To te haapaoraa huru a muri aˈe ia au i to ˈna huru tahito ra
24raa o te tuhaa: I teie nei e a muri noa ˈtu—Te haviti mure ore o te haapaoraa mau
“Ia faaunaunahia oia e te mau parau mau o te raˈi ra, ia hiˈo noa ˈtu oe i te haapao- raa ra, e faahiahia roa ïa oe ia ˈna.”—William Cowper, rohipehe beretane no te senekele XVIII
AITA hoê aˈe mea faahiahia i roto i te haapaoraa hape. A 6000 matahiti i teie nei to ˈna faatupu-noa-raa i te veve rahi e te mauiui. No te haavare, te peu haavarevare, te taviriraa i te taata e te feii o ta ˈna mau huru raveraa, ua riro roa oia ei mea faufau i mua i te aro o te Atua e to te taata atoa. Maoti hoi i te faaunaunahia i te mau parau mau o te raˈi ra, te patoi ra te huru o te haapaoraa hape i te parau mau e te haviti.
Ua fatata roa te tau i reira te mau puai haava a te Atua e turai roa ˈtu ai i te haapaoraa hape i roto i te abuso o te haamouraa mure ore. I muri noa iho, hoê â utua te roohia i nia i te toea o te faanahoraa e arataihia ra e Satani. Area te haapaoraa mau e te feia e faaohipa ra ia ˈna ra, e ora ˈtu ïa ratou. Auê ïa i te oaoa e ia ite atu i te haamoriraa mau i te anaanaraa e to ˈna mau unauna o te ore e nehenehe e manaˈohia i teie nei mahana!
Te haviti o te haapaoraa mau
E rave rau mau tumu e riro ai te haapaoraa mau ei mea haviti roa. E faahiti noa ˈtu matou i te tahi tumu. No te aha outou e ore ai e rave i te taime no te taio i te mau irava o te mau Papai e faahitihia ˈtu ia papu maitai outou e no roto mai teie mau manaˈo i te Bibilia?
Teie te tahi mau tumu e rave rau e faariro nei i te haapaoraa mau ei mea haviti roa:
▪ Ua niuhia te haapaoraa mau i nia i te parau mau no ǒ mai i te Atua o te ore e nehenehe e hape, o Iehova to ˈna iˈoa e e nehenehe mau â tatou e tiaturi papu ia ˈna. — Salamo 83:18 (19 i roto i te tahi mau Bibilia); Isaia 55:10, 11.
▪ Maoti hoi i te riro ei faufaa na te hoê pǔpǔ iti toroa teitei tei noaa ia ratou i te maramarama rahi, e nehenehe te haapaoraa mau e naeahia i te mau taata atoa tei haehaa te aau. — Mataio 11:25; Korinetia 1, 1:26-28.
▪ Eita o ˈna e hiˈo i te iri o te taata, aore ra te tiaraa i te pae totiale, e eita atoa o ˈna e hiˈo e mea moni anei te hoê taata aore ra aita. — Ohipa 10:34, 35; 17:24-27.
▪ Te horoa mai nei oia i te tiaturiraa papu e e nehenehe tatou e ora i roto i te hoê ao apî i reira e itehia ˈi te hau e te ino ore, te hoê ao aita e ite-faahou-hia te oto, te maˈi, te veve rahi e te pohe. — Isaia 32:18; Apokalupo 21:3, 4.
▪ I roto i teie faanahonahoraa, ua riro to ˈna mau melo ei utuafare fetii o te mau kerisetiano na te ao atoa nei tei tahoê maite na roto i te haapiiraa hoê, te haerea hoê e te manaˈo hoê. — Salamo 133:1; Ioane 13:35.
▪ Te pǔpǔ nei oia i te taata tataitahi — te tane, te vahine e te tamarii — i te ravea no te rave i te ohipa a te Atua ma te itoito, te horoa nei hoi te reira na ratou i te hoê aveia i roto i to ratou oraraa. — Korinetia 1, 15:58; Hebera 13:15, 16.
▪ E faaara mai o ˈna e te vai ra te mau ati o te ore e itehia, ma te haapii mai ia tatou no to tatou maitai no nia i te haerea te tia ia tatou ia faaite. — Maseli 4:10-13; Isaia 48:17, 18.
