Ua haaputapû o ˈna e rave rahi taata

I TE 19 no novema 1994 to Kathy Roberson poheraa i te 26raa o to ˈna matahiti. Ua haere tamau noa o ˈna ma te haapao maitai i te mau putuputuraa kerisetiano tae noa ˈtu i te hebedoma o to ˈna poheraa. Ua faatiahia ta ˈna aroraa i te mariri ai taata mai te ivaraa mai o to ˈna matahiti i roto i te A ara mai na! no te 8 no atete 1994, i raro aˈe i te tumu parau ra “Ia ore anaˈe e ohie te oraraa.” I muri aˈe i te taioraa i te tumu parau, e rave rahi na te ao taatoa nei tei hapono mai i te mau rata e ua faataa ratou e ua haaputapû hohonu te hiˈoraa itoito o Kathy ia ratou.

Te mau taurearea tei faaitoitohia no te tavini i te Atua

Ua papai o Loida, no te fenua Paniora, e: “E 16 matahiti to ˈu, e ua taˈi au i to ˈu taioraa i te aamu no nia i te faaoromai o Kathy. E mǎtaˈu noa na vau i te pohe, auaa râ teie tumu parau, te taa nei au e, mai ta ˈna i parau, ‘te mea faufaa mau, e ere ïa e pohe aore ra e ora anei tatou i teie mahana, te iteraa râ e te vai ra te haamaitairaa a te Atua ra o Iehova i nia ia tatou, te taata Otahi roa o te nehenehe e horoa mai no tatou te ora mure ore.’”

Ua papai o Mari no te fenua Tapone e: “I te mea hoi e hoê â rii to ˈu matahiti e to Kathy e ua bapetizohia vau i te hoê â taio mahana, e au ra e ua riro to ˈna aamu o ta ˈu i taio mai te hoê rata faaitoitoraa a te hoê hoa piri roa. Na roto i ta ˈna tiaturiraa e e turai to ˈna aamu e rave rahi taata ia faaohipa i to ratou oraora-maitai-raa, eiaha no te tapapa i te mau tapao faufaa ore, i roto râ i te taviniraa a Iehova ma te paari, ua putapû roa to ˈu mafatu, no te mea no haamata noa ˈtura vau i te taviniraa pionie tamau [taviniraa ma te taime taatoa].”

Ua papai o Noemi, no Italia, mai te reira atoa te huru, e ua riro te hinaaro o Kathy ia faaohipa te mau taurearea i to ratou oraora-maitai-raa, eiaha no te tapapa i te mau tapao faufaa ore, i roto râ i te taviniraa a Iehova ma te paari ei “faaitoitoraa no te mau tausani taurearea, e no ˈu atoa nei.” Ua parau faahou o Noemi e: “Te tiai ru nei au i te taime e ite ai au ia ˈna i roto i te ao apî ia mou roa teie mau mea atoa nei. Ia oti anaˈe ta ˈu haapiiraa teitei, e haamata atoa vau i te rave i te taviniraa pionie.”

“E 18 matahiti to ˈu,” o ta Rachelle ïa no Floride, mau Hau Amui no Marite, i papai, “e te rave nei au i te taviniraa pionie e ere mea maoro i teie nei. I to ˈu taioraa i te tumu parau ra ‘Ia ore anaˈe e ohie te oraraa,’ ua ite au i te hoê itoito rahi i te iteraa i te hoê taurearea mai ia ˈu nei o te faaoromai nei i teie huru teimaharaa. Ua turai o Kathy ia ˈu ia faaohipa i to ˈu oraora-maitai-raa, mai ta ˈna i parau, ‘eiaha no te tapapa i te mau tapao faufaa ore, i roto râ i te taviniraa a Iehova ma te paari.’”

Ua papai te tahi mau mitionare no te motu Chuuk, i Micronesia e: “I ǒ nei mea veve ta matou mau pionie i te pae materia. Ua tauturu râ te aamu o te tuahine Roberson ia ratou ia mauruuru i te mea e vai ra ia ratou. Ua taa ia ratou e noa ˈtu to ratou veve i te pae materia ua haamaitaihia râ ratou na roto i to ratou tino pautuutu i nehenehe ai ratou e tavini ia Iehova ma te taime taatoa. Ua riro te reira ei faahaamanaˈoraa maitai no ratou ia mauruuru no te mea e vai ra ia ratou e ia faaohipa i to ratou puai i roto i te taviniraa a Iehova.”

Ua hapono oioi te hoê pǔpǔ e 16 taata haapii tei putuputu i te haapiiraa a te mau pionie i Farani i te hoê hohoˈa o te mau lili na Kathy e teie faaitoitoraa i nia iho e: “Eita roa ˈtu e moe ia matou ta oe aˈoraa ia faaohipa i to tatou nei taime no to tatou Poiete rahi.”

Ua papai te tahi atu taurearea tamahine no Farani e: “No te mea hoi e e taurearea tatou e o tatou ta Satani e hinaaro ra e faahema na mua, e manaˈo tatou i te tahi taime e mea fifi ia faaea noa ma te taiva ore ia Iehova. I to matou râ taioraa i taua mau aamu faahiahia ra e te putapû, ua puai e ua itoito faahou matou, na roto i te iteraa e te tapea nei te tahi atu mau taurearea, mai ia Kathy, i to ratou haapao maitai noa ˈtu te mauiui. Auê ïa hiˈoraa nehenehe mau e!”

