Taua mau reni faufaa mau i feruri-noa-hia ra

NA TE TAATA PAPAI A ARA MAI NA! I BERETANE

A HIˈO na i te hoê hohoˈa fenua aore ra i te hoê taoˈa menemene o te faahohoˈa ra i te fenua nei o te ao nei. Te ite ra anei outou i te faanahoraa o te mau reni tia e te mau reni tarava i nia iho? Eita e ore outou i te vitiviti noa i te taa e, taua reni tarava i ropu i te hohoˈa fenua o te reni ropu o te fenua ïa. Tera râ, eaha te nehenehe e parau no te tahi atu mau reni? Eaha taua mau reni ra?

Teie mau reni e parauhia ïa te aano e te roa. Te mau reni o te aano e tarava ra i nia i ta outou hohoˈa fenua, te faatuati atura ïa ratou i te mau vahi o te fenua nei hoê â to ratou atearaa ia haamatahia mai te reni ropu o te feunua atu. Te mau reni o te roa, i te tahi aˈe pae, e tapaohia ïa mai apatoerau atu i apatoa, mai te hoê poro e tae atu i te tahi poro. Eita e ore outou i te haamanaˈo i ta outou mau haapiiraa no nia i te teotarafia i te fare haapiiraa. Tera râ, eaha te tapao a teie nei faanahoraa reni e titau ra? Nafea o ˈna ia ohipa? E nohea mai hoi taua faanahoraa reni ra?

Te tapaoraa e teihea outou

Ia au i teie faanahoraa reni o te aano e o te roa, e nehenehe te mau vahi atoa o te fenua nei e papu-maitai-hia na roto e piti huru ravea faitoraa parauhia te mau coordonnées. Ei hiˈoraa, e nehenehe outou e ite i te Oire no New York i nia i te hohoˈa fenua ia au i te faito aano 40°42’ Apatoerau e te faito roa 74°0’ Tooa o te râ, oia hoi te auraa tei nia te oire i te 40 teteri 42 minuti apatoerau o te reni ropu o te fenua e e 74 teteri tooa o te râ o te reni o te roa e na Greenwich atu, oia hoi te hoê aroâ no Lonedona, i te fenua Beretane, i te vairaa.a Mai te peu e e amuihia mai te mau tetoni i teie mau coordonnées, e nehenehe atoa e itehia i te vairaa o te mau fare tahua i roto i te hoê oire. Ei hiˈoraa, tei te aano 40°42’45” Apatoerau e tei te roa 74°0’23” Tooa o te râ te vairaa te fare oire i roto i te Oire no New York.

E numerahia te mau faito roa ia au i teie nei mau reni. Ei hiˈoraa, te roaraa o te hoê maile, hoê ïa minuti aano e faitohia ia au i te roaraa o te hoê tuhaa o te hoê méridien e vai ra i rotopu e piti reni aano hoê minuti te atea. I te mea hoi e tei te 90 teteri te hoê poro, aore ra tei te 5 400 minuti (90 x 60 = 5 400), te aano mai te reni ropu o te fenua atu, hoê maile 1/5 400 ïa te atearaa mai te poro e tae atu i te reni ropu o te fenua. No reira, te faito au noa o te maile e 6 080 ïa avae oia hoi 1 8532 kilometera.

Papu maitai, e riro mau â te aravihi no te faataa papu i te vairaa mau o te hoê vahi, ei haamaitairaa rahi mau no te feia horo pahi iho â râ. Ia nehenehe te hoê faanahoraa mai teie te huru e manuïa, ei mau tapao faahororaa papu mau ta tatou ïa e tia ˈi. Ua riro te reni ropu o te fenua ei tapao tano maitai i maitihia ei niu i reira hoi te mau faitoraa o te aano e ravehia ˈi. Tera râ, no te aha o Greenwich i maitihia ˈi no te faataa i te vairaa o te méridien matamua, te tapao e ravehia no te mau faito roa hitia-tooa o te râ? Inaha, mea nafea teie manaˈo no nia i teie mau reni i faahepohia mai e te taata i nia i ta ˈna mau hohoˈa fenua, i te tupuraa mai?

Te mau reni e to ratou aamu

I te piti o te senekele hou to tatou nei tau, ua faaohipa aˈera te taata heleni ra, taata tuatapapa i te reva teitei o Hipparchus, i te parau no te mau reni feruri-noa-hia e faataa i te vairaa o te mau tuhaa fenua i nia i te fenua taatoa nei. Ua maiti aˈera oia i te hoê reni na roto atu i te motu heleni no Rhodes ei tapao i reira oia e numera ˈi i te mau vairaa mai te pae hitia o te râ e te pae tooa o te râ. E pinepine i te parauhia e o te taata tuatapapa heleni i te reva teitei o Claudius Ptolemy no te senekele piti o to tatou nei tau, te taata matamua o tei faataa mai i te hoê faanahoraa e tuati i teie e faaohipahia ra i teie tau. Ua hutihia ta ˈna mau reni aano ia au i te hoê â faito e te reni ropu o te fenua. No te roa, ta ˈna tapao haamataraa o te hoê ïa reni e na roto atu i te poro tooa o te râ o te ao o to ˈna tau, te mau Motu Fortune, oia hoi mau Motu Canaries e parauhia i taua tau ra.