No te aha e parauhia ˈi e e haviti mure ore to ˈna? No te mea e vai noa mai oia a vai noa mai ai te haapaoraa mau, oia hoi e a muri noa ˈtu.
E haamaramaramahia te mau mea taa-ore-hia o te Aamu
E nehenehe e parau e ua riro te pohe ei hoê o te mau enemi rahi o te parau mau. Oia mau, e pinepine te tahi mau mea tei ite-noa-hia e te tahi mau taata, i te moe roa atoa ia pohe anaˈe ratou. Inaha, te aimârô noa nei â te taata no nia i te mau ohipa i tupu i teie nei tau, mai te taparahiraahia te peretiteni marite o J. F. Kennedy i te matahiti 1963 ra. Eaha mau na te ohipa i tupu? O vai tei ite? E rave rahi paha mau taata tei ite i teie ohipa, ua pohe râ ratou i teie nei. E mai te peu e e parau mau te reira no te hoê ohipa i tupu a 26 matahiti i teie nei, eaha ˈtu ïa no te mau ohipa i tupu te tahi hanere, aore ra te tahi tausani matahiti i teie nei?
Hau atu, e mau taata anaˈe te feia tuatapapa i te aamu; ua taotiahia to ratou ite, e inaha, te faaino nei to ratou mau hapa, e to ratou atoa paha mau manaˈo pae tahi, i te mau mea e itehia mai e ratou na roto i ta ratou mau maimiraa. Inaha, te titau nei te manaˈo pae tahi ore e ia ore tatou e faaite i te manaˈo etaeta no nia i te mau tumu parau aita e papai haapapuraa, tei faauruahia mai e te Atua.
E fa atoa mai teie mau huru fifi i mua i te taata e hinaaro ra e papai i te tahi parau no nia i te aamu o te haapaoraa, inaha, te amahamaha noa nei te feia mana i roto i teie tuhaa no nia i te ohipa i tupu. I roto i te anairaa o te mau tumu parau “To te haapaoraa huru a muri aˈe ia au i to ˈna huru tahito ra”, ua faaitoito o A ara mai na! i te faaite i te mau ohipa tei haapapuhia mai e te mau papai, teie râ, e tia ia faˈi e i teie nei mahana, aita tatou e taa ra i te tahi mau parau. No reira, eita e nehenehe e parau e i roto i teihea faito to te tahi mau pǔpǔ kerisetiano tei ora na na mua ˈˈe e i muri aˈe i te anotau pouri, faaohiparaa i te haamoriraa mau.
No nia i taua mau pǔpǔ ra, teie ta A. Renwick e parau ra, e orometua haapii i te aamu ekalesiatiko o ˈna: “E tiâ ia rave i te mau maimiraa e rave rahi ia itea mai te parau mau no nia i te aamu e te tiaraa o taua mau pǔpǔ e rave rahi ra i te pae faaroo.” Te na ô faahou ra oia e: “I mutaa ihora, ua pinepine roa te feia tuatapapa i te aamu i te rave ei niu na ratou, te mau parau patoi i taua mau pǔpǔ tei faataa ê ia ratou ra no te haapapu i to ratou manaˈo no nia i ta ratou mau tiaturiraa e to ratou huru morare.” Oia mau, e ere atoa i te mea tano roa ia farii ohie noa i te mau parau e turu ra ia ratou. No reira, noa ˈtu te mau maimiraa e rave rahi, mea rahi roa te mau uiraa e vai noa mai e aita e pahonoraa.
Eaha te nehenehe e parau no nia i te Bibilia? Teie buka te vai ra i roto te tahi mau pene no nia i te aamu o te haapaoraa, ua faauruahia mai ïa e te Atua: e nehenehe ïa tatou e tiaturi i te taatoaraa o te mau parau e vai ra i roto. Teie râ, mea iti roa te mau parau ta te mau Papai e faahiti ra no nia i te mau haamoriraa hape taa ê i vai na i mutaa ihora. E taa maitai ia tatou e no te aha râ, inaha, ua horoahia mai teie buka i te taata nei ei aratai no nia i te haapaoraa mau, eiaha râ no nia i te haapaoraa hape.
