Te mau Ite no Iehova ‘tuuhia i mua i te mau tiribuna’

MAI TO ˈNA omuaraa mai â, ua farerei te kerisetianoraa i te patoiraa. I to ˈna horoaraa i te mau faaueraa i ta ˈna mau pǐpǐ, ua na ô atura o Iesu i te hoê mahana e: “E ara râ ia outou i te taata; e tuu hoi ratou ia outou i te [tiribuna] ra, e e papai hoi ia outou i roto i to ratou mau sunago; e no ˈu nei e hopoihia ˈi outou i te aro o te mau tavana e te hui arii, ei ite no ratou e no te mau [nunaa].” (Mataio 10:17, 18) I teie mahana, te tupu nei te patoiraa i te Basileia i roto i te rahiraa o te mau fenua na roto i te mau huru haavarevare roa ˈˈe i te hamani-ino-raa rahi i tupu i muri noa ˈˈe i te haapoheraahia o Iesu. I roto i teie ao fifi mau o ta tatou e ora nei, te ohipa nei te mau uiraa e faahitihia ra e te feia patoi i nia i te mau tuhaa taa ê atu i te pororaa i te parau apî maitai o te Basileia.

Te haapaoraa i te mau tamarii

Ua taaihia hoê o te mau tumu no reira te mau Ite no Iehova e tia ˈtu ai i mua i te mau tiribuna, i te utuafare. I Auteteria, i Beletita, i Kanada, i te mau Hau amui no Marite, i Farani, i Norevetia, e i roto i te tahi atu mau fenua, te tamata nei te hoê pǔpǔ iti feia patoi i te faariro i te haapaoraa ei tumu no te faaoti e na vai e haapao i te mau tamarii ia faataa anaˈe te hoê taata e ere i te Ite no Iehova i to ˈna hoa taiva ore Ite no Iehova. Ua erehia te mau metua i te tiaraa no te haapao i ta ratou mau tamarii no te mea noa e e Ite no Iehova ratou.

Ua faaerehia te hoê vahine i te tiaraa e haapao i ta ˈna tamaiti e toru matahiti, e ua opani-atoa-hia oia ia paraparau atu ia ˈna no nia i te haapaoraa i roto i ta ˈna mau tere farereiraa. Ua tiaoro atu te pu haapao i te mau ohipa haavaraa a te Taiete Watchtower, tera râ, ua haapapu te tiribuna hororaa i te haavaraa i faaotihia. Ua afaihia ˈtura teie ohipa i mua i te Tiribuna teitei roa ˈˈe a te Hau no Ohio, o tei tuu i ta ˈna faaotiraa, i te 15 no eperera 1992, ma te haamana i te tiamâraa o te Ite. Ua haapau te hoê papai e 11 api o tei papaihia e te Tiribuna i te hoê taata maimi tei faahitihia ei ite, inaha, e taata tiavaruhia teie o te faahua taata aravihi i te pae feruriraa. Ua parau te Tiribuna e “ua horeo oia, ma te faahiti i te hoê tatararaa o ta ˈna iho i papai, e mea pinepine aˈe te mau fifi i te pae feruriraa i te tupu iǒ te mau Ite no Iehova ia faaauhia i te toea o te huiraatira. Ua titau teie faaiteraa ia opani i te hoê haapaoraa taatoa i roto i te hoê hohoˈa etaeta. . . . Aita hoê aˈe auraa to [teie] faaiteraa tanumerahia.”

Ua faaue ihora te Tiribuna e ia haava-faahou-hia teie ohipa, ma te parau e: “Eita e nehenehe e faaere i te hoê vahine i to ˈna tiaraa e haapao i ta ˈna tamarii no te mea noa e eita o ˈna e faaitoito ia ˈna ia aroha i te reva, ia faatupu i te mau oroa aore ra ia apiti atu i roto i te mau ohipa i rapaeau atu i te haapiiraa. Te faaore nei matou i te mau faaotiraa a te tiribuna matamua no nia i te haapaoraa i te tamarii e te tiaraa no te mau tere farereiraa no te mea ua niu-hape-hia i nia i te mau tiaturiraa faaroo [o te metua vahine].” I te 17 no eperera i mairi aˈenei, ua nehenehe ïa teie metua vahine e haere atu i te oroa Haamanaˈoraa o te poheraa o te Mesia e ta ˈna tamaiti.

