Ia au i te Bibilia

Ia riro anaˈe te faaea-taa-noa-raa ei ô

‘TE MOEMOE nei au,’ o ta te hoê vahine kerisetiano e autâ ra o tei riro ei vahine ivi e rave rahi matahiti i teie nei. ‘Ua hinaaro noa vau i te hoê hoa faaipoipo. Ua riro te rave-tamau-raa i te ohipa ei tauturu. Ua riro te mau hoa ei tauturu. Te hinaaro nei râ vau e faaipoipo.’

Ia hinaaro mau oe e faaipoipo aita râ ta oe maimiraa i te hoê hoa i manuïa, eita roa ˈtu te faaea-taa-noa-raa e riro ei ô—ua hau atu te reira, mai te huru ra e ua faautuahia oe i te fare tapearaa o te mau manaˈo tia ore o te haaparuparu e o te faateimaha ia oe. Aore ra, mai te peu e e utuafare fetii to oe tera râ te faaea taa noa ra oe, tei ia oe anaˈe ra te hopoia no te horoa i te mau mea atoa e hinaarohia ra e ta oe mau tamarii.

No reira, eita paha oe e faariro i to oe faaea-taa-noa-raa mai te hoê ô. Tera râ, te faariro nei vetahi mau taata i te faaea-taa-noa-raa mai te tahi mea faufaa roa, e e maiti ratou i te faaea noa o ratou anaˈe iho. E riro anei ïa te faaea-taa-noa-raa ei ô, e mai te peu e e, afea e no te aha? Eaha ta te Bibilia e parau ra?

E haafifiraa anei no te oaoa?

E nehenehe te faaipoiporaa e riro ei tumu no te oaoa rahi. (Maseli 5:18, 19) “Te tiaturi nei” te tahi mau taata “e te pouraa i nia i te eˈa o te faaipoiporaa, tera anaˈe te purumu e aratai tia ˈtu i te oaoaraa e i te haamâharaa, ta te vea ra Los Angeles Times ïa e faataa ra. O te faaipoiporaa anei te “ravea” otahi roa no te fanaˈo i te oaoa?

Ia au i te vea ra Los Angeles Times, te parau ra o Ruth Luban, te hoê taote vahine aravihi i te pae o te feruriraa, e: “E maere te mau vahine [e te mau tane] i te mea e e nehenehe ratou e ite i te mauruuru rahi ia faaea ratou i te ora i te hoê oraraa oaoa ma te tiaturi e e roaa ta ratou tane [aore ra vahine] e eita ïa ratou e faaea taa noa.” E, e ere te faaea-taa-noa-raa i te hoê mea e haafifi ra i te eˈa no te hoê oraraa oaoa e te mauruuru. E rave rahi taata tei faataa e parau ra e e ere te faaipoiporaa i te eˈa e aratai tia ˈtu i te oaoaraa. Te taairaa maitai e o Iehova tera ïa te oaoa mau. No reira, e nehenehe te hoê kerisetiano e oaoa noa ˈtu e e taata faaea taa noa aore ra faaipoipohia.—Salamo 84:12; 119:1, 2.

Taa ê noa ˈtu i te mau haafifiraa tei faahitihia e ta te taata e faatupu ra, ua huti o Marie Edwards e o Eleanor Hoover, i roto i ta raua buka The Challenge of Being Single, i te mau manaˈo i nia i te tahi atu haafifiraa i te oaoa e farereihia ra—te faateimaharaa i te pae totiale. Te parau ra raua e “te na ôhia ra e mai te peu e aita oe i faaipoipohia, e roohia oe i te tahi maˈi hohonu, hepohepo, i te pae o te feruriraa. . . . E eita e ore, te vai ra hoê mea hape i roto ia oe.”

E tae noa ˈtu i te mau hoa maitatai e nehenehe ta ratou e faateimaha maite, ma te ore e ite, i te feia tei faaea taa noa na roto i te aniani ahoaho ra, ‘Afea oe e faaipoipo ai?’ aore ra, ‘Mea nafea te hoê taurearea haviti mai ia oe aitâ i faaea ˈtura i te vahine?’ Noa ˈtu e ua riro teie mau paraparauraa ei ohipa hauti, ‘e puta râ teie mai te ˈoˈe,’ e e mau manaˈo haamauiui e te haama o te roaa mai.—Maseli 12:18.

Te ô no tatou paatoa

Aita te aposetolo Paulo i faaipoipohia a tere ai oia ei mitionare. No te mea anei ra e ua patoi o ˈna i te faaipoiporaa? E ere roa ˈtu. Ua faaea taa noa te aposetolo Paulo no te mea ua maiti oia e na reira “no te mau parau apî maitai.”—Korinetia 1, 7:7; 9:23.

