To ˈu hinaaro uˈana e tavini i te Atua

E pae matahiti to ˈu, e o vau te tamahine hauti roa ˈˈe o te aua o te fare haapiiraa Perkins, e vahi teie no te mau matapo.

E faaea vau i taua fare haapiiraa no Watertown ra (Hau amui no Marite) i na 13 matahiti i muri iho. Ua ite au e e matapo anaˈe te mau tamarii haere haapiiraa, tera râ, ua manaˈo vau e te ite ra vau. Aita anei to ˈu na metua e rave ia ˈu mai to ˈu na tuahine e pae? Te mau mea atoa o ta ratou e rave, o ta ˈu atoa ïa e rave: te mau ohipa fare, te tiaa huira, te au, te paiumaraa na nia i te mau tumu raau, oia mau, te mau mea atoa. Aita vau i faataa-ê-hia i te tahi pae. No reira, aita vau i manaˈo e e tamahine matapo vau.

Mea au roa na ˈu te oraraa, mea roa na ˈu te maimi-haere-raa. Tera noa to ˈu manaˈo, e hauti. E aratai vau i te tahi atu mau tamarii i nia i te mau vahi faaheeraa, te mau parahiraa taueue e i nia i te pahi faaopa. No te mea e faaopa puai vau i te pahi, e tuô noa to ˈu mau hoa; e himene puai ïa vau e e tuô vau no te faaitoito ia ratou. Ua rahi roa paha ta ˈu hauti, no te mea i reira, e taˈi mai te hiǒ e e pii mai te vahine faatere i te fare haapiiraa no te tairi i to ˈu tua i te purumu rouru. E i muri iho, e afaihia vau i te poro. I te mea e tei pihai iho taua “poro” ra, i te eˈa ta te mau orometua haapii atoa e rave ra, e ite mai ïa ratou ia ˈu e e parau mai ratou ma te ata e: “Tei reira faahou oe?”

A vaiiho na râ ia ˈu ia faatia e eaha tei aratai ia ˈu i roto i teie fare haapiiraa no te mau tamarii matapo. Ua fanauhia vau i te matahiti 1941. E piti matahiti to ˈu i te faaararaahia to ˈu mau metua e te vai ra te hoê tuhaa ino i nia i te uaua uira o te hoê o to ˈu nau mata; e tia ïa ia tâpûhia to ˈu mata. I to ratou tâpûraa ia ˈu, ua ite atura te mau taote e ua parare roa taua tuhaa ino ra i nia i te uaua uira o te tahi atu mata e te haere tia ˈtura i nia i te roro. E tia ïa ia maiti, e tâpû i to ˈu nau mata toopiti aore ra te pohe. I taua tau ra, i te matahiti 1943, e manaˈohia e mea hau aˈe ia pohe i te riroraa ei matapo. No reira te hoê taote aravihi i parau ai e: “Ahiri e o ta ˈu tamahine tera, e vaiiho vau ia ˈna ia pohe.” Ua pahono atu râ te tahi atu taote e: “Eiaha, a vaiiho ia ˈna ia ora.” Auaa ïa no ˈu, ua vaiiho to ˈu mau metua ia ora vau. E toru matahiti i muri iho, o vau te tamahine hauti roa ˈˈe o te aua fare haapiiraa.

E horoahia na i te tamarii tataitahi te haapiiraa faaroo o ta ˈna e maiti. I te mea e e katolika ta ˈu metua vahine, ua haapiihia vau e te mau paretenia o te haere mai i te mau hebedoma atoa mai te fare paretenia tapiri mai. E faatia mai na ratou i te aamu o te mau “peata” o tei pûpû i to ratou ora no te Atua. I to ˈu apîraa roa ra, ua faatupu vau i te hinaaro uˈana e pee i te hiˈoraa o taua mau “peata” ra. Ua hinaaro atoa vau e pûpû i to ˈu ora no te Atua, teie râ, ua pahono mai te mau paretenia e aita e faufaa. “Mea ino roa oe,” o ta ratou ïa i parau mai. “Eita te Atua e hinaaro ia oe.” No te mea noa ïa e te hauti ra vau e te mau porotetani e te mau ati Iuda, e ua faaue mai hoi ratou e ia hauti noa matou e te mau katolika.

