O vai ma tei hiaai ma te mâha ore, e no te aha?

TE FAAHORO ra oe i te pereoo na nia i te purumu, a faaroo ai oe i te hoê maniania taa ê i roto i te matini. E nafea oe? E hiˈo ra anei oe i roto i te matini no te hiˈopoa i te fifi? Aore ra e haapuai noa oe i te radio pereoo ia ore oe e faaroo faahou i teie maniania?

Ua taa-maitai-hia te pahonoraa, aita râ te feia e hiaai mâha ore to ratou e faaoti ra ma te tano—eiaha no to ratou pereoo no to ratou iho râ ora. E rave rahi tei haamoe i to ratou fifi na roto i te hiaai mâha ore i te mau raau taero, te ava, e tae noa ˈtu i te maa maoti i te faaruru i to ratou fifi ma te manuïa.

Nafea te hoê taata e ite ai e hiaai mâha ore to ˈna? Teie te faataaraa a te hoê taote: “Na mua ˈˈe, e riro te raveraa i te hoê raau taero e aore ra te hoê ohipa ei hiaai mâha ore mai te peu e e haafifi te reira i to oe oraraa e e tamau noa râ hoi oe i te rave i te reira.”

Ia na reira-anaˈe-hia, mea pinepine e fifi rahi roa ˈˈe te hunahia ra, no reira ïa, e tia ia hiˈopoahia te reira na mua ˈˈe teie peu ino e tauihia ˈi.

Te raau taero e te ava

No te aha te hoê taata e haamata ˈi i te haere na nia i te eˈa o te hiaai mâha ore no te mau raau taero e te ava? E pinepine te faaheporaa a te mau hoa e te hinaaro e ite, i te ume mai ia ratou, no te mau taurearea iho â râ. Oia mau, o te mau amuimuiraa iino e te feia e inu hua i te ava e e rave hua i te raau taero, te tumu e rave rahi taata e haamata ˈi i te hiaai ma te mâha ore i te tahi mea. (Korinetia 1, 15:33) Na te reira paha e faataa ra i te uiuiraa manaˈo i ravehia i te mau Hau amui no Marite o tei faaite e 41 i nia i te hanere o te feia haere haapiiraa tuarua o te matahiti hopea, o te arearea ra ma te inu hua i te ava i te mau piti hebedoma atoa.

Te vai nei râ te hoê taa-ê-raa i rotopu i te rave-hua-raa e te hoê hiaai mâha ore. E rave rahi tei rave hua i te tahi mau mea e o te ore e hiaai ra i te reira ma te mâha ore.a E nehenehe ratou e faaea i te rave hua i te tahi mea ma te ore roa e hiaai faahou i te reira. Te feia râ e hiaai mâha ore to ratou, eita ïa ratou e nehenehe e faaea. Hau atu â, noa ˈtu eaha te huru o te navenave tei noaa ia ratou i te omuaraa e moe ê ïa i te ahoaho. Te faataa ra te buka ra Addictions e: “Teie te eˈa matauhia no te mau taata e hiaai mâha ore to ratou, i te hoê taime, e haamata ratou i te hae ia ratou iho, e e haamata ratou i te mauiui rahi no te haavîraa i noaa e teie hiaai mâha ore.”

E rave rahi tei matau i te raveraa i te ava aore ra te mau raau taero o te faaohipa i te reira ei ravea no te haamoe i to ratou mau fifi i te pae o te mau manaˈo hohonu. I teie nei mahana, e pinepine teie mau ati i te tupu ma te ore e hinaarohia. E aita iho â tatou e maere ra, no te mea te faaau ra te Bibilia i teie nei mau mahana ei “anotau hopea” no teie faanahoraa o te mau mea, i reira “e tupu te ati rahi.” Ua tohu te Bibilia e e riro te taata ei “nounou moni,” “teoteo,” “viivii,” “iria,” “haavare,” e “faateitei.” (Timoteo 2, 3:1-4) Ua faatupu teie mau huru iino i te hoê oraraa o tei riro ei repo maitai no te faahotu mai i te hiaai mâha ore.

Ua fifihia o Susan i te pae o te mau manaˈo hohonu no te mea ua hamani-ino-hia o ˈna na mua ˈtu. Rave atura o ˈna i te cocaine. “Ua horoa te reira i te hoê haavîraa ia ˈu iho e te hoê manaˈo faatura ia ˈu iho haavare,” o ta ˈna ïa i parau. “E ua horoa te reira i te hoê puai o tei erehia e au i to ˈu oraraa i te mau mahana atoa.”

Ua faaite te hoê maimiraa no nia i te mau taurearea tane e hiaai mâha ore to ratou e ua hau atu i te hoê i nia i te toru tei hamani-ino-hia i te pae tino. Ua itehia i roto i te tahi atu maimiraa no nia e 178 vahine paari inu ava e 88 i nia i te hanere ua rave-ino-mau-hia ratou noa ˈtu eaha te huru raveraa. Te parau ra te Bibilia i roto i te Koheleta 7:7 e: “E huru ê te taata paari ia hamani-ino-hia.” Te hoê taata e mauiui ra i te pae o te mau manaˈo hohonu no te tahi huru oraraa riaria mau, e nehenehe ïa oia, i muri iho, ma te opua ore e rave i te raau taero aore ra e inu hua i te ava ia mǎmǎ oia.