No nia i te haapaoraa mau, aita te Bibilia e hohora ra i te mau mea atoa. Te horoa noa maira o ˈna i te mau haamaramaramaraa e navai maitai no te haapapu e teihea te haamoriraa mau, aita râ o ˈna e faataa ra i te tahi mau manaˈo. Peneiaˈe paha, mea anaanatae roa ia ite i teie mau manaˈo, teie râ, e ere te reira i te mea faufaa no teie nei taime.
Aita atoa te Bibilia e faaite ra i te parau no nia i te tahi mau anotau o te Aamu. No reira, aita o ˈna e faaite ra e eaha te ohipa i tupu i roto i na hau atu i te 400 matahiti i rotopu i te hoperaa te mau Papai hebera, tei parau-noa-hia te Faufaa Tahito, e te fanauraahia o Iesu. Hau atu, fatata e 1900 matahiti i teie nei te otiraa te Bibilia i te papaihia.
No reira, no te hoê area taime fatata e 18 senekele, aita e vai ra ia tatou nei i te hoê faatiaraa parau i faauruahia mai e te Atua no nia i te kerisetianoraa, no reira ïa e itehia ˈi te mau papu-ore-raa i faataahia mai e A. Renwick i nia ˈtu no nia i te tahi mau pǔpǔ kerisetiano. Teie râ, mea papu maitai e i roto i te roaraa o te mau senekele, ua auraro vetahi mau taata i te kerisetianoraa tumu. Tera râ, te vai noa nei te mau uiraa e aita e pahonoraa, no nia i te mau manaˈo i turai na i te tahi mau taata o te tau tahito e to ratou manaˈo haavare ore. Ei hiˈoraa, eaha te nehenehe e parau no nia i te tahi feia faatitiaifaro? E oia atoa, no nia i te mau taata mai ia Confucius e o Mahomet? Mai te peu e e nehenehe e faaite i te manaˈo papu no nia i te mau faanahoraa faaroo no teie nei tau na nia i to ratou mau hotu, mea pinepine e eita e nehenehe e na reira atoa no te mau taata — inaha, ua pohe ratou mea maoro i teie nei.
Mai te peu e, i roto i te ao apî ta te Poiete e haamau, e opua oia ia au maite i To ˈna hinaaro e haapapai faahou i te Aamu, e tae noa ˈtu te aamu faaroo, e nehenehe ïa tatou e ite i teie mau parau. E te reira, no te tahi atu tuhaa faahiahia roa o te haamoriraa mau: te tiaturiraa e e faatia-faahou-hia mai te feia pohe. — Ioane 5:28, 29; Ohipa 24:15.
A feruri na i to tatou oaoa ia ite tatou i te mau haamaramaramaraa mau no roto mai i te vaha o te feia i faatia-faahou-hia mai o tei ora na i te mau ohipa e faatiahia ra i roto i te mau buka aamu. I reira, e itehia ïa i te mau ohipa taa-ore-hia, mai te iˈoa o te pharao o tei roohia i te mau ati no Aiphiti ra hou oia e pohe atu ai i roto i te miti Uteute.
Mai te peu e e papai-faahou-hia te Aamu i te hoê mahana, e papaihia ïa no te faahanahana i te Atua ra o Iehova, o Tei haamau i te haapaoraa mau, e no te faateitei i to ˈna roo e a muri noa ˈtu. Aita e feaaraa no nia i teie tumu parau. Tera râ, teie te tahi uiraa: e ora anei outou no te taio i teie aamu?
Eita te faahiahia-noa-raa e navai
Mai te mea ra e aita te haviti mure ore o te haapaoraa mau e ite-ohie-noa-hia ra mai ta te mau parau a Cowper i faahitihia ˈtu i te omuaraa ra, e faaite ra. No reira te numera matamua o Te Pare Tiairaa no Siona e te Vea o te faraa mai te Mesia (beretane), i faaite ai i teie parau 110 matahiti i teie nei: “Ua haaatihia te parau mau, mai te hoê tiare iti i roto i te rahiraa o te oraraa, e inaha, ua fatata roa o ˈna i te pohe i raro aˈe i te mau aihere ruperupe maitai o te hape. Ia itea mai oia, e tia ia vai ara noa. Ia itea mai to ˈna haviti, e tia ia faataa ê roa i te zizania o te hape e te mau raau taratara o te paieti haavarevare. Ia noaa mai oia, e tia ia piˈo i raro e ia pofai mai ia ˈna.”
