Te mau taata e ere no te fenua nei—Teihea roa ratou?

IA AU i te taata papai aivanaa o Isaac Asimov, “i roto i te hoê faito, te vavahi nei teie uiraa i te mau mea atoa” no te feia e tiaturi nei e te vai ra te ora i nia i te tahi atu mau palaneta. Ua uihia teie uiraa no te taime matamua i te matahiti 1950 ra na te taata tuatapapa i te huru o te mau taoˈa atomi Enrico Fermi, e no roto mai teie uiraa i te hoê feruriraa e nehenehe e faataahia mai teie te huru: Mai te peu e ua fa mai te ora maramarama i nia i te tahi atu mau palaneta o to tatou nei anairaa fetia, te vai râ ïa e rave rau mau nunaa tei mua roa ia tatou ehia rahiraa mirioni matahiti. Eita e ore e ua haamata ê na ratou i te tere na roto i te reva teitei mea maoro i teie nei, ma te hiˈopoaraa e te faaearaa i nia e rave rahi mau palaneta o te anairaa fetia. Teie râ, teihea roa ïa ratou?

Noa ˈtu e te farii nei vetahi mau aivanaa no te SETI e te aueue nei to ratou manaˈo i mua i te “feaa-piti-raa a Fermi”, mea pinepine ratou i te patoi atu i te na ôraa e mea fifi roa ia tere na roto i te reva teitei. Noa ˈtu e e tere ratou i te vitivitiraa o te maramarama, e tere vitiviti roa hoi, e titauhia te tahi hanere tausani matahiti ia nehenehe te hoê pahi reva teitei e tapae i te tahi atu pae o to tatou nei anairaa fetia. Inaha, te manaˈohia nei e eita e nehenehe e haere i te hoê tere vitiviti aˈe i taua vitivitiraa nei.

E haavare anaˈe te mau aamu no te tau i mua nei i reira e itehia ˈi te mau pahi reva teitei i te tereraa mai te hoê fetia e tae atu ai i te tahi i roto noa i te tahi mahana aore ra te tahi hora, aita râ i niuhia i nia i te ite aivanaa. Eita to tatou feruriraa e nehenehe e faataa i te mau atearaa e vai ra i rotopu i te mau fetia. Inaha, mai te peu e e nehenehe ta tatou e hamani i te hoê hohoˈa o to tatou anairaa fetia i reira e faanainaihia te mahana (hoê mirioni taime rahi aˈe i te fenua) i nia i te faito o te hoê anani, te atearaa au noa i rotopu i te mau fetia, fatata â ïa 1 500 kilometera.

No reira te feia hiˈopoa fetia o te SETI e hiˈopoa noa ˈi i te reva teitei na roto i ta ratou mau taoˈa haruharu. Te parau nei ratou e, mai te peu e eita te mau nunaa maramarama roa e tere mai te hoê fetia e tae atu i te tahi, e tamata paha ratou i te imi i te tahi atu mau huru ora na roto i te faaohiparaa i te mau aru radio, te hoê ravea mama roa e ohie roa ia rave no te faatae i te poroi. Teie râ, te tamau noa nei te feia aivanaa i te tapitapi no nia i te feaa-piti-raa a Fermi.

Ua ite mai te taata maimi marite o Freeman Dyson e ahiri e te vai ra te tahi mau nunaa maramarama roa i roto i to tatou anairaa fetia, mai te peu e e hinaaro tatou e haapapu e te vai mau ra ratou, mai te huru ra ïa e e imi tatou i te mau tapao no te hoê nunaa aravihi roa i nia i te motu no Manhattan, i New York. E atutu te anairaa fetia i te mau poroi no te reva teitei mai e tae noa ˈtu i te mau ohipa faahiahia roa i te pae no te mau ravea apî. Teie râ, aita roa ˈtu teie mau mea atoa i iteahia mai. Inaha, ua faaite mai te hoê tumu parau no nia i teie ohipa e ua riro roa te parau ra “maimiraa faufaa ore” ei parau tahana noa i rotopu i te feia hiˈopoa i te reva teitei a te SETI.

