Mariri ai taata: Nafea ia turu i te feia i roohia?
“E hinaaro matamua roa te mau taata maˈi atoa ia turu to ˈna taote ia ˈna e ia tauturu ia ˈna ia taa maite no nia i to ˈna maˈi.” — Rapaauraa holistique [no te taatoaraa] (beretane).
E OHIPA taa ê mau te haapaoraa ˈtu i te feia ati no te mariri ai taata, no te mau utuutu maˈi iho â râ e haapao tia ˈtu ia ratou. Oia mau, e tia ia ratou ia taai na huru e piti: ia faaite i te manaˈo maitai e te faaitoito e eiaha ia faaite i to ratou mau manaˈo hohonu i mua i te feia maˈi. Eaha ïa te auraa i roto i te faaohiparaa?
Eita te mau taote e te mau utuutu maˈi o te utuutu tamau i te feia maˈi roohia i te mariri ai taata e nehenehe e amo i te mau mauiui o te feia maˈi atoa; e mea rohirohi roa ïa no ratou i te pae no te here. Ua ani A ara mai na! i te hoê taata tei haapao na i te pae no te raau i roto i te fare maˈi ia horoa mai i to ˈna manaˈo no nia i te reira. “E farerei pinepine na vau i te mau huru taote atoa e te mau huru taote taa ê atoa i te fare maˈi, ta ˈna ïa i parau. O te mau taote no te mariri ai taata te au noa na e ua ore to ratou anaanatae e to ratou puai.”
I te tahi aˈe pae, eita te pupu taote e te utuutu maˈi e nehenehe e vai toetoe noa e te atea atoa, no te mea te fariu ra te feia maˈi i nia ia ratou no te titau i te hoê tiaturiraa. I roto i ta ˈna buka ra Te hoê tiaturiraa apî no te feia maˈi mariri ai taata (beretane), ua parau o Maurice Finkel i teie nei parau: “E hinaaro iho â râ te hoê taata maˈi mariri ai taata i te tiaturiraa. Na te tiaturiraa e horoa ia ˈna i te puai no te aro atu i to ˈna maˈi — noa ˈtu e e mea faufaa ore. (...) E pohe mau ïa te taata e faarue i te aroraa, te taata râ e aro e nehenehe oia e ora mai.”
E parahiraa atâata mau to te taote, mai te hoê taata haere na nia i te taura etaeta. E tia ia ˈna ia hiˈopoa i tei hea faito e nehenehe ai oia e faaite i te taata maˈi no te tauturu ia ˈna ia aro i to ˈna maˈi. Ia parau rahi atu oia, eita anei te taata maˈi e faatopa roa i to ˈna anaanatae? Na nia ˈˈe, e taa ê teie mau tupuraa ia au i te mau nunaa.
Ua titorotoro A ara mai na! ia Tomoyoshi Hirano, te hoê Tapone ua pohe to ˈna na metua hoovai aita i maoro aˈenei i te mariri ai taata. Ua faaite mai teie taata i teie nei parau: “Ia au i te mau peu Tapone eita e tia ia faaite i te mau mea au ore. No reira aita te taote o to ˈu metua hoovai tane i faaite ia ˈna e e mariri ai taata to ˈna. I te mea mau, aita roa oia i parau aˈe i ta ˈna mau tamahine. Ua faaite mai oia i teie parau oto ia ˈu no te mea e ‘taata ê’ au no taua utuafare fetii ra. Ua manaˈo oia e e faaoti au i te mau opuaraa atoa ma te faaite ore i ta ˈu vahine e i to ˈu metua hoovai tane. Teie râ, ua manaˈo maite au e no te mea e kerisetiano vau e tia roa ia ˈu ia parau atu ia ratou i te parau mau ma te mǎrû, ma te huna ore atu i te mea mau.”