E ere i te matahiti 1884 ra te ao nei i te fariiraa i te parau no te hoê reni roa matamua no reira mai hoi i te faitoraahia te mau tapao mai te hitia o te râ i te pae tooa o te râ. I taua matahiti ra, e 41 mau tia no e 25 mai rahiraa fenua tei putuputu i te Apooraa Rahi no te Méridien i te oire no Washington. I te pae no te mau hiˈopoaraa e au no te tuatapaparaa i te parau no te reva teitei i ravehia i te méridien matamua, ua maiti te mau tia i te hoê reni e na roto atu i te hoê pu hiˈoraa fetia nahonaho maitai. Ua maiti te pae rahi i te reni e na Greenwich atu i te fenua Beretane.

Te tere e te mau pu o te faataa i te hora

E ere te maitiraahia o Greenwich ei tapao no te méridien matamua i te mea tupu noa mai. Mai te 18 mai â o te senekele, ua tapao mai te mau raatira pahi e na te uahu atu no Lonedona e, ia tere ratou i te pae tooa o te râ, na roto atu i te Ataranitita, e maoro roa i te mau mahana atoa, e taeahia ˈi i te mahana i to ˈna faito teitei roa ˈˈe. Ua ite ratou e no te mea e ohu te fenua i roto e 360 teteri i te mau 24 hora atoa, te taa-ê-raa o te hoê maororaa hoê hora, 15 ïa teteri te roa mai Greenwich atu. No reira, ia faaohipahia te mau uati e tapaohia na te hora o te raatira pahi ia au i te hora a te pu hiˈopoaraa i te mau tino o te raˈi no Greenwich, e nehenehe ïa ta ratou e numera e teihea mau na ratou i nia i te moana, na roto noa i te tapaoraa ratou i te taa-ê-raa i rotopu i te hora no Greenwich e ta ratou iho hora. Ei hiˈoraa, mai te peu e tei te hoê vahi ratou i reira e taeahia ˈi i te mahana i to ˈna faito teitei roa ˈˈe (12H00 o taua vahi ra), i muri iho i te 3H30 i te avatea. Te hora Greenwich, na roto noa i te hoê numeraraa ohie roa, e nehenehe ta ratou e faataa i to ratou vairaa mai te 52,5 teteri (15 x 3,5) tooa o te râ no Greenwich, oia hoi te fatata ˈtura ratou i te mau pae miti no Newfoundland, e faaite ra e ua faaea noa ratou i nia i taua nei â aano ra.

E ere roa ˈtu i te mea fifi ia faaea noa i nia i taua nei â faito tere ra. E rave rahi senekele to te mau taata tere pahi i te poro Apatoerau iteraa e e fa mai na te fetia no apatoerau e e mau noa na hoi oia ia faaauhia i te tereraa o te rahiraa o te tahi atu mau fetia i te po. Ua haamata ratou i te faataa e mea atea mau â ratou i te pae apatoerau e te pae apatoa, ia faito ratou i te teitei o taua fetia ra i nia i te iriatai. I rapae mai i nia i te moana, ua ite aˈera hoi ratou e te tere tia ra ratou i te pae hitia o te râ aore ra tooa o te râ oi taua fetia ra e itehia ˈtu ai i nia i te hoê noâ faito teitei.

E mau haamaitairaa ê atu tei itehia no te fenua Beretane i te maitiraahia o Greenwich ei aveiˈa. I te haamauraahia te reni tereraa pereoo auahi i reira, ua titauhia aˈera te hoê faanahoraa hora taa maitai i roto i taua fenua ra. Auê râ hoi i te peapea no te taata tere e ia ite oia, ia tae noa ˈtu oia i te vahi faarevaraa no te rave i te pereoo auahi i te 11H33, e ua faareva ê oia tau 14 minuti na mua ˈtu! Te fifi? Ua faaohipa ïa oia i te hora Exeter; e faaohipa na hoi te faanahoraa o te reni pereoo auahi i te hora no Lonedona. Inaha, ua faaore roa te fariiraahia te Hora no Greenwich i roto i taua fenua ra, i taua mau fifi ra.

Te vai atoa ra te mau fifi rarahi i te mau Hau Amui no Marite. E mau hora taa ê roa to te mau reni tereraa pereoo auahi. Ua aratai aˈera teie huru tupuraa e ia haamauhia te hoê Ture no te Hora o te mau reni tereraa pereoo auahi, i te matahiti 1883 ra. E maha tuhaa no te hora, 15 teteri te roa o te atearaa o te mau tuhaa tataitahi, aore ra hoê hora te maororaa, e o te tapoˈi i te fenua rarahi o te mau Hau Amui no Marite, i fariihia. Ua tia hoi te mau oire atoa i roto i te hoê tuhaa ia mau hoê â huru hora.

