Te uiui nei te mau taurearea . . .

Te haamaruaraa tamarii—Te reira anei te ravea?

“I te haapapuraahia na roto i te hoê hiˈopoaraa e ua hapu vau,” ta Judy ïa e haamanaˈo ra, “ua ani oioi mai to ˈu hoa tane e ia haamarua vau i te tamarii. Ua horoa atoa mai oia i te moni no te reira.” E 17 noa matahiti to Judy.a

I TO Marta e 15 matahiti iteraa e ua hapu oia, ua paraparau atu oia i te hoê taata aˈo i te fare maˈi no nia i te haamaruaraa tamarii. “Ua faataa mai oia ia ˈu i te mau mea atoa,” o ta Marta ïa e parau ra. “Ua parau mai oia ia ˈu e nehenehe au e haamarua i te tamarii aore ra e tauturu oia ia ˈu ia ite i te hoê piha ohipa no te faaamuraa tamarii aore ra te hoê fare haapaoraa tamarii, mai te peu e o te reira ta ˈu e hinaaro ra.”

Ua hau atu i te hoê mirioni taurearea tamahine o te hapu nei i te mau matahiti atoa i te fenua marite noa. I rotopu ia ratou te vai ra te mau taurearea o tei, noa ˈtu te haapiiraa kerisetiano, faaroo ore i te faaueraa a te Atua ia “ore outou ia faaturi,” aore ra e faatupu i te mau taatiraa i te pae tino na mua ˈˈe i te faaipoiporaa. (Tesalonia 1, 4:3) E hope ïa taua taatiraa viivii i te pae tino ra na roto e rave rahi mauiui faufaa ore. E rave rahi râ i rotopu i taua mau taurearea ra, o tei tatarahapa i to ratou huru haerea e te hinaaro nei ratou e faatitiaifaro i to ratou huru oraraa. Tera râ, i mua i te mǎtaˈu e fanau mai i te hoê tamarii i rapaeau mai i te faaipoiporaa, ua manaˈo vetahi e ahiri e ere te haamaruaraa tamarii i te ravea no ta ratou mau fifi. Noa ˈtu râ, i te mau matahiti atoa te maiti nei fatata i te afa mirioni tamahine tei hapu i te fenua marite noa i te haamaruaraa tamarii. O te reira anei te pahonoraa maitai roa ˈˈe i te hoê hapuraa hinaaro-ore-hia?

No te aha vetahi e haamarua ˈi i te tamarii

Ma te taa maitai, e mana rahi mai te tahi mau manaˈo horuhoru puai e o te faatupu i te aroraa i roto ia outou. E tupu mai iho â i roto i te hoê vahine apî i te tahi mau manaˈo natura o te metua vahine no te tamarii e paari ra i roto i to ˈna opu, e ua tano atoa hoi te mǎtaˈu e te hepohepo rahi.

Ei hiˈoraa, e ahuru ma vau matahiti to Vicky, te “hinaaro ra oia e haere i te haapiiraa tuatoru, e peneiaˈe e riro mai ei orometua haapii i muri iho.” I roto i to ˈna feruriraa, e faataui te fanauraa i te tamarii i ta ˈna opuaraa. (’Teen magazine, mati 1992) Hoê â atoa faaotiraa ta Marta: “Mai te peu e e riro mai oe ei metua vahine, e faaea oe i te fare e ta oe tamarii, eita ïa oe e nehenehe e haere faahou i te haapiiraa. Aitâ vau i ineine atura no te reira.” Ia au i te hoê titorotororaa, te manaˈo ra e 87 i nia i te hanere o te mau taurearea o tei haamarua i ta ratou tamarii, e e taui roa to ratou oraraa ma te peapea hoi i roto i te hoê tuhaa e aitâ ratou i ineine atura i te farii atu.

Ua riro atoa te mǎtaˈu o te mau fifi i te pae moni e te feruriraa e eita e maraa i te hopoia o te metua faaea otahi noa ei tumu atoa e e haamarua e rave rahi i te tamarii. Teie ta Vicky i parau: “No roto hoi au i te hoê utuafare e ua faataa to ˈu nau metua, e ua faaamu to ˈu metua vahine i ta ˈna e toru tamarii o ˈna anaˈe. Ua ite au i to ˈna peapea . . . Ua ite noa hoi au ia ˈu iho i te riroraa mai to ˈu metua vahine ei metua vahine faaea otahi noa.”

Na te mau parau faateimaha atoa a vetahi pae, te hoa tane iho â râ, o te horoa i te puai no te faaore i te hoê hapuraa. Teie te maitiraa i horoahia e te hoa tane a Judy: “Mai te peu e eita oe e haamarua i te tamarii, eita vau e hinaaro faahou e hiˈo ia oe.” No Nancy, na to ˈna metua vahine i faahepo ia ˈna ia haamarua i te tamarii e na te tahi mau fetii atoa.