E mana to Paulo no te oreraa e faaipoipo, tera râ ua faaite oia e eita te mau taata atoa e nehenehe e riro mai ia ˈna ra te huru. Ua parau oia e: “O ta te Atua râ i horoa mai i te taata atoa ra, o ta ˈna ïa, e huru ê to te tahi, e huru ê hoi to te tahi.”—Korinetia 1, 7:7.

E nehenehe te faaea-taa-noa-raa e riro ei eˈa e aratai atu i te oaoaraa, noa ˈtu e e ere te reira ta oe i hinaaro e ratere atu. E parau mau, te vai nei te faaipoiporaa i rotopu e rave rahi mau ô i horoahia mai e Iehova. Tera râ te parau ra te Bibilia e e nehenehe te faaea-taa-noa-raa e riro mai te hoê “ô”—mai te peu e e tia ia oe, a “farii.” (Mataio 19:11, 12; Korinetia 1, 7:36-39) Eaha râ ïa te tahi o te mau haamaitairaa o te faaea-taa-noa-raa?

Ua parau o Paulo e te tapitapi nei te mau hoa faaipoipo i te “mauruuru” o to ratou mau hoa faaipoipo, area râ te mau taata i faaea taa noa “te tapi ra ïa i ta te Fatu ra.” Te haapapu ra teie mau parau i te hoê o te mau haamaitairaa rahi roa ˈˈe o te faaea-taa-noa-raa—te neheneheraa e te tavini ia Iehova “ma te peapea ore.”—Korinetia 1, 7:32-35.

Aita te Bibilia e parau ra eita te hoê taata e faaea taa noa ra e ora ma te fifi ore. Tera râ, e rave rahi taime, mea iti aˈe te mau haafifiraa o te taata tei ora o ˈna anaˈe i to te taata e haapao ra i to ˈna utuafare fetii, no te mea na ˈna iho e farii ia rave anaˈe oia i te hoê faaotiraa. Ei hiˈoraa, a faaue ai te Atua ia Aberahama ia faarue ia Harana no te haere atu i te fenua no Kanaana, te parau ra te Bibilia e: “Ua aratai atura Aberahama i ta ˈna vahine ia Sari, e te tamaiti a tana tuaana ia Lota, ma te mau taoˈa atoa i noaa ia raua, e to raua mau taata atoa i noaa i Harana ra; haere atura ratou.” (Genese 12:5) Noa ˈtu e aita te huru o te oraraa utuafare o Aberahama i tapea ia ˈna, mea papu e e taime rahi ta ˈna i rave no te faaineine i to ˈna utuafare no taua huru tere ra.

A faaau na i te tere o Aberahama e to te aposetolo Paulo. I to Paulo e to Sila poro-noa-raa i te oire no Tesalonia, ua tahoê ihora te nahoa taata e te riri taatoa no te patoi atu ia raua. I taua iho po ra, ua tono oioi atura te mau taeae ia Paulo e ia Sila i Berea. I te hoê taime ê atu, i Teroa, ua ite atura o Paulo i te hoê orama no te “fano mai i Makedonia nei e tauturu mai ia [ratou].” I teie nei, i to ˈna iteraa ˈtu i te orama, haere atura oia i Makedonia. Mea papu e, no te mea aita ta Paulo e vahine ua nehenehe ihora oia e ratere ohie noa i roto i te hoê area taime poto roa, e rahi roa ˈtu hoi te fifi mai te peu e e utuafare fetii to ˈna.—Ohipa 16:8-10; 17:1-15.

Te tahi atu haamaitairaa, te fanaˈoraa ïa i te tiamâraa rahi no te rave i te mau faaotiraa no ˈna iho. Mai te peu e te ora nei oe o oe anaˈe, mea ohie ïa ia faaoti e ihea e ora ˈi, eaha e afea e tamaa ˈi, aore ra eaha te hora e haere ai e taoto. E tae roa ˈtu teie tiamâraa i nia i te mau ohipa i te pae varua. E rahi atu te taime e roaa mai no te hoê haapiiraa tataitahi i te Parau a te Atua, te apitiraa i roto i te taviniraa, e te faaohiparaa i te mau taime tano ia ineine i te tauturu i te tahi atu mau taata.

No reira, ia faaea taa noa oe no te mea ua maiti oe i te reira aore ra no te mau huru tupuraa, a opua papu i te faaohipa i to oe taime ma te paari. E roaa to oe oraraa oaoa aˈe ia faaohipa oe i to oe faaea-taa-noa-raa no te tauturu ia vetahi ê. (Ohipa 20:35). Mai te peu e te hinaaro nei oe e faaipoipo, eiaha e opanipani ia oe i roto i te mau manaˈo tano ore aore ra e ora i to oe oraraa mai te huru ra e ua erehia oe i te tahi mea, no te mea aitâ taua ‘taata taa ê’ ta oe e titau ra i tae mai atura. A rave tamau i te taviniraa i te Atua, e mai ta Paulo i parau, e nehenehe oe e ite e e riro te faaea-taa-noa-raa ei ô.