I te tahi aˈe pae, i te pae tooa o te râ ma, ia ore te hoê taote e haamaramarama maitai i te taata maˈi no nia i to ˈna huru, eita anei oia e haavahia a muri aˈe no te mea ua rave noa te taata maˈi ra i te mau faaotiraa ma te mau tapao navai ore? Inaha, e au te reira i te hoê pae rahi i ta te taata maˈi e hinaaro ra e ite e i tei hea taime. O ta te taote Charles McKhann ïa i parau ma teie nei mau parau: “Ua ite mai au e ia ui te feia maˈi i te mau uiraa tia roa, e tia iho â i to ratou taote ia farii e ia horoa ˈtu i te mau pahonoraa au maite.” — Te parau mau no nia i te mariri ai taata (beretane).
E faaitoitoraa mau ïa no te hoê taata maˈi ia rapaauhia oia e te pupu taote te faaite atu i te maitai mau i te feia maˈi. Teie te faaite mai i te faufaaraa ia maiti i te hoê taote e nehenehe tatou e faatupu atu i te mau taairaa maitai. Ua parau faahou te taote McKhann e: “E nehenehe te hoê taote ta outou e tiaturi maite e haamama rii mai i to outou mau fifi atoa. E tia i to outou taote ia aroha, ia manaˈo maitai, e ia haapao maite i to outou huru taata mai ia ˈna e haapao i to outou maˈi.”
Ma te faaite e eita te tahi mau melo no te pupu taote e haapao maitai i te mau hinaaro o te feia maˈi, ua papai te hoê vahine utuutu maˈi te haapao i te feia maˈi mariri ai taata i te New York Times e: “Ta ˈu e maere nei, oia hoi e nehenehe te feia maˈi e to ratou fetii eiaha ia upootia i nia i te mariri ai taata, ia faaoromai râ i te mau utuutu e te mau fare maˈi o te au to ratou faanahoraa no te faatupu i te inoino, no te faaore i te anaanatae e no te faaereraa i te puai e te tauturu ta te feia maˈi e hinaaro ra i roto i to ratou fifi.” Ua faaoti oia i ta ˈna rata ma teie nei mau parau: “E tia ia faˈihia e e mau ‘mauhaa’ atoa te mǎrû, te peu maitai, te ata e te manaˈo maitai no te tauturu ia tinai i te mariri ai taata.”
E nehenehe atoa vetahi mau taata e afai mai i te turu rahi i te taata maˈi, ei hiˈoraa to ˈna mau fetii fatata e to ˈna mau hoa. Oia iho â râ te tane, te vahine aore ra te mau tamarii. No te faaite i te huru tauturu e nehenehe e hopoi atu i te hoê taata maˈi mariri ai taata, ua titorotoro A ara mai na! i te tahi nau taata tei turu i to ratou hoa faaipoipo roohia i te mariri ai taata aore ra tei ora mai i te mariri ai taata.
“Ua tia ia ˈu ia taui i te mau mea faahiahia roa ˈˈe ia ˈu”
Te faaite ra te huru o Terry i te faufaaraa o te tauturu afaihia mai e te utuafare fetii. E 28 matahiti to Terry i to ˈna faarooraa, i te mahana hopea no te matahiti 1982, e ua roohia oia i te mariri ai taata “ino mau”. Ia au i te mau taote e 6 noa e tae atu i te 12 avae te toe ra ia ˈna. Nafea to Terry e to Paul, ta ˈna tane, i te fariu-tia-raa ˈtu i teie tupuraa?
Te faatia ra o Paul ia A ara mai na! e: “Ua parau vau ia ˈu iho e e tia ia mâua ia aro i te mea mau. Maa avae noa e toe ra ia Terry, e ua hinaaro au ia ora oia i te toea o to ˈna mau mahana ma te tia roa. Inaha ua ite mâua e e nehenehe te chimiothérapie [te hoê rapaauraa au i te mariri ai taata] e faatupu i te mau faahopearaa au ore roa, oia hoi te toparaa te mau rouru, te puareare e te pihae-tamau-raa.”
A ara mai na!: Eaha te faahopearaa o teie tupuraa i nia i to oe oraraa tane?
