Ia au i te Bibilia . . .

Ua opani anei te Atua i te inuraa i te ava?

‘EIAHA e haapeapea i te cocaine, te heroine, te LSD, e te marijuana—o te ava noa nei â te fifi hinaaro-ore-roa-hia ta te totaiete e tia i te faaruru. E faatupu te ava i te pohe e te inoraa i te pae totiare hau aˈe i te raveraa i te mau raau taero atoa amuihia.’ Teie te mau manaˈo hohonu i faaitehia i te 31raa o te tairururaa i tupu i te mau toru matahiti atoa a te Taatiraa no te haapaeraa i te ava a te mau vahine kerisetiano o te ao nei i Kanada a piti matahiti i teie nei.

Ua faariro teie mau pǔpǔ i te inu-hua-raa i te ava tei maraa i te mau vahi atoa ei pau rahi i te pae no te oraora-maitai-raa o te tino e no te oraraa, e tae noa ˈtu i te mau mirioni dala e haamâuˈahia ra i te matahiti hoê e te mau faatereraa hau no te tinai i te inu-hua-raa i te ava. Ma te tiaturi e te opani etaeta ra te Atua i te inu, te faaitoito nei e rave rahi feia manaˈo maitai ia opanihia e te ture te mau inu atoa e ava to roto. Te turu ra anei te Bibilia i te reira manaˈo?

Te inuraa i te uaina i roto i te Bibilia

Mea maoro i teie nei ua tǎpǔ te Atua i ta ˈna mau taata faaroo: “E î ta oe ra mau fare vairaa taoˈa i reira, e î hoi ta oe mau farii uaina i reira e manii noa ˈtu.” (Maseli 3:10) Oia mau, Na ˈna i horoa mai no tatou te hotu o te ô vine, e i faatupu atoa i te mau manumanu rii faahopue e vai ra i nia i te mau hotu vine ia fatata anaˈe te taime no te hamani i te uaina.

Ua faataa rii te peropheta a te Atua o Isaia e mea nafea ia hamani i te uaina maitai. Ma te faaite atea mai i te mau haamaitairaa a te ao apî no te feia parau-tia, ua papai o Isaia: “Ei reira Iehova sabaota ra e rave ai, na te taata atoa . . . i te oroa uaina tahito, . . . i te uaina tahito faaateate-maitai-hia ra.” (Isaia 25:6) Ua ite te feia hamani uaina aravihi e te uaina “faaateate-maitai-hia,” tei ore i tufahia i nia i te hoê area faahopueraa maoro, e ateate rii mǎrû noa ïa, ma te haamaitai i te noˈanoˈa e te au o te uaina.

E faaoaoa anei e e maitai anei no te tino?

Ua faaite mai te Atua i te oaoa e te maitai o te tino e noaahia mai i te uaina. Ua parau ta ˈna peropheta o Iotama no te “uaina e oaoa ˈi te Atua e te taata atoa.” (Te mau tavana 9:13) Ua papai te Arii ra o Solomona ‘ua ui au i to ˈu iho aau e ei nia vau i te uaina.’ (Koheleta 2:3) E i te oroa faaipoiporaa i Kana o tei tui te roo, ua taui Iesu i roto i ta ˈna semeio matamua, i te hoê rahiraa pape ei “uaina maitai,” no te oaoaoraa o te mau manihini o te oroa faaipoiporaa.—Ioane 2:6, 7, 10.

To Iesu ite no nia i te raveraa i te uaina no te rapaau, ua papuhia te reira i roto i ta ˈna parabole no nia i te taata aroha no Samaria. I to ˈna rapaauraa i te mau pepe o te taata i hamani-ino-hia, ua ninii te taata aroha no Samaria i “te hinu e te uaina” i nia iho. (Luka 10:30-34) I to te aposetolo Paulo faaitoitoraa i te taurearea ra ia Timoteo e inu ‘ei maa uaina iti no to ˈna opu e no te pinepine i te maˈihia’ ua tuea maitai ïa i te faufaaraa o te uaina i te pae no te tamaa e no te rapaauraa fariihia i teie nei tau.—Timoteo 1, 5:23.