Te feaa nei te manaˈo

I to ratou iteraa e ua rahi roa te oaoa o to ratou mau hoa, ua faatopa roa mai vetahi mau aivanaa i te numera o te mau nunaa maramarama roa e ora ra paha i roto i to tatou anairaa fetia. Te manaˈo nei vetahi e hoê anaˈe, oia hoi to tatou nei. Area vetahi ra, te parau roa nei ratou e, i te pae no te numeraraa noa, aita hoê aˈe; oia hoi, eita atoa hoi e tia ia tatou nei ia ora!

E ere i te mea fifi roa ia taa i te mau tumu o teie manaˈo feaa noa. E navai noa e piti uiraa no te faataa poto mai i teie mau tumu: Mai te peu e te vai ra vetahi mau taata i rapaeau atu i te fenua nei, teihea roa ïa ratou? E mea nafea to ratou faraa mai?

‘Te ora ra hoi ratou i nia i te tahi atu mau palaneta’, o ta te tahi mau taata ïa e pahono mai i te uiraa matamua. Teie râ, i roto i te faanahoraa o te mahana, hoê anaˈe palaneta o tei tano maitai ia nehenehe te ora e tupu: oia hoi to tatou nei. Eaha râ te nehenehe e parau no nia i te mau palaneta e ohu nei na te hiti i te mau miria fetia o to tatou nei anairaa fetia? Eita anei ta te tahi o ratou e atuatu i te ora? A tahi, e tae roa mai i teie nei, aita hoê taata i nehenehe e haapapu e te vai ra hoê noa ˈˈe palaneta i rapaeau atu i te faanahoraa o te mahana. No te aha?

No te mea mea fifi roa ia itea mai. I te mea e mea atea roa te mau fetia e aita te mau palaneta e faahoˈi nei i te maramarama, mai te peu e e hinaarohia e ite i te hoê palaneta — noa ˈtu e hoê â to ˈna rahi e o Jupiter — mai te mea ra ïa e te hinaarohia ra e hiˈopoa i te hoê huˈa one nainai roa e ohu noa ra na te hiti o te hoê mori uira puai roa e rave rahi kilometera i te atearaa.

Noa ˈtu e te vai ra teie mau palaneta — ta te tahi mau haapapuraa tei ore i faataa-papu-hia e faaite ra —, aita te reira e haapapu ra e te ohu ra ratou na te hiti i te fetia e tano, i roto i te tuhaa o te reva e au maitai e i te atearaa o te fetia tei titauhia, aore ra ua tia atoa to ratou faito e to ratou huru ia nehenehe te ora e tupu.

Te hoê niu papu ore

Teie râ, noa ˈtu e e fariihia e te vai ra e rave rahi mau palaneta e amui ra i te mau tuhaa papu atoa e titauhia ra ia tupu te ora mai ta tatou i ite, e toe mai ïa te piti o te uiraa oia hoi: Mea nafea te ora i te faraa mai i nia i taua mau palaneta ra? Na roto i teie uiraa, te faahiti nei tatou i te parau no te niu iho o te tiaturiraa i te ora i rapaeau atu i te fenua nei: te haapiiraa e ua tupu noa mai te mau mea atoa.

No te mau aivanaa e rave rahi, mea tano mau â ia manaˈo e mai te peu e ua tupu mai te ora na roto mai i te taoˈa ora ore i nia i te fenua nei, e nehenehe atoa teie ohipa e tupu i te vahi ê. Ia au i te hoê taata papai, “te manaˈo rahi i rotopu i te feia maimi no nia i te ora, oia ïa e fa te ora i roto i te vahi atoa e tano”. Teie râ, i ǒ nei, e û atu te haapiiraa no nia i te ora tei tupu noa mai ma te tumu ore, i te hoê patoiraa rahi. Inaha, eita roa ˈtu ta te feia turu i teie nei haapiiraa e nehenehe e faataa e mea nafea te ora i te haamataraa i nia i to tatou iho palaneta.