“Ua tia ia ˈu ia taui i te mau mea faahiahia roa ˈˈe ia ˈu. Aita to te mau taoˈa e te moni e faufaa faahou no ˈu. Ua ite au e e tia ia ˈu ia faaea fatata i te mau taime atoa i pihai iho i ta ˈu vahine no te haapao ia ˈna. Ua haapii atoa vau ia faaoromai e eiaha ia haama ia hinaaro oia e pihae i te vahi taata. Auaa râ, ua ite maite oia i te mea mau e aita oia i auê noa ˈˈe no nia i to ˈna huru. Ua tauturu te reira ia ˈu ia amo i ta ˈu hopoia.”
A ara mai na!: Eaha ˈtu ai te mau manaˈo ta oe e nehenehe e horoa i te feia e fetii aore ra e hoa to ratou tei roohia i te mariri ai taata?
“Ia haapao maite outou eiaha taua taata here ra ia manaˈo e e faateimaharaa oia no outou. Ia feruri outou e o outou aˈe oia. Ia haapii ia ite i to ˈna mau manaˈo hohonu ia ite outou eaha te parau atu ia ˈna e afea. I te tahi taime, e hinaaro oia e paraparau noa, i te tahi râ taime eita roa oia e hinaaro e paraparau aˈe no nia i to ˈna maˈi.”
A ara mai na!: Eaha tei tauturu ia Terry ia faaoromai i to ˈna fifi?
“Ua turu to mâua mau hoa Ite no Iehova ia mâua ma te haere e hiˈo ia mâua e ma te faaineine i te maa na mâua. E te mea faahiahia roa ˈˈe, auaa ta ˈna haapiiraa bibilia, ua tamau maite o Terry i roto i to ˈna feruriraa i te tiaturiraa no te tia-faahou-raa e te anotau e ore roa ˈi te pohe e te maˈi.”
Mai ta te mau taote i tohu, ua pohe o Terry i te avae atopa 1983, aitâ i mairi hoê matahiti.
Te maitairaa o te oraraa e te mau titauraa
Ia roohia tatou i te hoê maˈi pohe, e uiui tatou i teie mau uiraa ia tatou iho: E hia roaraa e toe ra ia ˈu? Maa hebedoma? maa avae? maa matahiti? I te reira faito, e mea faufaa ˈˈe te maitairaa o te oraraa. E riro te mau mea atoa ta tatou e rave, noa ˈtu â ïa e mea matau-noa-hia, mai te papai i te rata aore ra te taio, ei mea auraa ê roa e e faariro te reira i te oraraa ei mea faufaa ia orahia. Mai te peu e nehenehe e rave i taua mau mea ra, e riro te reira ei rapaauraa.
Te manaˈo atoa ra o Barbara, te hoê vahine beretane e 46 matahiti, mai teie te huru. I te matahiti 1980, ua ite mai oia e e mariri ai taata to ˈna i te titi. Mai reira mai, ua parare te mariri i te tahi mau melo. Teie râ, ua haamaitai te chimiothérapie e te radiothérapie ia ˈna. Nafea oia e faaoromai ai i to ˈna maˈi? “E mea faaitoito na ˈu ia faaoti i te mau titauraa eita e maoro e oti. E opua noa vau i te mau opuaraa e nehenehe e rave-oioi-noa-hia. E tauturu te reira ia ˈu ia oaoa ma te au noa e ia mauruuru.
“O te tauturu atoa mai ia ˈu, te faaitoitoraa ïa ia manaˈo ia vetahi e ia haapao atu ia ratou. E rave ïa vau i te taime no te hapono i te mau rata i te feia e farerei nei i te fifi no te tamahanahana ia ratou. Te oaoa atoa nei au i te papairaa i te tahi atu â mau taata.”
Nafea o Stephen, ta ˈna tane, i te tururaa ˈtu ia ˈna? “E tauturu rahi atoa te haapao maitai ta ˈu e faaite atu nei ia Barbara no nia i to ˈna huru. E rave amui mâua i te mau mea atoa. Ei hiˈoraa, noa ˈtu e mea au na mâua e piti atoa ra te ohipa taio, mea au na mâua ia taio ma te reo teitei, te tahi na muri i te tahi, no te haafanaˈo te tahi i te tahi i ta mâua mau taioraa.”
