Nafea to vetahi pae upootiaraa i nia i te mau manaˈo tano ore
IA TAE I TO ˈNA TAIME, e faatupu iho â te taata tataitahi i te mau manaˈo tano ore. No te mau fifi, te maˈi rahi, te matahiti rahi aore ra no te poheraa tei herehia e ratou, e riro te mau manaˈo hohonu tano ore mau i te mau roa i roto i vetahi mau taata, e inaha fifi roa ˈtura ïa to ratou oraraa.
Teie râ, i roto atoa i taua mau taata nei, te vai ra tei manuïa i te haavî i taua mau manaˈo hohonu ra e inaha, ua nehenehe ratou e faaoromai i te reira i roto i ta ratou mau ohipa i te mau mahana atoa. O te tahi mau hiˈoraa o te mau taata i uiuihia na te vea ra A ara mai na! tei faaitehia ˈtu i raro nei.
Ua rapaauhia o Janis no te tahi maˈi i te pae no te mau manaˈo hepohepo i farereihia e ana. Te na ô ra râ oia e: “Ta ˈu i ite mai, te ravea maitai roa ˈˈe no te arai i te reira, te haavîraa ïa vau iho i to ˈu mau manaˈo hohonu. Ua na reira vau na roto i te raveraa i te tahi mau mea na vetahi ê, mai te tunuraa i te faraoa monamona e te niraraa i te ahu. Ua rave atoa vau i te tahi tutavaraa taa ê na roto i te haamanaˈoraa i te mau mea oaoa mau e te mau ohipa e tupu a muri aˈe ta ˈu e titau ra. No to ˈu maˈi, e ere atura ïa i te mea ohie. I te tahi mau taime, mea ohie roa ia tuu e ia manaˈo i te mau manaˈo tano ore. E faufaahia râ te mau faahopearaa maitai maoti te tutavaraa.”
I muri aˈe e 45 matahiti faaipoiporaa, ua pohe te tane a Ethel. Noa ˈtu to ˈna peapea rahi, ua haavî o Ethel i to ˈna mau manaˈo hohonu. Te parau ra oia e: “E haa na vau i te rave i te ohipa na vetahi ê. Ei hiˈoraa, mea oaoa roa na ˈu i te haapii atu i te tahi pae no nia i te mau opuaraa a te Atua e vai ra i roto i te Bibilia. Na te oaoa o te hoê vahine i te mau mea maitatai ta ˈna i haapii, i tauturu atoa mai ia ˈu ia rahi atoa to ˈu oaoa. A haamau noa ˈi au i to ˈu feruriraa i nia i te mau mea maitatai e vai ra i roto i te Bibilia, na roto i te haapiiraa ˈtu i te tahi pae, na te reira i tauturu ia ˈu ia tatara i te mau manaˈo au ore i roto i to ˈu feruriraa. E haere atoa mai na te mau vahine apî aˈe ia ˈu ra, e ani i te tahi tauturu no te mau fifi ta ratou e farerei na, e te parauraa ˈtu vau ia ratou no nia i te mau ohipa maitai ta ratou e nehenehe e rave i roto i to ratou oraraa, o te riro ïa i te tauturu mai ia ˈu ia upootia ˈtu i nia i te mau manaˈo hohonu au ore mau.”
E oraraa ohipa roa to Arthur ehia rahiraa matahiti. E no te tahi maˈi i roohia i nia ia ˈna, ua tia aˈera ia ˈna ia faaea mai i ta ˈna ohipa e ia faaiti mai i te mau ohipa i rapaeau i to ˈna fare. E rave rahi avaˈe to Arthur faarururaa mai i te manaˈo faufaa ore e te hepohepo rahi. Ua nafea aˈera ïa o ˈna i taua mau manaˈo nei? “Ua faaea vau i te na reira. Ua hiˈo vau eaha ta ˈu e nehenehe e rave no te tauturu atu i te tahi mau taata e no te faaitoito ia ratou ia farerei ratou i te hepohepo rahi. I te mea hoi e ua mau noa vau i te fare, ua faaohipa pinepine aˈera ïa vau i ta ˈu niuniu paraparau. E no te rahi ta ˈu ohipa i roto i te parau no te tautururaa e te faaitoitoraa i te tahi pae, e iti roa ˈtura ïa to ˈu taime no te haapao noa ia ˈu iho.”
