Te nehenehe maere mau o te Opale

Na te taata papai i te A ara mai na! i Auteralia

TE PARAU ra te hoê rohipehe tuiroo e ‘o te mau daiamani te mau hoa maitai roa ˈˈe o te mau tamahine.’ Tera râ, e ere noa te mau daiamani o te nehenehe e faahinaarohia e taua feia fatu ra. Oia mau, no te purapura o te peni e te nehenehe faito ore, e mea faaau-ore-hia te ofai opale e ta ˈna mau peni rau!

Te huru o te opale e ofai aita e terehe to roto. Mai te one tahatai ra to ˈna huru. Tera râ, te vai ra te pape i roto i to ˈna huru taoˈa faufaa. Tau senekele i muri aˈe, ua ô te hoê anoiraa o te silice e te pape i roto i te mau afafaraa e ua vavahi i te mau ofai. Ia pau anaˈe te pape, e paari mai taua anoiraa ra no te riro ei opale.

Te maimiraa i te Opale

E ere i te ohipa ohie ia tatara i te opale i to ˈna vairaa, i roto i te mato. E itehia te rahiraa i te vahi atea, i te vahi mai te medebara ra te huru, i reira te veavea, muriadi mumuraa o te mau manumanu, e te itiraa o te pape e faariro pinepine nei te oraraa ei au ore. E mai te feia maimi tamau noa, te huru o ta ratou upootiaraa tei nia ïa i te manuïaraa.

Hau atu â, 95 i nia i te hanere o te mau opale atoa itehia e mea matauhia. E mea marau e aita e faufaaraa. I nia i te opale e toe ra i te maimi, hoê noa faito iti roa, e opale faufaa, aore ra te hoê ofai maitai rahi. No reira, maoti ua ona te tahi mau taata maimi i te mau faufaa rahi, vetahi ua heru faufaa-ore-noa-hia ïa.

Ua riro te mau toi repo, te mau ope, e te mau hamara, ei taoˈa tumu o te mau taata maimi ehia senekele i teie nei. Na mua, e heru o ˈna i te hoê apoo pirihao i roto i te repo paari, e te mârô ia naea-roa-hia i te vahi repo o te araea i reira e itehia ˈi te opale. I muri iho, e heru oia i te mau apoo tarava, e te lamepa i nia i te rima, ma te imi i te pura o te peni, na te reira e faaite e ua ite oia i te hoê opale.

Ua monohia taua huru raveraa e te mau mauhaa moni rahi. E roaa teie nei, i te opale e te tahi mau totaiete tapihoo na roto i te heruraa i te repo e te mau bulldozers. Teie nei, te rahiraa o te mau apoo te heruhia ra e te mau matini rarahi no te faaapoo. Te faaohipa-atoa-hia ra i te mau pereoo heru faahiahia mau no te haere i te mau vahi i reira te opale e itehia ˈi.

Haamaitaihia i to ˈna unauna

Oia mau, e mea taa ê te opale tarai-ore-hia e tei ore e faaanaanahia ia faaauhia i to ˈna faaotiraa. E tia iho â ia tarai e ia faaanaana te opale. E nehenehe e faaohipahia ei tapea rima, taoˈa faatautauhia, e te tahi atu ofai maitatai. A tapao na eaha ta te Buka parau paari o te ao nei e faaite ra: “Te itehia ra te nehenehe o te opale i roto i ta ˈna mau peni purapura, eita ra o ˈna e taraihia mai te huru o te daiamani. Maoti ra, e taraihia ia menemene rii te hohoˈa.”

Ua riro te hamaniraa o te hoê opale e ta ˈna mau peni anaana ei miterio ehia matahiti i teie nei. Teie ra, na roto i te mau taoˈa hiˈo i te mau ohipa haihai roa, ua haamata te mau aivanaa i te haamatara i te parau huna o te opale. Te faatupu nei te daiamani i ta ˈna mau peni no roto i te faatauiraa, oia hoi, na roto i te faaoparaa i te maramarama i te niaraa o te ofai maitatai. Te faatioi nei te huru o te opale i rapaeau e i roto atoa te maramarama, ma te faatauiraa ia ˈna e rave rahi mau peni i roto i te ofai.

Te parau nei te buka Te mau opale peni i Auteralia: “Mai te peu e e faaohuhia te ofai maitatai, e taui oia i te mau peni. Te piihia ra teie huru tupuraa ‘te hautiraa o te peni’, e na taua huru tauiuiraa peni e horoa ra i te nehenehe taa ê mau o te mau opale.”

Te faahopearaa i nia i te moni hoo

Na mua e hoo ai i te hoê opale, e tia ia outou ia ite e e ere te mau opale atoa i te mea mau. Te vai ra te hoê doublet o te tapiriraa ˈtu i te hoê tuhaa rairai aore ra te hoê tapoˈi o te opale ofai maitai i niho i te hoê opale ite haere noa. Hoê â huru atoa no te triplet, tera râ, no te paruru ia ratou i te tore, e tuu-atoa-hia i te tahi taoˈa kerehe aita e peni. Noa ˈtu e mea nehenehe atoa, te faaara ra te buka Te mau opale Auteralia & Mau ofai maitatai—Mau taata no te Natura (beretane) e: “Aita te mau doublet e te triplet opale e tuuhia i roto i te pape, te mau pua, te ava aore ra te hoê horoi puai, no to ratou mau tuhaa tapirihia e to ratou taairaa e te hoê tima.”

Te tahi atu tupuraa i roto i te moni hoo o te ofai tumu, aore ra te peni tumu. E mea moni roa ˈˈe te opale ereere. E piihia ereere no to ˈna peni pouri puai, tera râ te horoa nei te ofai iho i te mau peni huru rau maere mau e fatata aita e otiaraa. Te opale maramarama, aore ra uouo, te rahiraa o te taime, e mea mama aˈe. Noa ˈtu e peni puai teatea aore ra uouo teie huru, e faatupu atoa i te mau peni anaana—tarona, uteute, matie, e te ninamu. Oia atoa te faufaaraa, te iteraa te hoo o te opale na roto i te peni puai mai te auahi ra (mea pinepine te uteute i te mea moni aˈe i te matie aore ra te ninamu) e te peni purapura.

Tera râ, mai te peu e e taoˈa anaana aore ra te hoê doublet aore ra triplet, te hoê ofai maitai uteute aore ra e ninamu matauhia, e riro te opale ei taoˈa nehenehe o ta outou e hinaaro e oaoa atu ai.

[Hohoˈa i te api 30, 31]

E fatata 95 i nia i te hanere o te mau ofai maitatai opale i Auteralia mai

[Faaiteraa i te tumu]

Hohoˈa: Ia au i te parau faatia o te Australian Overseas Information Service