Te hoê paruparuraa o te mafatu, e i muri aˈe te mariri ai taata
Ua roohia o Charles, te tane o Dode, te hoê taata ono ahuru matahiti e te etaeta maitai, i te hoê paruparuraa o te mafatu i te matahiti 1985. Ua faaea noa na oia i te vahi faaora-faahou-raa e iva mahana i te maoro, no to ˈna hinaaro rahi e haamata faahou i ta ˈna ohipa aita i ono hebedoma i muri aˈe ua haamata oia i ta ˈna ohipa. I muri aˈe, i te avae setepa no taua matahiti ra ua haamata oia i te tuˈi ma te mau ore i te mau taime tamaaraa. Ua faaite te hoê hiˈopoaraa e e mea papu e mariri ai taata to ˈna i roto i te ouma. Ua tâpûhia oia i te avae titema e e maha hebedoma i muri aˈe ua haamata faahou oia i ta ˈna ohipa!
Nafea o Dode i te faaitoitoraa i te turu i ta ˈna tane i roto i taua mau avae fifi ra? Te pahono ra oia e: “Aita mâua i haamauˈa i to mâua taime e to mâua mau puai i roto i te mau manaˈo faufaa ore. Ua tiai mâua ia ite i te mau hiˈopoaraa hou a paraparau ai aore ra a rave ai i te mau faaotiraa.
“Ua haapao mâua i te rapaauraa horoahia mai e te mau taote e te taote tâpû, e ua tapea mâua i te tiaturiraa. Aita mâua i faaea i te parau i te mau parau faahiahia e ia manaˈo i te oraraa. E manaˈo faaitoito roa to ta ˈu tane, e ua hinaaro maite au e tauturu ia ˈna.”
A ara mai na!: Eaha ˈtu ai ta oe i rave no te tauturu ia ˈna ia tapea i te hoê manaˈo faaitoito?
Dode: “Ua taotiahia e au te mau taata e haere mai e hiˈo ia ˈna i to ˈna faaearaa i te fare maˈi. Ua hinaaro vau ia faaau te mau taata no te farerei ia ˈna e ia faaea poto noa mai ratou. Na reira to ˈu araraa eiaha oia ia farerei i te mau taata manaˈo maitai tei nehenehe râ e faarohirohi ia ˈna. I te mea mau, ua haamaitai rahi aˈe te mau hanere rata faaitoitoraa ta ˈna i noaa, ia ˈna i te mau farereiraa.”
A ara mai na!: Ua ite matou e e vahine utuutu maˈi oe na mua aˈe e e parau tuite ta oe e oia atoa ua rave oe i te ohipa e te mau taote e rave rahi. I teie nei o ta oe tane teie e maˈihia ra, i to oe manaˈo nafea te mau taote e riro ai ei turu mau no te feia maˈi?
Dode: “Te manaˈo nei au e e tia i te taote ia horoa i te hoê manaˈo faaitoito i te taata maˈi; te na reira nei iho â te taata e rapaau nei i ta ˈu tane. E tia noa ia ˈna ia parau atu i ta ˈu tane ta ˈna e hinaaro ra e ite e ia pahono i ta ˈna mau uiraa. Parau mau, ua hinaaro iho â vau ia faaite mai te mau taote i te mau mea atoa ia ˈu. Ua hinaaro râ vau ia ueue ratou i te mau huero tiaturiraa eiaha râ i te mau huero faateimaharaa. Inaha, mai te peu râ e hinaaro te taata maˈi, eita vau e manaˈo e e tia ia parau atu ia ˈna e hia mahana e toe ra ia ˈna. Tei te huru e te hinaaro mau o te taata maˈi.”
A ara mai na!: Eaha te tauturu ia oe ia faaoromai i te reira i te mau mahana atoa?