Ua numera na aivanaa ra o Fred Hoyle raua o Chandra Wickramasinghe e te numera ia nehenehe te mau taoˈa faatupu i te tauiraa o te mau mea (enzymes) e titauhia no te ora e tupu noa mai ma te tumu ore, hoê ïa manuïaraa i nia i te 1 040 000 (oia hoi 1 e e 40 000 aore i muri iho). Ua haere roa ˈtu â na aivanaa e piti, o Feinberg e o Shapiro, i mua. I roto i ta raua buka Te ora i rapaeau atu i te fenua nei (beretane), ua taio raua e te vai ra hoê manuïaraa i nia i te 101 000 000 ia nehenehe te mau taoˈa titauhia i roto i te mau tuhaa matamua na mua ˈˈe i te faraa mai i te ora, e tahoêhia i roto i te anoiraa o te mau taoˈa ora. Mai te peu e e papai tatou i teie nei numera, hoê ïa vea hau atu i te 300 api o ta outou e tapea i roto i to outou rima.

Te fifi ra anei outou no te faataa i teie mau numera hopea ore? Mea ohie aˈe ia haamanaˈo i te parau ra “aita e nehenehe”, inaha, hoê â hurua.

Noa ˈtu te reira, aita te feia hiˈopoa i te reva teitei a te SETI e haamarirau nei i te parau e ua fa mai te ora ma te tumu ore na roto i te ao taatoa nei. I roto i ta ˈna buka Te Ora i roto i te ao a Darwin, te feruri ra o Gene Bylinsky i te tahi mau eˈa huru rau i ravehia e te parau no te faraa mai te ora ma te tumu ore, no nia i teie mau ao ê atu i te fenua nei. Te faahiti ra oia i te mau fee maramarama, te mau taata e pute to ratou i nia i te opu e te mau taata iore pererau e hamani ra i te mau tauihaa upaupa, e mau taata anaˈe e ere roa ˈtu ratou i te mea huru ê i to ˈna manaˈoraa. Ua faahiahia roa vetahi mau aivanaa tuiroo i ta ˈna buka. Area vetahi ra, mai ia Feinberg e o Shapiro, te ite nei ïa ratou i te mau hapa rahi i roto i te huru feruriraa. Te faahapa nei ratou i te “paruparu o te mau niu o te mau tamatamataraa” i reira te haamauraahia te mau haapiiraa no nia i te faraa mai te ora i nia i te fenua nei, ma te haapapu mai e aita te reira i tapea i te mau aivanaa ia “faatia i nia i teie mau niu te mau pare tei moe roa to ratou mau vahi teitei i roto i te otia o te ao nei”.

Te haapaoraa hape

Te maere nei paha outou i te mea e te tiaturi nei te mau aivanaa e rave rahi i te mau mea eita e nehenehe e tupu. Mea ohie roa te tumu e mea peapea roa atoa: Te tiaturi noa nei te taata i te mea o ta ratou e hinaaro ra e tiaturi. Noa ˈtu e te faahua parau nei te mau aivanaa e e mau opuaraa papu to ratou, te roo-atoa-hia nei ratou i teie huru o te taata nei.

Te faaite ra o Hoyle e o Wickramasinghe e “mea papu aˈe te haapiiraa e parau ra e ua faanaho te hoê maramarama i te ora” ia faaauhia i te parau no te fa-taue-raa mai te ora. “Inaha, o ta ratou ïa e parau faahou ra, mea papu roa teie haapiiraa e no reira mea maere roa e aita te taata e farii ra i te reira. E mau tumu no roto mai i te feruriraa maoti hoi i te mau tumu i te pae no te ite aivanaa.” Parau mau, noa ˈtu e te haapapu maira te mau ohipa e itehia ra e te vai ra te hoê Poiete, e taratara roa te mau aivanaa e rave rahi ia faahiti-anaˈe-hia teie nei manaˈo. Ua aratai teie huru feruriraa ia ratou ia faatupu i ta ratou iho haapaoraa. Mai ta te feia papai toopiti i faahitihia i nia ˈtu e faataa ra, ua mono noa mai te haapiiraa a Darwin i te parau ra “Atua” na roto i te parau ra “Natura”.

