Ua maere roa ratou i te ohipa ta ratou i ite

I TE tau veavea i mairi aˈenei, i roto e rave rahi mau tuhaa no Europa Hitia o te râ e tae noa ˈtu i te mau fenua atea i Kazakhstan e i Siberia, ua itehia te mau Ite no Iehova i roto i te mau huru tupuraa o tei ore i itehia aˈenei na mua ˈtu. Ua putapû roa te feia no te fenua iho e te feia i ratere mai i te mau tairururaa i taua mau fenua nei, oia mau, ua maere roa ratou i te mea o ta ratou i ite.

Ua parau-pinepine-hia i te mau tia i haere atu i Zagreb e: “Aita matou i manaˈo e e haere mai outou!” Ua faaore hoi te rahiraa o te tahi atu mau ratere i te tere o ta ratou i faaineine—aita râ te mau Ite no Iehova i na reira. Ua papai te vea The Times no Lonedona no nia i te tairururaa e: “Inaha, teie te tairururaa matamua ta te mau Ite no Iehova i faanaho i roto i te hoê fenua e tamaˈi ra ia ˈna iho.”

Ua maere roa te mau mutoi iho. Ua parau hoê i Zagreb e: “Mea maitai ia faaite i te mau ravea haapurororaa parau apî i te ohipa e tupu ra i roto i teie tahua taaroraa, i ǒ nei, i reira te ite nei tatou i te feia no Serbie, no Croatie, no Slovénie, no Montenegro, e vetahi atu â, i te parahiraa te tahi i pihai iho i te tahi ma te hau.”

I Budapest, ua anihia te hoê mutoi ia faaau i te mau Ite i haaputuputu i roto i te tahua rahi e te feia matauhia e haere mai i te tueraa popo. Ua ata oia, ua hiˈo oia i nia, e ua na ô atura: “E nehenehe e faaauhia i te taa-ê-raa e vai ra i rotopu i te raˈi e te fenua.”

“Eaha ta oe e hinaaro ra e parau?”

“A hiˈo na,” o ta ˈna ïa i pahono. “Aita e taata e puhipuhi ra i te avaava, aita e pehu i faaruehia i te tahi vahi, e mea maitai roa te taata. E faaroo iho â ratou i ta oe parau.”

I Kiev, te oire pu no Ukraine, e 14 654 tei putuputu i te Tahua Dynamo. Ua ani atu te hoê Ite i te hoê raatira mutoi e mea rahi anei te ohipa a ta ˈna mau mutoi i roto i te tairururaa. “Aita, i te tairururaa i mua nei, e piti noa mutoi ta matou e tono mai.”

“No te aha e piti?” o tei anihia ˈtu ïa ia ˈna.

“Ia varea anaˈe hoê i te taoto,” o ta ˈna ïa i pahono ma te ataata, “e haapao ïa te tahi ia ˈna.”

Ua maere roa te taata

Ua tapao te hoê vea no Budapest Pesti Hírlap e: “Hau atu i te 40 000 o tei haere mai i teie hopea hebedoma i Népstadion. Aita e pehu, aita e huˈahuˈa faraoa, aita e oumou avaava tei faaruehia.” Ua parau te tahi atu vea o te oire Fehérvár Hírlap e: “Eita e ore e ua hitimahuta e ua oaoa atoa te feia i tapiri mai i Népstadion i rotopu i te 26 e te 28 no tiurai. . . . Ua ite ratou i te hiˈoraa e ite-varavara-hia nei o te haerea e te huru oraraa kerisetiano.”

I te hopea hebedoma, ua topa puai te ûa i Budapest; hau atu i te 5 tenetimetera pape o tei topa mai. Aita râ te reira i tapea i te mau Ite. “Mea faahiahia roa! Mea maere mau!” o te parau ïa ta te hoê mutoi i faahiti. “Te tae noa maira ratou . . . Aita hoê mea e nehenehe e tapea ia ratou.” I te monire, ua papai te hoê vea i teie upoo parau “Te pure i raro aˈe i te ûa” e ua faahiti oia i teie mau parau a te mau tia: “Ua topa mai te ûa i nia ia matou, eita râ o ˈna e tiahi ia matou!”

