Eaha te poroi ta ratou e faaroo ra?
Te hinaaro nei outou e ora i roto i teihea huru ao? Eaha te huru oraraa o ta outou e hinaaro ra e horoa na ta outou mau tamarii? Ahiri e e nehenehe ta outou e vai oraora maitai noa e eita outou e pohe faahou, e maiti anei outou i te reira?
Nafea outou ia pahono i teie mau uiraa? E hinaaro iho â te rahiraa o te taata, ma te ore e hiˈo i ta ratou haapaoraa aore ra to ratou tiaraa politita, e ora i roto i te hoê ao î i te hau e te ruperupe. E farii popou ratou i te hoê ao i reira e tupu ai te parau-tia e te au-maite-raa e eita roa ˈtu e ohipa tano ore; eita atoa e itehia te hoê ture no te feia moni e te tahi atu ture taa ê no te feia veve.
E no ta outou mau tamarii, eita e ore e te hinaaro ra outou e ia fanaˈo ratou i te maa navai maitai, te hoê fare au mau e te hoê haapiiraa maitatai. Oia hoi, te hinaaro nei outou e haamau i te hoê oraraa papu no a muri aˈe no outou iho e no ta outou mau tamarii. E mai te peu e e nehenehe ta outou e maiti, e farii iho â ïa outou i te oraora-maitai-raa e te ora-maoro-raa no te faatupu i to outou mau hinaaro atoa e ta outou mau titauraa atoa, e oia atoa te fanaˈoraa i te ora mure ore i nia i te fenua nei tei riro ei paradaiso hau mau.
E ere teie i te hoê moemoeâ o te ore roa ˈtu e tupu. O te poroi râ a te Bibilia ta te mau Ite no Iehova e poro nei na te ao atoa nei, e tae noa ˈtu i roto i te mau fenua no Europa Hitia o te râ.
Te tiaturiraa papu a te Bibilia no a muri aˈe
Ua faaite atea mai te mau parau tohu haavare ore a te Bibilia i papaihia e rave rahi mau senekele na mua ˈtu, i te mau ohipa e tupu i roto i to tatou senekele e XX, oia hoi ‘te mau tamaˈi e te mau aueue roo tamaˈi’; te mau ‘aueueraa fenua e te mau oˈe i tera vahi, i tera vahi’; te ‘tarapaperaa o te aau taata i te mǎtaˈu, e te manaˈoraa i taua mau mea e fatata i te tupu i te ao nei’; te ‘vavahiraa e te haaviiviiraa i te fenua’. — Luka 21:10-33; Apokalupo 11:18.
Inaha, ua riro teie mau ohipa e e rave rahi atu â, ei tapao papu e ua fatata roa mai te ao apî i tǎpǔhia mai e te Atua. Te titauhia ra “te raˈi apî e te fenua apî”, oia hoi te hoê faatereraa i te raˈi ra i nia i teie nei ao, e te hoê totaiete taata i tauihia i nia i te fenua nei ‘i reira te parau-tia e vai mau ai’. O te hoê ïa ao apî i reira ‘e ore roa te mauiui, te pohe e te oto’. — Isaia 65:17-25; Petero 2, 3:13; Apokalupo 21:1-4.
Oia mau, aita hoê faanahoraa politita, noa ˈtu te aau tae e te haapao maitai o te feia faatere, e nehenehe e faatupu i teie huru tabula ohipa. O te Arii mana hope o te ao nei anaˈe, te Atua ra o Iehova, tei ia ˈna ra te hinaaro e te mana no te faatupu i te reira. No teie tumu ta ˈna Tamaiti, o Iesu Mesia, i haapii ai i ta ˈna mau pǐpǐ ia pure e: ‘E to matou Metua i te raˈi ra, ia raa to oe iˈoa. Ia tae mai to oe ra basileia. Ia haapaohia to oe hinaaro i te fenua nei, mai tei te raˈi atoa na.’ — Mataio 6:9, 10.
Te hinaaro nei te Atua e ia riro te fenua mai te hoê taiamani anaana i roto i te ao atoa nei, e orahia e te utuafare fetii taata nei tei î i te here e te hau. Fatata roa te Atua i te rave i te tahi ohipa no te faatupu i ta ˈna opuaraa. E tamâ oia i te fenua ma te faaore roa i te mau haaviiviira atoa e te feia e haaviivii ra ia ˈna. E faaore-roa-hia te mau huru haaviiviiraa atoa, to te tino e to te pae morare, mai nia mai i te fenua nei. O vai te ora mai? Te na ô ra o Iesu e: “E ao to tei mǎrû; e riro hoi ia ratou te fenua.” — Mataio 5:5; Apokalupo 16:14-16.
Te hinaaro ra anei outou e ô atoa i roto i teie feia mǎrû o te fanaˈo i te haamaitairaa a te Atua? Mai te peu e e, a imi i te mau Ite no Iehova no to outou vahi e a ani atu i te hoê haapiiraa tamoni ore no nia i te Bibilia i to outou fare, ma te faahepo-ore-hia. A hiˈopoa outou iho eaha mau na te “hinaaro tia o te Atua ra, e te au, e te maitai hoi”. E i muri iho, a rave i teie hinaaro. — Roma 12:2.