ORARAA KERISETIANO

A maiti i ta oe mau faaanaanataeraa ma te paari

No te aha e titauhia ˈi ia tatou ia maiti i ta tatou faaanaanataeraa ma te paari? No te mea a maiti ai tatou i te hoê hohoˈa teata, himene, reni natirara, buka aore ra hauti video, e maiti tatou i te mau mea e faaî i to tatou feruriraa aore ra manaˈo. Te ohipa ra ta tatou e maiti ra i nia i to tatou haerea. Te vahi peapea râ, te vai ra te mau mea ta Iehova e patoi ra i roto i te rahiraa o te faaanaanataeraa itehia i roto i teie nei ao. (Sal 11:5; Ga 5:19-21) No reira e faaitoito ai te Bibilia ia tatou ia tamau noa i te haafaufaa i te mau mea e faahanahana ia Iehova.—Php 4:8.

A MATAITAI NA I TE VIDEO A MAITI MAITAI I TE FAAANAANATAERAA E I MURI IHO, A PAHONO NA I TO MURI NEI MAU UIRAA:

No te aha e nehenehe ai e parau e hoê â te mau hauti a te mau taata taputô no Roma tahito e te tahi mau faaanaanataeraa no to tatou tau?
Nafea te mau mero o te amuiraa e nehenehe ai e tauturu i te feia apî ia maiti i te faaanaanataeraa ma te paari?
Nafea tatou e nehenehe ai e faaohipa i te Roma 12:9 a maiti ai i te faaanaanataeraa?
Eaha te tahi mau faaanaanataeraa maitai i roto i ta oe tuhaa fenua?

TE PARAHI NOA RA ANEI OE AORE RA TE OHIPA RA?

Te turai ra te rahiraa o te mau faaanaanataeraa tuiroo o teie nei ao i te taata ia parahi noa, eiaha râ ia ohipa. I roto i te mau hohoˈa teata, buka e te mau porotarama i roto i te afata teata, te haapii mai ra te taata ia hiˈo aore ra taio i ta te tahi atu i rave, eiaha râ i ta ˈna iho i hamani aore ra rave. Parau mau, te vai ra te mau faaanaanataeraa parahi noa, ua taa râ e rave rahi taata ua faufaa-aˈe-hia ratou maoti te mau faaanaanataeraa o te turai ra i te taata ia ohipa. Ei hiˈoraa, mea au roa na vetahi ia hauti i te upaupa aore ra ia peni i te hoê hohoˈa. No te tahi atu, mea au roa na ratou te mau faaanaanataeraa i rapaeau, mai te hoê tuaro, te hahaereraa aore ra te puhaparaa. Noa ˈtu te faaanaanataeraa ta tatou e maiti, ia “rave” tatou “i te mau mea atoa ia hanahana te Atua.”—Ko1 10:31.