Eaha te tia i te mau vahine ia ite no nia i te mariri ai taata o te titi

TE MARAA noa ra te numera o te mau tupuraa o te mariri ai taata o te titi i te mau fenua rarahi atoa. Ia au i tei manaˈohia, e naeahia i te matahiti 2000, fatata hoê mirioni tupuraa apî o te mariri ai taata o te titi te itehia e te taote i te ao nei i te mau matahiti atoa.

E ore anei te tahi vahine e roohia i teie maˈi? E ravea anei no te paruru i te reira? E eaha te tamahanahanaraa e te tauturu hinaarohia e te feia e aro ra i teie ati?

E faatupu te mau hihi ultraviolet o te mahana i te rahiraa o te mau mariri ai taata o te iri. O te puhipuhiraa i te avaava te tumu o te rahiraa o te mau mariri ai taata o te mahaha. Aita râ e tumu hoê roa tei itehia no te mariri ai taata o te titi.

Ia au râ i te mau maimiraa apî, e tuhaa paha ta te mau tapao no ǒ mai i te tupuna, ta te mau mea e haaati ra ia tatou, e ta te mau oromona i roto i te mariri ai taata o te titi. E roo-ohie-hia ˈˈe i teie maˈi te mau vahine e vai ra i raro aˈe i teie mau haafifiraa.

Te aamu o te utuafare

Te hoê vahine e ua roohia te hoê melo o te utuafare i te mariri ai taata o te titi, mai te metua vahine anei, te tuahine, e tae noa ˈtu i te hoê metua vahine fetii aore ra te hoê metua vahine tupuna, e nehenehe ïa o ˈna e roohia i te reira. Mai te peu e, ua roohia e rave rahi i rotopu ia ratou i teie maˈi, e roo ohie atu â ïa o ˈna i te reira.

O te taote ra o Patricia Kelly, maimi i te mau tapao tupuna i te mau Hau amui no Marite, tei parau i te A ara mai na! e noa ˈtu â ïa e tuhaa atoa ta te mau tapao tupuna, ua riro noa te reira ei tumu no e 5 e tae atu i te 10 i nia i te hanere o te taatoaraa o te mau mariri ai taata o te titi. “Te manaˈo ra matou,” o ta ˈna e faataa ra, “e no roto mai te hoê numera rahi, i te mau tapao tupuna haihai o te ohipa amui ra e te mau mea e haaati ra ia tatou.” E au ra e te mau melo o te utuafare e hoê â to ratou mau tapao tupuna e hoê â atoa ïa huru mau mea e haaati ra ia ratou.

Te mau haafifiraa o te mau mea e haaati ra ia tatou

“Ma te maramarama maitai te vai ra te mau haafifiraa o te mau mea e haaati ra ia tatou, o tei manaˈo-rahi-hia nei, e tuhaa atoa ïa to ratou” no te haamataraa i te maˈi ia au i ta Devra Davis te hoê vahine maimi i parau, i roto i te hoê tatararaa i roto i te vea ra Science. I te mea e o te titi o te vahine te tuhaa o te tino e ohie noa i te fifihia i te ito radio a te taote, e roo-ohie-noa-hia ïa te mau vahine e vai ra i raro aˈe i te ohiparaa a te mau hihi X, alpha, bêta, gamma i te mariri ai taata o te titi. Mai te reira atoa ïa no te mau vahine e vai ra i raro aˈe i te ohiparaa a te mau taoˈa taero.

Te tahi atu â haafifiraa o te mau mea e haaati ra ia tatou o te huru o te maa e te inu. Te manaˈo ra te tahi pae e te mariri ai taata o te titi e maˈi te tupu mai ia ere-anaˈe-hia te vitami te ereraa iho â râ i te vitami D. E tauturu teie vitami i te tino ia rave mai i te taratiumu, e na te reira e tauturu ia tinaihia te maraaraa taotia-ore-hia o te mau taoˈa tahi ora.

Te taai ra te tahi mau maimiraa i te amuraa i te maa hinu, eiaha râ ei tumu, ei taoˈa râ o te faatupu i te mariri ai taata o te titi. Te faˈi ra te vea ra FDA Consumer e tei roto te rahiraa feia i pohe i te mariri ai taata o te titi i te mau fenua mai te mau Hau amui no Marite, i reira e amu-rahi-hia ˈi te maa hinu e te poroteina animala. Te parauhia ra e: “Na mua ˈˈe e mea iti te mau vahine tapone te roohia i te mariri ai taata o te titi, ua maraa râ ma te peapea mau, i te hoê â taime e te tamaaraa mai to ‘te pae Tooa o te râ’, oia hoi, te amuraa i te maa e mea iti te hinu i roto ma te amuraa i te maa e mea rahi te hinu i roto.”