Dode: “Te manaˈo maitai! E tamata te taata e turu ra i to ˈna hoa faaipoipo maˈi i te faaite tamau noa i te anaanatae. E mea au roa ïa na ˈu ia faaroo atu i te hoê taata ia ani mai ia ˈu e: ‘E o oe, Dode, eaha to oe huru?’ Ua papu atura ïa ia ˈu e te taa maite maira vetahi i to ˈu nei fifi.
“E tauturu rahi atoa mai te faaarearea ia mâua. No te mea, mea au na mâua i te golf e no te mea ua topa roa te faito kilo o Charles i raro, ua parau atura vau ia ˈna i te hoê mahana e: ‘Aita vau e ite mai te peu e e au to oe na avae, i teie nei, i te mau raau tairi popo numera toru aore ra i te mau auri tairi popo numera maha!’ Ua pohe atura oia i te ata. Taa ê noa ˈtu i te reira, aitâ i mairi e ono avae i muri aˈe i to ˈna tâpûraahia, ua faaoti roa oia i te hoê hautiraa golf e o vau!”
E o Charles, te taata maˈi, eaha, ia au ia ˈna, te mau mea faaitoito roa ˈˈe?
“E toru atoa ra ta ˈu e ite nei: ta ˈu vahine, te pupu taote e to mâua mau hoa atoa. Ua turu-maite-hia mâua e te mau melo no te pupu taote. Ua faataa mai ratou na mua roa i te mau tuhaa atoa o te tâpûraa e ua haapao mai ia mâua mai te mau taata eiaha râ mai te mau numera. No reira mâua i tiaturi maite ai ia ratou, o tei tauturu mai ïa ia mâua ia anaanatae noa.
“Parau mau, o ta ˈu vahine tei turu rahi aˈe mai ia ˈu. E no te mea ua utuutu aˈena oia i te mau maˈi, e mea faahiahia ˈˈe ïa no ˈu. Ua tauturu rahi e ua haapuai atoa mai te pure ia ˈu. Ua pure na vau ia nehenehe au e rave faahou i te ohipa (...) e, te ite nei hoi outou, teie nei au i roto i to ˈu piha papairaa parau!”
Ia aro tia ˈtu i te mea mau, ia ora ma te tiaturi
Ua titorotoro A ara mai na! ia Ethel, ua pohe ta ˈna tane, o Stan, aita i maoro aˈenei i te mariri ai taata i te 65raa o to ˈna matahiti.
A ara mai na!: Eaha te rapaauraa horoahia ia Stan?
Ethel: “Ua itehia mai to ˈna mariri ai taata i te tauupu i te avae tenuare 1985. Aita i maoro i muri aˈe, ua ite mai mâua e e puu atoa to ˈna i roto i te mahaha, te mata e te roro. Ua rapaauhia to ˈna mahaha na roto i te chimiothérapie e te radiothérapie no te tahi atu mau melo maˈi. I roto i te hoê tau, e au e ua maitai-rii-hia oia e ua opua ˈtura oia e haere no te hoê tere. I te hoê râ mahana, ua roohia aˈera oia i te mau pihae ino mau, e ua ite atura ïa mâua e eita roa oia e ora mai.”
A ara mai na!: Eaha atura ïa to orua huru i mua i te reira?
Ethel: “Ua paraparau maite mâua no nia i te reira, e ua aro tia ˈtu o Stan i te mea mau. Oia mau, auaa to ˈna huru, ua tauturu mau oia ia ˈu ia hiˈo i te mea mau i mua.
“Eita vau e taˈi noa, e ua tutava noa vau eiaha ia paruparu i mua ia ˈna. Te haamanaˈo ra râ vau i te hoê mahana, ua ite au ia ˈna te taˈi ra e ua haaparuparu te reira ia ˈu. Ua parau atura vau ia ˈna e: ‘Mai te peu e hinaaro oe e taˈi, mea maitai aˈe ia taˈi taua e piti atoa ra. E tamǎrû mai te reira ia taua.’ Ua na reira iho â mâua e te manaˈo nei au e ua tamǎrû iho â te reira ia mâua. I to mâua tamǎrôraa i to mâua roimata, te ata noa ra oia ma te huru haama rii, ua ite râ vau e ua haamaitai te reira ia mâua.
