Nafea to tatou reva e faaorahia ˈi
E FAAEA mau anei te mau taata i te faaî i to tatou mau raˈi i te mau mea viivii? Mea na reira anei e faaorahia ˈi to tatou reva?
Eita. Eita te faaoraraa i to tatou reva e niuhia i nia i te auraroraa te taata i te mau titauraa e patoi ra i te haaviiviiraa. Maoti râ, na te Taata tei ia ˈna te mana faatere teitei roa ˈˈe e tamâ eiaha i te reva noa i te fenua atoa râ.
Ua faaitehia e te haapao ra te Poiete i to tatou fenua, e te ora i nia iho atoa na roto i te huru faahiahia mau to ˈna hamaniraa i te reira. Ua hamani o ˈna i te fenua ia vai noa aita e hopearaa, e a muri noa ˈtu atoa.—Salamo 104:5, 24.
Te mau faanahoraa no te atuaturaa
Ei hiˈoraa, ua poietehia te reva i roto i te hoê ravea e na ˈna e tataˈi e e tamâ ia ˈna iho. E hiˈo na tatou i te hatua ozone i roto i te stratosphère o te reva. Ua hamanihia te hatua paruru ozone ma te aravihi ia nehenehe hoi oia e tapea i te hihi veavea atâta hoi no te mau taata i nia i te fenua nei. I te hoê â taime, e vaiiho oia i te marama maitai no te ora o te fenua ia hiti.
Ua ite mai tatou e ua faaino-roa-hia te hatua paruru ozone e te mau chlorofluorocarbone hamanihia e te taata, tei naea i roto i te tapoˈi teitei o te reva. Nafea te hatua paruru ozone e î faahou ai? Ma te maere mau, ua hamani te Poiete i te reira ia nehenehe oia e tataˈi ia ˈna iho. E, te poiete-noa-hia ra te hatua ozone i roto i te tapoˈi teitei o te reva—inaha, na te hatua ozone e titia i te mau hihi atâta! No reira, i te taime iho a haamou ai te haaviiviiraa a te taata i te hatua ozone, te faaapî-faahou-hia ra te tahi mau hatua ozone.
Hoê â huru atoa i roto i te tapoˈi raro roa ˈˈe o te reva, i reira e itehia ˈi te rahiraa o na hau atu i te 5 mirioni i te miria tane mataˈi. E tamâ oioi noa te mau tau ohuraa natura i teie mataˈi viivii na roto i te mau ravea faahiahia mau. Te parau nei The World Book Encyclopedia e: “Te haaparare nei te mataˈi i te mau taoˈa taero, e na te ûa e te hiona e horoi i te reira i roto i te repo.”
No reira, mai te peu e e faaea te mau taata i te haaviivii i te mataˈi, aore ra e faaiti rahi mai ratou i teie haaviiviiraa, e mea mâ e te rahi te mataˈi fatata na te mau vahi atoa. Te faaite nei râ te buka i nia nei i te fifi, ma te faataa e: “I roto e rave rahi tuhaa fenua, te tuuhia ra te mau taoˈa taero i roto i te aore oioi aˈe i ta te huru o te mahana e nehenehe e haru mai.”
Nafea râ e tapeahia ˈi te haaviiviiraa miimii a te taata i te reva nei?
Te fatata maira te hoê fenua tamâhia
Na te Atua iho e faaore i te haaviiviiraa, ia ohipa mai o ˈna. Te tohu ra te Bibilia e na ˈna e “[haamou . . . i te feia e faaino ra i te fenua nei.]” (Apokalupo 11:18) Eita o ˈna e vaiiho noa i te mau taata miimii ia tamau i te haaviivii i teie fenua nehenehe e to ˈna reva ora e a muri noa ˈtu. Te tǎpǔ ra oia e: “E riro hoi te feia hamani ino ra i te tâpû-ê-hia, o te feia râ i tiaturi ia Iehova ra, no ratou ïa te fenua.”—Salamo 37:9.
Nafea te feia hamani ino e haamouhia ˈi? Mea na roto ïa i te faatereraa a te Atua i nia i te raˈi, to ˈna Basileia, o te mono i te mau faatereraa taata tano ore. Te tǎpǔ nei te Bibilia e: “Ia tae i te anotau o taua mau arii ra, e faatupu ai te Atua o te raˈi ra o te hoê basileia, o te ore roa ïa e mou, . . . e hope roa hoi taua mau basileia ra i te parari e e pau, e vai tera e a muri noa ˈtu.” (Daniela 2:44) Teie taua Basileia o te Atua ra ta Iesu i haapii i ta ˈna mau pǐpǐ ia pure: “Ia tae to oe ra hau. Ia haapaohia to oe hinaaro i te fenua nei, mai tei te ao atoa na.”—Mataio 6:10.
Te hinaaro o te Atua no to tatou fenua nei oia hoi ia faaterehia te mau taata e to ˈna Basileia e ia fanaˈo ratou i te ora i roto i te hoê ao viivii ore. No reira te Atua i faaoti ai e “[haamou . . . i te feia e faaino ra i te fenua nei.]” (Apokalupo 11:18) Auê ïa ohipa faaora rahi e!
A manaˈonaˈo na i te hoê oraraa i nia i te hoê fenua aita e haaviiviiraa faahou e faatupuhia e te taata! I taua taime ra, e haamau-faahou-hia to tatou reva faufaa roa i roto i te hoê huru tupuraa maitai. E manuïa te reira ia tupu te parau tǎpǔ a te Atua: “Inaha tei ǒ te taata ra te sekene o te Atua, e e parahi oia i roto ia ratou ra, e ei taata ratou no ˈna, e ei pihai atoa iho te Atua ia ratou, ei Atua no ratou. E na te Atua e horoi i to ratou roimata atoa; e e ore roa te pohe, e te oto, e te mihi, e te mauiui, e ore atoa ïa, no te mea ua mou te mau mea tahito ra.”—Apokalupo 21:3, 4; Petero 2, 3:13.
Eaha te tia ia oe ia rave no te ora ˈtu i roto i te ao apî parau-tia ta te Atua e tǎpǔ ra? E tia ia oe ia haapii e ia apee i te mau haapiiraa o tei tonohia mai e te Atua i nia i te fenua nei ei tia Na ˈna. (Ioane 3:16; 7:29) Ua parau o ˈna, o Iesu Mesia, i te pureraa i te Atua e: “Teie hoi te ora mure ore, ia ite ratou ia oe i te Atua mau ra, e ia Iesu i te Mesia i ta oe i tono mai.”—Ioane 17:3.
[Hohoˈa i te api 20]
Te fatata maira te hoê fenua paradaiso viivii ore, mâ