Tera râ, e ere te mau raau taero e te ava anaˈe iho te hiaaihia ma te mâha ore.

Te mau fifi o te tamaaraa

Te mau fifi o te tamaaraa (o ta vetahi feia aravihi e pii ra e mau hiaai mâha ore) i te tahi mau taime, no te haamoe ïa i te mau manaˈo hohonu au. Ei hiˈoraa, e faariro te tahi pae i te tino poria roa ei pariraa i ta ratou iho manuïa-ore-raa. “I te tahi mau taime, te manaˈo ra vau e faaea poria noa vau no te mea, ia ore te mau mea e tano i roto i to ˈu oraraa na to ˈu ïa tino poria te hape,” ta Jennie e parau ra. “Ia faaea poria vau e mai te peu e eita te hoê taata e au ia ˈu, e nehenehe noa ïa vau e pari e na to ˈu tino poria te hape.”

No te tahi atu pae, e horoa te maa i te hoê haavîraa haavare.b E riro te maa ei tuhaa no to ˈna oraraa o ta te hoê taata e manaˈo ra e mana to ˈna i nia iho i te reira. Te manaˈo ra e rave rahi taata e mau peu iino to ratou i te pae no te tamaaraa, e te erehia ra ratou i te tahi mea. No te haamau i te manaˈo e faufaa to ratou, e tutava ïa ratou i te haavî i to ratou tino pohe poia. Ua parau te hoê vahine e: “E faariro oe i to oe tino ei tuhaa o ta oe e faatere ra, e o oe te taata haavî uˈana, te tavana mana rahi hau aˈe.”

Aita roa ˈtu teie mau faatiaraa i faahitihia iho nei e faataa taatoa ra i te tumu no te hiaai mâha ore i te raau taero, te ava, e te maa. Ua rau te mau haafifiraa. Te manaˈo atoa ra te tahi feia aravihi, e ohie te tahi pae i te faatupu i te hiaai mâha ore i te tahi atu pae no te mau tapao no ǒ i te mau tupuna. “Ta matou e ite ra o te hoê ohiparaa te tahi i nia i te tahi o te huru o te taata, te mau mea e haaati ra ia ˈna, te ihiora e to ˈna fariiraahia e te totaiete taata,” ta Jack Henningfield e parau ra no te Piha maimiraa rahi no nia i te rave-hua-raa i te raau taero. “Aita matou e hinaaro ra e ia varehia matou ma te hiˈoraa i te hoê anaˈe iho fifi.”

Noa ˈtu eaha te huru tupuraa, aore roa te hoê taata e hiaai mâha ore to ˈna—noa ˈtu eaha te tumu o to ˈna hiaai mâha ore—e topa roa i te pae tino e te pae o te mau manaˈo hohonu. Te vai ra te tauturu.

[Nota i raro i te api]

[Tumu parau tarenihia i te api 18]

Te hiaai mâha ore e ati ïa na te ao nei

◼ Te faaite ra te hoê maimiraa i Mexico e 1 i nia e 8 taata e 14 e tae atu i te 65 matahiti e taata inu ava ïa.

◼ Te faaite ra te vahine turuutaa o Sarita Broden i te parareraa te mau peu iino i te pae o te tamaaraa i Tapone. Te parau ra oia e: “I rotopu i te matahiti 1940 e te matahiti 1965, ua maraa taue te rahiraa o te mau peu iino no te pae o te tamaaraa e na reira atoa ïa no te rahiraa feia e mau i te fare maˈi e te feia e rapaauhia e o te hoˈi i te fare i rotopu i te matahiti 1965 e te matahiti 1981. Mai te matahiti 1981 iho â, ua maraa ma te ati mau te maˈi patoiraa i te tamaa e te maˈi popore maa.”

◼ I te fenua Tinito e au ra e te maraa oioi ra te feia e rave ra i te héroine. Te parau ra te taote ra o Li Jianhua, e haa ra i roto i te Piha maimiraa no nia i te rave-hua-raa i te raau taero i Kunming e: “Ua parare te raveraa i te héroine na te otia o te fenua e tae atu i roto i te fenua Tinito, na te mataeinaa e tae atu i roto i te mau oire, e i te taurearea e te taurearea apî roa.”

◼ I Zurich, Helevetia, ua hope te tamatamataraa a te hoê matete hooraa raau taero na roto i te peapea rahi. “Ua manaˈo matou e e roaahia te feia hoo raau taero, aita râ matou i manuïa,” ta te taote ra o Albert Weittstein i parau ma te autâ e ua ume noa mai ratou i te feia hoo e te feia rave raau taero na te vahi atea.