua ei mau tavini no te Atua e no to ˈna nunaa i nia i te fenua nei. Te patoi nei Satani e ta ˈna mau demoni i te Atua e te haavare nei ratou i te taata. Te taoto ra te feia pohe i roto i te pohe e tae noa ˈtu i te taime e faatia mai ai te Atua ia ratou.

Te hinaaro nei te mau demoni ia haamori tatou ia ratou

I te mea e aita te taata pohe e ora faahou ra, aita rea mea e noaa mai na roto i te haamoriraa ia ratou. Te turu noa nei te raveraa i te mau tusia no te taata pohe i te mau haavare a Satani e a te mau demoni.

Te hinaaro ra anei te mau melahi a te Atua ia haamori tatou ia ratou? Aita roa ˈtu! Te faahanahana nei te mau melahi haapao maitai i te Atua e te faaitoito nei ratou i te taata ia na reira atoa. I to te aposetolo Ioane tamataraa e piti taime i te haamori i te mau melahi, tera râ, ua aˈo mai ratou ia ˈna ma te parau e: “A haapao maitai! Eiaha oe e na reira! . . . A haamori i te Atua.”—Apokalupo 19:10; 22:8, 9, MN.

Taa ê atu i te mau melahi haapao maitai, te hinaaro ra Satani e ta ˈna mau demoni ia haamorihia e ia faahanahanahia ratou. Ua itehia te reira i to Satani tamataraa ia Iesu a ora ˈi Iesu ei taata i nia i te fenua nei. Te faatia ra te Bibilia e: “Ua aratai faahou atura te diabolo ia [Iesu] i nia i te hoê mouˈa teitei roa, e ua faaite maira ia ˈna i te mau basileia atoa i te ao nei e to ratou hinuhinu. Ua parau maira ia ˈna, E horoa ˈtu vau i teie nei mau mea atoa ia oe na ia tipapa mai oe i raro e haamori mai ia ˈu.”—Mataio 4:8, 9.

Ua pahono atura Iesu e: “E haere ê atu oe, e Satani; ua oti hoi i te papaihia, O to Atua o Iehova ta oe e haamori, e oia anaˈe ra ta oe e faaroo.” (Mataio 4:10) Ua ite Iesu i te Ture a Iehova, e aita oia i hinaaro e ofati i te reira.—Deuteronomi 6:13.

Noa ˈtu e aita Satani i nehenehe e turai ia Iesu ia haamori ia ˈna, ua manuïa râ o ˈna i nia ia vetahi ê. Parau mau, mea iti te taata e opua mau ra e haamori ia Satani. Noa ˈtu râ, na roto i te râmaraa, te faahemaraa, te haavareraa, e te mǎtaˈu, e rave rahi roa taata ta Satani e ta ta ˈna mau demoni i haafariu ê mai i te haamoriraa viivii ore a Iehova, i papai ai te aposetolo Ioane e: “Te vai noa nei to te ao atoa i raro aˈe i taua varua ino ra.” (Ioane 1, 5:19) Te feia e haamori ra na roto i te mau ravea aita e tu ra i te Parau a te Atua, te faahanahana ra ïa ratou ia Satani, eiaha ia Iehova. Te faaara nei te Bibilia e: “Ta te Etene i faatusia ra, i faatusia ïa na te mau demoni, e ere na te Atua.”—Korinetia 1, 10:20.

O Iehova anaˈe te haamorihia

O te Atua anaˈe te tia ia tatou ia haamori. Teie ta Iehova i parau ia Mose: “Eiaha roa to oe ei Atua ê atu, ia ˈu nei. Eiaha roa oe e hamani i te idolo tarai no oe, e te hohoˈa no te hoê mea i nia i te raˈi ra, e no te hoê mea i raro i te fenua nei, e no te hoê mea o te moana i raro aˈe i te fenua ra: eiaha roa oe e piˈo i raro ia ratou, eiaha hoi e tavini ia ratou; e Atua [“titau i te haamoriraa otahi,” MN] hoi au o te Atua no oe nei o Iehova.”—Exodo 20:3-5.

Noa ˈtu e e mana faahiahia mau to Iehova, mea ohie râ ia haafatata ˈtu ia ˈna. Teie ta te pǐpǐ Iakobo i papai: “E haafatata ˈtu i te Atua, e na ˈna e haafatata mai ia outou na.” (Iakobo 4:8) Teie ta te aposetolo Paulo i parau: “Aita râ [te Atua] i atea ê atu ia tatou atoa nei.” (Ohipa 17:27) E ua papai te aposetolo Ioane e: “Teie taua taiâ ore no tatou i noaa ia [Iehova] ra, ia ani noa ˈtu tatou i te mau mea atoa [“ia au i to ˈna hinaaro,” MN], te faaroo maira ïa oia ia tatou. E te ite nei tatou e te faaroo maira oia ia tatou i te mau mea atoa ta tatou i ani atu, ua ite tatou e e roaa ia tatou ta tatou i ani atu ia ˈna ra.”—Ioane 1, 5:14, 15.