Ua riri atoa te mau paretenia i ta ˈu mau uiraa no nia i te iˈoa o te Atua, o Iehova. I taua tau ra, te haapii ra to ˈu metua vahine i te tahi mau taime e te mau Ite no Iehova e, ia hoˈi atu vau i te fare i te hoê hopea hebedoma i te avaˈe, e faaroo vau e o Iehova te iˈoa o te Atua. Ia ani atu vau i te mau paretenia e no te aha eita ratou e paraparau mai ia matou no Iehova, e riri roa mai ratou e e tiavaru ratou ia ˈu i roto i te eˈa haereraa taata. Peneiaˈe, ua faaea vau i te afaraa o to ˈu mau matahiti apî ma te tia noa i roto i te eˈa haereraa taata aore ra ma te faautuahia i te poro.

I te mea e e katolika haapao to ˈu metua vahine, mea nafea ïa to ˈna haapiiraa e te mau Ite no Iehova? I muri aˈe i to ˈu tâpûraa, ua haere mai te perepitero e farerei ia ˈna e ua parau mai oia e eita e ore e ua rave oia i te hoê ohipa ino e no to ˈna riri, ua haamatapo te Atua ia ˈu. Maoti i te tamǎrû ia ˈna i roto i te mau taime fifi o ta ˈna e faaruru ra, ua faatupu oia i te hoê manaˈo faahapa i roto ia ˈna. Hau atu, ia au i ta ˈna parau, o te Atua te tumu o to ˈu fifi. Na roto i to ˈna haerea, ua iriti teie perepitero i te uputa i te mau Ite no Iehova ia haere mai ratou—e aita i maoro roa, ua haere mai iho â ratou.

Ua faaite te mau Ite no Iehova i to ˈu metua vahine i te parau apî oaoa o te Basileia e ua faataa ˈtu ratou e, i te mea e e here te Atua, eita o ˈna e faatupu i te mauiui; e mea na reira ïa to ˈna haamataraa i te haapii e o ratou. Teie râ, ua mairi te taime hou oia e pûpû ai ia ˈna no te tavini ia Iehova. Ua mau hohonu roa hoi te mau haapiiraa hape a te faaroo katolika i roto ia ˈna. Teie râ, “e mauhaa puai rahi [te mau parau mau bibilia o ta ˈna e haapii ra] i te Atua, i te huriraa i te mau pare i raro,” e i te matahiti 1954, ua bapetizo atura to ˈu metua vahine e ua riro maira oia ei Ite no Iehova.—Korinetia 2, 10:4.

I teie nei, ia hoˈi anaˈe au i te fare i te hopea hebedoma o te avaˈe, e hinaaro to ˈu metua tane e ia haere matou i te ekalesia baptiste, e haere atu vetahi o to ˈu mau tuahine i te pureraa méthodiste, area ta ˈu metua vahine ra, e afai ïa oia ia ˈu i te Piha no te Basileia; taa ê atu i te reira, mea puai roa ˈtu â te haapiiraa katolika tei horoahia mai i te fare haapiiraa. E maha ïa haapaoraa taa ê o te faaohipahia ra i roto i te utuafare! Aita vau i taa faahou e nafea râ, aita hoi vau i ite e teihea te eˈa maitai no te haamori i te Atua.

I te 16raa o to ˈu matahiti, ua riro maira te hinaaro e tavini i te Atua ia au i te raveraa maitai ei hinaaro uˈana roa. Ua pure au ia Iehova, ma te ani ia ˈna e ia vai te taata o ta ˈu e faaipoipo i roto i te haapaoraa mau, noa ˈtu e eaha taua haapaoraa nei. Ua fa maira teie taata “faahiahia roa” i te hoê mahana e ua ani maira oia ia ˈu ia faaipoipo ia ˈna. I te mea e e katolika oia, e e au ra e ua faatae mai te Atua ia ˈna ei pahonoraa i ta ˈu pure, ua faaoti ihora vau e o te faaroo katolika te haapaoraa mau. Ua faaoti ihora vau e mai taua mahana ra, e riro vau ei katolika, ei vahine e ei metua vahine hiˈoraa maitai.