Na roto i te tahi mau fifi i farereihia mai e ana, e tae noa ˈtu hoi te poheraa o ta ˈna tane, ua ite mai o Nita i te peapea rahi e te hepohepo rahi. Ua haapii mai o ˈna nafea râ ia haavî i taua mau manaˈo hohonu ra, i roto i te roaraa o te tau: “Ia vehîhia vau e te hoê manaˈo peapea, e imi au i te tahi uputa e matara ˈtu ai au. E faahepo vau ia ˈu iho e haere e ori haere, e niuniu i te hoê hoa papu, e faaroo i te upaupa, aore ra e rave i te tahi ohipa ta ˈu i ite e e tamǎrû i te hepohepo rahi. E tamata vau i te aroha ia ˈu iho mai te huru ra ïa e e hoa maitai roa vau.”
Ua farerei mai o Mary i te tahi fifi maˈi e 32 matahiti te maoro. I te mea hoi e ua mau roa o ˈna i roto i te hoê parahiraa turairai, e faarue noa mai oia i te fare no te haere i te taote. Eaha ta Mary i rave ia ore oia ia haaparuparu? Teie ta ˈna e parau: “Ua riro ta ˈu tane e turu papu mau. E e taio pinepine atoa na vau i te buka e faaitoito ia ˈu. E niuniu tamau na vau i to ˈu mau hoa, e e pinepine vau i te titau ia ratou i to ˈu fare. Mea oaoa roa na ˈu ia haere mai ratou e farerei ia ˈu e eita roa ˈtu vau e faaohipa i taua mau taime ra no te faahiti noa i te parau no ˈu aore ra e rave e ia aroha noa mai ratou ia ˈu. Eita vau e haamauˈa i to ˈu taime i nia i te mau ohipa tano ore i roto i to ˈu oraraa no te mea mea rahi roa te mau ohipa matatai e vai ra no ˈu.
E vahine manaˈo roa o Margaret ia au i to ˈna naturaraa. “Ia ô mai te mau manaˈo tano ore,” te parau ra oia e “e imi vau i te hoê taata e manaˈo maitai to ˈna”—eiaha te hoê taata manaˈo otahi—te hoê râ taata matau-maitai-hia e au e o te faahaamanaˈo mai ia ˈu i ta ˈu mau ohipa maitatai i rave e o te faaitoito mai ia ˈu.”
E pae tâpû rahi ta Rose Marie i faaruru mai i te mau matahiti i muri ia ˈna, e e hitu taata i pohe i roto i to raua na fetii i roto noa i te area o te hoê matahiti e te afa. Papu maitai, ua faatupu te reira i te mau manaˈo tano ore mau. Aita râ raua i faaea noa i nia i teie mau mea. Ia au i to raua tiaraa Ite no Iehova, ua turuhia raua na te tiaturiraa maitai mau e te mahanaha atoa hoi ta te Bibilia e horoa maira no nia i te hoê ao apî e te parau-tia e fatata maira i reira te Atua “e horo ˈi i to ratou roimata atoa, e ere roa te pohe, e te mihi e te mauiui, e ore atoa ïa.” E faatia-atoa-hia mai te feia pohe, ia au i ta Iesu i parau mai, “te fatata mai nei hoi te hora e faaroo ai te feia atoa i roto i te apoo ra i tana reo [te reo o te Tamaiti a te Atua] e e haere mai i rapae.”—Apokalupo 21:4; Ioane 5:28,29.
[Hohoˈa i te api 9]
Ua haavî o Janis i to ˈna mau manaˈo hohonu na roto i te raveraa i te tahi mau mea no te tahi pae, ma te tapea mai i te mau manaˈo maitai e te hiˈo-tia-raa i te mau ohipa e tupu a muri aˈe