Tuhaa 5
Te ô faahiahia mau o te tiamâraa ia maiti
1, 2. Eaha te ô faahiahia roa e vai ra i roto ia tatou nei?
NO TE TAA e no te aha te Atua i faatia noa ˈi i te mauiui e eaha ta ˈna e rave no te arai i te reira, e tia ia tatou ia ite papu e mea nafea to ˈna hamaniraa ia tatou. Aita oia i poiete ia tatou ma te horoa noa mai i te hoê tino e te hoê roro. Ua poiete atoa râ oia ia tatou maoti te tahi mau huru taa ê roa i te pae no te feruriraa e i te pae no te mau manaˈo putapû.
2 Te hoê tuhaa faufaa roa o to tatou huru hamaniraa i te pae no te feruriraa e i te pae no te mau manaˈo putapû, o te tiamâraa ïa ia maiti. Oia mau, ua tuu mai te Atua i roto ia tatou nei i te ravea no te maiti ma te tiamâ. Ua riro mau â te reira ei ô faahiahia no ǒ mai ia ˈna ra.
To tatou huru hamaniraa
3-5. No te aha tatou e haafaufaa ˈi i te tiamâraa ia maiti?
3 E hiˈo anaˈe na i te taairaa e vai ra i rotopu i te tiamâraa ia maiti e to te Atua faatia-noa-raa i te mauiui. A tahi, a feruri na i teie mau uiraa: Te haafaufaa ra anei outou i te tiamâraa ia maiti i te mea o ta outou e rave e e parau, ta outou e amu e e omono, te ohipa o ta outou e rave, i te vahi e te huru o to outou oraraa? Aore ra te hinaaro ra anei outou e na te tahi atu taata e faahepo mai ia outou i te mau parau e te mau ohipa tataitahi i te mau taime atoa o to outou oraraa?
4 Aita te taata e hinaaro ra e ia arataihia to ˈna oraraa taatoa. No te aha hoi? No te mea mai te reira to te Atua hamaniraa ia tatou. Te faaite maira te Bibilia e ua poiete te Atua i te taata ia au i ‘to ˈna hohoˈa e to ˈna ra huru,’ e hoê o te mau aravihi e vai ra i te Atua ra, o te tiamâraa ïa ia maiti. (Genese 1:26; Deuteronomi 7:6) I to ˈna poieteraa i te taata, ua horoa atoa ˈtu oia i teie aravihi faahiahia mau—te ô o te tiamâraa ia maiti. Tera te hoê tumu tatou e au ore ai ia faatîtîhia tatou e te mau faatere haavî.
5 E ere ïa te titauraa i te tiamâraa i te tahi ohipa tumu ore, inaha, ua riro te Atua ei Atua no te tiamâraa. Te na ô ra te Bibilia e: ‘Te vahi tei reira te varua o Iehova, tei reira ïa te tiamâraa.’ (Korinetia 2, 3:17) Ua horoa mai ïa te Atua i te tiamâraa ia maiti ei tuhaa no to tatou huru hamaniraa. I te mea e ua ite oia i te huru ohiparaa o to tatou feruriraa e to tatou mau manaˈo putapû, ua ite oia e e rahi atu tatou i te oaoa maoti te tiamâraa ia maiti.
6. Mea nafea to te Atua poieteraa i to tatou roro ia ohipa oia ia au maite e te tiamâraa ia maiti?
6 Apitihia mai i te ô o te tiamâraa ia maiti, ua horoa atoa mai te Atua i te aravihi no te feruri, no te faito i te mau ohipa, no te rave i te mau faaotiraa, e no te faataa i te maitai e te ino. (Hebera 5:14) No reira, ua niuhia te tiamâraa ia maiti i nia i te hoê maitiraa maramarama. Aita tatou i hamanihia mai te mau taata matini aore to ratou e feruriraa, eita hoi ta ratou e nehenehe e rave i ta ratou iho mau faaotiraa. Aita atoa hoi tatou i poietehia no te pee noa ˈtu i te tahi ture faataa-ê-na-hia i roto ia tatou mai te mau animala ra te huru. Area ra, ua hamanihia to tatou roro faahiahia mau no te ohipa ia au maite i to tatou tiamâraa ia maiti.