Teie râ, ua riro ta ˈu faaipoiporaa ei huananeraa. E 10 avaˈe i muri iho, ua haamaitaihia mâua na roto i te fanauraa o te hoê tamahine iti, e e 22 avaˈe i muri iho, i te fanauraa i te hoê tamaroa, teie râ, i te roaraa o taua taime ra, ua ino noa to mâua faaipoiporaa. Ua manaˈo hoi au e aita ˈtu tupuraa ino aˈe i te reira.

Ua hape râ vau: ua ino roa ˈtu â te huru tupuraa. E haere na mâua e ori i te mau mahana maa atoa, e i muri iho, e rave rahi o te haaputuputu mai i te fare no te inu i te taofe e te tahi pape toetoe. I te hoê râ mahana maa, o mâua tei haere atu iǒ te hoê hoa. Ua faaroo atura vau i ta ˈu tane i te paraparauraa no nia i te tauiraa i te hoa. I to te hoê taata matau ore aniraa e o vai te hoa o ta ˈna e rave, ua faaroo atura vau i ta ˈu tane i te pahonoraa ˈtu e: “E nehenehe oe e rave i ta ˈu vahine.” Ma te manaˈo haafaufau e te riaria, ua horo atura vau i te fare. I te aahiata, ua aufau atura vau i te hoo: i te hoˈiraa mai ta ˈu tane, ua taparahi atura oia ia ˈu, no te mea e ‘ua haamaau vau ia ˈna i mua i te taata.’

I taua sabati taatoa ra, ua pure au i te Atua, ma te taparu e ia faaite mai oia, mai te peu e te vai ra, e teihea te haapaoraa mau, te ravea maitai no te tavini ia ˈna; ahiri aita, mea au aˈe na ˈu ia pohe. Hoê noa mea o te tapea ra ia ˈu ia haapohe ia ˈu: ta ˈu e piti tamarii. Na vai e haapao ia raua mai te peu e aita faahou vau?

I te poipoi aˈe, te tâpû ra vau i te matie—aita to ˈu e tiaa, no te fafa e teihea roa te vahi mea teitei aˈe te aihere—a haere mai ai e piti Ite no Iehova, te hoê tane e te hoê vahine. Eita e moehia ia ˈu te mǎrû o taua taata ra, i roto i ta ˈna mau peu e to ˈna tuuraa reo. Te vai ra ta ˈna te hoê vea na roto i te papairaa a te matapo [braille] i neneihia e te Taiete Watch Tower, o ta ˈna i horoa mai hou oia e ani mai ai ahiri e e nehenehe anei raua e hoˈi mai i te hebedoma i muri iho. Aita vau i hinaaro, tera râ, i mua i to raua huru mahanahana e te auhoa, aita vau i nehenehe e patoi atu. Te haamanaˈo ra vau e ua hoˈi atu vau i roto i te fare ma te manaˈo e: “E te Atua e, eiaha! Eiaha o ratou, eiaha te mau Ite no Iehova! Aita ˈtu ïa haapaoraa taa ê atu i teie?”

Mai ta raua i faaara mai, ua hoˈi mai taua tane e taua vahine ra, e ua haamata ˈtura te hoê haapiiraa bibilia tahebedoma. I muri iho, e piti vahine, o Judy raua o Penny, o tei haere mai. Ua riro teie nau tavini taime taatoa (e mau pionie taa ê) ei haamaitairaa mau no ǒ mai ia Iehova ra. E vahine mahorahora e te oraora maitai o Judy, ma te haapao atoa râ i te haapiiraa e te aravihi i te faaohiparaa i te Bibilia. O Penny, e huru hau aˈe, mea etaeta ïa oia i te pae no te aˈoraa; ua tano roa ïa te reira no ˈu. Ua pûpû raua toopiti atoa ra i to raua ora no te tavini ia Iehova. I roto i te roaraa o te tau, ua hinaaro atura vau e pee i to raua hiˈoraa, eiaha râ to te mau “peata” ta te mau paretenia i faahiti mai.

