Ia vai ineine no te hoê tau oaoa no a muri aˈe

“IA VAI ineine,” o ta Iesu ïa i faaitoito. (Luka 12:40) Mai te peu e e na reira tatou, ia haere anaˈe mai te Mesia “ma te mana e te hanahana rahi,” e nehenehe ïa tatou e pahono atu ma te oaoa i ta ˈna faaueraa: “E nânâ i to outou mata i nia, e faateitei i to outou upoo, te fatata maira hoi to outou ora.”—Luka 21:27, 28.

Teihea huru ora? Oia hoi, te ora ta Noa e ta to ˈna utuafare i fanaˈo na—e, te oraraa mai i te hopea o teie nei ao! “E te mou nei hoi teie nei ao,” o ta te aposetolo Ioane ïa i papai, “o tei haapao râ i to te Atua ra hinaaro, e tia ïa i te oraraa e a muri noa ˈtu.”—Ioane 1, 2:17.

I roto i te ao apî a Iehova, e fanaˈo te mau taata a te Arii ra o Iesu Mesia i nia i te fenua nei i te ora mure ore. “E parahi te feia parau-tia i nia i te fenua,” o ta te Bibilia ïa e parau ra, “e parahi tamau â ratou i reira.” (Salamo 37:29) Auê ïa tau faahiahia mau no a muri aˈe ta te Atua e tǎpǔ no to ˈna nunaa! “Ei pihai atoa iho te Atua ia ratou,” o ta ta ˈna Parau ïa e faahiti ra. “Na te Atua e horoi i to ratou roimata atoa; e e ore roa te pohe, e te oto, e te mihi, e te mauiui, e ore atoa ïa.” Teie te parau tohu tia!—Apokalupo 21:3, 4.

Tera râ, no te fanaˈo i teie tau no a muri aˈe, e tia ia outou ia ohipa. Te titauraa i te ite, o te ohipa faufaa matamua ïa. Te faataa ra te Bibilia e: “Teie hoi te ora mure ore, ia ite ratou ia oe i te Atua mau ra, e ia Iesu i te Mesia i ta oe i tono mai.”—Ioane 17:3.

E tia atoa ia outou ia haere tamau i te mau putuputuraa e o vetahi ê o te imi ra i teie ite, mai ta te aposetolo i faaitoito e: “E haapao maite â tatou te tahi i te tahi, a faaaraara ˈtu ai ia rahi te aroha, o te rave i te mau ohipa maitatai ra: eiaha hoi e faarue i to tatou haaputuputuraa . . . no te mea te hiˈo na outou i taua mahana ra i te fatataraa mai.” (Hebera 10:24, 25) Oia mau, te hiˈo noa ra te nunaa a Iehova i te mahana faaoraraa i roto i te ao apî a te Atua e fatata maira, e no reira ua matauhia ratou no ta ratou putuputuraa amui.

Ua tapao te Sunday Telegraph no Lonedona no nia i te hoê haaputuputuraa i te hoê tahua taaroraa rahi e: “Ua matauhia i te ite e aita e oto i nia i te feia e parau ra e ‘Te fatata maira te hopea o teie nei ao.’ Ua fatata iho â. I roto i taua area taime ra, e au ra e te faaanaanatae nei te taata tataitahi ia ˈna iho ma te au noa, te tia, te paieti e te ieie.” Ua tapao faahou te vea ra e: “Mai te peu e ua fatata roa teie faanahoraa o teie nei ao i te mou, e au ra e ua ineine maitai te mau Ite i Twickenham no te faanaho i te ao apî.”

Ia vai ineine oia hoi ia ohipa noa, te raveraa i te hoê â ohipa e ta Noa i rave na, o tei tavini i te anotau hou te Diluvi ei “taata i aˈo i te parau-tia.” (Petero 2, 2:5) Ia vai ineine oia atoa te riroraa ei taata “haapao maitai e te paieti.” Te titau-manihini-hia nei, e, te faaitoitohia nei outou ia apiti mai i te nunaa o Iehova “i te tiairaa e te ruraa ˈtu ia tae mai taua mahana o te Atua ra.”—Petero 2, 3:11, 12.