Te crack—Taoˈa hamani ino

E TAOˈA puai roa oia no roto mai i te cocaïne, e raau taero e faatîtî roa i te taata, inaha, ua mairihia oia i te iˈoa ra crack no te mea e paapaaina oia ia hamanihia oia aore ra ia puhipuhihia oia. Ia au i te hoê taata tuatapapa i te parau no te mau faahopearaa o te mau raau taero i nia i te feruriraa o te taata, “aita ˈtu e raau taero matauhia o te faatupu i te hoê faatîtîraa puai roa mai teie te huru, o te tupu oioi atoa hoi”. Ua faataa te hoê raatira mutoi ia ˈna mai “te raau taero ino roa ˈˈe”, ma te parau atoa e “aita e taata e tuea i te hoê taata rave i te crack”.

Taa ê atu i te tahi atu mau raau taero, e patiahia na roto i te uaua aore ra e ravehia na roto i te ihu, e puhipuhihia te crack. Te manaˈo nei te feia e faataero nei ia ratou o te mǎtaˈu nei e ia roohia ratou i te SIDA na roto i te mau patia viivii, e e toru “vahi maitai” to te puhipuhiraa i teie taoˈa: mea “papu” aˈe, mea puai aˈe to ˈna mau faahopearaa e mea oioi roa to ˈna auauahi i te ohipa. Te faatia ra te hoê taata e faataero na ia ˈna e: “E tere oioi noa te raau i roto i to oe upoo. E ite oe i to ˈna navenave i tera iho â taime. Mai te mea ra e e paaina te niaraa o to oe upoo.” I roto i te rahiraa o te taime, i muri noa ˈˈe i te taime navenave, i roto noa i te area e 5 e tae atu i te 12 minuti, e tupu te hoê taime hepoheporaa riaria mau o te faairia roa i te taata e rave i te crack, o te haaparuparu i to ˈna feruriraa, e faatupu i te riri aore ra te manaˈo ahoaho e te hinaaro uˈana e faataero faahou ia ˈna. Te faataa ra te taote Arnold Washton, faatere no te pu rapaauraa i te feia faataero ia ratou o te hoê fare maˈi no New York, e: “Te vahi ino roa ˈˈe o te crack, oia hoi e nehenehe ta ˈna e faatîtî i to outou roro — e to outou oraraa — i roto noa i te tahi tau mahana aore ra tau hebedoma.”

Te parare nei te raveraa i te crack mai te repo puehu ra na te ao atoa nei. I Kanada, i te fenua Beretane e i roto i te tahi atu mau fenua no Europa, e hau atu â i te Fenua Marite, ua faataero roa teie raau taero fatata i te mau pǔpǔ taata atoa o te totaiete; te roohia nei te feia moni, te feia veve, te feia manuïa i te pae no te tapihooraa tauihaa, te mau rave ohipa aufau-maitai-roa-hia ˈˈe, i teie ati. E toru tumu e faataa ra i teie ohipa e no reira atoa te titauraa e rahi noa ˈi: to ˈna hamaniraa rahi, te ohieraa ia noaa mai teie raau, e oia atoa to ˈna mau faahopearaa navenave. E noaa mai te mau taata hoo apî, te feia e faataero atu ia ratou, na nia i te purumu, i te fare haapiiraa aore ra i te vahi raveraa ohipa. Te faahema-atoa-hia nei te mau vahine e, i roto i te tahi mau tuhaa o te totaiete, mea rahi aˈe ratou i te mau tane. Ua riro te mau taurearea apî roa e maimi ra i te mau mea e faatupu i te mau manaˈo puai e aita hoi ratou i ite i te patoi i te raau taero, ei feia e topa ohie noa i roto i te marei a te feia hoo i te crack, peneiaˈe paha to ratou iho mau taeae, te mau melo o to ratou utuafare aore ra to ratou hoa piri roa.

Te faatîtîraa e te haavîraa uˈana

“Mea iti roa te mau taoˈa o te nehenehe e faatupu i teie huru haavîraa uˈana taehae mau i nia i te taata puhipuhi mai te crack ra te huru, o ta te Wall Street Journal no te 1 no atete 1989 ïa e faaite ra. Aita i maoro aˈenei, i roto i te hoê tuhaa oire no Boston, ua taora puai roa te hoê metua vahine apî e hiaai ra i te crack i to ˈna aiû iti i nia i te papai e ua fati roa ˈtura to ˈna aˈi.” No roto mai hoi teie vahine i “te hoê utuafare fetii faaturahia o te pǔpǔ taata aifaito noa o te totaiete”.

No te mea e faatupu oia i te hoê haerea hamani ino, te tiaturi nei te feia maimi no nia i te huru o te taata e te mau taote tamarii e e tuhaa atoa ta te crack i roto i te maraaraa o te mau hamani-ino-raa e ravehia nei i nia i te mau tamarii. E nehenehe te hoê vahine tei raro aˈe i te mana o te crack e riri taue noa ia taˈi anaˈe ta ˈna aiû. “Mai te peu e mea iria roa te hoê taata aore ra ua hepohepo roa oia no te mea te erehia ra oia i te cocaïne, e ere ïa i te mea maitai ia rave oia i te hoê tamarii, o ta te hoê taata maimi ïa i parau. Mea iti roa hoi te manuïaraa ia haapaohia teie tamarii mai te tia mau â ia haapaohia.”