“Fatata hoê â to tâua matahiti e mea oraora maitai au,” o ta Nadine ïa no Ohio, i te mau Hau Amui no Marite, i papai. “E rave rahi taime to ˈu vaiihoraa i te mau ohipa haihai ia haafifi i ta ˈu taviniraa no Iehova. Ua turai to ˈu taioraa i to oe aamu ia hiˈopoa maite i to ˈu oraraa, ua taa ˈtura ia ˈu e ehia rahiraa taime faufaa roa ta ˈu i haamâuˈa. Ua riro oe ei hiˈoraa no ˈu.”

Ua parau te hoê vahine apî no Beresilia e: “Ua haaputapû roa o ˈna i to ˈu mafatu e ua faarahi i to ˈu hiaai e tavini i to tatou Atua ma te taatoa atu â.”

Ua papai te hoê taurearea tamahine no Kanada e: “E 15 matahiti to ˈu. A piti matahiti i teie nei, ua ite au e ua tupuhia vau i te maˈi upaa faatupuhia e te ravea parururaa iho. Auaa te aamu o Kathy Roberson i taa ˈi ia ˈu e noa ˈtu te huru o to ˈu oraora-maitai-raa, e nehenehe atoa vau e tavini ia Iehova ma te haapao maitai a vai noa ˈi te taime e e tia ia ˈu ia tiai ma te faaoromai i te faanahoraa o te mau mea apî tǎpǔhia e te Atua no te faaoraraa taatoa.”

Ua papai o Jennette no New Jersey, i te mau Hau Amui no Marite e: “Te tauturu nei to ˈna faarururaa i te mau haafifiraa atoa e to ˈna faaroo ia tatou paatoa ia faaoti i te tamau i te tutava ia rave rahi atu â i roto i te taviniraa a Iehova noa ˈtu eaha te mau fifi ta tatou e farerei. Te faanaho nei au i te faaohipa i to ˈna aamu e te tahi o ta ˈu mau taata e haapii nei i te Bibilia no te turai ia ratou ia haamau i te mau tapao e rave i te taviniraa pionie ia noaa anaˈe ta ratou parau tuite i te fare haapiiraa.”

Ua faaitoito-atoa-hia te ruhiruhia

Ua papai te hoê vahine no Kalifonia, i te mau Hau Amui no Marite e: “E mea papu e ua tuu na oe i te hiti i te mau fifi haihai atoa i roto i to tatou oraraa e ua tuu i te niu i nia i te mea faufaa roa ˈˈe—to tatou taairaa e o Iehova.” Ua papai faahou oia e: “Noa ˈtu e ua paari au, ua horuhoru roa e ua putapû vau i to oe aamu e i ta oe haamaitairaa. Ua tauturu te reira ia ˈu ia hiˈopoa faahou i ta ˈu mau ohipa matamua.”

Ua parau te tahi atu rata no Kalifonia e: “Ua riro te tamataraa ta oe i faaruru ei tamataraa rahi aˈe i tei farereihia e te mau taeae e te mau tuahine i Helemani aore ra i Malawi aore ra i te tahi atu vahi o ta ˈu i taio na. E 68 matahiti to ˈu i teie nei, ua ite au, ua faaroo vau, e ua taio vau e rave rahi aamu tei faatiahia. E riro mau to oe aamu ei haamaitairaa no te taurearea e te ruhiruhia atoa.”

Ua faˈi te hoê vahine no Caroline Apatoa, i te mau Hau Amui no Marite e: “E ere au i te hoê tamarii. Fatata vau i te naeahia e 70 matahiti.” Ua papai oia ma te mauruuru e: “Ua riro oe mai ia Ioba. Te tiaturi nei au e e tapao te mau taurearea e te ruhiruhia atoa i to oe faaoromai.”

Ua parau te tahi atu rata e: “Ua haaputapû te faaroo e te faaotiraa a Kathy i to ˈu mafatu. Fatata vau i te naeahia e 57 matahiti, e te hoê o ta ˈu mau fa o te horoaraa rahi atu â ïa i roto i te taviniraa a Iehova ia tatuhaahia vau, tera râ, aita i maoro aˈenei ua itehia e e mariri ai taata to ˈu. Auê au i te tatarahapa e i to ˈu apîraa ra e a oraora maitai noa ˈi to ˈu tino, aita vau i rave rahi atu â no Iehova! Aita hoê noa ˈˈe taata e nehenehe e faaara mai i te taime e haafifi ai te hoê maˈi rahi i taua haamaitairaa ra.”

Ua papai te hoê matahiapo kerisetiano e: “Ua tuu vau i teie tumu parau i roto i te hoê haapueraa parau taa ê no ta ˈu taioraa no te mau taime e tupu mai ai te tahi mau ohipa manaˈo-ore-hia o te nehenehe e tamata i to ˈu faaroo. Ua tuu atoa vau i teie tumu parau i roto i ta ˈu haapueraa parau no nia i te ohipa tiairaa i te mamoe no te faaohipa i te reira ei faaitoitoraa i te mau hoa here i tairihia e te mau ati a fatata noa mai ai te hopea o teie faanahoraa.”

Te haapaari-mau-hia nei tatou e te faaroo e te itoito o te taatoaraa o te mau melo o to tatou fetii taeae na te ao nei. (Petero 1, 5:9) A tiatonu tatou paatoa i mua, mai ia Kathy, i te tau e tupu ai te parau tǎpǔ a te Bibilia e “e ore roa te pohe.” (Apokalupo 21:3, 4) Auê ïa taime faahiahia mau ia “ore hoi to reira e parau e, Ua paruparu vau i te maˈi.”—Isaia 33:24.

[Hohoˈa i te api 26]

Kathy Roberson