I Lvov, i reira e 17 531 taata tei putuputu i te Tahua Central Ukraine, ua parau te hoê tia a te mutoi i te hoê Ite e: “No te tahi atu putuputuraa huiraatira e teie rahiraa taata, e titau ïa matou i te mau hanere mutoi. No ta outou tairururaa, hoê ahuru mutoi noa ta matou, e aita hoi e faufaa ia haere mai ratou.”

I muri iho, ma te faaite i to ˈna maere i te tairururaa, ua parau teie tia e: “Te manuïa nei outou i te haapii atu ia vetahi ê i te ohipa maitai, te paraparau nei outou no nia i te Atua, e aita outou e amui atu nei i roto i te ohipa hamani ino. Te aniani noa nei matou e no te aha râ matou i rave ino ai ia outou, e ua faaoti matou e aita matou i faaroo ia outou e aita roa ˈtu matou i ite e o vai râ outou.”

I muri aˈe i to ˈna haereraa ˈtu i te tairururaa i Usolye-Sibirskoye, i Siberia, ua papai te hoê vahine papai a te vea rusia ra Leninskiy Put’ e: “Mea maere roa ia ite i te maitai, e tae noa ˈtu te aravihi ia ite e ia haapao i te mau hinaaro o vetahi ê, ta te mau tavini a Iehova i faaite te tahi e te tahi. Eita roa ˈtu e moehia ia ˈu i te mau parau i faahitihia i te tairururaa: ‘Eiaha e eiâ! Eiaha e haavare! Eiaha e inu [hua] i te ava! A rave i te ohipa! A tauturu i to outou taata-tupu!’ Inaha, te reira te mau faaueraa te tia i te mau taata atoa ia faaohipa. Teie râ, te moe-pinepine-hia ra ia tatou.

“Te mea maere atoa, o te haerea autaeae ïa i faaitehia e te ineineraa ia tauturu atu ia vetahi ê. Ua horoa mai te hoê vahine i te hoê vea ia ore matou ia parahi i nia i te hoê parahiraa repo. A topa mai ai te ûa, ua horoa mai te vahine apî e parahi ra i pihai iho ia ˈu i to ˈna paruru amarara ma te mata ataata, e i pihai iho atu ua huti mai te hoê tane i te hoê tamaroa tei rari roa i raro aˈe i to ˈna paruru amarara. . . .

“Ua turai atoa te huru o te tairururaa iho i te taata ia haamaitai atu â ia ˈna, ia rahi atu to ˈna ite, e to ˈna tiaraa tura. Eita e nehenehe e ore e pahono atu e te mata ataata i te maitai tei faaitehia mai e te feia matau-ore-hia. . . . Ua faarue matou i te tahua ma te manaˈo e ua mâ matou, ma te tiaturi e ua farerei matou i te tahi mea nehenehe roa.”

No te tairururaa i Kiev, hau atu i te 2 000 taata o tei haere mai mai Moscou mai e tau 4 500 no Caucase mai. Ua faanahohia te hoê vahi haamaramaramaraa i te vahi tauraa manureva, e ua apapahia te mau buka bibilia. E rave rahi o tei ui mai i te tahi mau uiraa e ua pahonohia ˈtu ma te mǎrû. I te hoê ahiahi, ua haafatata mai te hoê tane e ua na ô maira: “Mea maoro to ˈu mataitai-noa-raa ia outou. Ua maere roa vau i to outou maitai ia paraparau atu outou i te taata no nia i te Basileia. A farii na i teie mau tiare ei ǒ no ta outou ohipa faahiahia roa.”

I te taime bapetizoraa i te tairururaa i Usolye-Sibirskoye, ua maere roa te hoê papai vea i to ˈna iteraa i te hoê pǔpǔ feia Rusia i te tauahiraa mai e te haapopouraa i te hoê taata bapetizo-apî-hia no roto mai oia i te opu taata Buryat. Noa ˈtu e aita e hiˈo-ino-raa i te pae o te nunaa i Siberia, mea varavara roa i te itehia te mau auhoaraa i rotopu i te mau Rusia e teie mau taata. “Mea nafea to outou faaoreraa i teie mau otia i rotopu i te mau nunaa?” o ta te papai vea ïa i ani.

“Na roto ïa i te faaohiparaa i te faaueraa a te Bibilia e na ô ra ‘e tia ia oe ia here i to taata-tupu mai ia oe iho,’” o te parau ïa i pahonohia ˈtu.

