Te hoê ata i nia i e avae
TEI te fenua Beresilia tatou, i te hoê po haumǎrû o te tau toetoe i te afaraa o te avae atete. Mea maramarama maitai te raˈi e e atiraa avae. Ua haere te taata i rapaeau i nia i te taupee, area vetahi ra, ua haaputuputu ïa i te pae purumu, ma te hiˈo na roto i te pata hohoˈa i nia i te avae aore ra ma te faatano i ta ratou hiˈo fenua. Te faaroohia ra te omuhumuhu o te feia e paraparau ra i roto i te poiri, e faaite ra i te hoê â tiairaa ma te hau.
No te aha teie arepurepuraa? I teie mahana 16 no atete 1989, e 21 minuti mairi i te hora 10, e tupu te hoê poiriraa avae taatoa. I te mataeinaa, no te viivii ore o te mataˈi, e itehia ïa te hoê hohoˈa faahiahia mau. I te taime iho â i faataahia, ua haamata ihora te avae i te ô atu i roto i te ata menemene o te fenua. I te senekele IV hou to tatou nei tau, i to te philosopho heleni Aristote hiˈoraa i teie ata menemene, ua taa ˈtura ia ˈna e mea menemene te fenua.
A tamau noa ˈi te avae i te haere atu i roto i te vahi poiri, ua faahiti aˈera te mau taata mataitai i te mau parau faahiahia. Inaha, te ahu ra te avae i te peni anani. Mai te ohipa e tupu i roto i te hoê toparaa mahana unauna mau, e faatioi te reva mataˈi o te fenua i te mau hihi o te mahana, ma te rave atoa mai i te mau hihi ninamu e ma te vaiiho i te mau hihi uteute e anani. E 97 minuti i muri iho, ua topa roa te avae i roto i te poiri. I muri aˈe i te tahi maa taime iti, ua haamata ˈtura oia i te faura mai i rapae no te hoˈi faahou mai i roto i te maramarama o te mahana.
E ara vetahi mau taata mataitai e tae noa ˈtu i te hora 2 i te poipoi no te hiˈo i teie hohoˈa mai te omuaraa e tae roa ˈtu i te hopea. Te manaˈo nei hoi ratou e eita to ratou taime e mâuˈa. Inaha, ua ite roa ratou i te haapapuraa faahiahia mau o te puai e te paari o te Poiete o te ao taatoa nei, ta te Bibilia e faataa ra e ua hamani oia ‘i na tiarama rarahi e piti ra, o te tiarama rahi ra, ei haapaoraa ïa no te ao, e te tiarama iti, ei haapaoraa ïa no te rui’, “ei tapao ïa, e ei faaite no te mau tau, e no te mau mahana, e no te mau matahiti”. — Genese 1:14, 16.