Teie râ hoi, mea ino roa te mau faahopearaa. Mea pinepine hoi i te taiohia aore ra i te faaroohia e ua taparahi te hoê taurearea rave i te crack i to ˈna mau metua aore ra i to ˈna mau metua tupuna no te mea aita ratou i farii i te horoa i te moni na ˈna no te hoo mai i ta ˈna faito raau taero aore ra ua ite ratou ia ˈna i te puhipuhiraa i te raau taero. Ua faataa te mau mutoi no New York e na te mau taurearea tei ino roa te upoo i te crack i rave e rave rahi mau ohipa taparahi taata ino mau.

Na nia râ i te purumu e itehia ˈi te mau tupuraa hamani ino rahi roa ˈˈe e te ino roa ˈˈe. No te rahi o te feia e hinaaro nei i te crack, ua rahi atoa ïa te moni e faaohipahia ra e no reira, ua ineine roa te feia hoo i te raau taero, i te taparahi i te taata. Ma te mau mauhaa e te mau tauihaa apî roa — pupuhi haapurara, pupuhi tamaˈi, taoˈa maniania ore e te mau pereue paruru i te ofai pupuhi — te hahaere nei ratou na roto i ta ratou tuhaa fenua, ma te auau i te mau taurearea itoito roa e tamata ra i te haru i ta ratou mau taata aore ra o te ore e horoa i te taatoaraa o te moni i noaa mai i te mahana. No te horoa i te hoê hiˈoraa, eita ratou e haamarirau i te faatitiaifaro i ta ratou mau feiiraa na roto i te toto. “E pupuhihia te avae o te hoê tamarii aore ra e patiahia to ˈna rima i te tipi, ei faaararaa ia ˈna no te mea ua tapea oia i te moni aore ra i te raau taero a te taata hoo e faaohipa ra ia ˈna, o ta te taata haapao i te fariiraa taata e afai-ru-hia mai i te fare maˈi ïa e faataa ra. Te hoê ofai pupuhi i roto i te upoo aore ra i nia i te ouma, o te tapao ïa e te hinaaro ra ratou e haapohe ia ˈna.”

Ia au i te hoê taata maimi no nia i te huru o te taata no New York, “mea hairiiri roa ˈtu â te mau ohipa taparahi taata i teie mahana. Eita te taparahiraa i te taata e navai faahou, e tia ia tâpû i te taata. Ua pohe ê na te taata i te pitiraa o te ofai pupuhi, tera râ, e pupuhi-faahou-hia oia e ono taime. E tâpûhia to ˈna upoo aore ra e ravehia teie mau huru raveraa i nia i to ˈna tino”. “Na roto i te mau aroa, te vai ra te hoê mirioni tamarii aita ˈtu ta ratou ohipa maoti râ te taputôraa, o ta te hoê taata i te pae no te ture tei ite maitai i ta ˈna ohipa i parau. Eita ratou e mǎtaˈu i te mutoi, i te fare auri aore ra i te pohe.” Eita atoa hoi ratou e haapao i te huru peapea ore e te oraraa o te feia e haere ra na reira a tupu ai te mau pupuhiraa. Te faaite ra te vea Time e, i roto i te vahi no Los Angeles, te afaraa o na 387 taata i taparahihia e te mau pǔpǔ i roto i te hoê matahiti, e feia ïa e haere noa ra na reira e aita hoi ta ratou e ohipa e taua mau pǔpǔ ra.

Te mau fǐfǐ arapoa piru e te mau pereoo moni roa

Ia hiˈohia te huru hamani ino e haavî ra i te ao o te crack, mea poto roa ïa te oraraa o te feia hoo. Inaha, mea apî roa te feia e pohe nei i roto i taua ao ra. No reira, ua riro te manaˈo ra “a fanaˈo i te oraraa hou oe e pohe ai” ei manaˈo tumu o te mau taata e rave rahi. “A haere na i te mau mahana atoa i te uputa o te mau fare haapiiraa tuarua e e ite atu ïa outou i te mau pereoo Mercedes, Jeep, Cadillac e te Volvo apî roa, o ta te hoê mutoi i te pae no te raau taero no Detroit ïa e parau ra. Na teie mau tamarii e fatu ra i teie mau pereoo, e ere na to ratou mau metua.” Mai te peu e aita i taeahia to ratou matahiti, e rave te mau tamarii i te hoê taata faahoro pereoo. Area te tahi ra, e faahoro noa ïa ratou e aita e parau faatia. E pee hoi teie mau pereoo ia ratou ia aufau. Ia û noa ˈtu ratou, e horo ratou ma te faarue i te pereoo.