Te horoa ra te hoê maimiraa apî i te manaˈo e e riro paha te rahiraa kalori e pau ra i te amu-rahi-raa i te maa hinu ei ati mau. Te faˈi ra te Science News e: “E roo-ohie-hia te mariri ai taata o te titi ia rahi anaˈe te kalori hau, te mau kalori hau no roto mai iho â râ i te hinu, fatata ïa e 67 i nia i te hanere tei atihia i te tahi atu mau maa.” Ia rahi anaˈe te kalori e poriahia ïa, e te mau vahine poria roa o ratou ïa te tataitoru i te roohia i te mariri ai taata o te titi, o te mau vahine iho â râ tei ore to ratou maˈi avaˈe. E faatupu te meˈi o te tino i te estrogène, e oromona vahine o te nehenehe e faaino i te iˈo o te titi, ma te faatupu i te mariri ai taata.

To tatou iho aamu e te mau oromona

Te vai ra i roto i te titi o te vahine e rave rau oromona o te faatupu i te mau tauiraa i roto i te titi i te roaraa o te oraraa. Te papai ra te taote ra o Paul Crea, e taote tâpû mariri ai taata, i roto i te Australian Dr Weekly e: “I roto i te tahi mau vahine, ia ohipa maoro anaˈe te oromona i nia i te iˈo o te titi . . . i reira te mau taoˈa tahi ora e haamata ˈi i te tauiui te tahi i muri aˈe i te tahi e peneiaˈe e hope na roto i te hoê tauiraa ino [mariri ai taata].” No teie tumu te manaˈohia ra e te vahine tei pohe-oioi-hia i te maˈi avaˈe, i te matahiti 12, aore ra tei maoro te oreraa to ˈna maˈi avaˈe, i te ropuraa o te mau matahiti 50, e roo-ohie-hia oia i teie maˈi.

Ua riro ei tumu aimârô-rahi-hia te taairaa e vai ra paha i rotopu i te estrogène hau tei horoahia i roto i te ERT (te rapaauraa ma te monoraa i te estrogène) e te mariri ai taata o te titi. I te mea e te faataa ra te tahi mau maimiraa e eita te ERT e faarahi i te ati, te faaite ra te tahi atu mau maimiraa i te ati papu no te feia rave tamau. Ma te hiˈopoa i te mau maimiraa tei tuatapapa-faahou-hia, te faˈi ra te British Medical Bulletin no te matahiti 1992 e e nehenehe mau te “estrogène o te faataime ore i te fanau e faarahi i te ati ia roohia i te mariri ai taata o te titi na roto i te 30 e tae atu i te 50 i nia i te hanere” i muri aˈe i te rave-tamau-raa i te reira.

Te faaite ra te mau parau faataa no nia i te taairaa i rotopu i te huero no te faataimeraa i te fanau e te mariri ai taata o te titi i te iti te ati i te raveraa i te reira. Teie râ, e itehia te hoê pǔpǔ iti vahine o te roo-ohie-hia e teie maˈi. Te mau vahine apî, te mau vahine aitâ i fanau i te tamarii, e te mau vahine tei amu tamau i te huero no te faataimeraa i te fanau peneiaˈe e naeahia e 20 i nia i te hanere te roo-ohie-hia e te mariri ai taata o te titi.

E 3 atoa i rotopu i te 4 vahine e mariri ai taata o te titi o te ore roa e nehenehe e faahiti i te tahi noa ˈˈe mea ei tumu a roohia ˈi ratou i teie maˈi. Teie ïa te uiraa e tuuhia ˈtu, E tia anei i te tahi vahine ia manaˈo eita o ˈna e roohia i te mariri ai taata o te titi? Te faataa ra te FDA Consumer e: “Ia au i te huru hiˈoraa a te taote, e tia ia haapaohia te mau vahine atoa mai te huru ra e roohia paha o ˈna i te mariri ai taata o te titi.”

