Eaha te tupu mai a muri aˈe?
No te aha mea putapû mau te hau i rotopu i te taata e te animala? No te mea i te haamataraa, ua poietehia te mau taata no te ora ma te hau e te mau animala, e te mau animala taehae atoa.
I to te Atua hamaniraa i te taata e te vahine matamua, ua tuu aˈera oia ia raua i roto i te paradaiso i nia i te fenua ia ora ratou ma te oaoa. Ta ˈna opuaraa no raua, ia fanau raua i te tamarii e ia faatae raua i te mau otia o taua Paradaiso matamua e ati noa ˈˈe te fenua taatoa. I te vahi atoa, e faatere te taata i te mau animala ma te hau.
Te faaite ra te aamu o te Genese e: “E ei nia iho ratou i te mau iˈa o te tai, e i nia iho i te mau manu o te reva, e i nia iho i te mau puaa, e i nia iho i te fenua atoa, e i nia iho hoi i te mau mea e nee haere i te fenua nei ra. . . . Hiˈo aˈera te Atua i te mau mea atoa ta ˈna i hamani, e inaha, e mea maitai roa.”—Genese 1:26-31; 2:9.
Eita taua faatereraa animala ra e ravehia ma te hamani ino. E ora amui te mau taata e te mau animala ma te hau. E nehenehe te reira e itehia a haere mai ai te mau animala ia Adamu ra ia horoahia te iˈoa no ratou, aita hoi ta ˈna e mauhaa no te paruru ia ˈna. Hau atu, aita i faahitihia i te hoê noa ˈˈe mǎtaˈu ta te taata aore ra ta te animala i faaite.—Genese 2:19, 20.
E tupu te opuaraa matamua
Mea oaoa roa ia ite e fatata taua opuaraa tumu a te Atua i te tupu, e e monohia te mau faatereraa a te taata paatoa e te Basileia a te Atua, o te faatere mai te raˈi mai. (Daniela 2:44; Mataio 6:9, 10) Ia haamauhia te faatereraa a te Atua i nia i te fenua atoa nei, e rave te Atua e ia tupu ta ˈna opuaraa matamua no te fenua e no te mau taata e no te mau animala.
Ua faaite-papu-hia i roto e rave rahi mau parau tohu a te Bibilia te mau tauiraa ta te faatereraa tia a te Atua e faatupu mai. Ei hiˈoraa, e tapao anaˈe na e eaha ta Isaia i papai i raro aˈe i te faauruaraa a te Atua: “Ei reira te luko e parahi atoa ˈi raua o te arenio; e te nemera e te pinia mamoe, e apiti atoa ïa i te taotoraa; e te fanauˈa puaatoro, e te liona apî, e te puaatoro haaporia ra, hoe â amuiraa mai, e na te hoê tamaiti iti e aratai. Te puaatoro apî ra, e te daba maiaa ra, hoê â ïa amuraa, e hoê â taotoraa to te fanauˈa. E amu hoi te liona i te aihere mai te puaatoro atoa ra. E ore ratou e hauti, e ore e rave ino, i to ˈu atoa nei mouˈa moˈa, e î hoi te fenua i te ite ia Iehova, mai te vairaa miti e î i te miti ra.”—Isaia 11:6, 7, 9.
Te faaite atoa ra te tahi mau parau tohu i te oaoa hohonu o te vai mai i roto i te ao apî a te Atua. No nia i taua parau ra, ua tohu o Mika e: “E tiapai ratou i ta ratou ˈoˈe ei auri arote, e ta ratou mau mahae ei tipi tope vine ïa: e ore te hoê fenua e aa mai i te tahi fenua i te ˈoˈe, e ore hoi ratou e haapii faahou i te tamaˈi. E parahi râ ratou o te taata atoa i raro aˈe i ta ˈna iho vine, e i raro aˈe i ta ˈna iho suke, e aore roa e taata e haamǎtaˈu mai ia ratou.”—Mika 4:3, 4.
Eita ïa hoê aˈe animala taehae e haafifi i te hau o te huitaata, inaha te na ô ra te mau parau tohu a te Atua e: “E fafau vau i te faufaa hau ia ratou, e na ˈu e faaore i te puaa taehae i nia i te fenua nei: e parahi noa hoi ratou ma te ora i te medebara; e taoto hoi i roto i te ururaau. . . . E parahi hoi ratou ma te ora i to ratou ra fenua.”—Ezekiela 34:25, 27.
No reira, e ite-taatoa-hia te hau e te au-maite-raa i roto i taua Paradaiso ra o te faatia-faahou-hia. No reira, ua nehenehe ta te buka hopea a te bibilia e faaite i teie mau huru tupuraa: “E na te Atua e horoi i to ratou roimata atoa; e e ore roa te pohe, e te oto, e te mihi, e te mauiui, e ore atoa ïa, no te mea ua mou te mau mea tahito ra. E ua parau maira tei parahi i nia iho i te terono ra, Inaha, te faaapî nei au i te mau mea atoa nei. E ua parau maira oia ia ˈu, A papai, e parau mau hoi teie nei mau parau, e te haavare ore.”—Apokalupo 21:4, 5.
E, e parau mau e te haavare ore. Te auraa o te reira, e nehenehe ïa tatou e tiaturi i te parau fafau a te Atua, inaha taa ê atu i te mau taata tia ore, e mana to ˈna, e e paari to ˈna, e ua hinaaro papu oia i te faatupu i ta ˈna mau opuaraa. Mai ta te hoê o te mau tavini haapao maitai a te Atua i te tau tahito i haapapu: “E aore roa te hoê o te mau mea maitatai ta to outou Atua ta Iehova i parau mai ia outou ra i ore i te tia; ua hope roa i te tupu ia outou, aore roa te hoê i toe.”—Iosua 23:14; hiˈo atoa Isaia 55:11.
E nehenehe tatou e tiaturi e fatata roa, i roto i te ao apî a te Atua, e rave faaoti roa oia i ta ˈna opuaraa matamua no te fenua, no te mau taata e no te mau animala. E tupu mau â te hau ta te Atua e horoa, i nia i te fenua atoa nei. Eita teie huru hau e tupu noa i rotopu i te mau taata, e oia atoa i rotopu i te mau animala.