Ia au i te Bibilia

Te vai mau ra anei te Diabolo?

I TO outou nainairaa, mea riaria anei na outou i te poiri? Peneiaˈe paha outou i te manaˈo e te tapuni noa ra te hoê tuputupua i muri mai i te haamaramarama, ineine noa i te haru ia outou. I teie nei râ, e taata paari outou, e nehenehe hoi ta outou e taio i te mau haamaramaramaraa i niuhia i nia i te mau ohipa papu e e nehenehe atoa ta outou e feruri maite, e ia hiˈo outou i to outou riaria i to outou tamariiriiraa ra, e manaˈo ïa outou e mea maamaa roa. No reira ïa vetahi pae e parau ai e: “No te aha ïa e ore ai e haere roa ˈtu â i mua e e tuu atoa ˈtu i te Diabolo i roto i te anairaa o te mau tuputupua haavare e faariaria nei i te mau tamarii?”

E taata haavare noa anei ïa te Diabolo? O ta te hoê buka iti faaroo ïa e parau ra, i te na ôraa e: “Aita roa ˈtu te Bibilia e faahiti ra i te parau no te tahi tuputupua ino mai teie te huru.” E te parau faahou ra oia e: “Te faataa ra na parau ra Diabolo e Satani (...) i te tumu o te hara e o te ino no roto mai i te natura taata nei.” Area te hoê orometua no te haapiiraa sabati, i te fenua Marite, te na ô ra ïa oia e: “Te mau diabolo, o te mau taata ïa.” Te manaˈo ra paha outou e e parau ohie roa teie?

Nafea ia faataa i te haerea o te mau taata?

Mai te peu e te mau diabolo o te mau taata anaˈe ïa, no te aha ïa te rahiraa o tatou nei e tapitapi ai no te oaoaraa o to tatou fetii? No reira, ia ravehia ratou tataitahi, te faaamu nei te rahiraa o te taata, i to ratou utuafare fetii. Hau atu, eita ratou e faataero nei ia ratou ma te opua maite e te ape nei ratou i te faaino i to ratou ora. Aita hoê aˈe huru diabolo i roto i teie tupuraa. Teie râ, ia tahoê teie mau taata e ia ohipa ratou ei nunaa, e opani te hoê mea ia ratou ia ohipa no te maitai o te taatoaraa. E vaiiho ïa ratou i ta ratou toetoea maa ia ino maoti hoi i te faaamu i te feia e pohe ra i te poia, e haaviivii ratou i te fenua nei e e haaputu ratou i te mau mauhaa tamaˈi e e nehenehe atu ai ratou e taparahi te tahi e te tahi i roto i te hoê tamaˈi atomi. Auê ïa haerea taparahi taata huru ê mau e!

Eaha te mana e turai ra i te mau taata ia rave i teie huru haerea tuati ore? Te mana o te rahiraa o te taata? Te huru tano ore o te mau faatere? Mea hohonu roa ˈtu â te tumu. O te Bibilia anaˈe teie e haapapu nei e o vai râ te taata i ‘haapoiri i te aau’ o te “ao” taatoa o te feia faaroo ore. O vai râ teie taata? “O tei parauhia o te diabolo ra, e o Satani hoi, o tei haavare i to te ao atoa nei.” I te mea e mea ite roa oia i te faahema i te totaiete taata nei i parau ai te mau Papai ia ˈna e “te atua” o te ao nei. — Korinetia 2, 4:4; Apokalupo 12:9.

E ere roa ˈtu teie “atua” i te tuputupua e tapuni ra i muri mai i te haamaramarama. O te hoê taata varua ite-ore-hia râ, te hoê taata aravihi roa i te faaohiparaa i te ravea paari i te pae politita, o tei nehenehe e pûpû atu na Iesu i te mau basileia atoa o te ao nei, i to ˈna aniraa ˈtu ia ˈna ma te ore hoi e manuïa ia piˈo i mua ia ˈna (Luka 4:6, 7). E nehenehe e manaˈo e ua horoa ê na o Satani i teie huru mana i te tahi atu hou oia i pûpû atu ai na Iesu, no te mea te faaite ra te buka bibilia a Daniela e, i to ratou fariiraa i te amui atu ia ˈna, ua horoahia ˈtu na te mau melahi orure hau i te hoê mana i nia i te mau puai o te ao nei e e mau tiaraa mana to ratou mai teie te huru “te arii no Peresia” aore ra “te arii no Iavana”. — Daniela 10:20, 21.

No reira, ua haamau o Satani i te hoê faanahonahoraa rahi: o ˈna ‘te arii o teie nei ao [ite-mata-hia]’ e ‘te raatira o te mau demoni [itea-ore-hia]’. (Ioane 14:30; 16:11; Mataio 12:24.) No reira, ia ite tatou e o te Diabolo te raatira o te hoê faanahonahoraa na te ao atoa nei, e taa atoa ïa ia tatou e rave rahi mau ohipa.

