Mea hoona anei ia faaite i te parau mau?

IA ITE ratou i te haavare rahi i rotopu i te feia paari, mea pinepine te mau taurearea i te pee i to ratou haerea. Mea oaoa mau â—e mea tano atoa ia tapao—ia itehia te hoê taata parau-tia! Ua faahiti te vea ra Sports Illustrated i teie hiˈoraa no te parau-tia na roto i teie parau: “Teie te aamu o te faaitoito faahou i te tiaturiraa.”

Ua faatia te vea i te parau o te hoê hautiraa tairiraa popo a te mau taurearea i Floride, i te Fenua marite. Ua haru mai te taurearea tiai tapao matamua i te popo i topa i raro e ua tamata i te tapea i te taurearea e horo ra mai te tapao matamua i te piti o te tapao. Ua pii atura te vahine e hiˈopoa ra i te hautiraa, o Laura Benson, i te taurearea horo ia haere i rapae, ua parau atu râ te tiai tapao matamua e: “Aita vau i tapea i te taata horo.” No reira, ua farii o Benson Vahine ia faaea te taurearea horo i nia i te piti o te tapao.

I roto i te tahi atu hautiraa e piti hebedoma i muri iho, ua hauti faahou teie taurearea i roto i te hoê hautiraa. Na Benson Vahine â i hiˈopoa i te hautiraa. I taua taime ra, ua manaˈo oia e aita i noaa i taua taurearea ra i te tapea ˈtu e ua faatia ihora oia i te taata horo. Noa ˈtu e aita te taurearea i parau noa ˈˈe i te hoê parau, i to ˈna hoˈiraa ˈtu i ta ˈna tapao, ua ite ihora oia e te vai ra te tahi mea aore e tano ra i roto i ta ˈna huru hiˈoraa mai ia ˈna. Ua haere ihora oia ia ˈna ra e ua ani atura: “Ua tapea anei oe i te taurearea horo?”

“E,” o ta ˈna ïa i parau atu.

I to Benson Vahine tauiraa i ta ˈna faaotiraa e ua tuu ihora i te taurearea horo i rapae, ua patoi te feia faaineine o te tahi atu pǔpǔ. Ua faatia ˈtura oia i te ohipa i tupu e piti hebedoma na mua ˈtu e ua parau ihora oia: “Ia hiˈo vau i te parau-tia o teie tamarii, e tia ia ˈu ia faatia i ta ˈna parau.”

E au ra e te rahi noa ˈtura te feia haavare i roto i teie nei ao i teie mahana. Mai ta te papai salamo a te Bibilia i parau na: “Inaha, o te paieti ore teie nei, e te vai tamau nei to ratou maitai i te ao nei; te tupu ra i te rahi ta ratou taoˈa.” (Salamo 73:12) I te parau mau râ, e hopoi mai te haerea tia i te hoonaraa faahiahia roa ˈˈe. E noaa mai te faatura o te taata. Te mea faufaa roa ˈtu râ, e noaa mai te farii maitai o te Atua ra o Iehova, o te nehenehe e horoa mai i te haamauruururaa o te ora mure ore.