I muri iho, i to Judy raua Penny faahitiraa i te parau no te pororaa i tera e tera fare, ua manaˈo atura vau: ‘Eiaha ïa! Eiaha raua e ani mai i te reira! E matapo vau!’ Aita vau i tapuni aˈenei i muri mai i to ˈu tiaraa matapo no te ape i te rave i te tahi mea, i teie râ taime, te na ô ra vau ia ˈu iho e: ‘Eiaha vau. Eita vau e tae e poro na te mau fare.’ Ua pahono atura vau e: “Nafea ïa vau no te taio i te mau irava bibilia i te taata?” Ma te hau, ua na ô maira o te Penny e: “E nehenehe ta oe e tamau aau i te mau irava, e ere anei?” Ua ite oia e e nehenehe ta ˈu, no te mea ua haapii mai raua ia tamau aau vau e piti irava i te mau hebedoma atoa. Eita ïa ta ˈu e nehenehe e aro atu i teie na vahine e piti!

O te matahiti 1968 ïa i reira. E piti matahiti to ˈu haapiiraa, e ua faaoti au e haere i te oroa Haamanaˈoraa o te poheraa o te Mesia. Ua pure au hou vau e paraparau atu ai i ta ˈu tane. Ua ite au e e riri mai oia, e aita iho â i hape. Ua tuô ihora oia, ma te parau e mea au aˈe na ˈna ia ite ia ˈu ia pohe maoti hoi i te riro mai ei Ite no Iehova. Ua haru maira o ˈna i ta ˈna tipi, e ua tuu atura i nia i to ˈu arapoa. “A parau e eita oe e haere, eita ïa vau e haapohe ia oe!” Ua pure ihora vau ia Iehova ma te mâmu noa. ‘A tauturu mai ia ˈu ia ore e taiva noa ˈtu e e tia ia ˈu ia pohe,’ o ta ˈu ïa i ani atu. Ua ite atura vau i te hau i te faaîraa mai ia ˈu, e ua hitimahuta ˈtura vau i te manaˈoraa e: ‘Eaha hoi te faufaa ia ora mai te peu e eita vau e tavini ia Iehova?’ E au ra e aita e hopea to taua mau taime ra, tera râ, ua faarue atura ta ˈu tane i ta ˈna tipi i raro. “Eita ta ˈu e nehenehe e haapohe ia oe,” o ta ˈna ïa i auê. “Te hinaaro nei au, tera râ, aita ta ˈu e nehenehe. Aita vau i ite e no te aha râ.”

I te oroa Haamanaˈoraa, ua faaî faahou taua hau e taua fatataraa ra e o Iehova ia ˈu. I to ˈu hoˈiraa ˈtu i te fare, ua ponaohia te opani, e ua tuuhia ta ˈu mau tauihaa i te pae opani. Ua haere ïa vau e taoto iǒ to ˈu mau metua. Mai taua mahana mai râ, ua tamau noa ta ˈu tane i te taparahi ia ˈu e i te haamǎtaˈu ia ˈu i te tipi. Mea pinepine vau i te opanihia i rapae ia hoˈi mai au mai te mau putuputuraa. “Mai te peu e e hinaaro oe e tavini ia Iehova, na ˈna ïa e haapao ia oe,” o ta ta ˈu tane ïa e parau mai. Aita oia i aufau faahou i te mau tarahu. Aita ta matou e maa faahou, ua tâpûhia ta matou gaz e ta matou uira, e ua erehia matou i to matou fare. Tera râ, ua tia noa mai o Iehova i reira no te turu mai ia ˈu e ta ˈu mau tamarii.

I te avaˈe tiurai 1969, ua faanaho te mau Ite no Iehova i te hoê tairururaa rahi i New York. Hoê hora hou vau e rave ai i te pereoo auahi no te haere atu i reira, ua haru maira ta ˈu tane ia ˈu. Ua haamǎtaˈu faahou mai oia ia ˈu mai ta ˈna i matau e ua tuu faahou mai oia i te tipi i nia i to ˈu arapoa. Tera râ, ua matau roa vau i ta ˈna ohipa e aita vau i tuu. I taua tairururaa ra, i te 11 no tiurai 1969, e e 3 000 taata, ua bapetizohia ˈtura vau i roto i te moana, ei faataiperaa i to ˈu pûpûraa ia ˈu iho no Iehova.

