Te papai mai nei te feia taio

Dinosaures Ua huti roa te numera o te 8 no febuare 1990 no nia i te mau dinosaures i to ˈu manaˈo. Mea maramarama maitai teie mau tumu parau, o tei faataa mai i te mau manaˈo papu, e taa-maitai-hia e te feia aravihi e tae noa ˈtu e te feia tei ore i ite i teie tuhaa, inaha, e mau tumu parau anaanatae mau teie. Ua manaˈo noa na hoi au e ua ite maitai au i te tumu parau o te mau dinosaures, tera râ, te ite nei au i teie nei e mea papu ore roa to ˈu ite.

U. A., Repubilita tooa o te râ no Helemani

Ua uiui noa na vau e eaha râ tei roohia i te mau dinosaures. Tei roto au i te piha haapiiraa hopea o te fare haapiiraa tuarua, tera râ, aitâ vau i ite atura i te hoê faataaraa maramarama e te papu mai teie te huru.

S. S., Fenua Marite

E maha matahiti anaˈe to ta ˈu tamaiti, tera râ, mea anaanatae roa na ˈna teie mau dinosaures rarahi, e ua au roa oia i te mau hohoˈa. Ua haamata vau i te haapii i te Bibilia i te avae novema i mairi aˈenei e, mai taua tau mai â, mea au roa na ˈu ta outou mau tumu parau faahiahia roa. Auê hoi e, te tatarahapa nei au i te mea e aita vau i fanaˈo i te mau numera na mua ˈtu.

M. G., Mexique

O Ronald to ˈu iˈoa. Ahuru matahiti to ˈu. Mea anaanatae roa na ˈu te mau dinosaures, e te tiai noa ra vau e ia papai outou i te hoê tumu parau no nia i teie mau animala. Auê, ua tae mai oia (8 no febuare 1990) e te hinaaro nei au e parau e mauruuru roa.

R. M., Auteteria

Te haere nei au i te fare haapiiraa tuatoru. E piti mahana hou teie numera i tae mai ai, ua hinaaro vau e papai ia outou no te ite i te tiaraa o te mau Ite no Iehova no nia i te matahiti o te fenua. Ua noaa mai te pahonoraa i ta ˈu mau uiraa, e te opua nei au e faaite i teie mau haamaramaramaraa faahiahia roa i ta ˈu orometua haapii.

M. H., Fenua Marite

Bapetizoraa Mauruuru roa i to outou neneiraa i te tumu parau ra “Te uiui nei te mau taurearea... E tia anei ia ˈu ia bapetizo?”. (08 no mati 1990.) Ua putapû roa vau na roto i te hiˈoraa o Suzanne, tei faatiahia i te omuaraa o te tumu parau. Tei roto vau i te piha haapiiraa faito 6 i to ˈu pûpûraa ia ˈu no Iehova, e ua tauturu mau â te reira ia ˈu ia tapea i te hoê faaroo paari maitai. Auê te faahiahia e ahiri e e nehenehe ta te mau taurearea kerisetiano atoa e faaite i te hoê â paieti e te eunuka etiopia e e ani atoa e: “Eaha te mea e ore e tia ˈi ia bapetizo ia ˈu?” — Ohipa 8:36.

M. A., Tapone

Te mahanahana nei te fenua 15 matahiti to ˈu, e te haere nei au i te fare haapiiraa tuarua, e te hinaaro nei au e haamauruuru ia outou no te mau tumu parau no te 8 no setepa o tei tuatapapa i te parau no te tuhaa ozone e te mahanahanaraa o te fenua. Ua faaohipa vau i teie mau tumu parau no te hoê tatararaa no nia i te parururaa i te vahi nohoraa e ua noaa mai ta ˈu nota maitatai roa.

J. B., Auteralia