No reira, ia uihia te uiraa ra “O tatou anaˈe anei i roto i te ao taatoa nei?”, aita te ite aivanaa e horoa maira i te hoê noa ˈˈe parau haapapuraa e te vai ra te ora i nia i te tahi atu mau palaneta. Inaha, te mairi noa nei te mau matahiti e te vai mamu noa nei te mau fetia, e te fifi noa ˈtura te parau no te maimiraa i te tahi maramarama e ere no te fenua nei no te feia e turu nei i te haapiiraa no te tupu-noa-raa te mau mea ma te tumu ore. Mai te peu e e tupu ohie noa te mau mea ora huru rau na roto mai i te taoˈa ora ore, no te aha ïa eita e faaroohia te haruru o to ratou vevo na roto i to tatou nei ao rahi? Teihea roa hoi ratou?

I te tahi aˈe pae, eaha te pahonoraa ta te haapaoraa e horoa ra i teie nei uiraa? Ua poiete anei te Atua i te ora i te vahi ê atu i te fenua nei?

[Nota i raro i te api]

[Tumu parau tarenihia i te api 21]

Te mau ratere no te reva teitei mai?

E rave rahi mau taata teie e tiaturi nei e te haere mai nei, aore ra ua haere ê na mai, te feia no te reva teitei mai i nia i te fenua nei. Aita te mau aivanaa e rave rahi e manaˈo nei i te reira, inaha, te parau nei ratou e aita roa ˈtu e haapapuraa e nehenehe e hiˈopoahia e te faaite nei ratou e te rahiraa o teie mau OVNI (mau taoˈa rere taa-ore-hia) e nehenehe ïa e faataahia na roto i te mau ohipa a te natura. Area te mau aamu no nia i te raveraahia te tahi mau taata, i to ratou manaˈoraa, no roto mai ïa te reira i te tuhaa papu ore o te mau fifi i te pae no te feruriraa, aore ra te faahitihia ra teie mau parau no te haamâha i te tahi mau hinaaro i te pae no te feruriraa e i te pae faaroo.

Teie hoi ta te hoê taata papai aamu i parau: “Te hinaaro uˈana e anaanatae e e tiaturi i teie mea, e manaˈo faaroo ïa. I mutaa ihora, e mau atua to tatou. I teie mahana, te hinaaro nei tatou e tiaturi e e ere o tatou anaˈe, e te vai ra te tahi mau puai paruru e hiˈo noa maira ia tatou.” Hau atu, ua tuatihia vetahi o te mau ohipa i tupu i te ohipa tahutahu maoti hoi i te ite aivanaa.

Teie râ, e rave rahi mau aivanaa teie e tiaturi nei, ia au i to ratou iho huru hiˈoraa, e te vai mau ra te mau “ratere”. Ua ite ratou e aita te ora i fa noa mai i nia i te fenua nei ma te tumu ore, e te tiaturi nei ratou e no ǒ mai te ora i te reva teitei. Ia au i te tahi o ratou, ua tuu mai te feia e ere no te fenua nei i te ora i nia i to tatou nei palaneta na roto i te haponoraa mai i te mau taoˈa î roa i te mau bateria matamua. Ua faahiti atoa mai hoê i te manaˈo ra e ua tupu mai te ora ma te tumu ore i roto i te mau pehu i vaiihohia mai e te mau ratere no ǒ mai i te reva teitei mea maoro i teie nei. Te faahiti nei te mau aivanaa i teie mau parau no te mea te ite-pinepine-hia ra te mau taoˈa rii ora huˈa roa i roto i te reva teitei. Teie râ, e navai anei te reira no te haapapu e ua fa mai te ora ma te tumu ore? E faaoti anei tatou, no te mea e tei roto tatou i te hoê fare toa e hoo ra i te mau tuhaa pereoo, e e nehenehe te hoê pereoo e fa noa mai mai te reira ma te tumu ore?

[Hohoˈa i te api 20]

Noa ˈtu e te vai ra te tahi atu mau palaneta e nehenehe e orahia i nia iho, te vai ra anei te tahi mea e haapapu ra e e nehenehe te ora e fa noa mai i reira ma te tumu ore?