Te horo noa ra te puaahorofenua maheahea

MA TE faauruahia mai e te Atua, ua ite aˈera te aposetolo Ioane i te pohe e horo ra na nia i te hoê puaahorofenua maheahea e horo vitiviti ra, te taipe no te hoê anotau i reira te mau maˈi pee e tairi ai i te fenua atoa nei (Apokalupo 6:8). Ua riro te parareraa riaria mau o te SIDA ei haapapuraa ino roa ˈˈe e faaite ra e te ora nei tatou i taua anotau ra. Inaha, ua faataa te feia toroa teitei i te pae rapaauraa no te oire no New York i te parareraa o te SIDA e itehia ˈtu i te tau i mua nei mai “te maˈi pee no ananahi”.

I Thaïlande, ua itehia mai te tirotiro o te SIDA i roto e 70 o na 73 mataeinaa o taua fenua ra. I te matahiti 1987, 1 % anaˈe o te feia e rave tamau ra i te raau faataero i Bangkok tei roohia i te SIDA; i te ropuraa o te matahiti 1989, ua hau atu ïa to ratou rahiraa i te 40 %. Te manaˈo nei te fenua Beresilia e e tapao oia e 75000 feia i roohia i te SIDA e 1,5 mirioni feia e tirotiro SIDA to roto ia ratou mai teie atu nei e tae atu e toru matahiti. I nia i na 1200 fare vairaa toto i Beresilia, e 20 % anaˈe tei hiˈopoa i ta ratou pueraa toto i faahereherehia i te matahiti 1988 ra; hau atu, 14 % o te feia i roohia i te SIDA tei peehia i taua maˈi ra na roto i to ratou pâmuraahia i te toto e tirotiro to roto. I Rio de Janeiro e i São Paulo, fatata e 75 % o te feia maˈi hémophiles tei roohia i te SIDA. I Côte d’Ivoire, e tae roa ˈtu i te 10 % o te mau vahine hapu e 10 % o te feia horoa toto, ua roohia ïa ratou i te maˈi SIDA.

I roto i te hoê apooraa no nia i te SIDA tei amui mai i te mau tia no 87 nunaa, ua parau te hoê taata aravihi marite e: “Eita e nehenehe e haavî i te maˈi pee o te HIV [te tirotiro o te SIDA] i te fenua Marite e i roto i te ao nei.” Ia au i te mau tupuraa i manaˈohia no a muri aˈe e te Pu marite no te hiˈopoaraa i te mau maˈi, i te matahiti 1988, hoê mirioni feia Marite te roohia ˈtu i te SIDA, e e rave rahi atu â te vai ra te tirotiro i roto ia ratou. Aita i maoro aˈenei, ua haamaraa-faahou-hia te mau numera i tapaohia mai i te pae no te rahiraa taata tei roto ia ratou te tirotiro. I New York, ua riro te SIDA ei toruraa o te tumu e pohe ai te taata i muri aˈe i te mau maˈi mafatu e te mariri ai taata.

Ua horohia te mau fare vairaa toto i mua i te haavaraa no to ratou horoaraa i te toto ino. E rave rahi o ratou tei faautuahia e aufau i te moni faahoˈi i te taata, teie râ, aita ratou e paruruhia ra i te tahi atu mau hororaa. Ua faaite te paruru o te Taatiraa a te mau fare vairaa toto marite i to ˈna mǎtaˈu i te na ôraa e: “Eaha te tiai maira ia tatou? Aita vau i ite. I roto i te tupuraa ino roa ˈˈe, e faaorehia ïa te mau fare vairaa toto.”

Tera mau ïa te ohipa e tupu, inaha, ua fatata roa te taime i reira te fenua nei e tamâhia ˈi i te SIDA, i te mau fare maˈi, i te maˈi e te pohe. Ua papai atoa o Ioane, tei faataa mai i te hororaa o te puaahorofenua maheahea, i te tǎpǔ a te Atua no nia i te hoê “fenua apî”, te hoê totaiete taata tei tiamâ mai i te maˈi (Apokalupo 21:1-4). Mea ru mau â ia haapao tatou i taua tǎpǔ nei, no te mea, hou teie parau e tupu ai, e horo noâ te puaahorofenua maheahea.