Mea maitai roa te omuaraa
7, 8. Eaha te omuaraa maitai roa ta te Atua i horoa ˈtu na to tatou nau metua matamua?
7 No te haapapu i te huru aupuru o te Atua, taa ê atu i te ô no te tiamâraa ia maiti, ua fanaˈo atoa to tatou nau metua matamua, o Adamu raua o Eva, i te mau mea maitatai atoa o ta raua e hinaaro. Ua tuuhia ˈtu raua i roto i te hoê paradaiso rahi e te unauna. Ua pue noa te mau mea i te pae tino o ta raua e titau ra. Ua fanaˈo raua i te hoê feruriraa e te hoê tino tia roa, e eita hoi raua e roohia i te ruhiruhia, i te maˈi aore ra i te pohe—e nehenehe hoi raua e ora e a muri noa ˈtu. E fanau mai raua i te mau tamarii tia roa o te nehenehe atoa e fanaˈo i te hoê oraraa oaoa e te mure ore. E e rave te huitaata o te haere noa ˈtu i te rahi i te hoê ohipa oaoa oia hoi te faariroraa i te fenua taatoa ei paradaiso.—Genese 1:26-30; 2:15.
8 No nia i te mea i pûpûhia ˈtu na raua, te faataa ra te Bibilia e: “Hiˈo aˈera te Atua i te mau mea atoa ta ˈna i hamani, e inaha, e mea maitai roa.” (Genese 1:31) Te faaite atoa ra te Bibilia no nia i te Atua e: “O tei tia roa ta ˈna ohipa ra.” (Deuteronomi 32:4) Oia mau, ua horoa te Poiete i te hoê omuaraa tia roa no te fetii taata nei. Aita ˈtu hoi omuaraa maitai aˈe. Ua riro mau â oia ei Atua poihere i te taata!
Te hoê tiamâraa tei taotiahia
9, 10. No te aha e tia ˈi ia taotiahia te tiamâraa ia maiti?
9 Teie râ, ua opua anei te Atua e horoa i te hoê tiamâraa no te maiti taotia-ore-hia? A feruri na ahiri e, i roto i te hoê oire rahi, aita roa ˈtu e ture purumu, e e nehenehe te mau taata e faahoro na te mau aveia atoa noa ˈtu eaha te puai o te tere. E hinaaro anei outou e faahoro i te pereoo ahiri e mai te reira te huru? Eita, no te mea e huanane ïa te noaa mai e e û noa ïa te pereoo.
10 Hoê â huru no te ô a te Atua no te tiamâraa ia maiti. Ahiri e aita te tiamâraa i taotiahia, e tupu ïa te huanane i roto i te totaiete taata. E tia ia haamau i te mau ture no te aratai i te mau ohipa a te taata. Te na ô ra te Parau a te Atua e: “E feia tiamâ outou, eiaha râ taua tiamâ no outou ra e faarirohia ei tapoˈi [i te ino].” (Petero 1, 2:16) Te hinaaro nei te Atua e ia taotiahia te tiamâraa ia maiti no te maitai o te taatoaraa. Ua opua oia e ia fanaˈo tatou, eiaha i te hoê tiamâraa otia ore, i te hoê râ tiamâraa taotiahia, o te auraro i te mau ture.
Tavai ïa mau ture?