“Te haere mai nei te mau tamarii i te fare haapiiraa i te mau mahana atoa e te mau ahu e nehenehe e naeahia e 2 000 dala marite, o ta te hoê vahine orometua haapii ïa e parau ra. Mea rahi roa hoi te tamarii e pereue huruhuru animala to ratou e te mau fǐfǐ arapoa piru.” Ia au i te vea Time no te 9 no me 1988, “mea hinaaro roa na teie mau taurearea no te mau vahi veve i te piru. Mea au roa hoi na ratou i te mau fǐfǐ arapoa piru teiaha roa e 20 000 dala marite”. E moni rahi ta te feia hoo i te raau taero e aufau nei na te mau tamarii e rave ra i te ohipa na ratou. Ei hiˈoraa, e nehenehe ta te mau tamarii e iva aore ra hoê ahuru matahiti e aufauhia 100 dala marite i te mahana ia tiai ratou no te faaara i te feia hoo e te haere maira te mutoi. Te faito i nia ˈtu, oia hoi te taata afai, e nehenehe ta ˈna moni i te mahana e hau atu i te 300 dala marite, ia afai atu oia i te taata hoo i te raau taero i hamanihia i te pu hamaniraa. Inaha, te titau nei te taata tiai e te taata afai i te faito teitei roa — e naea ohie noa hoi ia ratou oia hoi: te tiaraa o te taata hoo. A hiˈo na! Teie te tahi mau taurearea, aita hoi vetahi i haere i te haapiiraa, te noaa nei ta ratou e 3 000 dala marite (hau atu i te 300 000 farane) i te mahana. Mea rahi paha te moni e noaa, tera râ, te oraraa no a muri aˈe, mea papu ore roa ïa.

Mea pinepine te taata hoo i te mau roa i rotopu e piti pae. I te hoê pae, te hoo ra oia i te hoê taoˈa taero taparahi taata o te faaino roa i te oraraa o te feia e rave ra i te reira e o te ueue i te mau huero o te haavîraa uˈana, e mau ati anaˈe hoi o te faaino atoa ia ˈna iho. I te tahi atu pae, te faaitoito nei to ˈna mau metua ia ˈna ia tamau noâ i teie ohipa, no te mea mea pinepine e o ˈna anaˈe te afai maira i te moni i te fare, inaha, te ravehia ra te hoê tuhaa rahi o ta ˈna moni no te faaora i te hoê utuafare veve roa. Te apiti atoa ˈtu nei te mau metua o te ore e hinaaro ra e faatitiaifaro i teie ohipa e mea au aˈe na ratou e tapo i to ratou mata, i roto i teie ohipa ino.

Mea ino roa ˈtu â ia hau atu te hinaaro o te hoê metua vahine no te crack i to ˈna here no ta ˈna mau tamarii, e tae noa ˈtu te aiû i roto i to ˈna opu. A hiˈo na i roto i te tumu parau i muri nei i te mau faainoraa ta te crack e nehenehe e faatupu i nia i te aiû i roto i te opu.

[Tumu parau tarenihia i te api 22]

Te raau taero crack—Mai te mau ofai pupuhi ra

Te tapapa ra te mau mutoi ia ˈna. Te taparahi nei te mau tamarii i to ratou mau metua ia noaa mai te tahi. Te haapohe nei te mau metua tei riro roa to ratou manaˈo ia ˈna i ta ratou mau tamarii. Te vavahi roa nei oia i te oraraa o te mau tamarii e fanauhia. Te faariro nei te hooraa o teie taoˈa i te mau aroa ei vahi aroraa; e hopoi-ê-hia te mau taata i pohe i roto i teie mau taparahiraa taata, ma te ore e hiˈo i te huru o te taata, i roto i te mau pute. I roto i te mau fare maˈi, ua rohirohi roa te feia rave ohipa i te vahi e afai-ru-hia ˈtu te taata ia ˈna. Ua monihia te mau taata hoo ia ˈna no te mau faito matahiti atoa. Ua parauhia oia “te moemoeâ o te taata hoo e te moerurua o te taata e rave ia ˈna”.

[Tumu parau tarenihia i te api 25]

“Te crack, e ere roa ˈtu ïa hoê â huru”

Ua haamatahia i te hoo i te crack no te huti i te mau taurearea e te feia veve, e ia hiˈohia mai te reira, mea mama roa ïa teie taoˈa. I te Fenua Marite, te faaau nei te feia hoo i teie mau huero hoê â faito e te mau tapau i roto i te mau farii iti uraina no e pae noa aore ra hoê ahuru dala marite. Teie râ, te titau ra te navenave poto roa e te puai atoa râ, e ia faaapî-noa-hia oia; no reira te na ô ra te taata faatere i te hoê pu faaararaa no nia i te raau taero i Floride e: “Te crack, e ere roa ˈtu ïa hoê â huru. O te hoê ïa raau taero o te faatîtî roa ˈtu â i te taata ia faaauhia i te cocaïne i matauhia. No te puai o te navenave e o te taime hepoheporaa, i muri aˈe i te raveraa matamua, hoê anaˈe ïa hiaai to te feia rave i teie taoˈa: e faataero faahou ia ratou.”