Ia hinaaro-rahi-hia ˈtu â

NOA ˈTU e e nehenehe te mau manaˈo e rave rahi i roto i te mau tumu parau na mua ˈtu e tauturu rahi, e hinaarohia râ i te tahi taime i te tauturu rahi atu â i roto i te tahi mau tupuraa taa ê. Ei hiˈoraa, e mau tabula teie e vai nei no te mau tamarii iria ohie noa e te atâta atoa râ. Te faaite nei teie mau tamarii, noa ˈtu e ua paari ratou i roto i te mau utuafare here, i to ratou huru ino ma te vavahi i te mau ohipa, tutuô i nia i te mau taata, tanina, pupuhi, patiatia e te tipi (mai te peu e te vai ra), e te hamani ino i te mau animala, e te tahi mau taata, aore ra ia ratou iho, mai te peu e te opua nei ratou i te na reira. Ei haapotoraa, te faaite nei ratou i te huananeraa.

Te hinaaroraa aore ra eita i te tauturu i te pae rapaauraa, no te maitai aˈe o ta ratou tamarii, o te hoê ïa faaotiraa ta te taata tataitahi iho e rave. E tia i te mau utuafare tataitahi ia faaoti e nafea ia haamâha i te mau hinaaro taa ê o ta ratou iho tamarii, ma te haamanaˈo i te haapapuraa faaitoito horoahia na te mau metua i roto i te Maseli 22:6.

Hoê o te mau ravea rapaauraa mârô-rahi-hia i teie mahana, o te faaohiparaa ïa i te raau. Ua anoi noa te mau faahopearaa o te Ritalin, te hoê raau faaohipa-rahi-roa-hia ˈˈe. E rave rahi utuafare tei mauruuru maitai no te maitairaa mai ta ratou tamarii a rave noa ˈi ratou i te Ritalin aore ra te tahi atu mau raau faaitoito. Te tamau noa nei râ te aimârôraa i teie mahana, eiaha noa no nia i te faufaaraa o teie mau raau no nia atoa râ i te titau-rahi-raahia e te pinepine i te reira. Inaha, te tautoo nei te tahi mau taote i to ratou faufaaraa taatoa, ma te parau, ei hiˈoraa, e nehenehe te faaohiparaa maoro i te Ritalin e faatupu e rave rahi mau faahopearaa iino amuihia mai. E tia râ ia haapapu-faahou-hia e te faahiti nei e rave rahi utuafare e mau taote i te tahi atu mau faahopearaa amuihia mai e te huru haamaitaihia e te haereraa i mua tuatapapahia. Ma te anaanatae, te mauruuru atoa nei e rave rahi feia paari, tei hiˈopoahia e e ADD to ratou e o te rapaauhia ra e te raau i teie mahana, i te mau faahopearaa. Tera râ, te opuaraa e faaohipa i te raau o te hoê ïa faaotiraa niuhia i nia i te maimiraa e te tuatapaparaa maite.

Te vai ra te mau ravea rapaauraa ê atu no te feia tei tamata i te faaohipa i te raau e mea ino te mau faahopearaa. E rave rahi utuafare tei taio i te reira e o tei ite i te mau faahopearaa maitai aˈe o te mau ravea rapaauraa na roto i te vitami e te raau tupu aore ra te amuiraa nau toopiti ravea. Mai tei tapaohia na mua ˈtu, i roto i te tahi mau tupuraa, e nehenehe te mau aifaito-ore-raa biochimiques i roto i te roro e faatupu i te ADD/ADHD i tiaturihia ˈi e e riro teie mau ravea rapaauraa ei tauturu tano.

Hau atu, te manaˈo nei vetahi e te vai ra te tahi atu mau tumu o te faaô mai i te mau fifi taaihia i te ADD/ADHD. Te parau nei te taote ra o Doris Rapp, i roto i ta ˈna buka Is This Your Child?, e “ua taaihia te maˈi e/aore ra te mau fifi i te pae o te mau manaˈo hohonu, te huru, e te haapiiraa o te tahi mau tamarii, i roto i te hoê tuhaa aore ra ma te taatoa, i te maˈi tatiraa aore ra i te mau mea e haaati ra.” Oia atoa, e nehenehe te mau hinaaro e peni, e tatihota, e amui e riro mai ei mau fifi na roto i te riri-uˈana-raa, te tauiraa rahi o te huru taata, e te oreraa e varea i te taoto.

E rave rahi utuafare tei haapii e nafea ia faatitiaifaro i te haerea o ta ratou mau tamarii, e nehenehe râ to ratou huru i te fare haapiiraa e faatupu i te tahi atu atu â mau fifi. No te tahi pae, e nehenehe te mau tuhaa taa ê mai te mau aratai, te feia aˈo, e te mau pǔpǔ turu, e te mau orometua haapii taa ê, e tauturu. No te mea e ohipa maitai teie mau tamarii i roto i te hoê faanahoraa i rotopu ia ratou e te hoê taata, e ua ite te tahi mau utuafare i te manuïa, ia au i te manaˈo a to ratou orometua haapii, o te hoê haapiiraa horoahia i te fare.

E te mea faahiahia atoa te vai ra e rave rahi opuaraa api no te pae haapiiraa, mai te Schools Attuned a te taote ra Mel Levine, o te turu ra i te huru otahi e te huru rau o te mau tamarii. Te turu nei te faanahoraa a te taote ra Levine i te faatanoraa i te haapiiraa no te haamâha i te mau hinaaro o te tamarii tataitahi. I te mau vahi atoa o te mau Hau Amui i reira teie tamataraa huru rau no te haapii i te haamauraahia, e au ra e e mea maitai te mau faahopearaa.

To a muri aˈe

E nehenehe e faaau te haapaoraa i te mau tamarii i te hooraa mai i te hoê fare apî. E titau na mea e piti i te hoê haamâuˈaraa taime roa; no te huru tupuraa râ, e tia ˈtura i te feia e tutava ra i te hoo mai i te mauruuru noa i te mea iti aˈe i tei titau-rahi-hia. Oia atoa, ua tia atoa i te mau metua tia ore tei haapao i te mau tamarii tia ore i roto i te ao a Satani ia mauruuru noa i te mea haihai maoti râ i te mea faahiahia roa. E ere paha te mau tuhaa o te fare hoo-apî-hia mai i te mea matauhia aore ra e ere i te mea nehenehe, na roto râ i te ohipa e te feruriraa taa ê, e nehenehe te mau tuhaa iino e faaorehia. E nehenehe atoa te tahi fifi i te pae hamaniraa o te fare e riro ei tumu faufaa o te fare.

Oia atoa, mai te peu e e faatano atu te mau metua ia ratou i te mau hinaaro taitahi o ta ratou tamarii, e nehenehe ratou e riro mai ei tuhaa nehenehe o to ratou oraraa. E tia ia haafaufaa i te tamarii tataitahi no to ˈna iho mau huru maitatai. Ia tapea mai iho â râ i te mea maitai. Maoti râ i te haavî i te mau tamarii, a faaitoito i te ohipa a te tamarii tataitahi, e ia taa e e taata faahiahia o ˈna te tia ia faaturahia e ia herehia—te hoê ô faufaa roa no ǒ mai i te Atua ra o Iehova.—Salamo 127:3-5.