Te hoê autaeaeraa na te ao atoa nei

Te mea o tei haaputapû roa i te mafatu i na tairururaa rahi e toru, o te mau farereiraa here mau ïa i rotopu i te mau tia no te ao atoa nei. I Budapest, ua tae mai te feia ratere no 35 fenua mai, te rahiraa no Polonia e no Helemani mai, teie râ, ua tae atoa mai te mau pǔpǔ rarahi no ǒ mai i te tahi atu mau vahi, e oia atoa e 500 no te Fenua Rusia mai. I Prague, ua tae mai te mau tia no 39 mau fenua, e tae noa ˈtu hau atu i te 26 000 no Helemani mai, fatata e 13 000 no Polonia, hau atu i te 900 no Italia, e 819 no te fenua Holane, e 746 no Tuete, e 743 no Tapone mai. I Zagreb, ua tae mai te mau ratere no 15 fenua, noa ˈtu te haamǎtaˈuraa o te hoê tamaˈi tivila.

I te tairururaa rahi tataitahi, ua faanahohia e toru tahua oreroraa i nia i te mahora i mua i te mau tuhaa taa ê o te tahua taaroraa. Mai nia mai i taua mau tahua ra, ua faataahia te taatoaraa o te porotarama na roto e toru reo i te hoê â taime. I Budapest, teie ïa te mau reo, te reo no Honegeria, no Polonia, e no Helemani; i Prague, te reo no Tekolovakia/Slovaquie, no Polonia, e no Helemani; e i Zagreb, te reo no Croatie/Serbie, no Slovènie, e no Italia. I roto i te darama bibilia anaanatae mau, tei niuhia i nia i te ohipa i farereihia e Ezera e to ˈna mau hoa, ua nehenehe te mau tia e paraparau ra i te mau reo taa ê e mataitai i te aamu e hautihia ra na nia mai i te mau vahi taotiahia ia au i te mau reo taa ê o ta ratou i maiti.

Na te mau melo taa ê o te Tino Aratai a te mau Ite no Iehova i vauvau mai na roto i te reo beretane i te hoê â taime i te rahiraa o te mau oreroraa parau rahi o te mau tairururaa. Ua paraparau ratou tataitahi mai nia mai i te hoê o na tahua e toru. Ua hurihia teie mau oreroraa parau ia nehenehe na pǔpǔ reo e toru e taa i te auraa, e i Budapest e i Prague, ua hurihia ïa na roto e rave rau mau reo ê atu.

Ua tia te mau auvaha taa ê no teie mau tuhaa reo i nia i te mahora i mua i to ratou mau pǔpǔ reo. Na roto i te faanahoraa o te mau taoˈa haapuai reo i tamauhia i roto i taua tuhaa reo taa ê ra, e nehenehe ïa e faaroohia i te parau na roto i to ˈna iho reo ma te ore e haapeapeahia e te mau huriraa i faataahia na roto i te tahi atu reo i roto i te tahi atu mau paeau. Ei hiˈoraa, i Budapest, ua hurihia te mau oreroraa parau a te mau melo o te Tino Aratai na roto i te reo Holane, te Filelane, te Farani, te Heleni, te Italia, te Tapone, te Norevetia, te Paniora, e te Tuete, taa ê atu i te mau reo tumu no Honegeria, Polonia, e Helemani.

I te mau tairururaa rahi tataitahi, ua horoahia te oreroraa parau hopea putapû mau na e toru melo o te Tino Aratai. Ua tamata hoi ratou i te faaoti i te hoê â taime. I muri aˈe, ua tahoê aˈera te mau reo no te mau huru nunaa atoa i roto i te hoê himene, e i te pae hopea, ua amui paatoa te mau mafatu i roto i te hoê pure putapû mau ei haamauruururaa i te Atua ra o Iehova no to ˈna haamaitairaa i teie mau haaputuputuraa ma te manuïa.

I te taime a faahitihia ˈi te “Amene!” hopea, aita hoê i hinaaro e haere. Ua tahe te mau roimata i nia i te mau tausani mata. Na roto i te mau tahua rarahi, ua tahirihia te mau horoi, te mau tahei, e te mau paruru amarara ei aroharaa i te mau hoa herehia o tei tapea i to ratou haapao maitai i te Atua noa ˈtu te mau matahiti maoro o te opaniraa e te tapearaa. I Prague, e rave rahi mau hoa o tei faaea mai hau atu i te hoê hora, ma te himene e te oaoaraa e te mau hoa.