Te faatupu atoa ra te manaˈo farii-rahi-hia e aita e haapohe-mau-hia ra i te hoê tamarii, i te mana puai mau. Te parau ra o Vicky e: “Aita vau e faatia ia ˈu iho ia farii i te reira mai te hoê aiû. . . . Ua taio vau e i te paeraa o te hebedoma, e mea nainai aˈe te huero i to oe maiuu rima iti ra. Ua tapea maite au i taua mau manaˈo ra. Ua parau vau ia ˈu iho e mai te peu e mea nainai mai te hoê maiuu rima iti, e ere ïa i te hoê aiû. Ua tamata vau i te faariro i te reira ei parau mau i roto i to ˈu feruriraa e e nehenehe atu ai au e haamarua i te tamarii.”

Ua faahiti atoa vetahi i te reira, i roto paha i te mau nunaa e haere ra i mua i te pae faufaa, e e ohipa tiamâ te haamaruaraa tamarii—peneiaˈe no te faatiamâ i te taurearea tamahine ia haapao i te tamarii. I muri aˈe i te hiˈopoaraa i te mau tuhaa atoa, e au ra e mea maitai roa te haamaruaraa tamarii. Teie nei râ, te faaite ra te ohipa i tupu e te rahiraa o tei maiti i te haamaruaraa tamarii, ua inoino roa ratou i muri iho. Te parau ra te hoê vahine e: “Ua faatupu vau i te hoê haamaruaraa tamarii i te 20raa o to ˈu matahiti. I teie nei e 34 to ˈu matahiti, e mea fifi no ˈu i te ora e te ohipa o ta ˈu i rave. Ua hinaaro vau i ta ˈu aiû, aita râ to ˈu hoa tane i hinaaro. Te faaruru noa nei au i te mauiui i te pae o te feruriraa; e vai noa mai te mauiui i pihai iho ia oe no te toearaa o to oe oraraa.”

Te mau mǎtaˈu i te pae o te manaˈo horuhoru

Maoti hoi i te riro mai ei ravea ohie, te faaino roa nei te haamaruaraa tamarii i ta outou mau fifi. I te pae hopea, e faahape te reira i te aravihi e vai ra ia tatou ra no te ite eaha te maitai e te ino—te haava manaˈo ta te Atua i tuu i roto i te mau taata atoa. (Roma 2:15) Hau atu, te titau nei te haamaruaraa tamarii e ia opani te metua vahine i te manaˈo no te faaite i te here i nia i te ora iti nainai e tupu ra i roto ia ˈna. (A faaau e te Ioane 1, 3:17.) Auê hoi i te peapea e!

Te parau ra o Marta e: “E ere noa e piti hebedoma [i muri aˈe i te haamaruaraa tamarii] to ˈu haamataraa i te faahapa ia ˈu e te iteraa i te haama no te mea o ta ˈu i rave.” Ua hau roa ˈtu te tupuraa i te ino mai a tae mai ai te avaˈe febuare—te avaˈe e fanau ai au i te aiû. Te tapao atoa ra o Eliasa e: “Ua mairi e ahuru ma pae matahiti a faatupu ai au i te hoê haamaruaraa tamarii. I muri aˈe i te reira, ua mauiui au i te hepohepo hohonu ino mau e ua tia e ia rapaauhia vau i roto i te hoê fare maˈi e rave rahi taime. Ua hinaaro atoa vau e haapohe ia ˈu iho.”

Parau mau roa, aita te taatoaraa o te mau vahine e apee i taua huru haerea ra. Te tiaturi nei e rave rahi ma te aau rotahi e e ere te huero i te hoê taata ora. Eaha râ ta te Poiete—“te tumu o te ora”—e parau nei no nia i taua tumu parau ra? (Salamo 36:9) Te haapapu maitai ra te Bibilia e no te Atua ra o Iehova ua hau atu te aiû aitâ i fanauhia i roto i te opu o te metua vahine i te hoê noa haapueraa huero. Ua faaurua oia i te Arii ra o Davida ia papai e: “Ua ite to mata ia ˈu i to ˈu vai-oti-ore-raa ra; e ua oti to ˈu mau melo atoa i te papaihia i roto i te buka na oe.” (Salamo 139:16) No reira, te hiˈo nei te Poiete i te huero mai te hoê taata taa ê mau, te hoê taata ora. No reira, ua faaara oia e e ani oia i te hoê faahoˈiraa ia hamani-ino-hia i te hoê aiû aitâ i fanauhia ˈtura. (Exodo 21:22, 23) Oia mau, ia au i te mau manaˈo o te Atua, ua tuea noa te taparahiraa i te hoê aiû aitâ i fanauhia, i te hoê taparahiraa taata. Te hoê tamahine o te hinaaro nei e ia au mai te Atua ia ˈna, eiaha ïa oia e manaˈo e ua riro te haamaruaraa tamarii ei ravea o te nehenehe e fariihia—noa ˈtu eaha te faateimaharaa e tuuhia i nia ia ˈna.b