Te faaara ra te pu haapao i te mau ohipa haavaraa a te amaa no Kanada a te Taiete Watch Tower e piti huru tupuraa mai teie te huru e haavahia ra i mua i te Tirubuna teitei roa ˈˈe no Kanada. I to ˈna aˈe pae, ua fanaˈo te amaa no Auteteria i te hoê faaotiraa maitai no ǒ mai i te Apooraa no Europa o te mau tiaraa o te taata. Te faataa ra te mau fenua Beletita, o Farani e o Norevetia, i te mau upootiaraa i noaa mai aita i maoro aˈenei i mua i te mau tiribuna. Ua noaa mai teie mau upootiaraa e te mau Ite i roto i te mau hororaa no te haapaoraa i te tamarii i reira ua faaino-faahou-hia te faaroo. Ia au i ta Iesu i parau, e riro te mau huru tupuraa tataitahi ei faaiteraa—eiaha noa no te mau tiribuna e te feia toroa ture, no te mau nunaa atoa râ.

Te fifi o te toto

Ua riro te faaohiparaa i te toto ei tuhaa ê atu i reira te mau Ite no Iehova e farerei ai i te fifi. Noa ˈtu te mau faaotiraa ta te mau tiribuna teitei roa ˈˈe no Floride, no Illinois, no Massachusetts e no New York i tuu aita i maoro aˈenei ei tururaa i te tiamâraa i te pae faaroo e te tiaraa a te mau Ite no Iehova i nia i to ratou tino; noa ˈtu te mau tutavaraa tuutuu ore a te Pu haamaramaramaraa i te pae rapaauraa e te mau tomite tuatiraa e te fare maˈi e rave rahi o tei purara na te fenua taatoa, aita te fifi o te toto i hope atura i te faatitiaifarohia. Teie râ, te fanaˈo nei te pǔpǔ toroa rapaauraa i te hoê faaiteraa, e te tamata nei vetahi mau fare maˈi i te faataa oioi e ma te papu e o vai te mau Ite no Iehova i rotopu i ta ratou mau taata maˈi.

Ua faatura te tiribuna hororaa matamua no San Diego (Kalifonia) i te tiaraa o te hoê Ite no Iehova Tapone. I muri aˈe i to ˈna rooraahia i te hoê oruraa o te hoê uaua toto i roto i te roro, e ua moe to ˈna hiroa. Maoti ta ˈna Parau rapaauraa tei faaî-maitai-hia e te faaiteraa a te hoê taote vahine o tei uiui maoro ia ˈna no nia i te fifi o te toto i to ˈna patotoraa ˈtu i to ˈna opani, ua navai te reira no te haapapu i te manaˈo o te haava e eita roa ˈtu te Ite tei moe te hiroa e farii noa ˈˈe i te toto.

I Long Island, ua taamuhia te hoê vahine Ite no Iehova hou oia e pâmuhia ˈi i te toto, area ta ˈna tane ra, ua afaihia oia e te mutoi ma te ponaohia te rima. Ua horo te pu haapao i te mau ohipa haavaraa a te Taiete Watchtower i teie ohipa i mua i te tiribuna hororaa matamua no New York, o tei paruru, i roto i ta ˈna faaotiraa, i te mau tiaraa taitahi o te mau Ite no Iehova. Ua ravehia te mau hororaa, e tei roto atura teie ohipa i te rima o te haavaraa. Hau atu, fatata roa te haavaraa tei tuuhia no te turu i te hoê taurearea e 16 matahiti e to ˈna metua vahine i mua i te Tiribuna a te Hau no Atlanta i te tupu. I muri aˈe i to ˈna taamuraahia, ua pamûhia taua taurearea nei i te toto e vau hora te maoro. Ua tupu te rururaa haava ia noaa mai te parau faatia a te tiribuna i te fare maˈi, e aita te tamarii e to ˈna metua vahine i faaarahia i taua faaotiraa ra. E rave rahi mau ohipa ê atu o tei tuuhia i mua i te mau tiribuna hororaa, e te fa mai nei te mau ohipa apî i te mau mahana atoa. Te noaa nei te mau upootiaraa, tera râ, aitâ te aroraa ia faaturahia te mau tiaraa o te taata i oti atura. Te tiaturi nei te mau Ite no Iehova e i te tau au ra, e faatiamâ te Atua ra o Iehova i ta ˈna ture no nia i te faaohiparaa i te toto.

