Te hoê rata haamauruururaa

TE NENEI NEI e te opere nei te mau Ite no Iehova i te mau ahuru mirioni rahiraa Bibilia e te mau buka tauturu bibilia i te mau matahiti atoa. Aita i maoro aˈenei, ua tae mai ta te hoê vahine haapii i te Bibilia e ora ra i te fenua Texas i te tahi rata haamauruururaa na ta ˈna tamaiti fetii e 20 matahiti no teie mau buka o ta ˈna i hapono atu. Teie te tahi mau parau a teie taurearea:

“E to ˈu metua vahine fetii Irene, e outou paatoa e,

“(...) Hora 1 i te poipoi i teie nei, e aita paha vau e haamaoro roa i te papai i ta ˈu rata, tera râ, e tamata vau i te faaite atu i to ˈu nei manaˈo o ta ˈu e nehenehe e faataa poto noa na roto i te parau ra mauruuru roa.

“Mea faahiahia mau â te mau buka o ta oe i hapono mai! Aita roa ˈtu vau i manaˈo noa ˈˈe e e mau buka faufaa roa teie. Te horoa nei ratou i te tahi nota taa ê i te mau mea atoa, teie mea iti haihai ra e faariro nei i teie mau buka ei mea anaanatae roa e te tia mau â ia taiohia.

“Mea anaanatae mau â te buka ra Te ora (...) Mea tupu noa mai aore ra mea poietehia?. E tia mau â ia haapopou i te feia i papai i teie nei buka. Mea papu maitai te mau tatararaa, mea afaro maitai e ua au maite i te feruriraa. Teie ta ˈu pereota faahiahia roa ˈˈe: ‘E nehenehe te manaˈo ra e ua fa taue noa mai te ora e faaauhia i te manaˈo ra e e noaa mai te hoê titionare taatoa i muri aˈe i te paainaraa te hoê fare neneiraa.’ Auê ïa patoiraa faahiahia e!

“Ua papai-maitai-atoa-hia te buka ra E nehenehe oe e ora e a muri noa ˈtu i roto i te paradaiso i nia i te fenua nei. Te faahiti faahou ra oia i te mau parau o ta ˈu i taio ê na, tera râ, ua faataahia na roto i te hoê huru papairaa e te manaˈo papu faahiahia roa ˈˈe. Aitâ i hope atura ia ˈu i te taio.

“Ua imi noa na vau i te hoê titionare mai te buka Haaferuriraa ia au i te mau Papai. Te faataa nei oia i te mau haaferuriraa tano roa no nia i te mau haapiiraa tumu aitâ i matara maitai ia ˈu e tae roa mai i teie taime. Te faaite atoa ra oia i te manaˈo o te Bibilia no nia i te mau tumu parau no teie nei tau. Auê teie buka i te mea faahiahia e! E tia mau â ia taio ia ˈna. Mauruuru faahou â.

“Ua tauturu te buka ra Te uiui nei te mau taurearea — Mau pahonoraa ohie ia ˈu nei i teie mahana. Ua faaohipa vau ia ˈna no te horoa i te tahi aˈoraa na to ˈu hoa e farerei nei i te tahi mau fifi e te taurearea o ta ˈna e haamatau ra. Ua papu roa to ˈna manaˈo na roto i te mau pahonoraa tano roa no roto mai i taua buka nei. Te tauturu atoa nei teie buka ia ˈu nei, no te mea maoti oia e nehenehe au e taa i to ˈu nei huru. Mauruuru.

“I te pae hopea, e tera paha te mea faufaa roa ˈˈe, te vai ra te Tatararaa a te ao apî. Mea ohie roa ˈˈe hoi ia taa i ta ˈu tatararaa o te Bibilia a te arii Jacques, e no reira, e faaohipa hau atu â vau i taua tatararaa ra. (...) Ia haamaitai te Atua ia oe no teie mau ǒ faufaa mau ra! (...)

“Ahiri e aita taua mau buka nei, e tamau noa paha ïa vau i te oto, tera râ, i teie nei, te vai ra ia ˈu nei te mau ravea atoa no te faaruru i te huru tupuraa; eita hoi ta ˈu e nehenehe e faahoˈi atu ia oe i roto i teie tuhaa. E nehenehe o Iesu e oaoa roa ia oe, e te oaoa atoa nei au.

“Ua rau te huru o te mau mea o ta ˈu i haapii i roto i te hoê area taime poto roa! Auê te anaanatae e. Aita vau i manaˈo aˈenei e e buka anaanatae mau te Bibilia e e horoa atoa oia i te itoito. I teie nei, te vai nei ia ˈu nei te mau tumu papu no te tiamâ oioi noa i te mau herepata a Satani, e te hinaaro nei au e faaite atoa i teie mau tumu i te ao nei. Mauruuru!

“Te aroha ˈtu nei au i te mau fetii. (...)

“Te pure nei au no outou paatoa.

Mauruuru roa,

Michael”