Te pu o te mau faufaa mau
Ia faaohipahia te reira e hope ïa te toparaa i te pae morare
IA MATAITAI te taata i te raˈi e anapanapa ra i te fetia i te po, e î roa oia i te mǎtaˈu e te faahiahia. Ia hiˈo atu oia i teie tapoˈi fetia i te atea ê, e taa ia ˈna i to ˈna nainai e to ˈna faufaa ore. E haamanaˈo faahou paha oia i teie mau parau a te papai salamo tei faahitihia mea maoro i teie nei: “Ia hiˈo vau i te mau raˈi i te ohipa a to rima ra; te marama e te mau fetia ta oe i faaau ra, Eaha te taata nei i manaˈo mai ai oe ia ˈna? e ta te taata nei tamaiti i haapao mai ai oe ia ˈna?” (Salamo 8:3, 4) Ua ite noa hoi te papai salamo i te mau tausani rahiraa fetia e ua taa ia ˈna i to ˈna haihai; ua ite te taata i teie nei e te vai ra e rave rahi miria haapueraa fetia e e mau miria fetia to roto i te haapueraa tataitahi, e e taa hau atu â ia ˈna i to ˈna haihai. E puta mai paha te mau uiraa i roto i to ˈna feruriraa: ‘Eaha to ˈu parahiraa? No te aha vau e ora ˈi? O vai mau na vau?’
Eita râ te animala e na reira i te feruri.
Te hiˈopoa nei te taata i te mau mea ora huru rau e haaati nei ia ˈna e te tapao nei oia i te hoê faanahoraa maere mau no te faatupu i teie mau opuaraa papu. E ite oia i te mau manu e rere i nia i te mau tausani kilometera, te mau animala ote û o te taoto ia tae i te tau toetoe, e e rave rahi atu â mau mea ora o te faaohipa nei i te mau ravea mai te heheuraa moana, te faatauiraa mataˈi, te maoˈaraa, te ravea titiaraa i te pape miti, te arairaa i te toetoe, te mau faanahoraa no te hopu i raro i te pape, te haapatoraa, te faito anuvera, te papie, te hapaina, te uati, te aveia, te uira, te mau matini faaohu, e te tahi atu mau taoˈa maere hou te taata e feruri ai i te reira. Te uiui nei te feia feruri e: ‘Mea nafea teie mau ohipa maere atoa, fifi roa ia faataa, tei hamanihia no te tahi opuaraa, i te faraa mai? Eaha te maramarama rahi e vai ra i muri mai?’
I reirâ, eita te mau animala e feruri i nia i teie mau uiraa.
Area te taata ra, oia ïa. No te aha o te taata anaˈe, i rotopu i te mau miria rahiraa mea ora i nia i te fenua nei, o te haafaahiahia nei ma te mǎtaˈu e te maere i te raˈi i nia ia ˈna e te mau ohipa moe o te oraraa i nia i te fenua? No te aha? No te mea mea taa ê te taata.
No te aha te taata i taa ê ai?
No te mea o ˈna anaˈe tei poietehia ia au i te hohoˈa e te huru o te Atua: “Ua parau ihora te Atua, E hamani tatou i te taata ma to tatou iho huru, ia au i to tatou iho hohoˈa.” (Genese 1:26) Te faataa ra te reira i te taa-ê-raa rahi e vai ra i rotopu i te taata e te animala. Te faataa ra te reira e no te aha aita ˈtu mea ora i nia i te fenua nei o te nehenehe e tapirihia e te taata. Te faataa ra te reira e no te aha te taata e feruri ai, e uiui haere ai no nia i te ao e haaati ra ia ˈna, e e haafaufaa ˈi i te mau ture morare.
E au te taata i te hohoˈa e te huru o te Atua i roto i teihea auraa? No te mea ïa te vai ra to ˈna te tahi mau ateributi e te tahi mau huru maitatai o te Atua, mai te here, te aroha, te parau-tia, te paari, te puai, te hamani maitai, te maitai, te faaoromai, te haerea tia, te parau mau, te taiva ore, te rohiraa, e te maramarama. Ua riro te reira ei mau huru maitatai o tei tuu-ê-na-hia i roto i te taata, teie râ, i to te tane e te vahine matamua faaohipa-hape-raa i to raua tiamâraa ia maiti, ma te aratai ia raua ia orure i te hau, ua faainohia ˈtura teie mau ateributi e aita ˈtura i horoahia ˈtu i to raua huaai i roto i te hoê faito tia roa. Ua erehia ratou i to ratou aifaitoraa, e i te mea e aita vetahi i faaohipahia, ua aramoina atura. Tera râ, te faaite ra te Kolosa 3:9, 10 e na roto i te noaaraa i te ite papu no nia i te Atua e te faaohiparaa i te reira, e nehenehe tatou e ahu i te huru taata apî e e tapiri atu â i ‘te hohoˈa e te huru o te Atua.’
