Eaha te huru o to outou oraraa a muri aˈe?
MEA rahi te mau ohipa ta te tuatapaparaa no nia i te génome o te taata i faaite mai no nia i te mau maˈi tumu e nehenehe e roohia i nia i te taata. Tera râ, eaha te nehenehe e parau no nia i te ravea rapaauraa e oia hoi no nia i te parururaa i taua huru maˈi ra?
Rahi noa ˈtu â te mau maimiraa i te ravehia no nia i te mau génomes o te mau raau, o te mau animala, e o te mau taata, rahi noa atoa ˈtu â te mau ravea i te faaohipahia no te faatupu i te mau raau e te mau ravea rapaauraa i te mau maˈi, ta The Times ïa no Lonedona e parau ra. Tera râ, mai ta te vea Industry Week e faaite ra, te horoa ra te mau aivanaa i te hoê parau faaararaa no te mea “ua nehenehe [teie huru tereraa] e faataere mai e 20 e tae atu i te 50 matahiti hiˈopoaraa i te mau tapao o te maˈi.” Teie huru tupuraa, ia au i te orometua haapii no nia i te biochimie ra o Charles Cantor, e nehenehe ïa e faarue i te hoê taata “i ere-papu-hia i te tiaturiraa.” Eita râ hoi te reira e hinaarohia.
Te tǎpǔ maira hoi te Bibilia ma te maramarama maitai e e ore roa te mau maˈi atoa. “E na te Atua e horoi i ratou roimata atoa, e ore roa te pohe e te mihi e te oto, e ore atoa ïa,” ta te Apokalupo 21:4 ïa e haapapu ra. E nehenehe anei ta te feia tuatapapa i te parau no te mau huru tupuna e faatupu i te reira ei parau mau na roto, ia au i ta te vea ra The Christian Century e parau ra i te “apitiraa ˈtu i roto i te hamaniraa i te mau huru tupuna”? E ere te tupuraa te mau parau tǎpǔ a te Bibilia, tei te faaoti-roa-raa ïa i te Opuaraa e tuatapapa i te parau no te Génome o te Taata, tei te “apitiraa ˈtu i roto i te hamaniraa i te mau huru tupuna,” aore ra i te haamaitai-riirii-raa i te natura. Papu maitai, e tuati te reira i te puai ohipa o te Atua, oia hoi to ˈna varua moˈa.
Te patoiraa i te huru tupuna e te mau mea e haaati ra
Te tahi tau toru tausani matahiti i teie nei, teie ta te hoê arii Iseraela i parau: “Ua taa ê hoi to ˈu hamaniraahia.” Noa ˈtu â ïa e aita rea ohipa ta Davida i ite no nia i te Opuaraa e tuatapapa i te parau no te Génome o te Taata o teie nei tau, ua himene oia i teie mau parau ei arueraa i te Atua: “Ua ite to mata ia ˈu i to ˈu vai-oti-ore-raa ra; e ua oti to ˈu mau melo atoa ra i te papaihia i roto i te buka na oe.”—Salamo 139:14, 16.
Mea nafea teie nei arii no tahito ra i te iteraa e ua oti to ˈna tupuraa mai te hoê aiû i roto i te opu o to ˈna metua vahine i te “papaihia”? Ua farii o Davida iho e: “Te parau nei te [varua] o Iehova ia ˈu, e tei tau vaha nei ta ˈna parau.” (Samuela 2, 23:2) Oia mau, ua faaurua te puai ohipa o te Poiete, oia hoi te varua moˈa i te mau papai a Davida.
Aita anei e haapiiraa i ǒ nei ta te mau taata e rave rahi i teie nei mahana i ore i ite, aore ra e tia ia hiˈopoa? Noa ˈtu â ïa e faatupu te mau huru tupuna e tae noa ˈtu te mau mea e haaati ra ia tatou i to tatou huru taata, e nehenehe te varua moˈa o te Atua e ohipa puai i nia ia tatou, e oia hoi e patoi i te tahi atu mau huru faaohiparaa.
