Te ao faahiahia mau o te mau peu faaanaanataeraa manaˈo
HOLLYWOOD! Noa ˈtu eaha te mau vahi o te ao nei ta outou e faaea ra, eita e ore teie iˈoa i te faahoˈi mai i roto i to outou feruriraa i te mau manaˈo no nia i te mau hohoˈa i tavirihia e tae noa ˈtu hoi i te parau no te mau peu faaanaanataeraa manaˈo. Ma te piihia ei pu no te mau peu faaanaanataeraa manaˈo o te ao nei, e oia atoa hoi ei oire rahi unauna mau, aita ˈtu vahi e nehenehe e faaauhia i te parau no te imiraa faufaa mai ia Los Angeles ra te huru, oia hoi te tahi mataeinaa no Californie. Papu maitai, te reira te pu no te mau ohipa moemoeâ mau o te ao nei. Mai ta te hoê taata papai buka i parau, “ua tui roa te roo o Hollywood ei hamani moemoeâ maoti te ohipa teata, i roto i te ao taatoa nei.”
Mau peu faaanaanataeraa manaˈo—Imiraa moni rahi mau
Teie râ, e ere noa te hohoˈa no Hollywood tei parare roa i roto i te ao taatoa nei; ua riro o “Hollywood” ei tuhaa hooraa taoˈa rahi mau. Inaha, ia au i te vea ra Time, i muri aˈe i te mau materia e hinaarohia no te reva teitei, tei nia te parau no te mau peu faaanaanataeraa manaˈo i te piti o te parahiraa i roto i te mau hotu e hoohia nei e te Hau Marite. Te ohi nei te pae no te mau peu faaanaanataeraa manaˈo e rave rahi miria dala marite i te mau matahiti atoa, e te hoê tuhaa—e 20 i nia i te hanere—no te tahi mai ïa mau fenua.
Ua noaa i te Hau Marite te hoê faito e 35 i nia i te hanere o te mau buka i hoohia i nia i te matete o te ao nei, e 50 i nia i te hanere o ta ˈna mau pehe, e 55 i nia i te hanere i roto i ta ˈna mau hohoˈa i taviri e ta ˈna mau hohoˈa video, e 75 e tae atu i te 85 i nia i te hanere o te mau moni e noaa mai i te pae no te afata teata.
Ei faahoonaraa i teie faufaa rahi mau, te faaanaanatae nei o Hollywood i te ao nei. E ere noa no te mea e te oaoa ra te ao nei i te reira—e rave rahi mau fenua tei mutamuta no nia i te huru haapiiraa a te Marite, inaha te faarue roa nei ta ratou mau ui apî i ta ratou iho peu tumu no te rave i te mau manaˈo e te mau peu a to te fenua Marite. Aita roa ˈtu ïa matou e parau ra e no te Hau Marite noa mai te mau peu faaanaanataeraa manaˈo. E rave rahi mau fenua, te vai atoa ra ta ratou mau imiraa i te pae no te mau peu faaanaanataeraa manaˈo—te mau hohoˈa tavirihia, te afata teata, te mau pehe, te mau buka, te ohipa faaetaetaraa tino e rave rau atu â.
Te mau peu faaanaanataeraa manaˈo—Mea ohie mau i teie mahana
Ia au i te parau no te iteraa e o vai e na vai e faaanaanatae i te ao nei, te mea faahiahia roa inaha, mea ohie roa ia fanaˈo i te mau peu faaanaanataeraa manaˈo, e ua rau huru hoi i teie mahana. Ei faahohoˈaraa i te reira, mai te peu e ua ora outou hoê hanere matahiti i teie nei, na teihea ïa mau huru taata aravihi i te pae no te mau peu faaanaanataeraa manaˈo e haapao ia outou? E noa ˈtu e ua ora outou i roto i te mau vahi ruperupe roa ˈˈe, e riro iho â outou i te haumani i te mea aita e mau peu faaanaanataeraa manaˈo i reira, ia au i te manaˈo o te rahiraa o te taata o to tatou nei ui. Ei hiˈoraa, e tia ia tatou ia tere roa ˈtu i te vahi hime neraa aore ra faaotoraa upaupa. I teie mahana, e faaroo noa ˈtu ïa tatou i te mau huru taˈi upaupa atoa na roto i te mau afata radio afaifai, aore ra e taravarava noa tatou i te fare i nia i te roi e, ma te pata noa ˈtu i te hoê pitopito, e hautihia mai ïa i te mau huru hauti atoa.
I roto i te mau fenua ona, e nehenehe outou e ite atu i roto i te mau utuafare e rave rahi, i te hoê TV (afata teata), i te hoê VCR, e te hoê CD aore ra i te hoê matini faaoto upaupa, mai te mau huru matini hamaniraa apî atoa o teie nei tau. Ua paari vetahi mau tamarii ma te haaatihia to ratou fare i te mau afata TV i te hoê noa iho vahi mai te mau hiˈo ra te huru. I roto i te mau fenua e ere i te mau fenua navai roa, e rave rahi mau oire rii e mau vahi tapiri atu, te vai ra ta ratou pu TV i reira te taata e putuputu ai i te po ei faaanaanataeraa ia ratou. Ua riro roa te manaˈo o te huitaata nei i te TV. Ua î mau â te mau taime faaoaoaraa i te mau huru peu faaanaanataeraa manaˈo.
Te vai ra anei te hoê ohipa hape i reira? Te vai ra anei te tahi mau fifi i roto i te mau peu faaanaanataeraa manaˈo o teie nei tau? Aore ra ua riro anei te rahiraa peu faaanaanataeraa manaˈo ei ohipa huru ê mau i te pae no te moni? Ei hiˈoraa aifaito na to tatou e tia ˈi no nia i te ao faahiahia mau o te mau peu faaanaanataeraa manaˈo.