Te upootiaraa i nia i te mau ati
E MEA faahiahia iho â te mau tutavaraa a te mau Nunaa Amui e a te mau taata faatere no te faaiti i te mau faahopearaa o te mau ati natura. Te manaˈo e horoahia ra e te mau opuaraa mai te opuaraa Hoê ahuru matahiti Na te mau fenua atoa no te Faaitiraa i te Ati Natura, oia hoi e eiaha te huitaata nei ia topa i roto i te ahoaho e aita e tiaturiraa faahou ia faaruru anaˈe oia i teie mau huru ati ra. Mai te peu e e rave te mau taata, te mau oire, e te mau faatere i te mau ravea tano, e nehenehe te mau taata e ora mai.
E mea anaanatae roa te reira, no te mea te parau maira te Bibilia ia tatou e e fatata te hoê tauiraa i te tupu i nia i te tiairaa faatere o te huitaata nei. Mai te tau o Iesu mai â, ua pure noa na te mau kerisetiano i te Pure a te Fatu (to “Matou Metua”), o te na ô nei hoi e: “Ia tae to oe ra hau. Ia haapaohia to oe hinaaro i te fenua nei, mai tei te ao atoa na.” (Mataio 6:9, 10) Te Basileia o te Atua o te hoê ïa faatereraa mau. Ia au i te parau tohu a te Bibilia, ua fatata roa e na roto i te reira “e hope roa hoi taua mau basileia [taata] ra i te parari e e pau, e vai tera e a muri noa ˈtu.” (Daniela 2:44) A feruri na e tei raro aˈe te huitaata taatoa nei i te hoê faatereraa tia. Auê ïa tauiraa e!
Mai te peu e te ite nei te mau faatereraa no teie mahana i te faufaaraa ia rave i te mau ohipa ia ore te mau atâtaraa natura e riro mai ei mau ati natura, e nehenehe tatou e tiaturi e e haapapu iho â te faatereraa a te Atua e eita to ˈna mau taata e mauiui faahou i roto i teie huru tupuraa. E afai mai te Basileia o te Atua i te hau mure ore i nia i teie palaneta no te taime matamua mai te taime mai â i haapohe ai o Kaina ia Abela. I raro aˈe i taua Basileia ra, o “te feia mǎrû ra, e parahi ïa i te fenua, e oaoa ratou i te rahi o te hau ra.” (Salamo 37:11) E haapii te Basileia i te huitaata nei e i roto i te auraa mau ‘e riro te mau taata atoa ei feia haapiihia e Iehova, e e hau rahi to ratou.’—Isaia 54:13.
I teie mahana, te rahiraa taata e faaruru nei i te mau ati natura o te mau taata veve ïa. Tera râ, na roto i te tiairaa tia e te haapiiraa tano, i raro aˈe i te Basileia o te Atua, eita te huitaata nei e mauiui faahou i te mau haapeapearaa o te veve. Teie ta te peropheta Isaia i papai no te tohu i teie mau huru tupuraa na roto i te hoê raveraa e ia taa te mau taata o to ˈna ra tau e: “Ei reira Iehova sabaota ra e rave ai, na te taata atoa i teie nei mouˈa, i te oroa amuraa maa maitatai, i te oroa uaina tahito, i te mau mea maitatai roa ra, i te uaina tahito faaateate-maitai-hia ra.” (Isaia 25:6) E, te hoê oroa amuraa maa maitatai! Hau atu i te faataa i te huru oraraa i raro aˈe i te faatereraa a te Basileia, teie ta te papai salamo i papai: “E riro hoi e maa sitona tei te fenua i nia i te tupuai o te mau mouˈa ra, e tei tupu ra, e ahehe ïa mai te mau raau e tupu i Lebanona ra; e ruperupe to te oire ra mai te raau o te fenua nei.”—Salamo 72:16.
Papu maitai, e faaore-roa-hia te aroraa a te taata i te mau ati natura. Na roto i te aratairaa a te varua o te Atua e te tiairaa a te Basileia o te Atua, e upootia te feia e mǎtaˈu nei i te Atua i roto i taua aroraa ra. Auê ïa tamǎrûraa e!