Mai te matahiti 1943 mai â, mea iti te mau Ite no Iehova i te mau Hau amui no Marite o tei afaihia i mua i te mau tiribuna no te mau pariraa no nia i te pororaa. Teie râ, te faataehia ˈtu nei i te Taiete Watchtower i te mau hebedoma atoa i te mau ahuru rahiraa rata e mau taniuniuraa no ǒ mai i te mau tino matahiapo e ani ra i te tauturu i muri aˈe i te mau haafifiraa tei farereihia e te mau Ite no Iehova i roto i ta ratou taviniraa i mua i te taata. Mea arearea roa te hopearaa o te hoê fifi iti i tupu i te Hau no Washington: Ma te riri, ua opani te hoê taata i te aua o to ˈna fenua ia ore te pereoo a te mau Ite no Iehova ia haere faahou i rapae. I muri iho, ua taniuniu atura oia i te mau mutoi. I mua i ta ˈna mau tuôtuô e ta ˈna mau parau haamǎtaˈuraa, ua tiai noa te mau Ite i roto i te pereoo. I to te mau mutoi taeraa mai, maoti i te tapea i te mau Ite no to ratou tomoraa mai i roto i te otia o teie fenua, ua haamauruuru atu ratou ia ratou. Inaha, te manaˈo ra ratou e e mau auri teie taata o tei horo, tera râ, aita ratou i manuïa i te tomo mai i roto i to ˈna aua no te haapapu i te reira. I teie nei, na teie taata iho i faatomo mai ia ratou iǒ na, e e nehenehe ratou e haapapu e o vai ra o ˈna. Ua faahoro atura ratou ia ˈna e to ˈna hoa vahine i te fare auri . . . area te mau Ite no Iehova ra, ua tamau noa ratou i ta ratou ohipa pororaa e te haapiiraa.

Eita e ore e e tupu â te tahi atu mau aroraa i mua i te haavaraa no te paruru i te mau ohipa a te Basileia. Te haamauruuru nei te Taiete Watchtower i te mau Ite e rave rahi, na te ao nei, o te faaite nei i to ratou tapitapiraa i roto i teie tuhaa, o te pure nei ia Iehova ia horoa mai oia i ta ˈna aratairaa i roto i te arairaa i te mau fifi i te pae haavaraa e noaa mai na roto i te faatupuraa i te ohipa a te Atua i teie nei tau. Ua parau atu o Iehova i te mau ati Iseraela e eita ratou e haru mai i te Fenua i tǎpǔhia mai i te hoê anaˈe taime, tera râ, e haere “riirii” noa ratou. (Deuteronomi 7:22) Hoê â huru no te nunaa o Iehova i teie mahana: te faatiamâ-riirii-noa-hia ra to ˈna mau tiaraa. Teie râ, noa ˈtu e e noaa mai te upootiaraa aore ra te pau, hoê mea papu: i te mau taime atoa te mau tavini o Iehova e tuuhia ˈi i mua i te mau tavana, te mau arii, te mau tiribuna, aore ra te tahi atu mana, e tupu iho â te hoê faaiteraa no teie mau tia e no te mau nunaa.

I roto i te hoê tau fatata roa, e faatiamâ roa Iehova i to ˈna tiaraa, eiaha noa no te mau fifi no nia i te toto e te haapaoraa i te tamarii, no nia atoa râ i to ˈna tiaraa arii. I reira ïa to ˈna nunaa e tiamâ mai ai i to ˈna mau enemi atoa e e oaoa oia i raro aˈe i te faatereraa a te Basileia—no te mea e mea au na Iehova te parau-tia.—Salamo 37:28.

[Parau iti faaôhia i te api 12]

I muri aˈe i to ˈna taamuraahia, ua pâmuhia te hoê taurearea i te toto e vau hora te maoro.