E navai te maa no te taatoaraa!

NA TE TAATA PAPAI A A ARA MAI NA! I BERESILIA

E NEHENEHE e fanaˈo e rave rahi maa, e te maitatai a vai peapea noa ˈi. No te ite i te oaoa mau e te mure ore, te hinaarohia ra i te tahi atu ohipa—te maa i te pae varua. Teie ta Iesu i parau: “E ore te taata e ora i te maa anaˈe ra, i te mau mea atoa râ i haapaohia e te Atua.”—Mataio 4:4.

I te tahi aˈe pae, te aratai ra te haapaeraa i te Parau a te Atua i te pohe poia i te pae varua, mai tei tohuhia i roto i te Amosa 8:11 e: “E hopoi atu ai au i te oˈe i nia i te fenua, e ere râ i te oˈe maa ore, e te hiaai i te pape, i te faaroo râ i te parau a Iehova.” Tera râ, e nehenehe e ape i te navai-ore-raa te maa i te pae varua. Teie ta Iesu i parau: “E ao to tei [ite i to ratou mau hinaaro i te pae varua] . . . E ao to tei hiaai i te maitai; e faaîhia hoi ratou.” (Mataio 5:3, 6) Mai te maa maitai e te navai o te haamâha i to tatou tino, e haapaari te maa maitai i te pae varua i to tatou faaroo e to tatou tiaturiraa no te tau no a muri aˈe. Teihea huru ao ta tatou e nehenehe e tiaturi?

E pue te maa no te taatoaraa

A feruri na i te hoê ao e te pue noa ra te maa au roa e te maitai. Te hoê ao aita e tamaˈi, e ati, aore ra e veve o te faatupu ra i te pohe poia aore ra te navai-ore-raa te maa, o te haaparuparu aore ra o te faahepohepo ra i te mau taata. Eita e itefaahou-hia te feia aita e faaearaa aore ra aita e ohipa o te fanaˈo noa ra i te maa tei operehia no te feia veve aore ra no te feia taparu moni, eita atoa te mau hoo o te maa moni rahi e faahepo faahou i te mau taata ia amu i te tahi maa rii no te faaî i te opu. “E riro hoi e maa sitona tei te fenua i nia te tupuai o te mau mouˈa ra, e tei tupu ra.” (Salamo 72:16) Nafea râ te reira ia tupu? Na vai e faatitiaifaro i te fifi o te navai-ore-raa te maa?

E haapao to tatou Poiete ma te here i te hinaaro o te taata i te maa maitai. E mea tano noa te ahuaraˈi o te fenua, o te haapapu ra e eita te mau maa tupu e ino faahou. “Na Iehova hoi e horoa mai i te mea maitai, e hotu mai â hoi to tatou fenua.” (Salamo 85:12) Hau atu â, noa ˈtu e e nehenehe iho â te fenua e faatupu mai i te maa e navai, na te Basileia o te Atua anaˈe e faaore roa i te nounou e te haavîraa, o te faatupu ra i te opereraa maa aifaito ore, te navai-ore-raa te maa, e te veve.

E, e haapapu te faatereraa a Iehova i nia i te raˈi e eita te mau faanahoraa e vai ra i te pae faaapuraa e te faautaraa e opere i te maa maitai i te mau vahi e hinaarohia ra. Eita te faatereraa a te Basileia e haamaitai i te tahi noa mau taata e e vaiiho i te rahiraa ia rohi ma te fifi no te tamaa. Maoti râ te hepohepo e te ereraa i te tiaturiraa, e faatupu te mau haamaitairaa a te Basileia i te oaoa tei faahitihia i roto i te tamaaraa rahi i te mau maa maitatai i tohuhia i roto i te Isaia 25:6: “Ei reira Iehova sabaota ra e rave ai, na te taata atoa i teie nei mouˈa, i te oroa amuraa maa maitatai, i te oroa uaina tahito, i te mau mea maitatai roa ra.”

I reira, e mou roa te huru oraraa faatitiauaraa, hepohepo rahi, e te ino i teie mahana. Eita te hoê taata e pohe poia aore ra e maˈihia. No reira, mai te peu e te hinaaro mau ra oe e fanaˈo i te oraraa i roto i taua ao apî ra, a faaohipa ïa i te mau parau a Iesu: “Eiaha e ohipa i te maa tahuti noa, i te maa râ e tia i te vairaa e tae noa ˈtu i te ora mure ore ra.”—Ioane 6:27.