I to te Atua ra o Iehova horoaraa i te Ture a Mose i te mau ati Iseraela, te vai ra i roto i te mau ture faufaa mau, oia atoa na Ture Ahuru e te faaueraa ia ‘here i to ratou taata-tupu mai ia ratou iho.’ (Levitiko 19:18; Exodo 20:3-17) E tia ia horoa ˈtu i teie mau faufaa i te mau ui no a muri aˈe ei tufaa aiˈa. Ua parau atu o Mose ia Iseraela ia auraro i taua ture ra, e ua na ô atura oia e: “E na outou e parau atu i ta outou mau tamarii, ia haapao e ia rave i te mau parau atoa i teie nei ture: e ere hoi teie i te parau faufaa ore ia outou; o to outou ïa ora.” (Deuteronomi 32:46, 47) Tau senekele i muri iho, ua faahiti te Maseli 8:18 i te reira mai te mau “taoˈa rahi.”
Te mau faufaa no te arai i te toparaa i te pae morare
Tera râ, e rave rahi teie e patoi nei e, no te mea ua rau te huru o te totaiete i teie nei, eita te hoê anaˈe faanahoraa e tano no te mau taata atoa. Te parau nei ratou e e te titau nei te mau nunaa e te ihotumu taa ê i te mau faufaa e rave rahi. Teie râ, eaha te fifi no teie nei tau o te ore e araihia na roto i te faaohiparaa i te faaueraa a Iesu e here i to tatou taata-tupu mai ia tatou iho? Aore ra te raveraa i nia ia vetahi ê mai ta outou e hinaaro ra ia ratou ia rave no outou? Aore ra te oraraa ia au i te mau faaueraa tumu e vai ra i roto i na Ture Ahuru? Aore ra te tutavaraa i te faatupu i te mau hotu o te varua i faataahia i roto i te Galatia 5:22, 23 (T.a.a.): “Te hotu o te varua ra, o te here ïa, te oaoa, te hau, te faaoromai, te hamani maitai, te maitai, te faaroo, te mǎrû, te hitahita ore. Aore roa e ture e patoi i te reira.” Aita hoê o teie mau hotu e titau ra i te tahi mea aore e maraa ia rave; e riro te tahi o teie mau hotu i te faaore i te hoê tuhaa rahi o te mau ati ta te totaiete e farerei nei i teie mahana.
‘Eita râ te taata e ora mai te reira!’ o ta outou ïa e parau mai. Teie râ, ahiri e te manaˈo ra outou e mea fifi roa teie mau ravea, eiaha ïa e manaˈo e e titiaifaro te mau fifi na roto i te mau ravea ohie. Tei roto i te puai o te totaiete iho ia faaohipa i teie mau ravea, noa ˈtu e aita o ˈna e hinaaro ra e na reira. Aita teie nei ui e tuu ra i te tahi otia i to ˈna mau tiamâraa, e tae noa ˈtu te tiamâraa ia rave i te ohipa tia ore e ia faaoromai i te mau faahopearaa.
Te ani ra te vea Bottom Line/Personal e: “Eaha tei roohia i te taotiaraa ia ˈna iho?” I muri aˈe i te faaiteraa e “te mehameha nei te rahiraa o te taata i te mau faahopearaa o to tatou tau e faatia noa i te mau peu i te pae taatiraa tino,” te na ô ra oia e: “Te tamau noa nei te taata i te faateitei i te faufaaraa o te haamâharaa i te mau hinaaro i te pae taatiraa ma te otia ore. . . . Te titauhia nei te taata ia haapararai, ia rave i te ohipa faaetaetaraa tino, ia faaea i te puhipuhi i te avaava, ia haapao i to ratou huru oraraa no to ratou oraora-maitai-raa. O te haamâharaa anaˈe i te pae taatiraa o te ravehia nei ma te taotia ore.” E ere no te mea e eita ta ratou e nehenehe e faaohipa i te mau faufaa mau; aita râ ratou e hinaaro ra. No reira, te ooti nei te totaiete i ta ˈna e ueue ra.
