Mea nafea to outou huru hiˈoraa i te feia e ere hoê â huru iri e to outou?

“Ua riro te mau skinheads [upoo pahure] no Marite, e oia atoa te mau skinheads itoito mau no Europa, ei ui apî no te nunaa taata teitei roa ˈˈe o te pǔpǔ feia rave ohipa.

Te aro nei matou i te feia ino roa o te pǔpǔ ona e te pǔpǔ turu i te amui-tahi-raa o te faaino nei i te nunaa taata teitei. (...) O te mau ati Iuda, teie mau manumanu ino, te tumu matamua o teie ati.”

NA te mau skinheads no Chicago i nenei i teie parau i reira te papairaahia teie poroi. Ua hahu teie mau taurearea i to ratou upoo, te oomo nei ratou i te ahu motumotu i nanaˈohia e te mau satauro ofatifati, te faateitei nei ratou i te haavîraa uˈana, te faaroo nei ratou i te upaupa ‘a te mana uouo’ e te hiˈo ino nei ratou i te mau ati Iuda, te feia Ereere e te tahi atu mau pǔpǔ taata haihai.

I mua i te hoê nahoa o te mau tia uouo au ore i te feia ěê, ua faaite te hoê raatira o te hoê pǔpǔ mairihia i te iˈoa “Haavîraa uˈana no te here” e “te turu nei” to ˈna pǔpǔ “i te manaˈo no te tamaˈi”, e te na ô ra oia e: “E taata haavî au. Te here nei au i te nunaa taata uouo e, ia here anaˈe oe i te tahi mea, e riro ïa oe ei taata taehae roa.”

Parau mau, mea iti roa te mau skinheads, e mea etaeta roa to ratou manaˈo. Parau mau, mea iti roa te feia e faaite tahaa nei i teie huru manaˈo etaeta e teie huru riri rahi. Teie râ, e rave rahi mau taata teie e faatupu nei i roto ia ratou iho i te feiiraa e te hiˈo-ino-raa i te feia no roto i te tahi atu nunaa taata. Na roto i te ao atoa nei, te faataahia ra te huru o te taata ia au i te hohoˈa o to ratou mata aore ra te peni o to ratou iri. Teie râ, mea papu mau anei teie mau tapao? Te vai ra anei te mau taa-ê-raa tei faataa-ê-na-hia i te pae no te maramarama aore ra te huru o te taata i rotopu i te mau nunaa taata? Hou tatou e pahono ai i teie mau uiraa, e tia na mua ia hiˈopoa e mea nafea te mau manaˈo taa ê no nia i te mau nunaa taata i te tupuraa mai i roto i te roaraa o te tau.