Aita te manuïa faahiahia mau o teie mau tairururaa i tupu ohie noa mai. E mau hanere tausani hora ta te mau Ite no Iehova i horoa eiaha noa no te rave i te mau faaineineraa no te tae atu i reira, oia atoa râ no te haapao i te mau hanere ohipa titauhia ia manuïa teie mau tairururaa.

Te faaineineraa i te mau vahi tairururaa

Te titauhia ra ia tataˈihia te Tahua rahi Strahov i Prague, tei ore i faaohipahia no te hoê tairururaa rahi i roto e rave rahi matahiti. E 55 000 anaˈe parahiraa te nehenehe e faaohipahia, aita hoi i navai no te haaparahi i te rahiraa taata e tiaihia ra no te tairururaa rahi roa ˈˈe o te tau veavea i Europa Hitia o te râ. No reira, ua maimihia ˈtura te hoê matini hahu raau tei ino, ua tataˈihia, e ua faaohipahia no te hamani hau atu i te 18 kilometera parahiraa no te haaparahi fatata e 30 000 taata.

Te hamaniraa e te tamauraa i te mau parahiraa, o te hoê noa ïa tuhaa o te ohipa. Ua titau-atoa-hia e peni, e tamâ, e tatara i te aihere, e e tataˈi haere. I te pae hopea, ua faaunaunahia te tahua e 8 300 vairaa tiare e 33 200 tiare e e 1 357 tumu raau. I te tahi taime, hoê tausani feia rave ohipa o tei haere mai. Ia amuihia, hau atu i te 66 000 hora ta te feia tauturu i horoa no roto mai e 260 amuiraa a te mau Ite no Iehova.

Ua rave-atoa-hia teie huru ohipa no te faaineine i te mau tahua i Budapest, Zagreb, e te tahi atu mau oire. Fatata e 4 000 feia tauturu o tei horoa hau atu i te 40 000 hora no te rave i te ohipa i te mau tahua tairururaa i Lvov. Na ta ratou ohipa i aufau i te tarahuraa o te mau vahi tairururaa. Ua tataˈihia e ua penihia te mau parahiraa atoa i roto i te tahua, e ua tamâhia e ua tamau-faahou-hia te mau vahi haumitiraa. Oia atoa, ua patuhia te hoê fare piriti e 33 metera te roa tei roto te tahi atu mau vahi haumitiraa. Mai te reira atoa, i te Tahua Khimik i Usolye-Sibirskoye, ua patuhia e 52 vahi haumitiraa apî e faaohipahia i roto i te tairururaa.

Ua parau te raatira haapao i te tahua i Lvov e: “I roto i to ˈu oraraa taatoa, aitâ vau i ite aˈenei i teie mau taata huru ê roa. Te rave nei outou i te ohipa mai te hoê utuafare rahi. Aita vau e taa ra e no te aha râ, teie râ, mea au roa ia rave i te ohipa na muri ia outou.” Ua faaineine te pǔpǔ faatere o te tahua i te hoê parau i reira to ratou haamauruururaa i te mau Ite “no te ohipa itoito o ta ratou i rave e no to ratou mau huru maitatai e to ratou amoraa i te mau hopoia.” Ua faaoti teie parau i te na ôraa e: “Te tiaturi nei matou e manuïa ta outou tairururaa i Lvov.”

I Kiev, ua titauhia ia tataˈi i te tahua o te vahi i reira te vahi tamaaraa e faanahohia ˈi. I roto e piti mahana, ua oti te ohipa. Ua haere mai e piti rave ohipa a te tahua e hiˈo i te “semeio,” hoê o te parau atu i te tahi e: “I roto e piti mahana, ua rave ratou i te hoê ohipa o te titau i ta tatou mau taata i te hoê afa matahiti ia faaoti.” Ua parau te peretiteni o te pǔpǔ no te mau ohipa taaroraa i roto i te pape i te tiaau no te tairururaa e: “Ua taui roa te huru o te tahua ia outou e aita matou e ite faahou ra i ta matou tahua.”

Ua papai te pu faatere i te tahua i Kiev ei haamauruururaa e: “Ua putapû roa to matou mafatu i mua i te faanahoraa a te tairururaa a te mau Ite no Iehova. . . . Mai ta te mau anavai iti pape e tahoê i roto i te anavai rahi, mai te reira atoa te mau anavai o te mau Ite no Iehova ia tahoê e ia rahi roa ˈtu, no te haere atu i ta ratou vahi putuputuraa. E tia mau â ia haapopou i te reira. A tahi ra matou a ite ai i teie huru ohipa. Mauruuru no to outou haapiiraa mai ia matou i te tahi mea na roto i to outou hiˈoraa.”