I teie mahana, ua ino roa teie mau faufaa. E rave rahi teie e faariro nei i te ino ei maitai e te maitai ei ino, mai tei faaite-atea-hia mai: “E pohe to ratou to tei parau i te ino ra, e maitai, e te maitai ra, e ino; o tei parau i te pouri ra, e maramarama, e te maramarama ra, e pouri; o tei parau i te maramara ra, e momona, e te momona ra, e maramara.” (Isaia 5:20) Te haapeapea nei râ vetahi. Te ite nei ratou i te mau hotu iino o te haerea ‘e rave mai ta oe e hinaaro’ e te titau nei ratou i te hoê tauiraa i te pae morare.
E nehenehe anei te haapaoraa e te utuafare e tauturu?
E rave rahi mau ravea te faataahia ra no te faahoˈi faahou i te mau faufaa maitatai. O te haapaoraa ïa te tahi. Te manaˈohia ra e e nehenehe oia e horoa i te puai i te pae varua. Eita râ teie puai e itehia i roto i te mau haapaoraa rahi a te amuiraa faaroo kerisetiano. Ua rave faahou mai vetahi i te mau peu etene no te faahiti i te mau haapiiraa faufau mai te Toru tahi, te haamauiuiraa mure ore, e te pohe-ore-raa o te nephe. Ua haapae vetahi pae i te hoo e te poieteraa no te faahanahana i te faaroo aivanaa no nia i te tupu-noa-raa te mau mea. Te farii nei ratou i te pǔpǔ faahapa rahi o te haavahavaha nei i te parau mau o te Bibilia, te Parau a te Atua. Te pûpû nei ratou i te tahi “kerisetianoraa” o tei tarapape roa e o tei viivii roa e inaha aita to ˈna e faufaa faahou, e te ite noa nei te ui apî i te haerea tia ore e te haavare. Eita, eita tatou e nehenehe e fariu i nia i teie mau haapaoraa paruparu no te imi i te puai i te pae varua, i nia anaˈe râ i te haamoriraa mau i niuhia i nia i te Bibilia o te faaite ra i te Basileia o Iehova mai te tiaturiraa otahi roa no te ao nei.
Te vai nei râ te tahi atu pu tauturu no te feia e tapitapi ra, oia hoi te utuafare fetii, te vahi i reira te mau metua e nehenehe ai e haapii i te mau faufaa i ta ratou mau tamarii. E tia i te here o te haamata i te fanauraa ra, ia vai tamau noâ. Te mau tamarii o te here nei e o te tiaturi nei i to ratou mau metua, e hinaaro ïa ratou e riro mai ia raua ra, e rave mai ta raua e paraparau ra e ta raua e ohipa ra, e pee i to raua haerea, e e rave mai i ta raua mau faufaa morare, e i roto i te roaraa o te tau, e mau roa te mau faufaa a te mau metua i roto i te mau tamarii. Te mau paraparauraa ohie, eiaha râ te mau aˈoraa papu ore; te tauaparauraa ma te vaiihoraa i te tamarii ia faaite i to ˈna manaˈo, eiaha râ te mau faaueraa etaeta, te reira te mau ravea o te manuïa.
E farii te mau tamarii i te mau faufaa morare a to ratou mau metua, ia faaohipa atoa raua iho i ta raua e faaue ra. E nehenehe ïa teie mau tamarii e patoi i te hiˈoraa ino o vetahi ê i te fare haapiiraa aore ra i te tahi atu vahi. Mai ta te Maseli 22:6 e parau ra: “E haapii i te tamaiti i tana eˈa ia haere ra; e ia paari oia ra, e ore e faarue i taua eˈa ra.” A haapii na roto i te mau aˈoraa papu. E hau atu â, a haapii na roto i te horoaraa i te hiˈoraa maitai.
Te tahi mau faufaa tei faaherehere-ê-na-hia i roto i to tatou mau tapao tupuna
Ua parau o Iesu e: “E ao to tei ite i to ratou mau hinaaro i te pae varua.” (Mataio 5:3, T.a.a.) Ua tuu-ê-na-hia teie hinaaro i roto ia tatou nei, mai ta vetahi taote tuatapapa feruriraa i faataa na. E parau mau atoa e mea na roto anaˈe i te puai i te pae varua tatou e nehenehe ai e patoi atu i te mau faufaa haavare e faateiteihia nei i teie mahana.
