Eaha mau na te oraora-maitai-raa?

E NEHENEHE anei e parau e te fanaˈo nei tatou i te oraora-maitai-raa no te mea noa e aita tatou i pohehia i te maˈi? Inaha, ehia rahiraa taata, ia hiˈohia ratou mea itoito maitai mai te mato ra te huru, o te pohe taue noa râ no te tahi maˈi ite-ore-hia? Te faaite ra te tahi mau faataaraa parau e, i nia i te numera o te feia e pohe nei i te mau matahiti atoa no te hoê maˈi mafatu, no fatata e 20 % o ratou, aita hoê aˈe tapao e faaite ra i to ratou maˈi. Oia mau, te manaˈoraa e mea itoito maitai te hoê taata, e ere ïa te auraa e te fanaˈo ra oia i te oraora-maitai-raa.

Ei hiˈoraa, a hiˈo na i te ohipa i roohia i te hoê taurearea e 22 matahiti, no roto oia i te hoê pǔpǔ hauti i te taoraraa popo i roto i te ete no te hoê haapiiraa tuatoru. Ua faarirohia na hoi oia ei taata taaro oraora maitai, mea maitatai roa to ˈna huru i te pae tino. Teie râ, ua pohe taue noa oia, i te hoê noa po. Ua faaite mai te hiˈopoaraa i ravehia i te tumu o to ˈna poheraa: ua rahi roa te faito raau faataero o ta ˈna i rave. Inaha, mea papu maitai e aita o ˈna i ora i te hoê oraraa mâ.

No reira, mai te huru ra e te titau ra te oraora-maitai-raa hau atu i te oreraa e roohia i te maˈi. Parau mau, e tia ia haapaohia i te tuhaa o te huru o te tupuna e te vahi i reira te hoê taata e ora ˈi, teie râ, i roto i te mau huru tupuraa matauhia, te mea e ohipa rahi mai i nia i to tatou oraora-maitai-raa, peneiaˈe paha, o to tatou ïa huru oraraa. E haamaitai aore ra e faaino te maa o ta tatou e amu e te mea o ta tatou e inu, te tereraa o to tatou oraraa, mea ru anei aore ra eita, te taime faafaaearaa ta tatou e rave, to tatou huru i mua i te mau fifi o te mau mahana atoa, e te tahi atu mau peu, i to tatou oraora-maitai-raa. No reira, i roto i te hoê tuhaa rahi, tei ia tatou tataitahi to tatou maitairaa i te pae tino. E tano atoa teie faaueraa tumu bibilia e na ô ra e “o ta te taata e ueue ra, o ta ˈna â ïa e ooti mai” i roto i teie nei tuhaa. — Galatia 6:7.

To tatou oraora-maitai-raa e to tatou huru oraraa

Ei hiˈoraa, ua ite-maitai-hia e, i roto i te mau pu raveraa ohipa tapone rarahi, te rave nei te feia rave ohipa i te mau taime faaetaetaraa tino puai i te mau mahana atoa. Eaha ïa te mau faahopearaa? Ia au i te vea Asiaweek, “e rave rahi mau haapapuraa e faaite ra e, i rotopu i te feia rave ohipa atoa, o te mau Tapone ïa te feia oraora maitai aˈe”. Teie râ hoi, te faaite ra teie vea e, i te fenua Tapone noâ, “fatata e 25 % o te taata e pohe nei i te mariri ai taata; e 20 % i te mau maˈi mafatu e te mau-taue-raa te tereraa o te roro; hau atu i te 8 % i te mau maˈi o te hutiraa aho. Fatata e 2 % o te mau tane e haapohe nei ia ratou (i ǒ te mau vahine, ua naeahia te faito e 1,4 %)”.

Te patoi ra anei teie mau manaˈo te tahi e te tahi? Aita paha ia hiˈopoa-maitai-hia te mau huru tupuraa. Maoti te faito e 40 % taata paari e puhipuhi nei e 300 miria avaava i te matahiti hoê, ua naeahia i te fenua Tapone te piti o te parahiraa i roto i te ao nei (i muri noa mai i te fenua Heleni) no te rahiraa avaava e puhipuhihia e te taata hoê. Hau atu, te inu nei te mau Tapone i te mau matahiti atoa e 8 miria mohina pia e 1,5 miria litera saké, oia hoi te auraa, fatata hoê afa litera ava anoi-ore-hia i te taata e i te hebedoma hoê. Mea maere roa ïa ahiri e aita hoê aˈe faahopearaa iino i nia i te oraora-maitai-raa o taua mau taata ra, ia hiˈohia ta ratou mau peu.

Parau mau, e nehenehe e parau e mea maoro aˈe te oraraa o te mau Tapone ia faaauhia i te tahi atu nunaa e mea iti aˈe ta ratou faito avaava e puhipuhi nei e te ava ta ratou e inu nei i te tahi atu fenua, teie râ, aita e faufaa to taua mau huru faaauraa ra, no te mea te itehia ra e te pohe nei ratou hou e naeahia ˈi te faito matahiti i matauhia e na ratou iho â te hape. Peneiaˈe paha, ia hiˈohia ratou, mai te huru ra mea maitai aˈe ratou ia vetahi pae, teie râ, e nehenehe anei e parau e te fanaˈo ra ratou i te oraora-maitai-raa?

No reira, te itehia ra e te faahohoˈa ra to tatou oraora-maitai-raa i to tatou huru oraraa e ta tatou mau peu i te mau mahana atoa. Te titau ra te oraora-maitai-raa i te hoê huru oraraa aifaito maitai. E faatupu teie aifaitoraa i te maitairaa i te pae tino, i te pae o te feruriraa, o te mau manaˈo hohonu e te pae totiale, maoti hoi te reira e nehenehe ai te taata e ati maite atu i te mau mea e haaati ra ia ˈna, e oaoa e e mauruuru roa i ta ˈna mau ohipa i te mau mahana atoa. Nafea râ e naeahia ˈi teie faito?

[Parau iti faaôhia i te api 6]

Noa ˈtu e e tia ia haapao i te tuhaa o te huru o te tupuna e te vahi o ta tatou e ora ra, te mea e ohipa rahi roa ˈˈe i nia i to tatou oraora-maitai-raa, peneiaˈe paha, o to tatou ïa huru oraraa.

[Hohoˈa i te api 5]

I te pae no te oraora-maitai-raa, e nehenehe tatou e vare ia haapao noa tatou i te huru rapaeau.