A hiˈo na i te ohipa i farereihia e Ian. “E tamaiti iti mahutahuta roa vau,” ta ˈna ïa e faataa ra. “E e taata mahutahuta rahi atoa hoi to ˈu metua tane ia tae i to ˈna taime, e i teie mai te reira atoa ta ˈu mau tamarii tamaroa. I to ˈu apîraa, e taata mahutahuta roa vau. E eita ta ˈu e nehenehe e faahiti i te hoê noa ˈˈe parau ma te ore e uˈu e e otuitui, e i muri iho ua haamata aˈera vau i te inu i te ava ei ravea na ˈu no te pahono. Ua tamǎrû te reira ia ˈu, aore ra ua manaˈo hoi au e ua tamǎrû te reira ia ˈu. I te parau mau, ua rahi roa ˈtu â te inu i te faaino ia ˈu.” I te haamataraa o Ian i te haapii i te Bibilia e te mau Ite no Iehova, ua ite aˈera hoi oia e e tia ia ˈna ia faaea roa i te inu i te ava no te haavî i to ˈna feruriraa. “Ua manaˈo vau e navai noa na nia i to ˈu puai no te hoê matahiti taatoa. Tera râ,” o ta ˈna ïa e farii ra, “aita vau i nehenehe e parau e ua navai.”
“I te hoê mahana,” o ta ˈna ïa e parau faahou ra, “te haere noa ra vau na te aroâ i raro aˈe i te ûa ma te manaˈo e e haere noa vau e pohe noa ˈtu vau. Ua faaea vau i te inu e ua haamata faahou vau i te inu e rave rahi taime. E ua ite aˈera hoi au e ua tamata vau i te arai i to ˈu fifi ma te faaohipa i ta ˈu iho ravea, eiaha râ i ta Iehova ravea. No reira, ua haamata aˈera vau i te pure a haere noa ˈi au, i te parauraa ia Iehova e, e rave au i teie nei i te mau mea ta ˈna e titau mai, ma te ani atu ia ˈna i to ˈna varua moˈa no te faaitoito ia ˈu.” Ua tupu te reira hoê ahuru matahiti i teie nei. Eaha te huru o Ian i teie nei?
“E tiâ ia ˈu ia faaitoito no te haavî i to ˈu nei paruparu,” o ta ˈna ïa e farii ra, “e ua haapii au nafea râ ia tiaturi ia Iehova no te tamau â i te haere i mua.” Eaha te tumu ta Ian e horoa ra no to ˈna manuïaraa? “Te haamanaˈo ra vau i ta ˈu taioraa bibilia matamua i muri aˈe i to ˈu hoˈi-faahou-raa ˈtu i te amuiraa a te mau Ite no Iehova. O te Salamo 116 hoi, e haamata ra e: ‘E hinaaro rahi to ˈu ia Iehova, o tei faaroo mai i tau reo i ta ˈu i ani atu.’ I te afaraa o te salamo, teie ta ˈu i taio: ‘Eaha râ ta ˈu ia hopoi atu na Iehova, i te mau hamani maitai no ˈna ia ˈu nei?’ [irava 12] Ua riro te reira mai te hoê ravea no te haere i mua o tei tauturu ia ˈu ia hoˈi i muri i nia i te eˈa tano.” Te faaara nei o Ian i te mau taata atoa e farerei nei i te hoê â huru tupuraa mai to ˈna: “Eiaha e haavare ia outou iho.” Te na ô faahou ra oia e: “I to ˈu faarururaa i to ˈu mau fifi e i to ˈu pureraa no te varua moˈa o Iehova no te faaitoito i ta ˈu nei faaotiraa, ua haamata aˈera vau i te manuïa.”
Te tiaturi nei o Ian, mai te rahiraa Ite no Iehova tei fatata e pae mirioni, i nia i te varua moˈa no te tauturu ia ˈna ia apee i te eˈa e vai ra i roto i te buka haapiiraa faufaa roa ˈˈe, te Bibilia. A faatia na i te mau Ite o te vahi i to outou vahi faaearaa ia faaite atu ia outou i ta ˈna poroi maramarama maitai e te ohie—no nia i te Basileia o te Atua, ta ˈna faatereraa i nia i te raˈi i roto i te rima o Iesu Mesia tei faatiahia mai. Fatata roa taua faanahonahoraa nei i te faaore roa i te mau tapao atoa o te mau huru tia ore no roto mai i te tupuna e i te horoa mai na te huitaata nei i te hoê paradaiso i reira e nehenehe ai e ora e a muri noa ˈtu. E nehenehe atoa outou e ora i reira!