11. Ua hamanihia tatou no te auraro i tavai mau ture?
11 Ua hamanihia tatou no te auraro i tavai mau ture? Te faataa ra te tahi atu tuhaa o te irava a te Petero 1, 2:16 e: “Ei tavini râ outou no te Atua [aita ˈtu].” E ere râ i te faatîtîraa teimaha, teie râ te auraa e ua hamanihia tatou no te oaoa i te auraroraa ˈtu i te mau ture a te Atua. (Mataio 22:35-40) Te horoa maira ta ˈna mau ture, hau atu i te mau ture a te taata, i te aratairaa faahiahia roa ˈˈe. “O vau to Atua ra, o Iehova; o tei faaite ia oe i te mea e maitai ai oe ra; o tei aratai ia oe na te eˈatia maitai ia haere oe ra.”—Isaia 48:17.
12. Eaha te tiamâraa no te maitiraa o ta tatou e fanaˈo ra i roto i te mau otia a te mau ture a te Atua?
12 I te hoê â taime, te horoa maira te mau ture a te Atua i te hoê tiamâraa rahi no te maiti i roto iho i ta ratou mau otia. Ua faatupu te reira i te mau huru taa ê e te faahiahia roa o te fetii taata nei. A feruri na i te mau hohoˈa huru rau i te pae no te maa, te ahu, te upaupa, te mau peu aravihi, e te mau fare na te ao atoa nei. Mea au aˈe na tatou e na tatou iho e maiti i roto i teie mau tuhaa maoti hoi e na te tahi atu taata e faaoti no tatou.
13. Eaha te mau ture i te pae tino te tia ia tatou ia auraro no to tatou iho maitai?
13 No reira, ua poietehia tatou ia hau atu tatou i te oaoa mai te peu e e auraro tatou i te mau ture a te Atua no nia i te haerea o te taata. E nehenehe te reira e faaauhia i te auraroraa i te mau ture a te Atua i te pae tino. Ei hiˈoraa, mai te peu e eita tatou e haapao i te ture o te umeraa taoˈa e e ouˈa mai tatou na nia mai i te hoê vahi teitei, e pepe iho â ïa tatou aore ra e pohe tatou. Mai te peu e eita tatou e tâuˈa i te mau ture e faatere ra i to tatou tino e eita tatou e amu faahou i te maa, e inu i te pape, aore ra e huti i te aho, e pohe ïa tatou.
14. Nafea tatou e ite ai e aita te mau taata i poietehia no te faataa ê mai ia ratou i te Atua?
14 Ua poietehia tatou ma te titauraa e auraro atu i te mau ture a te Atua i te pae tino, oia atoa, ua poietehia tatou ma te titauraa e auraro i te mau ture a te Atua i te pae morare e i te pae no te oraraa taata. (Mataio 4:4) Aita te mau taata i poietehia no te manuïa ma te faataa ê mai ia ratou i to ratou Poiete. Te na ô ra te peropheta Ieremia e: “E ere hoi tei taua taata e haere ra i te haapao i to ˈna taahiraa. E aˈo mai oe ia ˈu, e Iehova.” (Ieremia 10:23, 24) Ia hiˈohia te mau tuhaa atoa, ua poietehia te mau taata no te ora ma te auraro i te faatereraa a te Atua, eiaha râ na nia i to ratou iho manaˈo.
15. E riro anei te mau ture a te Atua ei hopoia teimaha no Adamu raua o Eva?
15 E ere te auraroraa i te mau ture a te Atua i te hopoia teimaha roa no to tatou na metua matamua. Area ra, e faatupu te reira i to raua maitairaa e to te taatoaraa o te fetii taata nei. Ahiri e ua faaea noa te tane e te vahine matamua i roto i te mau otia a te mau ture a te Atua, e tere maitai ïa te mau ohipa. Inaha, te ora ra ïa tatou i teie nei i roto i te hoê paradaiso unauna e te au maitai ei utuafare fetii here e te autahoê! Aita ïa te ino, te mauiui e te pohe.
[Hohoˈa i te api 11]
Ua horoa mai te Poiete i te hoê omuaraa tia roa na te taata
[Hohoˈa i te api 12]
E hinaaro anei outou e faahoro i nia i te hoê purumu tei apǐ roa i te pereoo ahiri e aita e ture purumu?