A vaiiho i te haapiiraa i to ˈna parahiraa

E MEA ite te hoê taata aravihi i te hamani i te mau hohoˈa fare. E rahi aˈe te papuraa o te mau mea e vai mai i mua i te mau mea no ropu e i to muri. Hoê â atoa no ta tatou mau ohipa faufaa i roto i te oraraa. E mea faufaa aˈe vetahi o ratou i te tahi atu.

Ua parau o Iesu e: “E ao to tei haehaa te aau, no ratou hoi te basileia ra o te ao.” (Mataio 5:3) No reira, e tia ia faarirohia te mau faufaa pae varua ei mea faufaa roa ˈˈe. E ia tuuhia râ i te mau taoˈa materia i te piti o te parahiraa.

Eaha te faufaaraa o te haapiiraa ia taaihia i te tahi atu mau ohipa i roto i te oraraa? E ere roa ˈtu i te hoê tuhaa iti faufaa ore no te hoê kerisetiano. E mea faufaa te rahiraa o te haapiiraa no te faatupu i te titauraa a te Bibilia horoahia e te aposetolo Paulo: “O te taata hoi aore i hamani maitai i to ˈna ihora, e rahi atu â i to ˈna ihora utuafare, ua faarue ïa oia i te parau, e e rahi atu ïa to ˈna ino i to te taata mau ore ra.” (Timoteo 1, 5:8) Hau atu, te titau ra te faaueraa ta Iesu i horoa i ta ˈna mau pǐpǐ, e faariro i te mau taata ei pǐpǐ, “ma te haapii atu ia ratou i te haapao i te mau mea atoa [ta ˈna] i parau,” ia ‘noaa te ite’ e ia haapii atu ia vetahi ê.—Mataio 28:19, 20; Ioane 17:3; Ohipa 17:11; Timoteo 1, 4:13.

E tia ïa ia vaiiho i te haapiiraa i to ˈna parahiraa. Eiaha e titau i te reira no te riro noa ei feia maramarama aore ra no te titau i te mau toroa teitei. E hepohepo te tupu mai ia titau i te hoê haapiiraa teitei roa ˈtu â. Parau mau, te horoa mai nei te reira i te tahi mau haamaitairaa i te pae materia maa taime poto noa. Mai ta te arii paari ra o Solomona i faahiti: “Te ohipa ra hoi te tahi ma te paari, e te ite, e te aravihi; o te tahi ra o tei ore i na reira i te rave, ta ˈna ïa e vaiiho ei tufaa na ˈna.”—Koheleta 2:21.

Te anaanatae nei te mau Ite no Iehova i te haapiiraa, eiaha no te titau noa i te ite, no te haamaitai râ i to ratou aravihi i roto i te taviniraa i te Atua e no te turu ia ratou iho i te pae faufaa. I te mea hoi e ere ta ratou taviniraa i te mea tamoni, te tiaturi nei e rave rahi i nia i ta ratou ohipa no to ratou oraraa. E nehenehe te reira e riro mai ei fifi mau no te mau tavini Ite no Iehova ma te taime taatoa, tei piihia te mau pionie. E tia ia ratou ia tapea i te hoê porotarama ohipa i roto i te taviniraa a rave noa ˈi ratou i te ohipa no te turu ia ratou iho i te pae moni e to ratou utuafare mai te peu e ua faaipoipo ratou.a—Maseli 10:4.

I muri aˈe i te feruri-maite-raa i te mau mea atoa e tupu mai, ua maiti vetahi mau Ite no Iehova i te faahaere atu â i ta ratou haapiiraa i mua. Oia mau, e tia ia ratou ia haapao maitai e ia vai te haapiiraa i to ˈna parahiraa. Na te aha i tauturu ia ratou ia na reira? Te parau nei te hoê taurearea no Beresilia o John te iˈoa e: “E rave rahi mau tumu tei tauturu ia ˈu. E noa ˈtu e ua tia ia ˈu ia haapii i te po, aita roa ˈtu vau i mairi i te mau putuputuraa kerisetiano. Ua faaara atoa vau i to ˈu mau hoa haapiiraa i te omuaraa e Ite no Iehova vau.”

Ua haafaufaa atoa o Eric, no Beresilia atoa, i te mau taime atoa no te tauaparau ia vetahi ê i ta ˈna mau tiaturiraa a haere noa ˈi i te haapiiraa. Te parau nei oia e: “Ua faariro vau i te fare haapiiraa ei tuhaa fenua pororaa na ˈu. Ua nehenehe ia ˈu e aratai i te mau haapiiraa bibilia e e rave rahi mau orometua haapii e te feia haere haapiiraa, ua bapetizo e pae i teie nei, e e matahiapo e piti o ratou.”

