“Te mau Ite no Iehova o te Fenua Rusia—Mahana maitai aˈe to mua mai”
O te upoo parau ïa o te hoê tumu parau i neneihia i te 19 no atete 1990 i roto i te hoê vea polonia reo beretane The Warsaw Voice. Te faataa ra te vahine papai, o Anna Dubrawska, i te parau no nia i te tairururaa “Te reo viivii ore” ta te mau Ite no Iehova i faatupu i Varsovie i te avae atete 1990. Ua uiui oia i te manaˈo o te mau Ite no te Fenua Rusia, ua tapeahia hoi vetahi e 15 matahiti i roto i te mau fare tapearaa e te mau aua raveraa ohipa no ta ratou mau tiaturiraa i te pae faaroo. Teie râ, ua tuu teie mau Ite i te tapao i nia i te mau tauiraa faaitoito mau e tupu ra i roto i to ratou fenua.
Te rave nei o Grigor Goryachek i te ohipa paturaa fare, i Crimée. Ua paari oia e to ˈna mau metua Ite no Iehova, e ua hopoi-ê-hia oia e 15 matahiti te maoro i Sibérie. “I teie nei, te tiaturi nei matou e e mau mahana maitai aˈe to mua nei”, o ta ˈna ïa e parau ra. Area o Anton Pohanich, te tahi atu Ite, te faataa ra oia e: “Mea ohie aˈe i teie nei. E nehenehe vau e afai atu i ta matou poroi na te mau fare ma te tiamâ, aita hoi e nehenehe e na reira i mutaa ihora.”
Te faahiti ra o Anna Dubrawska i teie mau parau a Igor Cherny, te hoê Ite 17 matahiti e ora ra i Caucase: “I te hoê roaraa e 70 matahiti, ua faahepohia te taata ia faarue i te Atua, te mau taurearea iho â râ, e inaha, te imi nei ratou ia ˈna i teie mahana ma te uˈana rahi; aore ra, te tamata na mua nei ratou i te imi i te haamaramaramaraa.”
Te faaite ra te vea polonia Dziennik Wieczorny (Te vea o te po), i raro aˈe i te upoo parau Radość braci (Te oaoa o te mau taeae), i teie mau parau a te hoê taata rave ohipa a te tahua taaroraa Zawisza i Bydgoszcz: “Ua faahiahia roa vau i te parau mâ e te mau peu maitai a te mau taurearea.”
I roto i te hoê tumu parau a te vea tamahana polonia Trybuna, oia hoi Glosiciele Królestwa (Te feia poro o te Basileia), ua papai o Zofia Uszynska no nia i te tairururaa e: “I roto noa i te hoê afa hora, hoê ahuru taime to te taata horoaraa mai i te taofe e te tahi maa. E pae taata o tei hinaaro e vaiiho e to ratou parahiraa no ˈu. I roto e maha mahana, hau atu i te 30 000 taata tei amui mai i te tahua taaro Dziesieciolecia no Varsovie, o tei faatupu i te hoê oroa [faaroo]. Ua tae mai i reira, te mau vahine hapû, te mau utuafare e ta ratou mau tamarii nainai, te mau taata paari e te mau taurearea. E 11 matahiti to te taurearea apî roa ˈˈe i bapetizo, e te taata paari roa ˈˈe ra, fatata ïa i te 80 matahiti.”
Te na ô faahou ra te tumu parau e: “E rave rahi tausani feia no Rusia [hau atu i te 16 000] tei tae mai i teie putuputuraa i teie matahiti. I te matahiti i mairi aˈenei, e 6 000 ïa ratou. Ua vaiiho noa te mau mutoi haapao i te otia rusia i te mau pereoo faauta taata atoa ia haere e aita ratou i tiai e rave rahi kilometera te atearaa. Ua haere mai te mau tia no te mau vahi atoa o te Fenua Rusia: no ǒ mai ia Vladivostok, Khabarovsk, Vorkouta. Ua tere vetahi e maha aore ra e pae mahana na nia i te pereoo auahi.”
Te faahiti ra teie vea i te mau parau a Ivan Grevniak: “Ua ite au i te parau-tia ore i roto i te huru raveraa a te mau pâpa e te mau perepitero, e ua imi au i te parau-tia.” Te na ô faahou ra teie vea e: “Ua ite atura oia e te faaohipa ra te mau Ite no Iehova i ta ratou e parau ra.” Te na ô ra o Ivan e: “Te haamauruuru nei au i te Atua i to ˈna vaiihoraa mai ia ˈu ia ite i te parau mau.”
Te faataa ra te Trybuna e e matahiapo o Ivan i roto te hoê amuiraa no Lvov, oire i reira “ua hau atu i te 2 000 [Ite] i roto e 13 amuiraa. (...) ‘I roto i teie tuhaa o te fenua, te vai ra te manaˈo here aiˈa i roto i te tahi atu mau pǔpǔ faaroo, aita râ teie manaˈo e vai ra i rotopu i to ˈu mau hoa haapaoraa’, o ta Ivan Grevniak ïa e parau ra”.
Ua ite-maitai-hia teie autahoêraa i roto i te tairururaa a te mau Ite no Iehova i Varsovie, i reira ua vauvauhia te porotarama i te hoê â taime na roto i te reo polonia e te reo rusia i roto i te mau vahi taa ê o te tahua taaro. Aita roa ˈtu te tahi feiiraa i te pae no te nunaa i tupu.
Ua maere roa atoa o Zofia Uszynska i te faanahonahoraa i ravehia i te pae no te faaearaa, te maa e oia atoa te rapaauraa i na hau atu i te 35 000 taata. Teie ta ˈna parau faaotiraa: “Aitâ vau i haere aˈenei i te hoê putuputuraa huiraatira mai teie te au e te auhoa.”
Teie te parau a te vea tamahana polonia Sztandar Młodych (Mau faufaa a te ui apî) no nia i te ohipa i ravehia ia nahonaho maitai te vahi taaro no te farii i teie rahiraa taata: “I roto i te mau tauturu i horoahia e te oire, (...) ua tataˈi te mau tavini a Iehova i te mau parahiraa, ua faanaho faahou i te mau eˈa na raro i te fenua e te mau vahi haumitiraa, e ua tamâ i te mahora. Na ratou iho i aufau i te mau haamâuˈaraa o te tairururaa. Ua faaineine te mau Ite no Iehova i te vahi faaearaa no te mau 22 000 ratere i roto i te fare o te taata e ua haapao atoa ratou i te nohoraa no te mau ratere rusia. Hau atu, ua fanaˈo atoa ratou i ta ratou iho pu rapaauraa.”
Oia mau, te fanaˈo nei te mau Ite no Iehova i te mau “mahana maitai aˈe” i teie nei iho â i Europa Hitia o te râ. Te pure nei ratou ia faatiamâ-atoa-hia ta ratou ohipa, i tiamâ ê na i Hongrie, Polonia e Roumanie, i Albanie, Bulgarie, Tchécoslovaquie e i te Fenua Rusia. — Tesalonia 2, 3:1; Timoteo 1, 2:1, 2.
[Hohoˈa i te api 19]
Te mau Ite rusia i te tairururaa “Te reo viivii ore” i Varsovie: te feia bapetizo (i nia nei e i nia i te hohoˈa nainai), te hoê taata orero rusia, te porotarama, te mau tia rusia i mua i ta ratou pereoo uta taata.