Ia au i te Bibilia . . .

Eaha te huru faataaraa e au-ore-hia e te Atua?

“E MEA rahi te mau fifi i fa mai i muri aˈe i to ˈu faataaraa,” o ta te hoê vahine kerisetiano e tane taiva to ˈna, i papai. “Te taime faatanoraa, e ere ïa i te mea ohie. Ua faaafaro vau ia ˈu eiaha noa i te pae feruriraa anaˈe tera râ i te pae moni e te pae varua atoa. Ua ani au ia ˈu iho e mai te peu e e haamaitai Iehova i ta ˈu faaotiraa, ma te ite hoi e te parau nei te mau Papai e e mea riri na ˈna te faataaraa. E tuhaa inoino noa te reira.”

Ia hope te hoê faaipoiporaa, eita te mau haafifiraa e ore. E anairaa fifi apî te tupu tauê mai. Te mau manaˈo—taiâraa, moemoeraa, e manaˈo faahapa—o te fa tauê mai. Te aroraa ia roaa mai te parau faatia no te rave i te tamarii. E taˈi te hoê tamaiti aore ra tamahine i to ˈna Mama aore ra i to ˈna Papa. E hopoi mai te haafifiraa i te pae moni i te tahi mau faateimaharaa. Te tamataraa i te faaruru i te hinaaro no te taatiraa ta te faaipoiporaa noâ e faatia.

No reira, te vai ra te manaˈo o te Atua te tia ia haapao. Te parau nei te Bibilia e e mea ‘riri na te Atua te faataaraa.’ (Malaki 2:16) Te auraa anei e mea riri na te Atua te mau faataaraa atoa? E tia anei i te hoê kerisetiano ia faahapa ia ˈna no te imiraa i te faataa i te hoê hoa taiva? No te mau pahonoraa, e hiˈopoa anaˈe i te mau tupuraa i te tau o Malaki o tei turai i te Atua ia riri atu i te faataaraa.

“Eiaha outou e haavare”

Ua tohu o Malaki i muri aˈe i te matahiti 443 hou to tatou nei tau, e fatata hoê senekele i muri aˈe to te mau ati Iuda afai-tîtî-hia hoˈiraa mai Babulonia mai. Ua rahi te mau tupuraa iino i Iuda, i rotopu iho â râ i te mau tahuˈa. (Malaki 2:7-9) E mea puai roa te mau peu mai te haavareraa, te taiata, te eiâraa, e te haavîraa i rotopu i te mau ati Iseraela atoa. (Malaki 3:5) Ua faatupu taua mau tupuraa ra i te tahi tiaturiraa atâ e ua parau vetahi e: “E mea faufaa ore te haamori i te Atua.”—Malaki 3:14.

Ua ite-atoa-hia te toparaa i te pae faaroo e morare i te tau o Malaki i roto i te toparaa i te faatura o te faaipoiporaa. E rave rahi mau tane ati Iseraela o tei faataa ê i te mau vahine o to ratou apîraa, peneiaˈe no te faaipoipo i te mau vahine apî aˈe no te mau nunaa etene. Ua haamata te fata a Iehova i te î i te mau roimata o te mau vahine i faaruehia o tei haere mai i te hiero no te oto e no te pii i te Atua.—Malaki 2:13-15.

Eaha to te Atua ra o Iehova manaˈo no nia i teie huru faataaraa? Na roto ia Malaki, ua faaara oia e: “‘E tena na, e haapao i to outou varua, e eiaha te hoê e haavare noa ˈtu i te vahine a tana apîraa ra. Te riri nei hoi au i te taata i faataa ê,’ te parau maira Iehova, te Atua o Iseraela . . . ‘E tena na, a ara i to outou varua, e eiaha outou e haavare i ta outou mau vahine.’” (Malaki 2:15, 16) Ia au i te Theological Wordbook of the Old Testament, te auraa o te parau hebera ‘haavare’ o te “haapeapearaa, te raveraa ma te taiva.” I roto i te Salamo 59:5, te horoahia nei no taua parau haa ra te auraa e “feia haavare.”