Ua faahaere o Richard i ta ˈna haapiiraa i mua no te titau i te hoê toroa papai hohoˈa. Te parau nei oia e: “Ua tauturu ta ˈu tau haapiiraa ia ˈu ia noaa mai te hoê ohipa no te turu ia ˈu iho e ta ˈu vahine, ua horoa atoa mai râ te reira ia ˈu i te hoê haamaitairaa taa ê. I to ˈu ratereraa no te papai i te mau hohoˈa paturaa vitiviti o te mau Piha no te Basileia e to ˈu aparauraa e te feia faatere, ua ite au e te hinaarohia ra te feia papai hohoˈa. Te faaohipa-maitai-hia ra ta ˈu haapiiraa i teie nei i nia i taua mau opuaraa ra.b Hau atu, te tiaturi mau nei ta ˈu vahine e o vau iho i te tavini i te pu rahi aore ra i te mau vahi paturaa na te mau fenua atoa a te mau Ite no Iehova.”

I te hoê â taime, e rave rahi mau Ite no Iehova o te fifihia ra no te turu ia ratou iho e to ratou utuafare aita hoi i faahaere i te haapiiraa i mua. Te faataa nei o Mary e: “Te turu nei au ia ˈu nei na roto i te tamâraa i te fare e piti mahana i te hebedoma. Te vahi huru ê ra e te arearea, e mea rahi aˈe ta ˈu moni i te hora i ta vetahi mau taata o ta ˈu e tavini nei. Te faariro nei râ vau i ta ˈu ohipa ei ravea ia noaa mai te moni. Te tauturu ra te reira ia ˈu ia tamau noa i roto i te taviniraa pionie, e aita vau e tatarahapa ra.”

Hoê â manaˈo atoa to Steve. Te parau nei oia e: “I to ˈu haamataraa i te taviniraa pionie, ua parau mai vetahi ia ˈu e: ‘Eaha ta oe e rave mai te peu e e faaipoipo e e haamau oe i te hoê utuafare? E navai anei ta oe moni no te oraraa?’ I te pae hopea, ua rau te huru ohipa ta ˈu i rave i noaa ˈi ia ˈu te aravihi i roto i te mau mea atoa. I teie nei e vahine ta ˈu, te ite nei au e mea rahi aˈe ta ˈu faito moni i ta vetahi mau taata faatuitehia o te rave atoa ra i te ohipa i ta matou taatiraa.”

E titau paha te mau metua tane aita i roto i te parau mau i ta ratou mau tamarii ia faahaere â i ta ratou haapiiraa i mua, e mana to ratou niuhia i nia i te Bibilia ia na reira. I roto râ i taua mau huru tupuraa ra, e ia au i te Mataio 6:33, e tia i te mau taurearea ia maiti i te mau haapiiraa o te tauturu ia ratou ia riro ei feia hau atu â i te faufaa i roto i te taviniraa a Iehova aore ra ia rave atoa ratou i te taviniraa ma te taime taatoa a haere noa ˈi ratou i te haapiiraa.

Te haapiiraa rahi roa ˈˈe

Noa ˈtu to ratou toroa i te pae haapiiraa, te vai nei râ te hoê mea e taai ra i te mau Ite no Iehova. Te farii nei ratou e no roto mai te haapiiraa faufaa roa ˈˈe i teie mahana, i te Parau a te Atua, te Bibilia. Te parauhia ra i roto i te Ioane 17:3 e: “Teie hoi te ora mure ore, ia ite ratou ia oe i te Atua mau ra, e ia Iesu i te Mesia i ta oe i tono mai.” Noa ˈtu eaha te faito haapiiraa tei noaa mai i te hoê kerisetiano, o te iteraa e o vai ra o Iehova e ta ˈna Tamaiti, o Iesu, te haapiiraa faufaa roa ˈˈe.