Te haapaoraa i te mau ratere

Hoê o te mau ohipa rahi roa ˈˈe, o te faanahoraa ïa i te mau vahi nohoraa no te mau tausani feia ratere. Ua tatara te mau Ite no te fenua i to ratou fare no te farii i te mau tia. I te tairururaa no Prague, ua haaparahi te mau Ite Tekolovakia e 6 280 feia no Polonia i roto i to ratou mau fare. I Budapest, e 2 203 tia o tei faaea i te fare o te taata. E ua farii te mau 278 Ite no Kiev i te tahi tau 750 e tae atu i te 800 ratere.

Hau atu, e rave rahi mau fare haapiiraa e fare taaroraa i Budapest e i Prague o tei faaohipahia ei vahi faaearaa. Hau atu i te 40 fare haapiiraa tei faaohipahia i Budapest ia noho e 7 930 taata. I Prague, e 12 530 taata o tei taoto i roto i te mau fare haapiiraa e te mau vahi taaroraa. E mau tausani mǎrû roi matai o tei noaa mai no te faanaho i teie mau vahi nohoraa. Hau atu i te 29 000 o tei tae atu i te tairururaa no Prague o tei faaea i roto i te mau vahi taotoraa a te feia haere haapiiraa e te mau fare taotoraa no te mau taurearea, e mau tausani taata hau atu o tei faaea i roto i te mau hotera.

I te tahi mau tairururaa, ua ravehia te mau faanahoraa ia taoto te mau tia i roto i te mau pereoo auahi o tei faahoro mai ia ratou. Fatata e piti tausani Ite no Zakarpatskaya Oblast o tei faaohipa i te mau pereoo auahi ei vahi taotoraa i Kiev. Ua na reira atoa te tahi atu feia tei haere mai i Kiev mai te Caucase mai. Oia atoa, ua ratere te mau Ite no Lituanie i te tairururaa no Tallinn, Estonia, e ua taoto ratou i roto i te mau pereoo auahi o tei afai mai ia ratou.

I muri aˈe i to ratou taeraa mai, ua haapaohia te mau tia e te feia o tei farii maitai ia ratou na roto e rave rahi mau ravea. Ei hiˈoraa, ua ravehia te tahi mau faanahoraa i Prague no te faatere e 40 pereoo uta taata hau atu, i nia i te hoê tere e haapaohia e te hoê anaˈe pereoo. Hau atu, i te mea e ua aufau-ê-na-hia te mau tere, ua nehenehe te mau tia e haere ma te tamoni ore na nia i te mau pereoo uta taata i te tairururaa i te poipoi e e hoˈi atu i te fare i te ahiahi na roto i te faaite-noa-raa i ta ratou tapao no te tairururaa. I te Fenua Rusia, ua aratai e piti pereoo mutoi i na pereoo uta taata e 11 i nia i to ratou tere i te tairururaa i Usolye-Sibirskoye mai te vahi tapiri mai no Angarsk, hoê i mua e te tahi i muri!

Te mau tutavaraa no te haere i te tairururaa

Ua aufau te mau tia i haere atu i te tahi mau tairururaa Rusia i to ratou tere atea. Ua haaputu vetahi i te moni i roto i te hoê matahiti taatoa no te aufau i to ratou tere. Ua haere mai te hoê pǔpǔ na te uahu no Vladivostok roa mai i te Moana Patitifa ma te tere hau atu i te 3 200 kilometera e tapae atu ai i Usolye-Sibirskoye. Hoê ahuru ma piti tia o tei haere mai mai te motu no Sakhalin mai i roto i te Moana Patitifa i te pae apatoerau no Tapone. Hoê o ratou, o te hoê ïa taurearea e 20 matahiti o tei haere mai e e toru taurearea e haapii ra i te Bibilia na muri ia ˈna.