Te tiaturi nei matou e ua tauturu te anairaa o te mau tumu parau ra “To te haapaoraa huru a muri aˈe ia au i to ˈna huru tahito ra” i to matou feia taio ia “faataa ê i te zizania o te hape e te mau raau taratara o te paieti haavarevare”, ia nehenehe ratou e faahiahia roa ˈtu â i te haviti mure ore o te haamoriraa mau.
Teie râ, eita noa te faahiahiaraa e navai. Te na ô ra te hoê parau paari tinito ma te tano maitai e: “E au te haapiiraa e ô atu i roto i te tariˈa, o te ore râ e haaputapû i te mafatu, i te amuraa i te maa e moemoeâ-noa-hia.” Mai te peu e e hinaaro tatou tataitahi e fanaˈo i te haviti mure ore o te haapaoraa mau — eiaha noa râ e moemoeâ noa —, mea faufaa mau â ia putapû roa to tatou mafatu, eiaha noa râ to tatou tariˈa, i te mea o ta tatou e haapii ra.
A taio maitai i te parau i roto i te tabula ra “Tei roto anei au i te haapaoraa mau?” E i muri iho, a ani na ia outou iho e: ‘No nia i te hau emepera rahi o te haapaoraa hape, e farii anei au i te manaˈo o Voltaire o tei parau e ua riro te haapaoraa ei “enemi no te huitaata nei”? Ua tauturu anei teie tuatapaparaa poto noa o te aamu o te haapaoraa ia ˈu nei ia ite e teihea te haamoriraa mau? I roto i teie tau hopea o te totaiete taata nei, ua ite anei au e ihea roa e itea mai ai teie haamoriraa mau? Mai te peu e e, te hinaaro ra anei au e pee i te hiˈoraa o teie taata o Joseph Joubert, taata tuatapapa morare farani o te senekele XVIII, o tei “ite i to ˈna maitai e ta ˈna hopoia” i roto i te haapaoraa mau?’
Te tiaturi nei matou e te feia atoa e pahono e oia i taua mau uiraa nei, e tamau noâ ïa ratou i te faufaahia maoti te taioraa i te A ara mai na! e te mau papai hoê â huru e teie nei vea. Te titau atu nei matou ia outou ia pee i teie aˈoraa paari mau e vai ra i roto i te numera i faahitihia ˈtu o Te Pare Tiairaa no Siona: “Eita te hoê anaˈe tiare o te parau mau e navai. Mai te peu e e navai noa hoê ra, eita ïa te tahi mau tiare e uˈa atoa. A imi noa na ia rahi ta outou tiare e pofai mai.”
Oia mau, a tamau noa na i te imi, a tamau noa i te maimi i te mau faufaa apî o te haviti mure ore o te haapaoraa mau.
[Tumu parau tarenihia i te api 30]
Tei roto anei au i te haapaoraa mau?
▪ E faatupu te haapaoraa mau i rotopu i to ˈna mau melo i te hoê taairaa aroha mau e te autahoêraa aueue ore o te na nia ˈtu i te mau otia atoa i te pae o te nunaa (Ioane 13:35). E ere ïa mai te reira te haamoriraa hape, inaha, ia au i te hiˈoraa o Kaina, te taparahi nei to ˈna mau melo te tahi e te tahi i roto i te mau tamaˈi rahi. — Ioane 1, 3:10-12.
▪ E faataa ê te haapaoraa mau ia ˈna i te politita e te fariu nei oia i nia i te Poiete ma te tiaturi e o ˈna anaˈe te nehenehe e arai i te mau fifi o te ao nei maoti to ˈna ra Basileia. Te pee nei te haapaoraa hape i te hiˈoraa i vaiihohia mai e Nimeroda i to ˈna paturaa i te pare no Babela. Te amui atu nei oia i roto i te ohipa politita, te tuu nei oia i to ˈna tiaturiraa i nia i te feia faatere hau i faaatuahia, te faaô atu nei oia ia ˈna i roto i ta ratou mau ohipa e inaha, te faaineine nei oia i to ˈna iho haamouraa. — Daniela 2:44; Ioane 18:36; Iakobo 1:27.
