Te peu hiˈo fetia i teie nei mahana

E ere faahou te ohipa hiˈo fetia i te peu na te feia tiaturi haere noa e te feia e vare haere noa. I to tatou nei mahana, te fariihia ra teie peu e te mau huru taata atoa o te totaiete. Nafea ia faataa e, i te anotau o te ite aravihi, e nehenehe teie peu moe e huti i te manaˈo o te taata?

“MAI TE FARE-UOUO [te fare a te peretiteni no te fenua Marite] e tae roa ˈtu i Wall Street, ua tui roa te roo o te peu hiˈo fetia.” Tera ïa te omuaraa parau o te hoê tumu parau no nia i te anaanatae rahi o te taata no te peu hiˈo fetia i te fenua Marite.

A faahitihia ˈi teie parau no nia i te Fare-Uouo, eita e ore e ua haamanaˈo faahou te feia taio i te tahi mau parau a Donald Regan, papai parau tahito a te peretiteni no te fenua Marite. I roto i ta ˈna buka Ei haamanaˈoraa (beretane), teie ta ˈna i papai:

“I te tau a rave ai au i te ohipa i te Fare-Uouo, fatata te taatoaraa o te mau opuaraa aore ra te mau tere faufaa roa a Reagan tane e ta ˈna vahine, o te ore e faaotihia maoti te parau faatia a te hoê vahine no San Francisco o te tatara i te oraraa o te taata, no te haapapu e mea maitai anei te nanairaa o te mau palaneta no te rave i taua mau ohipa ra.”

Eiaha tatou e horoa i te faataaraa no nia i teie ohipa, tera râ, e nehenehe e parau e maoti teie mau haapapuraa i itea ˈi te anaanatae rahi o te taata no te peu hiˈo fetia i roto i te mau fenua no te pae tooa o te râ ma, i reira te parauhia ra hoi e ua faaore roa te ite aravihi o teie nei tau i teie peu. A hiˈo na i teie mau parau:

◼ Ia au i te Taatiraa a te feia hiˈo fetia marite, te vai ra i te fenua Marite fatata e 5 000 feia hiˈo fetia aravihi e hau atu i te 50 000 feia e rave nei i teie peu i te tahi noa taime. Ua taeahia te taatoaraa o te moni i noaa mai i te 35 mirioni dala marite i te matahiti hoê.

◼ “I te mau matahiti atoa (...) hau atu i te hoê ahuru mirioni feia Farani teie e haere nei e hiˈo i te hoê o na toru ahuru tausani feia hiˈo fetia aore ra feia hiˈohiˈo tei tapaohia to ratou iˈoa”, o ta te vea no Versailles ra Toutes les Nouvelles, e faaite ra.

◼ I te fenua Marite, 92 % o te mau vea, oia hoi hau atu i te 1500 mau vea, teie e nenei tamau nei i te hoê tumu parau no nia i te hiˈoraa i te mau fetia. I te Hau Repubilita no Helemani, i to te vea ra Weser Kurier oreraa i nenei i te mau tabula tatararaa i te oraraa, ua taniuniu roa ˈtu te feia taio no te mea “aita ratou i taa faahou e nafea râ, mai te peu e e faaea noa ratou i te fare aore ra e haere anei ratou i rapae, mai te peu e e nehenehe ta ratou e faaohipa i ta ratou moni aore ra eita, e mai te peu noa ˈtu e oia, eaha ïa te mau faufaa e hoo mai”.

◼ Te rahi noa ˈtura te feia hiˈo fetia teie e faaohipa nei i te mau matini roro uira. Ei hiˈoraa, i Helevetia, no te tino moni ra e 210 farane farani, te horoa nei o Astro Intelligence i te hoê tabula e 20 api i papaihia na te hoê matini roro uira. I te fenua Beretane, te faaohipa atoa ra te hoê taata hiˈo fetia tuiroo roa i te ravea o te matini roro uira no te papai hau atu i te 20 000 rahiraa tabula na te taata tataitahi, i te matahiti hoê no te tino moni ra fatata e 100 farane hoê. I roto i te tahi mau oire, mai ia New York, te vai atoa ra te mau pu e faataa nei i te tabula na roto i te niuniu paraparau. Ua tapao te taiete niuniu paraparau no New York i te hoê mirioni taniuniuraa i te avae.

Eaha te tumu o teie anaanatae rahi?

I teie anotau, te faahiti-pinepine-hia nei te parau no te “manuïaraa o te oraraa o te taata”, e no reira ˈtura, e farii-maitai-hia te ravea atoa e manaˈohia ra e nehenehe ta ˈna e haamaramarama mai no nia i te auraa o te oraraa aore ra e horoa mai i te hoê ite maitatai aˈe no nia i te taata iho. No reira, mai ta te hoê taata i parau, mai te peu e mea au roa na te taata te peu hiˈo fetia, no te mea atoa ïa e “te faahiti ra teie peu i te parau no te taata faufaa roa ˈˈe: oia hoi, o oe iho”.

Tera mau râ anei ta te peu hiˈo fetia e rave ra? Hau atu, e mana anei to te mau fetia i nia i to tatou oraraa? E tuatapapa anaˈe na i teie uiraa.

[Hohoˈa api taatoa i te api 20, 21]