E fifihia te mau vahine, paari iho â râ, i teie maˈi. Te faataa ra te taote ra o Kelly e noa ˈtu te rau o te mau tumu o te mariri ai taata o te titi, ‘te tahi i rotopu ia ratou, o ta ˈu e manaˈo ra, no te mea noa e ua paari te tino, e te haamata ra te mau taoˈa tahi ora i te vahi ma te tano ore.’

Eaha te tumu e roohia paha i teie maˈi

Ia hiˈopoa-anaˈe-hia te huru hamaniraa o te titi o te vahine na te reira e faataa mai no te aha e roohia paha i te mariri ai taata. I roto i te titi te vai ra te mau uaua, e mau eˈa haihai, i reira e tahe ai te û mai te mau pute iti hamaniraa û e tae atu ai i te oata. Te vai ra i nia i te mau uaua te mau taoˈa tahi ora e vahi noa e e tauiui noa ia au i te tereraa maˈi avaˈe o te vahine, ma te faaineine ia ˈna ia hapû anaˈe, ia tahe te û, e no te faaamu i ta ˈna aiû. Tei roto i teie mau uaua e tupu ai te rahiraa o te mau mariri ai taata o te titi.

I roto i te buka Alternatives: New Developments in the War on Breast Cancer, te faataa ra te vahine maimi o Rose Kushner e: “Noa ˈtu te huru tereraa ohipa tamau tei faahuru-ê-noa-hia ma te tapeapea rii noa—noa ˈtu â ïa e ravea natura . . .—e hape ohie ïa.” Te faˈi faahou ra oia e: “Te vai noa ra te mau taoˈa tahi ora o te titi o te haa noa ra i roto i te tahi mau oromona o te faaue ra, ‘A faaea na i te rave i te reira. A haamata na i te rave i tera.’ Eita ïa e maerehia, e vahi noa ma te taotia-ore-hia e rave rahi o te mau taoˈa tahi ora apî.”

E tupu mai te mariri ai taata o te titi ia vahi anaˈe te hoê taoˈa tahi ora ino, ma te taotia-ore-hia ta ˈna tereraa i te tupuraa i te rahi, e ma te haamata i te parare. Eita teie huru taoˈa tahi ora e faaea i te vahi ia ˈna, e i te tau au e î roa te iˈo maitai e vai ra i reira, ma te taui i te hoê melo maitai ei melo o tei maˈihia.

Te parareraa te mariri ai taata i roto i te tino

Ia vai anaˈe te mariri ai taata i roto i te titi, e nehenehe e iritihia te vahi ino. Ia parare râ te mariri ai taata o te titi i te tahi atu mau tuhaa o te tino, o te reira ïa te tumu rahi roa e pohe ai te feia i roohia i te mariri ai taata o te titi. Ia rahi anaˈe te mau taoˈa tahi ino o te mariri ai taata i roto i te titi e ia rahi mai to ˈna faito, e nehenehe ïa te mau taoˈa tahi ino o te mariri ai taata e tere huna noa i rapae au i vahi matamua o te oru ma te tomo atu i roto i te mau iri o te mau uaua taheraa toto e te mau puu e toropuru uouo to roto.

I reira e nehenehe te mau taoˈa tahi ino e tere i roto i te mau tuhaa atea o te tino. Ia tomo anaˈe ratou i roto i te mau ravea paruru o te tino, e te mau taoˈa tahi ora atoa o tei aro i te mau taoˈa tahi ino e tere haere ra i roto i te toto e te pape tino, e nehenehe ïa teie mau taoˈa tahi ino e faaea i roto i te mau melo ora, mai te upaa, te mau mahaha, e te roro. I reira ratou e rahi mai ai ma te parare faahou, a roohia teie mau melo i te mariri ai taata. Ia parare anaˈe te mau taoˈa tahi ino e nehenehe ïa te vahine e pohe.

No reira, te ravea ia tamau i te ora ia ite-oioi-hia ïa te mariri ai taata o te titi i te haamataraa ra, hou oia a parare ai. Eaha te tia i te vahine taitahi ia rave no te haamaitai i te mau ravea ia ite-oioi-hia te reira? Te vai ra anei te tahi mea te tia ia ravehia na mua ˈˈe eiaha ia roohia i te mariri ai taata o te titi?

[Parau iti faaôhia i te api 4]

E toru atoa i rotopu i te 4 vahine e mariri ai taata o te titi o te ore roa e nehenehe e faahiti i te tahi noa ˈˈe mea ei tumu a roohia ˈi ratou i teie maˈi