Haaparareraa i te parau ma te aparaa rima

HAAMATA mai te avaˈe tiunu 1995 e i te tau veavea taatoa, ua faatupu te mau Ite no Iehova no te tuhaa fenua o te amaa a te mau Hau amui no Marite, e 181 tairururaa mataeinaa, “Te feia e arue i te Atua ma te oaoa.” I roto e piti o taua mau tairururaa nei—hoê i te pae hitia o te râ, e te tahi i te pae tooa o te râ—ua vauvauhia te porotarama taatoa na roto i te reo aparaa rima marite. Mea papu roa ˈtu â ïa te porotarama—inaha, mea hau aˈe i te maramarama no te feia tariˈa turi, ia orero-roa-hia mai na roto i te reo aparaa rima, eiaha râ ia hurihia mai roto mai i te tahi atu reo paraparauhia.

Ua tae mai te mau tia no roto mai i na amuiraa e 11 e na pǔpǔ e 30 reo aparaa rima na te fenua marite taatoa. Ua tae atoa mai râ te mau tia no roto mai i te mau fenua Beretane, Danemata, Équateur, Helemani, Kanada, Mexique, Norevetia, Porto Rico, République dominicaine, Rusia, e Tapone. Ua rau ïa te huru o te mau nunaa i tae mai.

Ua tamaumauhia te mau reni video ia nehenehe te taata e mataitai i te haapurororaa o te porotarama na roto i te afata teata. Teie râ, te vai atoa ra te tahi mau tia tariˈa turi e te matapo atoa. Nafea ïa ratou ia fanaˈo i te porotarama? Ua putapûhia te taata i te mataitairaa hau atu i te hoê hanere feia tauturu tei haere mai te tahi i muri aˈe i te tahi, e huri i te porotarama o te mahana tataitahi na teie feia, na roto i te ravea o te paraparauraa ma te fâfâ i te rima.

I teie na tairururaa e piti, e 36 taata o tei faataipe i to ratou pûpûraa ia ratou no te Atua ra o Iehova na roto i te bapetizoraa. Te tahi atu taime puai, o te darama ïa, Te faaturaraa i tei au ia faaturahia i roto i to ratou mau matahiti ruhiruhia. Auê te putapû ia mataitai i te aparaahia mai te darama taatoa, e na te mau melo tariˈa turi iho i hauti i te rahiraa o te mau tuhaa o te darama!

Faaitehia mai nei te matararaa o te hoê ravea tauturu apî no te haapii i te Bibilia, oia hoi Te ite e aratai i te ora mure ore. Ua oaoa roa te feia i tairuru mai i te iteraa e te faaineinehia ra te mau ripene video o teie buka na roto i te reo aparaa rima! Na pene matamua e toru to roto i te Ripene 1, tei matara i te tairururaa. E pae ripene ê atu e faaineinehia ra. “Ua mauruuru roa matou no teie ripene apî,” o ta te hoê ïa tia no te hau no Ohio i parau. “E tauturu te reira ia matou ia faahaere oioi i te ohipa pororaa i mua no te feia tariˈa turi.”

Ua hoˈi atu na feia e 2 621 i tae mai i na tairururaa e piti i ǒ ratou, ma te itoitohia i te pae varua. Hau atu â i mutaa ihora, ua faaoti ratou e haavevo i te mau parau a te papai salamo ra: “O tei huti i te aho ra ia haamaitai anaˈe ïa ia Iehova.”—Salamo 150:6.