No te aha o ˈna i fatu ai i te hoê faanahonahoraa?

Mai ta te hoê raatira o te faanahoraa o te ohipa ino e haapao e rave rahi mau tuhaa ohipa tia ore — hooraa i te raau faataero, te ohipa taiata, te eiâ, te hauti, te hooraa huna, e te vai aturâ — ma te ore e faaite i to ˈna huru mau i mua i to ˈna mau taata rave ohipa, mai te reira atoa o Satani i te faaohiparaa i te hoê faanahonahoraa ia rahi aˈe te taata o ta ˈna e faahema ahiri e o ˈna anaˈe. Ta ˈna ravea paari? Taa ê atu i to ratou haapeapea-noa-raa i te tahi mau taata, te aratai nei o Satani e ta ˈna mau demoni i te mau nunaa mai te mau nǎnǎ animala ra te huru. Inaha, aita hoi e titauhia ra e aratai i te feia tataitahi. E navai noa ia tuu atu i te tahi feia i te upoo o te nǎnǎ, e e pee atu iho â te toea. Area te feia e faataa ê mai ia ratou, o ratou ïa te haapao-maitai-hia.

Oia, e taata mau iho â te Diabolo, teie râ, aita to ˈna huru mau e tano ra e te mau hohoˈa faaarearea e faataahia ra no nia ia ˈna aore ra i te manaˈo papu ore o te mau taata tuatapapa i te parau faaroo. Papu ore? Oia mau â, inaha, teie ta te buka ra Te hohoˈa o Satani (beretane): “Ua iti roa te tiaturiraa ia Satani” i te XIXraa o te senekele, e “ua tutava noa na” te feia tuatapapa i te parau no nia i te Atua “te faataa ia Satani mai te tahi mea ê atu maoti hoi i te hoê taata varua”.

Na vai e faaite ra i te parau mau no nia i te Diabolo?

Mai te peu e ua oioi noa te mau haapaoraa i te faatupu i te manaˈo feaa no nia i te parau a te Bibilia no nia i te Diabolo, no te faatanoraa ïa i te hinaaro o te hoê totaiete materia e feaa piti atoa nei no nia i te vai-mau-raa o te Atua iho. “I to tatou nei tau, o ta Ruth Ansher ïa e faataa ra i roto i ta ˈna buka Te Diabolo, e mea mau (beretane), ua moe ê te Diabolo, e (...) ua haere ê atoa te Atua iho.”

Ia faatupu ratou i te feaaraa no nia i te manaˈo o te Bibilia no nia i te Diabolo, te patoi ra ïa te feia “aravihi” i te pae faaroo o to tatou nei tau i te tumu mau o te Aamu. Mai ta te taata papai hautiraa teata no Roumanie o Eugène Ionesco i faaite i roto i te hoê vea helemani, “aita roa ˈtu to te Aamu e auraa ahiri e e tuu tatou i te Diabolo i te hiti”. — Welt am Sonntag, 2 no setepa 1979.

Aita anei e taata itoito no te faaite i te ohipa a te Diabolo i roto i te fifi e farereihia ra e te ao nei i teie nei tau? Oia! A hiˈo na i te “Parau patoi ia Satani e e turu ra ia Iehova”. I to ratou farii-popou-raa i teie opuaraa i te hoê tairururaa i tupu i te matahiti 1928 ra, ua tuô te mau Ite no Iehova i te hoê pii tamaˈi i nia i te enemi o te taata, oia hoi te Diabolo, ma te farii i te faaite e ua fatata roa te tamaˈi rahi o Aramagedo i te faaore roa i te mana o Satani e ta to ˈna faanahonahoraa iino.

No reira, te haapapu maira te Aamu e e enemi mau te Diabolo, te enemi o te taatoaraa o te mau taata. Teie râ, mea papu maitai e eita o Iehova e vaiiho noa ia tatou ma te paruru-ore-hia. No te aha outou e ore ai e faahohonu roa ˈtu â i teie tumu parau? Mea faufaa roa ia ite tatou i te huru o to tatou enemi, “o te noaa mai hoi ta Satani vahi ia tatou; e ere hoi tatou i te ite ore i ta ˈna mau ravea”. — Korinetia 2, 2:11.

[Parau iti faaôhia i te api 13]

“I to tatou nei tau, ua moe ê te Diabolo, e (...) ua haere ê atoa te Atua iho.”

[Hohoˈa i te api 12]

Mea taa ê roa te huru mau o te Diabolo i te mau hohoˈa ta te mau haapaoraa e horoa ra e te hohoˈa e faataahia ra e te mau haapiiraa papu ore a te feia tuatapapa i te parau faaroo.

[Faaiteraa i te tumu]

Gustave Doré