Ua papai te taote ra o Salvatore P. Lucia, e orometua haapii tahito no te Haapiiraa tuatoru i te pae rapaauraa no Kalifornia, i roto i ta ˈna buka Te uaina e te oraora-maitai-raa o te tino e “e ere te uaina i te inu tahito roa ˈˈe e ava to roto anaˈe iho e ravea rapaauraa faufaa roa ˈˈe atoa râ tei tamau-noa-hia i te rave i te roaraa o te aamu o te taata.” E ua parau te vahine maimi i te pae no te maa o Janet McDonald e mea maitai ïa te uaina e inuhia ma te au noa ei ravea tamǎrûraa au noa, ei faatupu i te hiaai i te maa, e ei tauturu no te tauiraa i te maa e te raveraa i te mau maitai a te maa i amuhia.

E titauhia te huru au noa e te hitahita ore

Teie râ, noa ˈtu teie mau faahitiraa maitai no nia i te uaina e te mau inu e ava to roto a te Bibilia e te rapaauraa atoa, ua roohia te rahiraa o te huitaata i te mau ati riaria i te inu-hua-raa i te ava. E tia anei ia parihia te Atua no te mau ati atoa i tae mai ei faahopearaa i te inu-hua-raa i te ava? Mea taa ê roa ïa, i roto i ta ˈna Parau, te Bibilia, ua horoa mai oia i te mau aratairaa maramarama no nia i te inuraa e te taeroraa i te uaina.

A hiˈopoa na, ei hiˈoraa, i teie faaararaa puai no nia i te rave-hua-raa i teie ô: “Eiaha oe e amui atoa i te feia i taero i te uaina ra; i roto i te feia oehamu tiaâ ra.” E ere ïa te auraa e o te feia amu pota noa tei auhia e te Atua, aita atoa teie irava e faautua ra i te feia e inu ra maa uaina iti aore ra e amu ra i te inai ma te au. Te patoi nei râ te Bibilia i te amu hua e te inu hua atoa. Mea papu roa ia au i te tahi atu Maseli e: “O vai tei ati nei? o vai tei oto? o vai tei mârô? o vai tei maniania i te paraparau? o vai tei paruparu hara ore noa? to vai te mata uteute? Te feia parahiraa maoro i te inuraa . . . i te uaina anoihia ra.”—Maseli 23:20, 29, 30.

Te faaitoito ra na taata papai o Petero e o Paulo i te huru au noa ma te aˈo i te mau kerisetiano matamua ia haapae “i te inu rahi, i te uaina ra” e eiaha “ia taero i te uaina.” E tia ia haapao-maitai-hia teie faaueraa, mai ta te aposetolo i faaara: ‘E ore te taero ava e parahi i te basileia o te Atua.’ Teie atoa te auraa, te feia mâtau i te inu hua i te ava aita ïa ratou e auhia ra e te Atua e eita e noaa ia ratou te ora mure ore.—Petero 1, 4:3; Ephesia 5:18; Korinetia 1, 6:9, 10.

Parau mau, mai te peu e erehia ra te taata i te hitahita ore i te inuraa i te ava, ia haapae roa ïa ratou i te reira, e tia ˈi. (A hiˈo i te Mataio 5:29, 30.) Tapiri atu i te inoraa te tino, e ati rahi te itehia mai i te pae varua ia hiaai noa anaˈe hau atu i te ava. No reira, te faaara ra te Atua ia tatou ma te paari mau eiaha ia inu hua i te ava.

Taa ê atu i te manaˈo e opani etaeta i te reira, aita te Bibilia e titau nei, e e faaite nei e eiaha roa e inu i te uaina aore ra i te ava no te taata atoa. (Deuteronomi 14:26) Teie te parau a te taata papai salamo no nia ia Iehova: “Te faatupu nei oia i te aihere na te mau puaa, e te raau rii na te taata. E te roaa nei te maa ia ˈna no roto i te fenua, e te uaina e oaoa ai te aau o te taata nei.” Ua tuu te Atua i te uaina no te hoê opuaraa maitai e te tura ia rave-anaˈe-hia ma te au.—Salamo 104:14, 15.

[Hohoˈa i te api 18]

L’Absinthe papaihia e Edgar Degas, 1877

[Faaiteraa i te tumu]

—E.R.L./Sipa Icono