Ia au i te manaˈo ra e ua poietehia tatou ia au i te hohoˈa e te huru o te Atua, maoti te tahi mau faufaa tei faaherehere-ê-na-hia i roto ia tatou nei, te na ô ra te hoê orometua haapii, o Thomas Lickona, e: “Te manaˈo nei au e te vai ra te aravihi no te faaite i te maitai i te omuaraa ra iho.” Teie râ, te parau faahou ra o ˈna e, “e tia i te mau metua ia atuatu i taua aravihi nei, mai ta ratou e tauturu i ta ratou mau tamarii ia riro ei feia taio, ei feia taaro aore ra ei feia hauti upaupa aravihi.”
Ua titau-manihini-hia te hoê taata toroa i te pae no te afata teata o Norman Lear, ei taata orero i te apooraa fenua a te Amuitahiraa no te Haapiiraa a te Nunaa. I muri aˈe i to ˈna fariiraa i “te fifi e farereihia nei e te feia aravihi aˈe, tei noaa ia ratou i te ite hau aˈe i rotopu ia tatou—te feia o tei faarue i te maimiraa i te opuaraa teitei ei ohipa maamaa aore ra faufaa ore,” te na ô ra oia e: “Mea ohie roa na ˈu ia huti i te faaotiraa e, ia au i te aamu taata nei, te hinaaro e ora, te pu iho o te Ora, te manaˈo e turai ra ia tatou ia tiaturi i te tahi mea teitei aˈe ia tatou nei, no to ratou puai e to ratou mana rahi, ua riro ïa ei tuhaa e ei vaehaa no roto roa ia tatou nei.”
Te faahapa nei o Lear e na te ohipa tapihooraa rahi e e maha ahuru matahiti afata teata i faatupu i te hoê “faanahoraa o te mau faufaa apî” o tei faaohipa i te hoê mana rahi i nia i te haerea morare o te huiraatira e te mau faufaa a te taata tataitahi, e e rave rahi mau fifi i te pae totiale o tei tupu mai: te mau fare haapiiraa o te horoa nei i te parau tuite i te mau taurearea o tei ore i ite i te taio e te papai; te maraaraa o te raveraa i te raau taero; te mau tamahine faaipoipo-ore-hia o tei hapû; e te mau utuafare aita ta ratou e moni o te topa noa ˈtura i roto i te tarahu. Te na ô faahou ra o Lear e: “Ia faahiti tatou i te hoê hanere fifi totiale—te manaˈo nei au e e tia ia tatou ia faahiti i te hoê tauiraa rahi o te mau faufaa, ma te tauturu a te afata teata, o tei faaino roa i te huru iho o te nunaa.” E te parau faahou ra o ˈna e “te tiaturi ra [oia] e, i roto roa i to tatou mau tapao tupuna, te vai ra te tiaturiraa e te vai ra te hoê puai e te hoê ohipa moe rahi aˈe o te faataa ra i to tatou oraraa, e te tia ia tatou ia haapao.”
Te na ô ra te taote tuiroo i te pae feruriraa o C. G. Jung e ua riro te haapaoraa “ei haerea tumu a te taata iho, e e nehenehe to ˈna mau tapao e itehia i roto i te taatoaraa o te aamu taata nei.” Tei roto atoa i te taata te hoê haava manaˈo o te faataa i te maitai e te ino: “Te [feia o te mau nunaa] hoi aita a ratou ture ra, ia rave noa ratou i ta te ture ra, ore noa ˈtu â ta ratou ture, o ratou iho â ta ratou ture: ua faaite hua hoi ratou i ta te ture i papaihia i roto i to ratou ra aau, te faaite ra hoi to ratou aau, e to ratou manaˈo te pari ra, e te faatia ra, ratou ratou iho.” (Roma 2:14, 15) “Te haava manaˈo,” o “te hoê ïa ite i roto i te taata iho” mai te hoê tiribuna i roto ia tatou iho nei o te haava i to tatou haerea, ma te faahapa aore ra te faatia ia tatou. Mai te peu râ e e “haavahavaha tatou i te tiribuna” i mua i to tatou haava manaˈo, e etaetahia o ˈna e eita o ˈna e ohipa faahou.