Ua horoa mai te mau kerisetiano o te senekele matamua i te hiˈoraa. ‘Na te teterareha ra o Heroda i haapii’ ia Manaena a ora e a ohipa noa ˈi oia i rotopu i te mau peropheta e te feia haapii o te amuiraa i Anetiohia. (Ohipa 13:1) Oia atoa, ua noaa atoa ia Paulo i tei piihia i teie mahana te haapiiraa tuatoru. Teie nei râ, i to ˈna riroraa ei kerisetiano, ua vaiiho oia i ta ˈna faaineineraa i to ˈna parahiraa. Maoti râ i te faaohipa i te reira no te faahaehaa ia vetahi ê, ua faaohipa oia i to ˈna ite i te pae totiale, o te ture, e o te aamu no te poro i te mau huru taata atoa.—Ohipa 16:37-40; 22:3; 25:11, 12; Korinetia 1, 9:19-23; Philipi 1:7.

Aita i tui te roo o te mau kerisetiano i te senekele matamua no to ratou toroa i te pae haapiiraa. E rave rahi pue taata ‘haapii-ore-hia e te itea ore,’ aita ratou i haere i te mau fare haapiiraa a te mau rabi. E ere râ te reira i te auraa e aita ratou i haapiihia. Ua faaineinehia teie mau tane e mau vahine no te paruru i to ratou faaroo—te hoê aravihi o te haapapu ra i te hoê ite niu-etaeta-hia.—Ohipa 4:13.

Te anaanatae rahi nei râ te mau kerisetiano atoa i te haapiiraa. I te hoê â taime, te tutava ra ratou ‘ia au atu i te mau mea i hau i te maitai ra,’ ma te vaiiho i te haapiiraa—na roto i te tahi atu tutavaraa—i to ˈna iho parahiraa.—Philipi 1:9, 10.

[Nota i raro i te api]

[Tumu parau tarenihia i te api 15]

Te hoê titauraa tano maitai

I te matahiti na mua noa ˈˈe to ˈna faatuiteraahia i te haapiiraa teitei, ua feruri maite o Matthew e nafea o ˈna e turu ia ˈna iho i te pae faufaa a rave noa ˈi oia i te hoê ohipa ei tavini Ite no Iehova ma te taime taatoa. I muri aˈe i te feruriraa i te tumu parau na roto i te pure, ua manaˈo o Matthew e to ˈna nau metua e mea maitai te hoê haapiiraa hau atu no te titau i ta ˈna tapao. No reira, ua fanaˈo oia i te hoê pute moni. Ua tuu atoa te taata aˈo o Matthew i te hoê rata tururaa, ma te parau e:

“I te roaraa o na matahiti e piti e te afa tei mairi, ua oaoa roa vau i te riroraa ei taata aˈo e ei hoa no Matt. E taata mau papu maitai o Matt . . . E faaroo hohonu to ˈna e te tiaturi paari, o te vai ra i roto i to ˈna mau taairaa e ta ˈna mau ohipa.

“I te roaraa o te mau matahiti i mairi aˈenei, ua faaineinehia o Matthew no te taviniraa. Eita te hoê tavini no ta ˈna faaroo e aufauhia. E ohipa [ta ˈna taviniraa] no te here mau. E taurearea miimii ore o Matt e te feruriraa maitai e te faahiahia. E nehenehe ïa ta teie pute moni e turu i teie taata faaroo ia tamau i ta ˈna faaineineraa e te ohipa tauturu.

“No nia i te ohipa tauturu e te taviniraa huiraatira, ua poro o Matt e rave rahi mau hora i tera e tera uputa i te mau hopea hebedoma i muri aˈe i te haapiiraa e i te mau tau faafaaearaa haapiiraa. Te rave nei oia i te ohipa i roto i te oire e i rotopu i te mau taata e rave rau. Ua faaite o Matt i to ˈna mau aravihi e mau ite no te faatere na roto i te aratairaa i te mau haapiiraa bibilia e te feia apî e te ruhiruhia atoa. . . . E nehenehe oia e faaitoito i te mau taata e e tauturu ia ratou ia titau i ta ratou tapao mau. I roto i te piha haapiiraa, ua faataa te mau orometua haapii e e ohipa maitai noa ta ˈna. Te tauaparau nei oia i roto i te piha e e taata orero maitai hoi oia. . . .

“O Matt te hoê o te mau taurearea maitatai ta ˈu i faahiahia i te aˈo. E mea au-roa-hia e e mea faaturahia oia e to ˈna mau hoa e te mau orometua haapii. O to ˈna taiva-ore-raa râ te mea faufaa roa ˈˈe.”

[Hohoˈa i te api 17]

Te anaanatae ra te mau Ite no Iehova i te haapiiraa, na mua roa no te riro mai ei tavini a te Atua hau atu â i te aravihi