E piti avaˈe i roto i te matahiti, ua horoa vau e 75 hora i roto i te pororaa. Ua opani ta ˈu tane ia ˈu ia poro, tera râ, na Iesu i faaue mai ia tatou ia rave i teie ohipa, e e tia ia ˈu ia auraro ia ˈna. (Mataio 24:14; 28:19, 20) Teie râ, te rave puai ra vau i te ohipa i te fare. Ua oti te ohipa fare. Ua ineine te maa i te hora tia. I te mau po putuputuraa, e tunu vau na ta ˈu tane i te mau maa au-roa ˈˈe-hia e ana. Ia hoˈi mai au, e faaineine au i te hoê maa monamona taa ê. Aita te reira i tapea ia ˈna ia faaite i to ˈna riri, tera râ, mea fifi roa ia tuôtuô maoro i te hoê vahine o tei faaineine mai i ta oe maa monamona au-roa ˈˈe-hia.

I te matahiti 1975, ua faaoti aˈera ta ˈu tane e e haere matou e faaea i Kalifonia. I te avaˈe novema 1976, i muri aˈe e 17 matahiti faaipoiporaa, ua taa ˈtura mâua. Aita vau i hinaaro e faataa. Aita vau i manaˈo e e ohipa maitai te reira. I roto i te Malaki 2:16, aita anei Iehova i parau e ‘te riri nei oia i te taata i faataa ê i tana vahine’? E tau ahoaho mau â te reira. No te faarahi i to ˈu mauiui, ua faaea ˈtu ta ˈu mau tamarii e to ratou metua tane i Kalifonia. O vau nei râ, ua hoˈi atu vau i te pae Hitia o te râ, i te vahi o ta ˈu i ora na mua ˈˈe.

I reira to ˈu metua, o tei faaamu hoi ia ˈu ma te mahanahana e te here, i te faaearaa. (Mai reira mai, ua pohe to ˈu metua tane, tera râ, te ora noa nei to ˈu metua vahine. Hau atu i te 80 matahiti to ˈna, e te tavini nei oia ia Iehova ma te haapao maitai e 40 matahiti i teie nei.) Noa ˈtu e ua ora vau o vau anaˈe, ua haapao mai Iehova i te mau mea atoa o ta ˈu e titau ra: te fare, te maa, te ahu, te moni e te ohipa i te taime hinaarohia, e tae noa ˈtu e rave rahi mau hoa here mau o tei turu rahi mai ia ˈu e tae roa mai i teie mahana. E taniuniu pinepine mai o Judy Cole, te hoê hoa maoro e ora ra i te atea ê i teie nei, ia ˈu, e taio mai oia i te mau tumu parau o Te Pare Tiairaa e e faaitoito mai oia ia ˈu. O ˈna to ˈu hoa piri roa ˈˈe—i muri aˈe ia Iehova iho â ïa, to ˈna te auhoaraa faufaa roa ˈˈe i rotopu i te mau auhoaraa atoa.

I te 1 no atopa 1986, i te hora 11 i te po, ua taniuniu maira ta ˈu tamahine o Linda na San Diego mai (Kalifonia) no te faaara mai e ua tapeahia o Stephen, ta ˈu tamaiti e 23 matahiti, i te pu atuaturaa maˈi e ua parau te mau taote e e pohe oia. Ua faahoro o ˈna i te moto na nia i te hoê purumu mouˈa tipuupuu haere, ua û atura o ˈna i nia i te hoê tumu raau e ua topa maira na nia mai i te hoê mato e 45 metera te teitei e tae roa ˈtu i roto i te tahora i raro mai. Hoê anaˈe fare i reira. Hora 2 i te aahiata i te taime o te ati, aitâ râ te taata e faaea ra i reira i taoto atura; te haapii ra oia. I to ˈna faarooraa i te maniania, ua haere atura oia i rapae, e i to ˈna iteraa i te ohipa i tupu, ua taniuniu oioi atura oia i te feia tauturu.