A tapao na e ua papai Ioane e e farii Iehova i ta tatou mau aniraa ia ani tatou “ia au i to ˈna hinaaro.” No te ite e eaha te hinaaro o te Atua, e tia ia tatou ia ite e eaha ta te Bibilia e haapii maira. E oaoa te mau Ite no Iehova i te tauturu ia outou ia maramarama i te Bibilia.

A haapii rahi noa ˈi outou no nia ia Iehova, e rahi atu â to outou ite no nia i te feia e ora ra i roto i te ao varua. Te faatiamâ ra teie ite i te mau tiaturiraa tupapau, te mau haapiiraa, e te mau peu tumu ta Satani e faaohipa ra no te tapea i te taata i raro aˈe i te mǎtaˈu e te faatîtîraa. Na roto i te ite papu no nia i te Atua, e haapii outou i te tiaturi ia ˈna no te tauturu ia outou ia ape aore ra ia faaruru i te mau fifi o te oraraa i te mau mahana atoa. E nehenehe outou e riro mai ei hoa no te Atua. E e riro mau â te Atua no outou ei ‘haapuraa e ei etaeta, e tauturu fatata ia roohia e te ati ra.’—Salamo 46:1.

E haamouhia te mau puai iino

Aita e feaaraa, e upootia te mau puai varua o te maitai i nia i te mau puai varua o te ino. Ua tupu aˈena te hoê tamaˈi i roto i te ao varua o tei tamâ i te mau raˈi ia Satani e to ˈna mau hoa iino. Te na ô ra te buka Apokalupo e: “E tamaˈi tei nia i te raˈi: O Mihaela [Iesu Mesia tei faatia-faahou-hia mai] e ta ˈna ra mau melahi tamaˈi atura i te teni; e ua tamaˈi maira te teni e ta ˈna ra mau melahi. Aore râ i riro te re ia ratou; e aore roa ˈtura o ratou e parahiraa i nia i te raˈi. Hurihia ˈtura hoi te teni rahi i rapae, o taua ophi tahito ra ïa, o tei parauhia o te diabolo ra, e o Satani hoi, o tei haavare i to te ao atoa nei; i hurihia oia i rapae i nia iho i te fenua nei, e ta ˈna mau melahi atoa ua huri-atoa-hia i rapae.”—Apokalupo 12:7-9.

Eaha te faahopearaa o taua tamaˈi ra? Te na ô faahou ra te aamu e: “E teie nei, a oaoa, e te mau raˈi ra e, e o outou atoa hoi o tei parahi i reira ra. E ati râ hoi to te fenua e to te tai, tei raro atu na hoi te diabolo ia outou na; e riri rahi hoi to ˈna, no te mea ua ite oia e maa taime poto to ˈna e toe nei.” (Apokalupo 12:12) E nehenehe to te raˈi e oaoa, i te mea e aita faahou o Satani e ta ˈna mau demoni i reira no te haapeapea. Ua faatupu rahi râ to ˈna huriraahia mai te raˈi mai i te ati, te arepurepuraa rahi, i to te fenua nei. Te ora nei tatou i taua tau ati ra i teie nei.—Timoteo 2, 3:1-5.

Hoê tau no a muri aˈe aita e ino

Te pûpû atoa maira râ te Bibilia i te tiaturiraa. Te haapapu maira oia ia tatou e “maa taime poto” noa to te Diabolo hou oia e tapeahia ˈi. Ia tupu te reira, e horoa mai Iehova i te mau haamaitairaa nehenehe no te feia atoa i nia i te fenua nei e imi ra i to ˈna auhoaraa. A hiˈo na i te tahi o ta ˈna mau parau tǎpǔ no a muri aˈe:

“E riro hoi e maa sitona tei te fenua i nia i te tupuai o te mau mouˈa ra, e tei tupu ra.”—Salamo 72:16.

“E vai taiata te aho o to ˈu ra feia i maitihia i to te mau mea ta ratou i hamani. E ore hoi ratou e ohipa faufaa ore noa.”—Isaia 65:22, 23.

“E ore hoi to reira e parau e, Ua paruparu vau i te maˈi.”—Isaia 33:24.

“Ei reira e faaaraarahia ˈi te mata o te matapo ra, e amaha hoi te tariˈa o te feia tariˈa turi ra: ei reira te pirioi e ouˈauˈa noa ˈi mai te aili, e himene mai hoi te vaha o te taata vava ra.”—Isaia 35:5, 6.

“E na te Atua e horoi i to ratou roimata atoa; e e ore roa te pohe, e te oto, e te mihi, e te mauiui, e ore atoa ïa, no te mea ua mou te mau mea tahito ra.”—Apokalupo 21:4.

“E parahi te feia parau-tia i nia i te fenua, e parahi tamau â ratou i reira.”—Salamo 37:29.

O Iehova anaˈe, te Atua mau, te nehenehe e faatupu i teie mau parau tǎpǔ faahiahia roa. Aita rea mea e tapea ia ˈna no te faatupu i ta ˈna opuaraa. “Aore roa hoi e mea e ore te tia i te Atua.”—Luka 1:37.

[Hohoˈa i te api 9]

Ia riro outou ei hoa no te Atua, e tauturu oia ia outou ia faaruru i te mau fifi o te oraraa