A imi i te turu

Ua maiti o Judy, tei faahitihia i te omuaraa, e ore e haamarua i ta ˈna aiû. Te parau ra oia e: “Ua ite to ˈu tuahine matahiapo i te reira e mai te haamataraa mai â, ua riro oia ei turu papu na ˈu i te pae o te mau manaˈo hohonu iho â râ. Ua parau atoa mai oia e e tamau oia i te turu ia ˈu ia fanau anaˈe au i te aiû. O te mea ïa o ta ˈu e hinaaro ra i te faaroo no te rave i te mea o ta ˈu e manaˈo ra e mea maitai tei aa hohonu roa i roto i to ˈu mafatu. Ua rave au mai ta ˈu i faaoti e ua fanau vau i te aiû iti.” Ua tupu te reira a iva matahiti i teie nei. Ma te hiˈo i ta ˈna tamaiti e vau matahiti, te parau ra o Judy e: “Ahiri au i haamarua i te tamarii, o te hoê ïa hape rahi roa o ta ˈu e rave i roto i to ˈu nei oraraa.”

Te faatia atoa ra mai te hoê vahine apî o Natisa to ˈna iˈoa e: “A pae matahiti i teie nei, ua parahi au i roto i te hoê fare maˈi no te haamarua i te tamarii, te tiai ra vau e ia piihia vau. Maoti hoi i te haere e hiˈo i te taote, ua feruri faahou vau e ua haere atura vau i rapaeau mai o te fare maˈi. I teie nei, ua fanau vau i te hoê tamaiti iti e maha matahiti haviti mau, e fatata faahou vau i te fanau, e ua faaipoipo vau i te hoê metua tane here mau.”

Ia hapu noa ˈtu vetahi i rapaeau mai i te faaipoiporaa, eiaha roa ˈtu e tia ia rave i te hoê faaotiraa ino mau. Noa ˈtu te fifi o te huru tupuraa, e ere te reira i te hopearaa o te ao nei. Papu maitai te titau nei taua taata ra i te tahi turu e te tahi aratairaa no ǒ mai i te feia paari. Ua riro te aparauraa e to outou metua ei haamataraa maitai roa, mai te peu iho â râ e mau metua kerisetiano. (Maseli 23:26) Papu maitai, e inoino ratou i te pae o te mau manaˈo hohonu e e riri atoa hoi ratou. I roto râ i te roaraa, e turaihia ratou ia tauturu ia outou. Ei hiˈoraa, e faanaho ratou i te tahi mau aupururaa na mua ˈˈe i te fanauraa. E nehenehe atoa ratou e tauturu ma te faaohipa i te mau porotarama a te apooraa oire no te feia e titau nei i te reira. Te mea hau atu â i te faufaa, e nehenehe ratou e faaitoito i te taata i hape e ia noaa i te tauturu titauhia i te pae varua no ǒ mai i te mau matahiapo a te amuiraa.—Iakobo 5:14, 15.

Ua maiti vetahi vahine tei ore i faaipoipohia e horoa i ta ratou aiû e ia faaamuhia, ma te manaˈo e eita ratou e nehenehe e horoa ˈtu i te mea maitai aˈe. Noa ˈtu e mea maitai e horoa i te tamarii e ia faaamuhia maoti hoi i te haapohe i te ora o te aiû, e titau râ te Atua i te hopoia i te metua no te mea o ta ˈna ‘i rave no to ˈna utuafare.’ (Timoteo 1, 5:8) Eita iho â te hoê metua otahi e nehenehe e horoa no ta ˈna tamarii i te mea maitai aˈe i te pae materia, e nehenehe râ oia e horoa i te hoê mea faufaa roa ˈˈe—te here. (Maseli 15:17) No reira i raro aˈe i te tahi mau huru tupuraa, e mea maitai no te tahi mau vahine faaipoipo-ore-hia ia faaamu o ˈna iho i te tamarii.

Eaha ïa no nia i te hopoia e faaamu i te hoê tamarii—e papu maitai e faatupu te reira i te tahi mau tauiraa i roto i te huru oraraa? E riro paha teie mau ohipa i te mea teimaha roa. Teie nei râ, te horoa nei te Bibilia i te tahi mau aˈoraa ohie mau o te tauturu i te mau taata ia haapao i taua mau tautooraa ra. E nehenehe atoa te mau metua vahine faaipoipo-ore-hia tei tatarahapa e fanaˈo i te turu î i te here tei niu-papu-hia i nia i te Parau a te Atua. Oia mau, na roto i te tahi turu horoahia ma te here e te aratairaa tano, e horoa te reira i te mea maitai aˈe i roto i te huru tupuraa.c E ere noa te haamaruaraa tamarii i te pahonoraa!

[Nota i raro i te api]

[Hohoˈa i te api 30]

E tamata pinepine te mau hoa tane i te faateimaha i te tamahine no te faatupu i te hoê haamaruaraa tamarii