Ua ani onoono te hoê taata faahoro i te pereoo uta taata no Sayanogorsk, e opua ra hoi e bapetizo i Usolye, i ta ˈna paoti ohipa ia faaea oia i te ohipa tau mahana no te haere i te tairururaa, aita râ ta ˈna paoti ohipa i farii i te vaiiho ia ˈna ia haere. No reira, ua haere atura taua taata ra i te oire no Abakan e ua noaa maira ia ˈna te tahi hohoˈa o te papai rusia no te 27 no mati i mairi aˈenei o te farii ra i mua i te ture i te mau Ite no Iehova ei faanahonahoraa faaroo. Noa ˈtu e ua ite oia i teie papai, aita ta ˈna paoti ohipa i farii ia ˈna ia haere. I te poipoi roa o te mahana o to ˈna revaraa, i muri aˈe i te hoê pure hohonu, ua ani faahou teie taata e ua faatiahia ˈtura o ˈna ia haere.

Te bapetizoraa e te mau buka apî

Ua riro te bapetizoraa ei taime putapû mau i roto i taua mau tairururaa atoa ra i Europa Hitia o te râ. Na roto i te ohipa taipe o te faahopuraa i raro i te pape, ua faaite e 18 293 taata i tae mai i taua mau tairururaa nei i mua i te aro o te mau ite e ua pûpû ratou ma te faaherehere ore i to ratou ora no te tavini i te Atua ra o Iehova. Ua parau te hoê taurearea o tei bapetizo ia ˈna i Prague, o tei faaauhia aita i maoro aˈenei i te hoê ohipa faahiahia roa, e: “Ua manaˈo vau e e tia ia ˈu ia maiti i rotopu i te hoê atua toru tahi oia hoi te dala marite, te moni helemani, e te moni Auteteria i te hoê pae, e o Iehova i te tahi pae. Ua maiti au ia Iehova e ua patoi au i te tahi atu faaauraa ohipa.”

Ua faatupuhia te bapetizoraa i Tallinn i roto i te hoê vahi hopuraa pape i rapaeau mai i pihai iho i te Miti Baltique i reira e itehia ˈtu i muri mai i te hoê patu tahito tei faaohipahia na ei fare tapearaa i mutaa ihora. E rave rahi mau Ite no Estonia o tei tapeahia i reira hou ratou e tonohia ˈtu ai i te mau vahi raveraa ohipa i Rusia i te omuaraa o te mau matahiti 1950. Auê ïa te putapû e, no teie feia paari iho â râ, ia ite e 447 feia faaroo apî o tei faataipe i to ratou pûpûraa ia Iehova i roto i teie oroa i mua i te aro o te taata!

Te tahi atu taime putapû o te mau tairururaa, o te matararaa mai ïa te mau buka apî. Ua ouˈa te mau hoa no Lituanie i Tallinn i nia i to ratou parahiraa e ua taˈi ratou i to ratou faaiteraahia e ua matara te vea iti ra “Inaha, te faaapî nei au i te mau mea atoa nei” na roto i to ratou reo. Oia atoa, te hoê taime putapû i te mau tairururaa i Rumania, o te matararaa ïa na roto i te reo rumania te buka Te Apokalupo: ua fatata roa to ˈna tatararaa rahi hopea nei!, e no te feia no Tekolovakia e te mau Slovaques i Prague, o te taeraa mai ïa te Tatararaa a te ao apî o te mau Papai Moˈa na roto i to ratou mau reo.

Inaha, i te rahiraa o te mau tairururaa, te buka o tei faatupu i te oaoa rahi, o te buka apî ïa Te taata rahi roa ˈˈe i ora aˈenei. Ua nenei-ê-na-hia hoê ahuru buka na roto e 59 reo.

Te faaohipa-maitai-raa i te tiamâraa

I teie mahana, te fariihia ra te mau buka bibilia i roto ia Europa Hitia o te râ, e tae noa ˈtu i te Fenua Rusia. Te faarue nei te mau pereoo rahi tei î roa i Te Pare Tiairaa e te A ara mai na! i te fare neneiraa rahi a te mau Ite no Iehova no Selters/Taunus, i Helemani, e e haere atu ai na roto i te mau otia e tomo atu ai i roto i te mau fenua no Europa Hitia o te râ. Auê ïa taa-ê-raa e te tau na mua ˈtu, i reira ma te nehenehe e faautuahia i te utua fare auri, e tia i te mau Ite ia afai huna i te mau papai i roto i taua mau fenua ra!

Ei faahohoˈaraa i teie tauiraa faahiahia roa, ua tupu te tauaparauraa i muri nei i rotopu i te tiai o te otia fenua e te hoê Ite no Iehova i te taime a tupu ai te tairururaa i Tallinn:

“Eaha ta oe i roto i teie afata iti?”