“Te tahi mea faufaa roa te tiaturiraa bibilia ïa no te tia-faahou-raa. Ua paraparau pinepine mâua no nia i te reira. Ua parau noa mai oia ia ˈu e: ‘E taoto noa vau no te hoê taime. I muri aˈe e ara mai au ua oti anaˈe te faanahonahoraa apî i te haamauhia i nia i te fenua nei.’ Ua turu rahi mai to mâua faaroo ia mâua.”
Te mariri ai taata e te faaroo
No te mea e tia ia aro tataitahi i te mariri ai taata, e nehenehe te faaroo puai maitai e riro ei tauturu rahi. E huru tamǎrû to te pure, te faatupu i te aparauraa e o te Atua. Te parau nei iho â te Bibilia e: “Eiaha outou e ahoaho noa ˈtu i te mau mea atoa nei; e faaite hua râ i to outou hinaaro i te mau mea atoa nei i te Atua, i te pure, i te aniraa ˈtu ma te haamaitai. E na te hau a te Atua, o tei hau ê atu i te ite taata nei, e faaitoito mai i to outou aau, e to outou manaˈo i te Mesia nei ia Iesu.” — Philipi 4:6, 7.
Te faaite nei te mau parau tohu e tupu nei e ua fatata roa te tau e ‘horoi ai te Atua i te mau roimata atoa; e e ore roa te pohe, e te oto, e te mihi, e te mauiui, e ore atoa ïa, no te mea ua mou te mau mea tahito ra’. Oia mau, i raro aˈe i te faatereraa o te Basileia o te Atua, e ore roa te mariri ai taata e te tahi atu mau fifi atoa. Ua fatata roa mai taua tau ra i teie nei. — Apokalupo 21:3, 4; Luka 21:29-33.
[Tumu parau tarenihia i te api 14]
Outou o tei roohia i te mariri ai taata, a tapea noa i to outou anaanatae
1. Eiaha e tapiri i te mata i mua i te mea mau. Ia ite maite râ i te mea mau e ia aro atu i to outou maˈi. Mea na reira outou e faaohipa maite ai i te taime e vai ra ia outou.
2. Ia faaoti i te mau opuaraa ohie ia rave, ia faaoti i te mau tapao. Ia tapea i te hoê tapao i roto i te oraraa. Ia ore outou e faaoti i te hoê aveia i roto i to outou oraraa, e riro oia ei mea faufaa ore. E nehenehe te reira e taui — tei ia outou noa.
3. Ia nehenehe noâ ia outou, ia ohipa noa outou. Noa ˈtu â ïa e ua paruparu roa to outou tino, aita to outou oraraa pae feruriraa i hope. No te aha hoi e faarue noa ˈi? Ia faaaraara noa i to outou feruriraa — a taio, a papai, a peni i te mau hohoˈa, a haapii. A faaoti atoa i te mau opuaraa apî.
4. Ia atuatu i te hoê huru faaanaanatae ia nehenehe outou e faaohipa i to outou mau ravea ma te paari. Mai te peu e auê noa outou no nia i to outou huru, e manaˈo noa outou ia outou iho e e haapeapea noa outou ia outou iho. E nehenehe outou e faaitoito i to outou mau hoa e to outou mau fetii na roto i to outou huru faaanaanatae.
5. Ia faaitoito i te tapea i te huru faaarearea e te iteraa i te ata ia outou iho. A hiˈo i te mau roti, eiaha noa i te mau tara. A manaˈo i te mea e e mea ora outou eiaha noa i te mea e, mai te mau taata atoa, e nehenehe noa outou e pohe.
[Hohoˈa i te api 13]
E nehenehe te pupu taote, te utuafare fetii e te mau hoa o te taata maˈi mariri ai taata, ratou paatoa e turu atu ia ˈna.