E ua fariihia aˈera taua faanahoraa hora ra i roto i te mau tuhaa o te ao taatoa nei. Ua tatuhaahia te ao nei i roto e 24 tuhaa hora. Te pu o taua faanahoraa ra o te Tuhaa 0 ïa, e 7 teteri e te 1/2 i te pae tataitahi o te méridien no Greenwich. E ia tere te hoê taata i te pae hitia o te râ, e faatano ïa oia i to ˈna uati hoê hora i muri aˈe ia haere noa oia i roto i te mau tuhaa tataitahi. I te pae tooa o te râ râ, e faatano ïa oia i to ˈna uati hoê hora na mua ˈˈe.

I te afaraa o te eˈa i roto i te ao nei na Greenwich atu, e tupu te hoê huru tupuraa faahiahia mau. I ǒ nei, i te 180 teteri méridien, e 24 ïa hora te taa-ê-raa mai te hoê pae o te reni i te tahi atu pae. E inaha, ua riro maira na 180 teteri méridien, ma te tahi mau tauiuiraa iti no te faatano i te mau otia o te fenua, ei reni o te taio mahana o te ao nei. Ia na rotohia ˈtu i taua reni nei i te pae tooa o te râ, e erehia i te taata ratere hoê mahana. E i te tahi aˈe pae, ia na te pae hitia o te râ oia i te reni, e fanaˈo ïa oia hoê mahana hau.

Te vai faufaa nei â

Ua mairi te mau mahana o te mau ravea taio taime i hiˈopoahia i Greenwich e i tatarahia mai i rapae i te moana no te numera i te parau no te roa. Ua mono te mau ravea apî o teie nei tau i taua mau mea atoa ra. Te horoa mai nei hoi te reni radio, te radar e te mau ravea haapurororaa parau i te mau parau apî roa. Inaha, maoti taua reni aano e roa i feruri-noa-hia outou e nehenehe ai e taa e teihea râ mau na outou i nia i te hoê hohoˈa fenua. E nehenehe tatou e haamauruuru i teie mau reni faufaa mau feruri-noa-hia ra.

[Nota i raro i te api]

[Tumu parau tarenihia/Hohoˈa i te api 24]

TE HORA GREENWICH

I te matahiti 1675 ra, ua faaue aˈera te Arii Charles II no Beretane e ia hamanihia “hoê pu nainai hiˈopoaraa i te mau tino o te raˈi” i roto i te vahi e parauhia i teie nei te oire iti Lonedona no Greenwich “no te numera i te roa o te mau vahi ia nehenehe te mau tere na te moana e oia hoi na te raˈi ia tupu maitai.” Ua haamauhia te mau tuhaa o te hora, e te mau hora rarahi i nia i te 13 avae [4 metera] te roa, no te faatupu i te mau numeraraa tano no nia i te ohuraa o te fenua.

Aita i maoro aˈenei, ua itehia i te mau aivanaa no te Pu hiˈopoaraa fetia Hui arii e aita te fenua e ohu ra i nia i te hoê â faito vitiviti. E te reira, no te mea e ere te araoa o te fenua na te hiti i te mahana, i te hoê menemeneraa papu maitai e ua opa te poro o te fenua. No reira, te mahana—i te area hora 12 e tae atu i te hora 12—e taa ê ai i te pae no to ˈna maororaa i roto i te matahiti. Ia ohipa te mau hora no Greenwich, e nehenehe ïa te mau numeraraa e ravehia o te haamau hoi i te hoê faito maororaa o te mahana.

Ua riro te hora 12 no Greenwich ei taime i reira te mahana e puai roa ˈi i nia i te mau vahi atoa o te reni roa no Greenwich, aore ra méridien (Latino, meridianus, no te hora ahuru ma piti). Ma te niuhia i nia i teie nei parau latino, ua itehia aˈera hoi te hora na mua ˈˈe i te hora ahuru ma piti mai te ante meridiem (a.m.), aore na mua ˈˈe i te hora ahuru ma piti; te hora i muri aˈe i te hora 12, ua riro maira ïa ei post meridiem (p.m.).

[Hohoˈa]

I nia mai: Te Pu hiˈopoaraa fetia Hui arii no Greenwich. I te pae atau: Te reni méridien i nia i te aua ofaifai

[Hohoˈa fenua i te api 22]

(Hiˈo i te papai)

TE MAU TUHAA HORA

-11 4:00

-10 5:00

-9 6:00

-8 7:00

-7 8:00

-6 9:00

-5 10:00

-4 11:00

-3 12:00

-2 1:00

-1 2:00

0 3:00

+1 4:00

+2 5:00

+3 6:00

+4 7:00

+5 8:00

+6 9:00

+7 10:00

+8 11:00

+9 12:00

+10 1:00

+11 2:00

+12 3:00