“E vea.”

“Eaha teie mau vea? E vea anei a te Atua?”

“A e.”

“Te mau vea a te Atua ra o Iehova?”

“E!”

“Jaaˈa, maitai roa. E nehenehe oe e haere.”

I muri aˈe i te tairururaa no Budapest, ua titau te peretiteni no Honegeria, o Arpad Goncz, i te hoê farereiraa e te hoê Ite hoê â to raua piha tapearaa i te tau o te haavîraa a te mau communistes. Ua paraparau raua o Goncz Tane hoê hora e i muri iho ua ani ihora o ˈna i to ˈna hoa tapearaa tahito ia faatae atu i to ˈna tapao aroha i te mau Ite no Iehova. Te mauruuru nei te mau hoa o te tiamâraa a te Atua na te mau vahi atoa i te mea e te farii nei te feia toroa i teie nei, mai ia Goncz Tane, i te tiamâraa o te haamoriraa i Europa Hitia o te râ.

Ma te faaite e te faaohipa maitai ra te nunaa o Iehova i to ratou tiamâraa, ua faataa te vea The New York Times i teie avaˈe setepa i te hoê ohipa i tupu i St. Petersburg (o Leningrad na mua ˈtu), i te na ôraa e: “Te faaroohia ra te mau nota rii mǎrû o te pehe ‘Summertime’ a Gershwin no ǒ mai i te Anavai Neva . . . Te haaati haere ra te mau nota i te feia e tarai ra i te mahana, te mau tamarii e aˈuaˈu ra i te urî, te feia e hoo ra i te mau hohoˈa no te oire tahito o St. Petersburg e te mau Ite no Iehova e maimi ra i te feia e faaroo mai ia ratou.”

Oia mau, te faaohipa nei te mau Ite i to ratou tiamâraa ma te itoito no te pororaa i te parau apî maitai! Te hinaaro ra anei outou e ite hau atu â no nia i ta ratou poroi? Te faataa ra te vea no Rusia ra Vostochno-Sibirskaya Pravda e: “E nehenehe te mau haamaramaramaraa papu no nia i ta ratou mau ohipa e noaa mai i te mau vahi haapiiraa bibilia a te mau Ite no Iehova i roto i te mau oire atoa.” Noa ˈtu e eaha te vahi o te ao nei ta outou e ora ra, eiaha e haamarirau i te haere atu e ani.

[Tapura i te api 27]

TE MAU TAIRURURAA I EUROPA HITIA O TE RÂ E I TE FENUA RUSIA

Fenua Rahi Taata Feia bapetizo

Tekolovakia (Prague) 74 587 2 337

Honegeria (Budapest) 40 601 1 134

Polonia (12 oire) 131 554 4 250

Rumania (8 oire) 34 808 2 260

Fenua Rusia (7 oire) 74 252 7 820

Yugoslavia (Zagreb) 14 684 492

Taatoaraa 30 tairururaa: 370 486 18 293

[Hohoˈa i te api 22, 23]

Pae atau: Te huriraa i te parau no te mau pǔpǔ reo ěê i Prague

I raro mai: Te Tahua Strahov i Prague tei î roa i te mau tia tei hau atu i te 74 000

[Hohoˈa i te api 24]

I nia ˈtu: Tairururaa i Tallinn, Estonia

Tairururaa no Budapest, i reira, i raro aˈe i te ûa aore ra te mahana, ua fanaˈo te mau tia i te porotarama

[Hohoˈa i te api 29]

I nia ˈtu: Vetahi mau vahi haumitiraa i patuhia no te tairururaa i Usolye-Sibirskoye, Siberia

Te peniraa e te hamaniraa i te mau parahiraa no te farii i te feia hau atu â i Prague

[Hohoˈa i te api 30]

Te darama bibilia e te bapetizoraa i Zagreb

[Hohoˈa i te api 31]

I nia: Avariraa i Tiunu 1991 o te Piha no te Basileia matamua i patuhia e te mau Ite i Honegeria

I ropu: Hau atu i te 20 000 feia tei taoto i roto i te mau fare haapiiraa e te mau fare taaroraa i Honegeria e i Prague

I raro mai: Opereraa i te buka “Te taata rahi roa ˈˈe i ora aˈenei” i Usolye-Sibirskoye, Siberia