Ia au i taua tupuraa ra, e nehenehe tatou e taa maitai aˈe i te mau parau i roto i te Malaki 2:16 e: “Te riri nei [oia] i te faataaraa.” E riri Iehova i te huru faataaraa haapaoraa ore no te faataa ê i te hoê hoa faaipoipo no te rave i te tahi atu. Ei hiˈoraa, te haavare nei te hoê tane taiata o tei faataa ê i to ˈna hoa faaipoipo hapa ore noa ˈtu aita oia e hinaaro aore ra e faahepo ia ˈna ia faataa ê ia nehenehe oia e faaipoipo atu i te hoê taata ê, i ta ˈna vahine. E mea hairiiri teie raveraa haavare, e te tiaturi ore i te hoê hoa hapa ore i mua i te mata o te Atua. Hoê taata o te rave i te mau matahiti maitatai o te oraraa o te hoê vahine e e faarue ia ˈna i muri iho, no te hoê vahine apî aˈe paha, e taata haavare mau oia.a

Eaha ˈtura, no nia i te hoê hoa hape ore o te maiti i te faataa ê i ta ˈna vahine o tei taiata? E mea riri anei na te Atua i teie huru faataaraa atoa?

Te hiˈoraa o te Atua iho

Te ite mau ra anei te Atua i te huru o te taata i mua i te faaotiraa i te faataa ê aore ra eita i te hoê hoa taiata? Ma te paraparau-taipe-raa, te faariro nei Iehova ia ˈna iho ei taata faaipoipohia i te nunaa Iseraela tahito oia hoi na roto i te faufaa ta ˈna i faaau e o ratou. (Isaia 54:1, 5, 6; 62:1-6; Ieremia 31:31, 32) Mai te hoê tane, e mea haapao maitai o Iehova, aita roa ˈtu oia e faafariu ê i to ˈna aroha i nia i te tahi atu mau nunaa. (Salamo 147:19, 20; Amosa 3:1, 2) Tera râ, e o Iseraela ïa? Eaha ïa huru vahine ta te nunaa i faaite mai?

I roto i to ˈna taatoaraa, ua haapapu pinepine te nunaa i to ˈna taiva i te faufaa, ma te tapae i te huru faataahia i roto i te pure papaihia i roto i te Daniela 9:5, 6: “Ua hara matou, ua rave i te parau ino, ua faatia i te taiata, e ua taiva, i te faarueraa i ta oe i faaue e ta oe faaauraa: e aita aˈenei matou i faaroo i to mau tavini i te mau peropheta ra, o tei parau mai i to oe ra iˈoa i to matou mau arii, e to matou feia mana, e to matou mau metua, e te taata atoa o te fenua nei.” I mua i te mata o Iehova, e au taua taivaraa ra mai te hoê vahine o te rave nei i te peu taiata.—Ieremia 3:1.

I muri aˈe ehia senekele faaoromairaa e te faaruru-tamau-raa eaha ta Iehova i rave? Na roto i te raveraa i te hoê ohipa haavaraa papu, ua hopoi-tîtî-hia te mau opu no te pae apatoerau e te mau opu no te pae apatoa i rapae au mai i to ratou fenua, oia mau, ua faataa ê Iehova ia ˈna iho i te nunaa. (Ieremia 3:8; Daniela 9:11, 12) No reira ia au i to ˈna iho hiˈoraa, nafea o te Atua ra o Iehova e nehenehe ai e riri i te reira ia maiti anaˈe te hoê hoa i te faataa ê i te hoê vahine o tei ore i faatura i te euhe o te faaipoiporaa?

E faanahoraa moˈa te faaipoiporaa i mua i te mata o te Atua, e o te feia o te faaô atu i roto, eiaha ratou e haafaufaa ore i ta ratou euhe. (Hebera 13:4) Tera râ, mai te peu e e taiva te hoê vahine aore hoê tane i ta ˈna euhe na roto i te raveraa i te “poreneia,” e vaiiho te Atua i te taata hapa ore i te tiaraa ia faaoti mai te peu e e faaore oia i te hapa aore ra e imi i te faataaraa. (Mataio 19:9) E faaotiraa fifi mau, o te hoa hapa ore anaˈe te nehenehe e rave. Ia maiti oia i te faahope i te faaipoiporaa, eiaha roa te tane aore ra te vahine e faahapa ia ˈna mai te peu e e imi o ˈna i te faataaraa. A haamanaˈo e e mea riri na Iehova, eiaha te faataaraa atoa, tera râ te huru faataaraa aita e tuea ra i te mau papai oia hoi te faarueraa i te hoê hoa no te rave te tahi atu.b

[Nota i raro i te api]

[Faaiteraa i te fatu o te hohoˈa i te api 28]

Historic Costume in Pictures/Dover Publications, Inc., New York