▪ Te faˈi nei te haapaoraa mau e o Iehova te Atua mau, o ˈna anaˈe te nehenehe e faaora mai i te taata i te haavîraa. Ta te haamoriraa hape e pûpû ra, mai te haamoriraa i ravehia na i te tau Tahito ra i Aiphiti e i Heleni, e mau atua aai e rave rahi anaˈe ïa, te puai ore e te faufaa ore. — Isaia 42:5; Korinetia 1, 8:5, 6.
▪ Te tǎpǔ nei te haapaoraa mau i te ora mure ore i roto i te oaoa i nia i te fenua nei. Te faariro nei te haapaoraa hape — ei hiˈoraa, te haapaoraa a te Bouddha — i te oraraa i nia i te fenua nei ei oraraa au ore te nehenehe e tiamâ mai i roto i te hoê oraraa papu ore i muri aˈe i te poheraa. — Salamo 37:29; Apokalupo 21:3, 4.
▪ Maoti te Bibilia, ta ˈna buka moˈa, te horoa nei te haapaoraa mau na te feia atoa e faaohipa ra ia ˈna i te hoê faaroo aueue ore. Te horoa ˈtu nei oia i te hoê tiaturiraa papu e te turai atu nei ia ratou ia faaite na roto i te mau ohipa, i to ratou here haavare ore no te Atua e no to ratou taata-tupu (Timoteo 2, 3:16, 17). Mea pinepine i te itehia e eita teie mau hotu e noaa i te haapaoraa hape, noa ˈtu e e mau buka moˈa atoa ta ˈna. — Ioane 1, 5:3, 4.
▪ E ite-papu-hia te haapaoraa mau na roto i te haehaa o to ˈna mau tiai. Area te haapaoraa hape ra, ua itehia o ˈna na roto i to ˈna mau upoo faatere nounou tiaraa e te manaˈo faatere noa ia ratou iho, o tei ineine noa i te faaino i te parau mau e o te tapitapi ra no ta ratou iho mau faufaa politita aore ra no to ratou toroa. — Ohipa 20:28, 29; Petero 1, 5:2, 3.
▪ Aita te haapaoraa mau, te eˈa o te auraro mau i te Atua, e faaohipa ra i te ˈoˈe i roto i te auraa mau i roto râ i te hoê auraa varua. Area te haamoriraa hape ra, aita roa ˈtu o ˈna e tâuˈa ra i te viivii ore i te pae no te mau haapiiraa, te ofati nei oia i te ture o te faataa-ê-raa mai te mau kerisetiano ia ratou i te pae politita e te horoa nei oia i te mau faufaa a te taata nei i te parahiraa matamua i mua i te mau faufaa a te Atua. — Korinetia 2, 10:3-5.
▪ Te haaputapû nei te haapaoraa mau i te mafatu o te mau taata faaroo ore ia pee atoa ratou i te haamoriraa a te Atua mau. Te rave nei te haapaoraa hape e ia itoito noa te manaˈo feaa noa o teie nei tau, te manaˈo tiamâ, te titauraa i te manaˈo afaro e te nounou taoˈa. — Luka 1:17; Korinetia 1, 14:24, 25.
▪ Aita te haapaoraa mau, mai te faaohipahia nei e te mau Ite no Iehova, i ite aˈenei i te hoê ruperupe rahi i te pae varua mai te itehia ra i teie tau. Te pohe nei te haapaoraa hape, tei î roa to ˈna ahu i te toto, i te poia i te pae varua e te ere-mǎrû-noa-hia ra o ˈna i te turu o ta ˈna i fanaˈo i mutaa ihora. — Isaia 65:13, 14.
Ia au i to ˈna huru tahito ra, eaha te oraraa a muri aˈe o te haapaoraa? Aita roa ˈtu to te haamoriraa hape; no reira, a faarue atu ia ˈna (Apokalupo 18:4, 5)! E a fariu tia ˈtu i nia i te haapaoraa mau, inaha, e vai mai oia e a muri noa ˈtu.