Te ite nei te mau aivanaa i te mau ohipa moe ta te Atua anaˈe e nehenehe e faataa
Mea anaanatae roa ia tapao e a rahi noa ˈi te ite aivanaa no nia i te fenua e te ao taatoa nei, te farii nei te tahi mau aivanaa i te tiaturiraa e te vai ra paha te hoê maramarama teitei aˈe i muri mai i teie mau mea atoa. Aita râ ratou e hinaaro ra e farii i te Atua o te Bibilia.
Ua faataa te aivanaa ra o George Greenstein, i roto i ta ˈna buka The Symbiotic Universe, “no te tatara i te mea e nehenehe e faaauhia i te hoê tupuraa maere mau o te mau ohipa faahiahia o tei ore i tupu taue noa mai o tei faaineine i te faraa mai o te ora. E rave rahi mau ohipa o tei tupu i te hoê taime tano maitai, e ua titauhia teie mau mea atoa ia ora tatou.” Te faaite ra o Greenstein e mea roa ˈtu â teie tabula, aita teie mau ohipa i tupu noa mai te reira, e te rahi noa ˈtura te manaˈo e na te tahi faanahoraa hau aˈe i te natura o tei ohipa. Te feruri ra oia e: “Peneiaˈe, ma te taue noa, e ma te ore hoi e hinaaro, ua topa tatou i nia i te haapapuraa i te pae no te ite aivanaa e te vai ra te hoê Taata Hau aˈe? Na te Atua anei i ohipa mai no te hamani i te reva teitei no to tatou maitai?” “Mea faufau roa” teie manaˈo no ˈna e te na ô ra oia ma te manaˈo pae tahi e: “E ere te Atua te pahonoraa.” Teie râ, ua turai te tabula e rahi noa ˈtura o te mau “ohipa tano maitai” ia ˈna ia ui i te mau uiraa.
Ua tuatapapa atoa o Fred Hoyle, te tahi atu aivanaa tei noaa ia ˈna i te re Nobel, i roto i ta ˈna buka Te ao maramarama (beretane), i teie atoa mau ohipa tano maitai taa-ore-hia o tei haafeaa ia Greenstein: “Ia hiˈohia teie mau ohipa, e au ra e ua tupu mai te ao nei na roto i te tahi mau ohipa tupu taue noa o tei manuïa. I te mea râ e e rave rahi mau ohipa tano maitai e te huru ê tei titauhia ia tupu te ora, e au ra e mea titauhia te tahi faataaraa.” Te farii atoa ra o Hoyle i te manaˈo o Greenstein e eita te reira e nehenehe e tupu matapo noa. No reira, te na ô ra o Hoyle e, ‘te titau ra te haamataraa o te ao taatoa nei i te hoê maramarama,’ ‘te hoê maramarama hau aˈe i te teitei,’ ‘te hoê maramarama o tei na mua mai ia tatou e o tei haamau i te mau faanahoraa tano maitai ia tupu te ora na roto i te hoê ohipa poieteraa opuahia.’
Ua faahiti o Einstein i te parau no te Atua eiaha râ ia au i te huru hiˈoraa a te mau haapaoraa matauhia. Ua faariro oia i te Atua mai “te varua hau aˈe i te teitei” o ta ˈna i ite i roto i te natura. Ua faahiti o Timothy Ferris ia Einstein i roto i ta ˈna tumu parau “Te tahi atu Einstein”: “Te mea o ta ˈu e ite ra i roto i te natura, o te hoê ïa faanahoraa faahiahia o ta tatou e taa ra i roto i te hoê faito haihai roa, e o te turai i te hoê taata maramarama ia faatupu i te manaˈo ‘haehaa.’ E manaˈo faaroo hohonu teie aita roa ˈtu to ˈna e faaauraa e te tahi faaroo miterio. . . . To ˈu faaroo, o te hoê ïa manaˈo faahiahia haehaa i mua i te varua hau aˈe i te teitei o tei faaite mai ia ˈna i roto i te faito haihai ta tatou hoi, ia au i to tatou ite paruparu e te morohi noa, e nehenehe e taa. . . . Te hinaaro nei au e ite e mea nafea to te Atua poieteraa i teie nei ao. Te hinaaro nei au e ite i to ˈna mau manaˈo, area te toea ra, aita ïa e faufaa.”