Ua moe te hiroa o Stephen, ua fati to ˈna nau avaˈe, ua fati atoa te ivi tuatiraa o te poro avae e ua oru roa to ˈna upoo. I to ˈu taeraa ˈtu i te fare maˈi, e manaˈo peapea mau to te mau taote. Hoê hebedoma to Stephen faaearaa ma te ore e ara. Tei pihai iho vau ia ˈna i to ˈna araraa mai. “Iaorana mama!” o ta ˈna ïa i parau mai; o te mau parau nehenehe roa ˈˈe ïa o ta ˈu i faaroo aˈenei. E ora oia! Ua hope roa to ˈu oaoa i te taime a bapetizohia ˈi oia, hoê matahiti i muri iho, i te avaˈe tiurai 1988.

Te tahi atu mea o te turama ra i to ˈu oraraa i teie mahana: o te rahiraa buka ïa ta te Taiete Watch Tower e nenei nei na roto i te papairaa braille. E ô faahiahia mau teie! I to ˈu iteraa i te parau mau, mea iti roa te mau buka na roto i te papairaa braille. I teie mahana, te vai ra te mau buka Faaroo i te Orometua Rahi, Ta ˈu Buka Aamu Bibilia e Te uiui nei te mau taurearea—Mau pahonoraa ohie, e tae noa ˈtu te buka i matara apî mai Te taata rahi roa ˈˈe i ora aˈenei.

Ei faaotiraa, te hinaaro nei au e parau e ua haafatata ˈtu â ta ˈu mau tamataraa atoa ia ˈu ia Iehova. E ua haapuai rahi mau â te reira i to ˈu faaroo. Aita vau i peapea rahi roa i te mea e e matapo vau, inaha, aita vau i ite na mua ˈˈe. Parau mau, ua fanaˈo vau i to ˈu mata e tae roa i te pitiraa o to ˈu matahiti, tera râ, aita vau e haamanaˈo ra i taua tau ra. Ua riro râ te Salamo 145:16 ei hoê o te mau irava au-roa ˈˈe-hia e au: ‘Te heheu nei Iehova i to ˈna rima e te haamâha nei oia i te hiaai o te mau mea ora atoa nei.’ Te mau hiaai atoa o tei ore i haamâhahia i teie mahana, e haamâhahia ïa i roto i te Paradaiso i nia i te fenua i tǎpǔhia mai, i reira Iehova e faaapî ai i te mau mea atoa. (Apokalupo 21:3-5) E ite faahou to ˈu mata, mai ta te hoê Ite i faahaamanaˈo mai ia ˈu.

Te oaoa e faaî nei i to ˈu mafatu i teie nei, o te tiaturiraa ïa e faatupu e a muri noa ˈtu i to ˈu hiaai puai e tavini ia Iehova.—Faatiahia e Collette Nunes.

[Parau iti faaôhia i te api 19]

“Ahiri e o ta ˈu tamahine tera, e vaiiho vau ia ˈna ia pohe.”

[Parau iti faaôhia i te api 19]

“Mea ino roa oe,” o ta ratou ïa i parau mai. “Eita te Atua e hinaaro ia oe.”

[Parau iti faaôhia i te api 20]

Ia au i te perepitero, na te Atua i haamatapo ia ˈu.

[Parau iti faaôhia i te api 20]

Ua faaroo atura vau i ta ˈu tane i te paraparauraa no nia i te tauiraa i te hoa.

[Parau iti faaôhia i te api 21]

Ua haru maira o ˈna i ta ˈna tipi, e ua tuu atura i nia i to ˈu arapoa. “A parau e eita oe e haere, eita ïa vau e haapohe ia oe!”

[Hohoˈa i te api 17]

O Collette e ta ˈna urî aratai

[Hohoˈa i te api 18]

O Collette, i te 17raa e te 2raa o to ˈna matahiti (te ite noa râ ïa oia i reira)