Te faataa ra o Guy Murchie, i muri aˈe i to ˈna faataaraa i te tahi o te mau ohipa huna taa-ore-hia o te ao nei, i roto i ta ˈna buka Na Miterio toohitu o te oraraa (beretane) e: “Mea ohie ia ite i te tumu te mau aivanaa tuatapapa i te taoˈa no teie nei tau, o tei faanuu â i te mau otia o te ite i nia i te hoê faito hohonu aˈe i ta te tahi atu mau aivanaa no te mau senekele na mua ˈtu, i riro ai ei feia matamua i roto i te tahi atu feia, o te farii i teie miterio rahi o te ao nei, e parau-noa-hia nei te Atua.”
A imi i te Atua, ia maitai outou, e a ora e a muri noa ˈtu
Te maimi haere noa ra te taata. E te mea ta ˈna e imi ra, o te Atua ïa. Ua na reira atoa hoi vetahi mau taata i te tau o Paulo. Te na ô ra oia e: “Ia imi ratou i te [Atua], peneiaˈe o te perehahu atu ratou ia ˈna e itea ˈtu, aita râ oia i atea ê atu ia tatou atoa nei.” (Ohipa 17:27) Eita te animala e imi i te Atua. Aita hoê e feruri ra no nia i te Atua. Area te taata ra, te na reira nei oia, ua poietehia hoi oia ia au i te huru o te Atua, maoti te hoê area rahi e faataa ê ra ia ˈna i te animala maramarama roa ˈˈe. E mai ta te irava e faaite ra, “aita râ [te Atua] i atea ê atu ia tatou atoa nei.”
Te ite nei tatou i te haapapuraa no nia i te Atua i te mau vahi atoa e haaati ra ia tatou i roto i ta ˈna poieteraa, mai ta te Roma 1:20 e na ô ra: “Te mau mea hoi no ˈna e ore e tia ia hiˈo ra, te itea papuhia nei ïa i te mau mea i hamanihia nei, mai te hamaniraa mai â o teie nei ao; oia hoi to ˈna ra mana hope ra e te Atuaraa ra; aita ˈtura o ratou otoheraa.” A ite ai te mau aivanaa i te mau ohipa tano maitai e te fifi ia faataa o te rahi noa ˈtura e a feruri ai ratou i nia i te mau ohipa faahiahia o te ao nei, peneiaˈe e rahi atu â i rotopu ia ratou o te farii i te Maramarama Hau aˈe o te ohipa ra i muri mai i teie mau faanahoraa e o te faˈi i to ratou Poiete, te Atua ra o Iehova.
O Iehova te Fatu o te fenua e ta ˈna mau taoˈa atoa. Ua haamau oia i te mau ture no te feia e ora i nia i te fenua. Ua horoa mai oia i te mau faufaa mau ei aveia e aratai tia ˈtu i te oaoaraa e te ora. Ua horoa atoa mai na te taata i te tiamâraa ia maiti. Aita ratou e faahepohia ra ia auraro ia ˈna. E nehenehe ratou e ueue mai ta ratou e hinaaro, teie râ, ia tae i te hoê taime, e ooti atoa ratou i ta ratou i ueue. Eita e nehenehe e faaooo i te Atua. Ua horoa mai oia i te mau faufaa mau, eiaha no to ˈna iho maitai, no te maitai râ o to ˈna mau taata i nia i te fenua. No reira te na ô ra te Isaia 48:17, 18: “O vau to Atua ra, o Iehova; o tei faaite ia oe i te mea e maitai ai oe ra; o tei aratai ia oe na te eˈa tia maitai ia haere oe ra. Ahiri oe i faaroo mai i te mau faaue na ˈu e; ua riro ïa to oe maitai mai te pape pue ra; e ta oe utua mai te are moana ra.”
Ia haapao ratou i te titauraa ru a Iehova, e arataihia ïa te mau nunaa atoa i nia i te eˈa e maitai ai ratou e e auraro ratou i te mau faaueraa a to ratou Poiete. E fanaˈo ratou paatoa i te hau mai te hoê anavai e te parau-tia ra mai te are o te moana. E faaohipa ratou paatoa i te mau faufaa e haapiihia ˈtu i te mau ui atoa e eita ratou e mauiui faahou i te toparaa i te pae morare. Afea râ te reira e tupu ai? Ia tupu te pure, i te hoê tau fatata roa: “Ia tae to oe ra hau. Ia haapaohia to oe hinaaro i te fenua nei, mai tei te [raˈi] atoa na.”—Mataio 6:10.
[Hohoˈa i te api 23]
Ravea maoˈaraa
Ravea titiaraa i te pape miti
Hamaniraa i te papie
Heheu moana